aambi. Mucikozyanyo, amulange-lange cakalemba Matayo. Ikujatikizya mamanino aabukkale oobu, wakazubulula Jesu kuti wakati: “Pele taakwe muntu naba umwi uuzi buzuba obo nanka ciindi, nibaba baangelo bakujulu naba Mwana, pele Taata luzutu nguuzi.” (Matayo 24:36) Ino majwi aaya asinizya buti kuti Jesu tali Leza Singuzuzyoonse?

Jesu waamba kuti Bausyi bazyi zinji kwiinda Mwana. Pele ikuti Jesu naakali cibeela ca Leza Singuzuzyoonse, naakazyi twaambo ntoonya twakazyi Bausyi. Aboobo Imwana alimwi a Bausyi tabakonzyi kuba bantu beelene pe. Pele bamwi balakonzya kwaamba kuti: ‘Jesu wakapona muziimo zyobile. Aawa ulaamba kali muntunsi.’ Pele nokuba kuti cakali boobo, ino mbuti kujatikizya muuya uusalala? Ikuti nowali cibeela ca Leza waambwa kuti ngu Taata, ino nkaambo nzi Jesu ncaataamba kuti muuya ulizyi nzyobazyi Bausyi?

Mbomuzumanana kwiiya Bbaibbele, mulazizyiba kabotu zibalo zimbi zinji zyamu Bbaibbele izipandulula makani aaya. Zisinizya njiisyo zyakasimpe kujatikizya Taata, Mwana alimwi amuuya uusalala.—Intembauzyo 90:2; Incito 7:55; Ba-Kolose 1:15.

ICIINGANO cilayandwa akulemekwa kapati atuulunzuma twabantu. Ibbuku litegwa The Encyclopædia Britannica lyaamba ciingano kuti “ncitondezyo ciyandika kapati kwiinda zyoonse cabukombi bwa Bunakristo.” Nokuba boobo, Banakristo bakasimpe tababelesyi ciingano mubukombi. Ino nkaambo nzi ncobatacibelesyi?

Ikaambo kapati nkakuti Jesu Kristo tanaakafwida aciingano pe. Ibbala lya Cigiliki lisandululwa kuti “ciingano” ngu stau·rosʹ. Mubwini lyaamba “citanda naa cisamu ciimvwi.” Ibbaibbele litegwa The Companion Bible cakusalazya lyaamba kuti: “[Stau·rosʹ] kunyina nolyaamba zisamu zyobile ziinganizyidwe munzila iili yoonse . . . Kunyina cilembedwe mu Cigiliki camu [Cizuminano Cipya] icitondezya naaceya kuti kwaambwa zisamu zyobile.”

Mumagwalo manji, basikulemba Bbaibbele babelesya bbala limbi kujatikizya cakabelesyegwa naakafwa Jesu. Ndibbala lya Cigiliki lyakuti xyʹlon. (Incito 5:30; 10:39; 13:29; Ba-Galatiya 3:13; 1 Petro 2:24) Ibbala eeli lyaamba buyo “cisamu” naa “ikasamu, kasako naa musamu.”

Kalipandulula ncokwakali kubelesyegwa cisamu buyo bunji bwaziindi nokwakali kujaigwa bantu, ibbuku litegwa Das Kreuz und die Kreuzigung (Iciingano Akukankaminwa Aciingano) ilyakalembwa a Hermann Fulda lyaamba kuti: “Imasamu tanaakali kujanika lyoonse kumasena akali kusalwa kujailwa muntu abuleya. Aboobo icisamu buyo cakali kusimpwa mucilindi. Acisamu eeci, ibantu bakali kusinganizyigwa bakali kwaangwa naa kukankaminwa maanza mujulu alimwi azyalo zituta zyakali kwaangwa naa kukankaminwa ansi.”

