Cibalo 29

Ikucita Milimo Mibotu mu Sabata

NCILIMO camu 31 C.E. Myezi misyoonto yainda kuzwa ciindi Jesu naakaambaude a mwanakazi kumukalo ku Samariya ciindi naakainda kuzwa ku Judaya kaya ku Galilaya.

Lino naamana kuyiisya canguzu mu Galilaya yoonse, Jesu waunka alimwi ku Judaya kwalo nkwakambaukila muzikombelo. Ikweelanya makani aambwaa Bbaibbele kujatikizya mulimo wakwe mu Galilaya, aciindi awa masyoonto kapati aambwa kujatikizya mulimo wa Jesu mu Judaya mulweendo olu alimwi amyezi njaakakkala nolyakainda pobwe lya Kwiindilila. Kulibonya kuti mulimo wakwe teewakabota mu Judaya mbuli mbowakabede mu Galilaya.

Kano kaindi Jesu uli mulweendo alimwi kuya kumunzi mupati wamu Judaya, Jerusalemu kupobwe lya Kwiindilila lyamu 31 C.E. Oku kumbali Amulyango Wambelele wamunzi, kuli ziba liitwa kuti Betesda kwalo bantu banji baciswa, boofu alimwi abalema nkobaboola. Basyoma kuti bantu balakonzya kuponesegwa kwiinda mukunjila mumeenda aamuziba omu ciindi naavwundaulwa.

Mubuzuba bwa Sabata, Jesu wabona muntu kuziba walo walikuciswa kwamyaka iili 38. Akaambo kakuziba bulamfwu bwaciindi ncaaciswa muntu, Jesu wabuzya kuti: “Sena uyanda kuponyegwa?”

Waingula Jesu ategwa: “Omwami, nsijisi muntu wakundibika mukaziba, maanzi kaaciselauka, pele nenciya, kwainda kale umbi kumbele lyangu.”

Jesu wamwaambila kuti: “Nyamuka, bweza bulo bwako, uende.” Ndilyona, muntu oyo wapona, wabweza bulo bwakwe weenda!

Pele nobamubona muntu oyo bama Juda balaamba: “Mbuzuba bwa-Sabata, taceelede kuti ubweze bulo bwako.”

Imwaalumi wabaingula kuti: “Oyo uwandiponya ngowandyaambila kuti, Bweza bulo bwako, uende.”

Babuzya ategwa: “Nguni oyo muntu uwakwaambila kuti, Bweza bulo bwako, uende?” Jesu ulizwide awo nkaambo kabantu banji alimwi oyu wakaponesyegwa taakalizi zina lya Jesu pe. Nokuba boobo, kucimana buyo kaindi, Jesu baswaangana amuntu oyo mutempele elyo muntu wamuziba wakamuponya.

Aboobo muntu oyo wakaponesyegwa waunka kuyooambila ba Juda kuti ngu Jesu wakamuponya. Bacimvwa buyo boobu, bama Juda baunka kuli Jesu. Ikuyoocita nzi? Sena nkuyakuziba naa ubelesya nzi kucita milimo eyo mibotu? Peepe. Pele nkuyakumujanina mulandu nkaambo ucita milimo eyi mibotu mubuzuba bwa Sabata. Elyo batalika akumupenzya! Luka 4:44; Johane 5:1-16.

▪ Kwainda ciindi cilamfwu buti kuzwa ciindi Jesu naakaswaide mu Judaya?

▪ Nkaambo nzi ciziba ciitwa kuti Betesda ncocizibidwe kapati?

▪ Maleele nzi Jesu ngaacita kuciziba alimwi bama Juda balimvwa buti?

Cibalo 30

Ikwiingula Basikumutamikizya

CIINDI basololi bacikombelo caba Juda nobamutamikizya kutyola mulawo wa Sabata, Jesu wabaingula kuti: “Mbubonya Taata mbwacibeleka ambuli sunu, amebo ncembeleka.”

