Cibalo 31

Kupulula Maila Mubuzuba bwa Sabata

NDILYONA Jesu abasikwiiya bakwe bazwa mu Jerusalemu akupilukila ku Galilaya. Ncilimo elyo mumyuunda kuli maila kumakuba. Basikwiiya bafwa nzala. Aboobo batalika kupulula maila balalya. Pele akaambo kakuti muubuzuba bwa Sabata, micito yabo yabonwa.

Basololi bacikombelo bamu Jerusalemu bakali mukanzide kale kumujaya Jesu kakutegwa utyola mulawo wa Sabata. Lino ba Farisi bamupa mulandu. Batongooka balaamba: “Langa, basikwiiya bako balacita citondwa mubuzuba bwa-Sabata.”

Iba Farisi baamba kuti kupulula maila akwaapuka mumaanza kutegwa aligwe nkutebula akupupulula. Pele ibupanduluzi bwabo bwamulimo bwapa kuti buzuba bwa Sabata ube mukuli mupati kakuli bwakabambilwa kuti kacili ciindi cakukondwa, icakuyakwa munzila yakumuuya. Aboobo Jesu waingula kwiinda muzikozyanyo zyamu Magwalo kuti atondezye kuti Jehova Leza tanaakakanzide kuti uyumizigwe boobu cakuzwa munzila mulawo Wakwe wa Sabata.

Jesu ulaamba, ciindi Davida abantu bakwe nobakafwa nzala bakaleya aŋanda ya Leza akulya cinkwa cacituulo. Cinkwa eco cakalizwisidwe kale kubusyu bwa Jehova alimwi kwakalibikkidwe cimbi abusena bwaco alimwi cakali buyo cabapaizi kuti balye. Pele kweelana aciimo ncaakalimumo Davida abaalumi bakwe taakwe nobakasinganizigwa pe akaambo kakulya.

Kapa cikozyanyo cimbi Jesu ulaamba: “Tamubalide mu-Mulao kuti mumazuba aa-Sabata bapaizi bali muntepele balasotoka Sabata, nekubaboobo tabajisi mulandu.” Inzya, nomuba mu Sabata ibapaizi balajaya banyama akucita milimo imbi kutempele nobalibambila zipaizyo zyabanyama! Jesu ulaamba: “Ndamwaambila kuti, Ano mpali umwi mupati kwiinda intempele.”

Kalailila ba Farisi, Jesu wazumanana ategwa: “Kuti nimwakalizi mbukaamba kapango aka kati, Ncinjanda nduse, teensi cipaizyo pe, nimwatakulengelela batakwe mulandu.” Mpoonya wamanizya akwaamba kuti: “Nkaambo Mwana a-Muntu ngumwami wa-Sabata.” Ino Jesu upandulula nzi naamba boobo? Jesu waamba bulelo bwakwe bwaluumuno mu Bwami kwacuulu camyaka.

Kwamyaka iili 6,000 lino, bantu balikupenga kubuzike bwa Sataani Diabolosi antoomwe akulwana ankondo zyabuzubaa buzuba. Munzila imwi buzuba bwabulelo bupati bwa Sabata bwa Kristo ciyooba ciindi cakulyookezya kuzwa kumapenzi oonse akudyaamininwa. Matayo 12:1-8; Levitiko 24:5-9; 1 Samuele 21:1-6; Myeelwe 28:9; Hosea 6:6.

▪ Mmulandu nzi ngobapegwa basikwiiya ba Jesu alimwi Jesu waingula buti?

▪ Nkwaalilwa nzi kwaba Farisi nkwaatondezya Jesu?

▪ Muunzila nzi Jesu mwali “mwami wa-Sabata”?

Cibalo 32

Ncinzi Ciluleme Kucita Mubuzuba bwa Sabata?

MUUBUZUBA bwa Sabata bumbi Jesu naaswaya cikombelo cili munsi-munsi a Lwizi lwa Galilaya. Oko kuli muntu uupuutide janza lyalulyo. Ibalembi aba Farisi balalangilila kutegwa babone naa Jesu ulamuponya. Mpoonya babuzya balaamba: “Sa kuliluleme kuponya mu-Sabata?”

Basololi bacikombelo caba Juda basyoma kuti kuponya kuliluleme mu Sabata lyalikke buyo ciindi buumi nobuli muntenda. Mucikozyanyo, bayiisya kuti mu Sabata takuleleme kululamika fwuwa lyapinduka naa kubikka cibbandeji muntu naa wafuyuka. Aboobo balembi aba Farisi babuzya Jesu kutegwa bamujanine kaambo.

Nokuba boobo, Jesu ulikuzi kuyeeya kwabo. Alimwi waziba kuti muzeezo wabo wakubona nokucitwa milimo iikasigwa amulawo wa Sabata ulaciindizya, alimwi taweendelani amagwalo. Aboobo Jesu wabusya kaambo kalo nkatibasinse loko cakaanzambwene kwiinda mukwaambila muntu oyo uulaa janza lipuutide ategwa: “Nyampuka awo akati.”

Lino kaambila balembi aba Farisi Jesu ulaamba: “Nguli muntu akati kanu uujisi imbelele yomwe, kuti yawida mumulindi mubuzuba bwa-Sabata, sa takooijata kuti aigwisye?” Mbwaanga mbelele ndubono tabakonzyi kwiisiya mumulindi kusika buzuba butobela cakuti iciswe buya ambweni akubaluzisya. Kunze lyaboobo Magwalo aamba kuti: “Muntu uululeme ulalela kabotu banyama bakwe.”

Mukukozyanisya twaambo Jesu wazumanana ategwa: “Pele muntu ulayandika loko kwiinda imbelele. Nkaambo kaako kuliluleme kucita kabotu mumazuba aa-Sabata.” Ibasololi bacikombelo baalilwa kukazya muzeezo oyu uululeme alimwi waluzyalo elyo baide kuumuna.

Kakalede kapati alimwi katyompedwe akaambo kabufwubafwuba bwabo Jesu wacebauka kubalanga. Mpoonya waambila mwaalumi ategwa: “Vungulula ijanza lyako.” Elyo walivungulula aboobo janza lyapona.

Muciindi cakukkomana kuti janza lyamuntu oyo lyapona, iba Farisi bazwa anze akuyoomvwana ankamu ya Heroda kuti bajaye Jesu. Eyi nkamu yatwaambo twacisi ilabikkilizya abakombi abamwi bacikombelo caba Saduki. Kanjikanji, eyi nkamu yatwaambo twacisi ilakazyanya kapati aba Farisi, pele balikamantene camaanza obile kukukazya Jesu. Matayo 12:9-14; Marko 3:1-6; Luka 6:6-11; Tusimpi 12:10; Kulonga 20:8-10.

▪ Muuciimo nzi Jesu mwaabasinsa cakaanzambwene basololi bacikombelo baci Juda?

▪ Basyoma buti basololi baci Juda kujatikizya kuponya mubuzuba bwa Sabata?

▪ Ncikozyanyo nzi ncaabelesya Jesu ikukazya mizeezo yabo iilubide?