Cibalo 17

Ikuyiisya Nikodemo

KACILI kupobwe lya Kwiindilila lyamu 30 C.E., Jesu wacita zitondezyo zyanguzu naa maleele. Akaambo kaboobo bantu banji bamusyoma. Nikodemo, umwi Wabasinkuta Mpati yaba Juda wakondwa kapati elyo uyanda kwiiya azimbi. Aboobo waboola kuli Jesu ciindi camasiku, antela uyoowa kuti, naa bamubona beendelezi ba Juda inga camujaila zina lyakwe libotu.

Ulaamba: “Rabi, tulizi kuti nduwe mwiiyi uuzwa kuli-Leza, nkaambo takukwe muntu uukonzya kucita malele aya ngocita, Leza atanooli awalo.” Mukwiingula, Jesu waambila Nikodemo kuti, ikutegwa muntu akonzye kunjila mu Bwami bwa Leza, weelede “kuzyalululwa.”

Pele ino muntu inga wazyalululwa buti? Nikodemo wabuzya ategwa: “Sena ulakonzya kunjila lwabili mwida lyabanyina, kuti azyalwe alimwi?”

Peepe, obo tabusi mbocaamba pe kuzyalululwa. Jesu wapandulula ategwa: “Muntu atazyalwa amaanzi a-Muuya, takonzya kunjila mu-Bwami bwa-Leza.” Ciindi Jesu naakabbapatizigwa mpoona muuya uusalala wamusikila, nkokuti wakazyalwa “amaanzi a-Muuya.” Kwiinda mukwaambilizya kwakatobela kuzwa kujulu kwakuti, ‘Ngooyu mwanaangu ngunkondelwa,’ Leza wakaambilizya kuti wabaa mwana wamuuya uujisi bulangizi bwakunjila mu Bwami bwakujulu. Mpoonya ciindi ca Pentekoste yamu 33 C.E., abamwi babbapatizidwe bayootambula muuya uusalala elyo abalo bayoozyalululwa bakabe bana ba Leza munzila yakumuuya.

Pele mulimo wa Mwanaa Leza waalubazu nalimuntunsi mmupati kapati. Jesu waambila Nikodemo kuti: “Mbubonya Musa mbwaakasumpula nzoka munkanda, mbubonya awalo Mwana a-Muntu ulyeelede kuyoosumpulwa, kuti muntu woonse uumusyoma abe abuumi ubutamani.” Inzya, mbubonya abaya bana Israyeli bakalumwa nzoka mbobakeelede kulanga kunzoka yamukuba akupona, abalo bantu boonse beelede kusyoma Mwanaa Leza kutegwa bapone kuzwa kuciimo cabo cakukonzya kufwa.

Kakankaizya mulimo wa Jehova waluyando kumakani aaya, Jesu waambila Nikodemo kuti: “Nkaambo obuya Leza mbwaakayandisya nyika, wakapa Mwanaakwe simuzyalwa alike, kuti umwi umwi uumusyoma atafwidilili, pele abe abuumi ubutamani.” Aboobo mu Jerusalemu myezi iili cisambomwi buyo yainda kuzwa ciindi naakatalika mulimo wakwe, Jesu wacisalazya kuti walo nenzila Jehova Leza njabelesya ikufwutula bantu.

Jesu wayaambele kupanduluda Nikodemo kuti: “Nkaambo Leza taakwe naakatuma Mwanaakwe munyika kuti akiibeteke nyika,” nkokwaamba kuti, ikutali kubeteka cakupa mulandu naa kusinganya, ikwaamba kuti bantu banyonyoonwe. Muciindi caboobo, mbubwena mbwaamba Jesu wakatumwa kuti “nyika ikafutulwe [a]nguwe.”

Nikodemo waboola kayubaila cabuyoofwu mumudima kuli Jesu. Aboobo cilakkomanisya kuti Jesu wamanizya mubandi wakwe anguwe kwiinda mukwaamba kuti: “Eno oku nkubetekwa, kuti mumuni [ngwaakatondezya Jesu mubuumi bwakwe amukuyiisya] wasika ansi, pele bantu bayanda mudima kwiinda mumuni, nkaambo milimo yabo mibi. Nkaambo muntu umwi umwi uucita cibi uluusulide mumuni, tasiki kumumuni kuti ambweni milimo yakwe yatopwa. Pele oyo uucita zyabwini nguuza kumumuni, kuti milimo yakwe iboneke kuti yacitwa muli-Leza.” Johane 2:23–3:21; Matayo 3:16, 17; Incito 2:1-4; Myeelwe 21:9.

▪ Ncinzi caletelezya kuswaya kwa Nikodemo alimwi nkaambo nzi ncasikila masiku?

▪ Ino “kuzyalululwa” caamba nzi?

▪ Ino Jesu uupandulula buti mulimo wakwe mukufwutulwa kwesu?

