Cibalo 3

Sikubamba Mugwagwa Wazyalwa

ELIZABETA ulaafwaafwi kutumbuka. Kwamyezi yotatwe eyi yainda, Mariya wali kukkala anguwe. Pele lino casika ciindi cakuti Mariya alaye akuunka mulweendo lulamfwu kujokela kumunzi ku Nazareta. Mumyezi buyo iili cisambomwi awalo uyoobaa mwana.

Ucizwa buyo Mariya, Elizabeta watumbuka. Caba cintu cikondelezya kaka kutumbuka nokwazwidilila alimwi Elizabeta amwana kabapona buyo kabotu! Elizabeta naatondezya mwanaakwe kuli basimukobonyina abasazinyina, basekelela antoomwe anguwe.

Kweelana a Mulawo wa Leza, kwainda mazuba aali lusele kuzwa buzuba mbwaazyalwa mwana musankwa mu Israyeli weelede kupalulwa. Aciindi eci balongwe abamukowa baboola kuzikuswaya. Balaamba mwana musankwa oyu weelede kuulikwa zina lyausyi, Zakariya. Pele Elizabeta wakaka. “Pe,” mbwaamba, “ulategwa ngu-Johane.” Amuyeeye kuti ndezina mungelo Gabriyeli ndyaakati ndyaelede kupegwa mwana.

Pele balongwe babo batongooka balaamba: “Taakwe musazinyoko uwakaulikidwe zina elyo.” Mpoonya kabatambaika, babuzya usyi zina ndyayanda kuulika mwana. Zakariya walomba cakulembela, caankamika bantu boonse walemba kuti, “Izina lyakwe ngu Johane.”

Mbwaalembela buyo, Zakariya wakonzya kwaambaula alimwi. Mulayeeya kuti wakaleka kwaambaula naatakasyoma mulumbe wamungelo wakuti Elizabeta uyoobaa mwana. Naatalika kwaambaula Zakariya, boonse basimukobonyina bayoowa akulyaambauzya ategwa: “Iniinga uyooba mwana uuli buti oyu?”

Lino Zakariya wazula muuya uusalala watembaula wati: “Akulumbwe Jehova, Leza wa-Israyeli, nkaambo wayeeya bantu bakwe, wabanununa. Watubusizya Mufutuli Singuzu muŋanda ya-Davida muzike wakwe.” Aino oyu “Mufutuli Singuzu” Mwami Jesu uucilangilwa kuzyalwa. Kwiinda mulinguwe, Zakariya waamba kuti, Leza “[uya]kutupa kuti, mbotwaangululwa kumaanza aabasinkondoma, tumukombe cakutayoowa mukusalala amubululami kumbele lyakwe mazuba esu oonse.”

Mpoonya Zakariya wasinsima kujatikizya mwanaakwe Johane ategwa: “Ayebo, omwana, uyootegwa musinsimi wa-Sijulu lyamajulu, nkaambo uyooenda kumbele lya-Mwami kululamika nzila zyakwe, kuzibya bantu bakwe lufutuko mukujatilwa kwazibi zyabo. Nkaambo kamoyo waluzyalo wa-Leza wesu, kulindulo bwatuyeeya bucedo bwakujulu, bukamunikile abakede mumudima amucimvule calufu, bukeenzye matende esu munzila yaluumuno.”

Lino Mariya uucizibidwe kuti mukaintu uutakwetwe wasika kumunzi ku Nazareta. Ncinzi ciyoocitika kulinguwe caakuzibwa buya kuti ulimitide? Luka 1:56-80; Levitiko 12:2, 3.

▪ Mupati buti Johane kuli Jesu?

▪ Nzintu nzi zyacitika Johane naabaa mazuba aali lusele aakuzyalwa?

▪ Ino Leza wabikkila buti maanu kubantu bakwe?

▪ Mulimo nzi wasinsimwa ngwayoocita Johane?

Cibalo 4

Ulimitide Pele Takwetwe

MARIYA uli mumwezi watatu wada lyakwe. Mulayeeya kuti mazuba aakusaanguna aada lyakwe wakali kuyooswaya Elizabeta pele lino wapilukila kumunzi ku Nazareta. Lino-lino bantu boonse bamumunzi mwakkala bayooziba kuti ulimitide. Masimpe ulimuciimo cikatazide!

Icaindila kubija ncakuti Mariya ulitangidwe kuti abe mukaintu waa Josefa mubezi. Alimwi ulizi kuti, mulawo wa Leza kuli Israyeli ngwakuti, nakalindu uutangidwe mwaalumi, nkabela mwaalumi umbi wamujana mumunzi akoona anguwe weelede kujaigwaa mabwe. Ulalipandulula buti da lyakwe kuli Josefa?

Mbwaanga Mariya wakalizwide kwamyezi yotatwe, tulakonzya kusyoma kuti Josefa uliyandide kapati kumubona. Baswaangana antela Mariya ulaamba makani aya kuli nguwe. Ulasoleka mbuli mbwakonzya kupandulula kuti nkwiinda mumuuya uusalala wa Leza ncamitide. Pele mbuli mbomunga mwayeeyela, eci ncintu ciyumu kusyoma kuli Josefa.

Josefa ulizi kuti Mariya ulilemeka kabotu. Alimwi ulamuyanda kapati. Pele, nokuba kuti waamba zyeezyo zyataminina, masimpe kuboneka kuti kuli mwaalumi wakamumisya. Nokuba boobo, Josefa tayandi kuti ajaigwe amabwe naa kumuusya nsoni kubuleya. Elyo wayeeya kuti amuleke kumbali. Mumazubaayo, bantu batangidwe bakali kulangwa mbuli kuti bali kwetwe kale elyo kulekana kwakali kuyandika ikumana kutangwa oko.

Nkabela, Josefa naciyeeya makani aya, woona. Mungelo wa Jehova walibonya kulinguwe muciloto wati: “Utayoowi kulitambwida mwanakazi wako, nkaambo kakuti eco cimitidwe mulinguwe nca-Muuya Uusalala. Nkabela uzootumbuka mwana mulombe ngozooulika izina lya Jesu, nkaambo nguwe uuzoofutula bantu bakwe kuzwa kuzibi zyabo.”

Azikubuke Josefa walumba kapati! Kakunyina akusowa ciindi wacita mbubonya mungelo mbwaalailila. Wamubweza Mariya kuŋanda yakwe. Eyi ntaamu yatolwa caantangalala waba mucado buya ikuzibya kuti Josefa a Mariya lino bakwatana kwiinda mumulawo. Pele Josefa kwiina naaswaangana a Mariya ciindi coonse ncaamitide Jesu.

Amulange! Mariya ulimisi pele Josefa umubikkaa mbongolo. Ino nkuli nkobaya alimwi nkaambo nzi ncobabweza lweendo kakuli Mariya uyanda kutumbuka kale? Luka 1:39-41, 56; Matayo 1:18-25; Deuteronomo 22:23, 24.

▪ Walimvwa buti Josefa naamvwa makani aakumita kwa Mariya, alimwi nkaambo nzi?

▪ Mbuti Josefa mbwakonzya kuleka Mariya kakuli tabana kwatana?

▪ Nintaamu nzi yatolwa caantangalala iyaba mucado wa Josefa a Mariya?