Nokuba kuti baamba boobu ba Farisi, imulimo wa Jesu tauli ngoukasyigwaa mulawo wa Sabata. Imulimo wakwe wakukambauka akuponya mmulimo kuzwa kuli Leza alimwi ikwiiya cikozyanyo ca Leza, wazumanana kuucita abuzuba. Nokuba boobo kwiingula kwakwe kwapa kuti ba Juda baindile buya kunyema kwiinda mbubabede aboobo basola kujana nzila yakumujaya. Nkaambo nzi?

Nkaambo kakuti lino tabasyomi buyo kuti Jesu watyola mulawo wa Sabata pele baamba kuti kulyaamba kwakwe kuti Mwanaa Leza mwini nkusampaula Leza. Nokuba boobo Jesu tayoowede pe elyo wazumanana kwiingula kujatikizya kuyanzana kwakwe kubotu a Leza. Ulaamba: “Wisi ulamuyanda Mwana, wamutondezya zintu zyoonse nzyacita mwini.”

Jesu wazumanana kuti: “Mbubonya Wisi mbwabusya bafwide akubapa buumi, mbubonya awalo Mwana ulapa buumi abo mbayanda.” Masimpe Mwana ubusya kale bafwide munzila yakumuuya! Jesu ulaamba: “Oyo uumvwa ijwi lyangu, akumusyoma uwakandituma, . . . wakazwa kukufwa, waya kubuumi.” Inzya, wazumanana ategwa: “Ciindi cilasika, ncencico cino, abafwide nobayoomvwa ijwi lya-Mwana a-Leza, abalo abalimvwa bayoopona.”

Nokuba kuti kunyina makani aamba kuti Jesu wakabusya kale muntu kuzwa kubafwu, waambila basikumutamikizya kuti kubusigwa kwabantu kuzwa kubafwu kuyoocitika. Ulaamba: “Mutagambwi aliyeeyi nkani, nkaambo ciindi ciyoosika ncobati kamvwe ijwi lyakwe boonse abali muzyuumbwe, bayoozwa mpoonya.”

Ikusika aciindi awa, Jesu taakwe naakaupandulude caantangalala boobu mulimo wakwe mupati mumakanze aa Leza. Pele basikutamikizya Jesu balizi kwiinda abumboni bwakwe mwini kujatikizya zintu ezi. Jesu wabayeezya kuti: “Mwakatuma kuli-Johane, awalo wakaba kamboni wabwini.”

Imyaka yobile buyo yainda, Johane Mubbapatizi wakabaambila basololi babukombi bwaci Juda kujatikizya Yooyo wakali kuboola musyule lyakwe. Ikubayeezya mbubakali kumulemeka cimwi ciindi Johane mwaange lino, Jesu ulaamba: “Anywebo mwali kuyanda kubotelwa mumumuni wakwe kaindi kaniini.” Jesu wabayeezya zyeezyi kasyoma kuti ulabagwasya, inzya, ikubafwutula. Pele tasyomi buyo bumboni bwaa Johane.

“Njenjiyo njencita [kubikkilizya amaleele ngaazwaa kucita] njiindilungulula kuti Taata ngowakandituma.” Pele kunze lyaboobo Jesu wazumanana ategwa: “Taata uwakandituma wandilungulula.” Mucikozyanyo, Leza wakamulungulula Jesu aciindi cakubbapatizigwa kwakwe naakati: “Ngooyu mwanaangu uuyandika ngunkondelwa.”

Masimpe, basikutamikizya Jesu tabajisi kaambo ncobamukakila. Ngaona Magwalo ngobataminina kuti balalingula alaamba zyanguwe! Jesu wamanizya akwaamba kuti: “Nemwalizumide Musa, nemwandizumina amebo, nkaambo wakalemba ndime. Pele mwatazumina makani ayo ngaakalemba, mulazumina buti majwi aangu?” Johane 5:17-47; 1:19-27; Matayo 3:17.

▪ Nkaambo nzi mulimo ngwacita Jesu ncokutali kutyola mulawo wa Sabata?

▪ Ino Jesu uupandulula buti mulimo wakwe mupati mumakanze aa Leza?

▪ Ikusinizya kuti Mwanaa Leza, mbumboni bwani mbwabelesya Jesu?