▪ Ino caamba nzi kuti Jesu taakaboola kuzikubeteka nyika?

Cibalo 18

Johane Uyabucesegwa, Jesu Uyabukomezyegwa

NOLYAMANA pobwe lya Kwiindilila lyamucilimo camu 30 C.E., Jesu abasikwiiya bakwe bazwa mu Jerusalemu. Nokuba boobo teebapilukila kumaanda aabo ku Galilaya pele baunka muminzi ku Judaya nkubabbapatizya. Johane Mubbapatizi wali kucita mulimo oyo kumana kwamwaka lino alimwi ucijisi basikwiiya bayanzana anguwe.

Pesi Jesu tabbapatizi pe walo pele basikwiiya bakwe mbabacita obo kwiinda mukulaililwa. Ilubbapatizyo lwabo lulaa bupandulizi bukonzyanya aloolo lwakacitwaa Johane, ncitondezyo cakweempwa kwazinyonyoono kwaba Juda kucizuminano ca Mulawo wa Leza. Nokuba boobo, ucibusigwa, Jesu walailila basikwiiya bakwe ikucita lubbapatizyo lulaa bupanduluzi bwaandeene. Ilubbapatizyo lwa Bunakristo sunu ncitondezyo cakulyaaba kwamuntu kuti abelekele Jehova Leza.

Nokuba boobo, aciindi eci cakumatalikilo mumulimo wa Jesu, boonse bobile Johane anguwe, nokuba kuti balaandeene mukubeleka kwabo balayiisya akubbapatizya baabo beempwa. Pele basikwiiya ba Johane babaa munyono elyo batalika kutongooka kujatikizya Jesu ategwa: “Rabi, . . . oyo ulabapatizya, abantu boonse balainka kulinguwe.”

Muciindi cakubaa munyono, Johane ulasekelela akaambo kakuzwidilila kwa Jesu alimwi uyanda kuti basikwiiya bakwe abalo basekelele. Wabayeezya kuti: “Anywebo nobeni muli bakamboni bangu mbwendakati, Nsili Kristo oyo, pele kuti, Ndatumwa kumusolwedela.” Mpoonya wabelesya cikozyanyo cibotu ulaamba: “Uujisi bwiinga ngusibwiinga, pele mweenzinyina sibwiinga, uuima akumuswiilila, ulabotelwa kwiindilila nkaambo kajwi lyasibwiinga, nkaambo kaako kukondwa kwangu oku kwazyulila.”

Johane mbwali mweenzinyina wa Sibwiinga, wakasekelela myezi iitandila kucisambomwi musyule ciindi naakatondezya basikwiiya bakwe kuli Jesu. Bamwi akati kabo bakaba basimbunga ya nabwiinga wa Kristo yakujulu yalo iinooli ya Banakristo bananikidwe amuuya. Johane uyanda kuti abalo basikwiiya bakwe mbalaambabo lino baccilile Jesu mbwaanga mulimo wakwe ngwakubamba mugwagwa kutegwa Kristo azwidilile mumulimo wakwe. Mbubwena Johane Mubbapatizi mbwapandulula ategwa: “Walo ulyeelede kukomezegwa, pele mebo ndyeelede kucesegwa.”

Sikwiiya wa Jesu mupya Johane, walo wakali sikwiiya wa Johane Mubbapatizi walemba kujatikizya nkwaakazwa Jesu alimwi amulimo Wakwe mupati mulufwutuko lwabantu ulaamba: “Oyo uuzwa kujulu uli ajulu lyaboonse, . . . Wisi uyanda Mwana, wakamupa zintu zyoonse mujanza lyakwe. Oyo uusyoma Mwana nguuli abuumi ubutamani, pele oyo uutamvwi Mwana takooyoobona buumi, pele bukali bwa-Leza bulikede alinguwe.”

Kakutanainda aciindi kuzwa ciindi Johane Mubbapatizi naali kubandika kucesyegwa kwamulimo wakwe, wajatwa a Mwami Heroda. Heroda wakwata Herodiya, mukamunyina uutegwa Filipo, lino Johane naamwaambila caantangalala kuti taciluleme kucita boobo, Heroda wamubikka muntolongo. Azikwaamvwe Jesu makani aakwaangwa kwa Johane wazwa mu Judaya abasikwiiya bakwe baya ku Galilaya. Johane 3:22–4:3; Incito 19:4; Matayo 28:19; 2 Ba-Korinto 11:2; Marko 1:14; 6:17-20.

▪ Ino lubbapatizyo lucitwa kwiinda mukusololelwa a Jesu katana busigwa lujisi bupanduluzi nzi? Ino ciindi kabusidwe?

▪ Ino Johane watondezya buti kuti basikwiiya bakwe banyina kaambo kakutongookela?

▪ Nkaambo nzi Johane nkaabikkilwa muntolongo?