Pele ibumboni buzula kwiinda boonse bujanwa mu Bbaibbele. Imwaapostolo Paulo waamba kuti: “Lino Kristo wakatunununa kuzwa kulutuko lwa-Mulao, ikuti walo mwini wakaba lutuko nkaambo kesu, nkaambo kulilembedwe kuti, Uli alutuko umwi aumwi uuangilidwe kumusamu.” (Ba-Galatiya 3:13) Aawa Paulo uzubulula Deuteronomo 21:22, 23, kwalo cakusalazya ikwaambwa cisamu kutali ciingano. Mbwaanga inzila yakujaya muntu eeyo yakapa kuti muntu abe “lutuko,” inga tiiceelela pe ku Banakristo ikubotezya maanda aabo azikozyanyo zya Kristo uukankamidwe.

Mumyaka yakusaanguna iili 300 kuzwa ciindi naakafwa Kristo, kunyina bumboni butondezya kuti aabo bakali kulyaamba kuti bakali Banakristo bakacibelesya ciingano mubukombi. Pele mumwaanda wamyaka wane, Mwami Constantine watakamuzyi Leza wakasanduka kuba umwi wa Bunakristo bwakazangide akupa muzeezo wakuti ciingano kacibelesyegwa kacili citondezyo cambubo. Kufwumbwa naa Constantine wakajisi makanze nzi, iciingano kunyina mbocakaswaangene a Jesu Kristo. Mubwini, iciingano cakatalisyigwa abantu batamuzyi naaceya Leza. Ibbuku litegwa New Catholic Encyclopedia lilazuminizya kuti: “Ikubelesyegwa kwaciingano kulajanwa muzilengwa zyabantu Bunakristo kabutanatalika alimwi kabuliko kale.” Imabbuku aambi manji aswaanganya kubelesyegwa kwaciingano kukukomba zilengwaleza alimwi akuzilengwa zyakoonana zyabantu batamuzyi Leza.

Aboobo ino nkaambo nzi citondezyo eeci cabantu batamuzyi Leza ncocakali kubelesyegwa? Kulangilwa kuti nkutegwa cuube-ube kubantu batamuzyi Leza kuzumina ceeco cakali kutegwa Mbunakristo. Pele kulemeka citondezyo cili coonse cabantu batamuzyi Leza kulakasyigwa cakutainda mumbali mu Bbaibbele. (2 Ba-Korinto 6:14-18) Alimwi Magwalo alakasya kukomba mituni kuli koonse. (Kulonga 20:4, 5; 1 Ba-Korinto 10:14) Aboobo Banakristo bakasimpe bajisi twaambo tubotu ncobatabelesyi ciingano mubukombi.a

BANAKRISTO balaililwa kucita Ciibalusyo calufwu lwa Kristo. Icilengwa eeci alimwi ciitwa kuti “Mulalilo wa-Mwami.” (1 Ba-Korinto 11:20) Ino ncinzi cipa kuti kauyandika kapati? Ndiilili alimwi mbuti mboweelede kucitwa?

Jesu Kristo wakatalisya cilengwa eeci imasiku mubuzuba bwapobwe lyaba Juda lya Kwiindilila mu 33 C.E. Ipobwe lya Kwiindilila lyakali pobwe lyakali kucitwa ciindi comwe buyo amwaka, mubuzuba bwa 14 bwamwezi waba Juda uutegwa Nisani. Ikutegwa bazyibe buzuba oobo, kulangilwa kuti ba Juda bakali kulindila buzuba ciindi cakumatalikilo kwamupeyo eelyo ibuzuba abusiku nobulampa mawoola aasika ku 12. Imwezi mupya wakusaanguna wakalibonya afwaafwi abuzuba oobo ngaakali matalikilo aamwezi wa Nisani. Ipobwe lya Kwiindilila lyakacitwa nolyabbila izuba nokwakainda mazuba aali 14 kuzwa leelyo.

Jesu wakasekelela pobwe lya Kwiindilila abaapostolo bakwe, wakagusya Judase Iskariote, amane wakatalisya Mulalilo wa Mwami. Mulalilo nguwakanjila mubusena bwapobwe