Cibalo 27

Kwiitwa kwa Matayo

MMBWAAMANA buyo kuponya muntu uuyuminide mubili, Jesu wazwa mu Kapernauma akuya ku Lwizi lwa Galilaya. Alimwi makamu-makamu aabantu baboola kuli nguwe elyo watalika kubayiisya. Mbwayaabweenda, wabona Matayo uutegwa Levi kakkede kucitelelo. Jesu wamutamba ategwa: “Ndicilila.”

Matayo ulalangilwa kuti ulikuzibide kale kuyiisya kwa Jesu mbubwena mbuli bwakali Petro, Andreya, Jakobo alimwi a Johane ciindi nobakaitwa. Alimwi mbubwena mbuli mbabo Matayo wakuzumina kutambwa mpoona-mpoona. Wanyamuka, wasiya mulimo wakwe wabusimutelo akuccilila Jesu.

Mpoona antela ikusekelela kwiitwa kwakwe, Matayo wacita pobwe muŋanda yakwe. Kunze lya Jesu abasikwiiya Bakwe, ibakali balongwe ba Matayo nkobali abalo. Aaba baalumi kanjikanji balasulaikwa abama Judanyina nkaambo babwezelela mitelo yabweendelezi bwabana Roma busulidwe. Kunze lyaboobo kanjikanji babweza mali manji kuzwa kubantu cabumpelenge kwiinda ngobeelede.

Nobamubona Jesu kupobwe antoomwe abantu bali boobu, iba Farisi babuzya basikwiiya bakwe ategwa: “Ino nkaambonzi mufundisi wanu ulalya abasimutelo abasizibi.” Naamvwa mubuzyo oyu, Jesu waingula ba Farisi ategwa: “Teensi baponi bayanda musiliki pe, pele balwazi. Kamuya, mukaiye ncikaamba kapango aka kati, Ncinjanda nduse, teensi cipaizyo pe, nkaambo teensi baluleme mbenzidide kwiita, pele basizibi.”

Kulibonya kuti Matayo waita basimutelo aba kuŋanda yakwe kutegwa baswiilile Jesu akuponesyegwa munzila yakumuuya. Aboobo Jesu wayanzana ambabo kutegwa abagwasye kujana cilongwe cibotu a Leza. Jesu tabasulaiki bali boobu mbuli bucita ba Farisi balibona kululama. Pele akaambo kaluzyalo lwakwe waba mbuli musilisi kulimbabo munzila yakumuuya.

Aboobo ikutondezya lubomba nkwacita Jesu kuli basizibi, takuli kuti ulazizumina zibi zyabo pe, pele nkutondezya luzyalo nkukwenya nkwaakacita kuli baabo baciswa kumubili. Mucikozyanyo, amuyeeye ciindi naakajata sicinsenda caluzyalo akwaamba kuti: “Ndazumina, salazigwa.” Andiswe mbubwena atutondezye lubomba kwiinda mukugwasya bantu bapengede kapati kubagwasya munzila yakumuuya. Matayo 8:3; 9:9-13; Marko 2:13-17; Luka 5:27-32.

▪ Nkuli nkwabede Matayo ciindi naamubona Jesu?

▪ Mmulimo nzi ngwacita Matayo, alimwi nkaambo nzi bantu bali boobu ncobasulaikwa abama Judanyina?

▪ Nkutongooka nzi kucitwa kujatikizya Jesu, alimwi waingula buti?

▪ Nkaambo nzi Jesu ncayanzana abasizibi?

Cibalo 28

Wabuzigwa Makani aa Kuliimya

MWAKA utandila kukkwana kuzwa ciindi Jesu naakali ku pobwe lya Kwiindilila lyamu 30 C.E. Johane Mubbapatizi ulaangidwe kwamyezi iili mbwiibede lino. Nokuba kuti wakali kuyanda kuti basikwiiya bakwe baccilile Kristo, tabali boonse pe bacita obo.

Lino bamwi babasikwiiya ba Johane waangidwe baboola kuli Jesu akumubuzya ategwa: “Ino nkaambonzi tulaliimya kulya kanjikanji, iswe aba-Farisi, pele basikwiiya bako tabaliimyi kulya?” Iba Farisi balaliimya kulya ziindi zyobile ansondo mbuli cilengwa cabukombi bwabo. Alimwi basikwiiya ba Johane batobela cilengwa nciconya. Alimwi ambweni balaliimya akaambo kakulila kwaangwa kwa Johane elyo baide kugambwa ncobatatoleli lubazu basikwiiya ba Jesu mumause aya.

Mukwiingula Jesu wapandulula ategwa: “Sa beenzinyina simusa balakonzya kulila, simusa naacili abo? Azoosika mazuba nibazoonyangwa simusa, elyo bazooliimya kulya.”

Basikwiiya ba Johane beelede kuyeeya kuti Johane lwakwe mwini wakaamba Jesu kuti ngo Sibwiinga naa Simusa. Aboobo mbwaanga Jesu nkwali, Johane takonzyi kucibona kuti cileelela kuliimya mbubwena mbuli basikwiiya ba Jesu. Mpoonya Jesu aakufwa, basikwiiya bakwe bayoolila akuliimya. Pele aakubusigwa akuunka kujulu, banoocinyina kaambo kambi kakuliimya kwamalila.

Mpoonya Jesu wapa zikozyanyo ezi: “Taakwe muntu uusuma cigamba cacisani cipya kucisani cakaindi. Nkaambo cigamba eeco cilamonkola cisani, nkabela cimonko caco cilakomenesya. Nikuba kutila waini munkomo zyazikutu zyakaindi, kuti naa wacita boobo, zikutu zilaanduka, waini ulasoomoka, azyalo nkomo zicinyina mulimo. Tee kayi waini mupya utilwa munkomo mpya.” (BT) Ino ezi zikozyanyo ziswaangene buti akuliimya?

Jesu wakali kugwasya basikwiiya ba Johane Mubbapatizi kuziba kuti kunyina weelede kulangila basikumutobela kuti kabaccilila zilengwa zyakaindi zyaci Juda mbuli cakuliimya. Taakaboola kuzyoobikka cigamba akutola ambele bweende bwabukombi bwakaindi bumanide kale ibwakali kulindila buyo kusoogwa. Ibunakristo teebwakabambilwa kuti bweendelane aci Juda camumazuba ayo anjiisyo zyabantu. Peepe, teebwakali mbuli cigamba cipya acisani cakaindi naa mbuli waini mupya munkomo zyakaindi. Matayo 9:14-17; Marko 2:18-22; Luka 5:33-39; Johane 3:27-29.

▪ Mbaani baliimya, alimwi nkaambo nzi?

▪ Nkaambo nzi basikwiiya ba Jesu ncobataliimyi ciindi nali ambabo, alimwi kuyooleka buti kuyandika kuliimya lino-lino?

▪ Nzikozyanyo nzi zyaamba Jesu, alimwi zyaamba nzi?