Cibalo 51

Ibujayi Kupobwe Lyabuzuba Bwakuzyalwa

NAAMANA kupa malailile kubaapostolo bakwe, Jesu wabatuma mumunzi bobile-bobile. Ambweni banabunyina ba Petro aa Andreya baunka antoomwe, abalo ba Jakobo a Johane mbubonya, Filipo a Bartolomayo, Tomaso a Matayo, Jakobo a Tadayo mpoonya Simoni a Judasi Iskariote. Itubunga tuli cisambomwi otu twabasikukambauka twaambilizya makani mabotu aa Bwami akucita maleele aakuponya koonse-koonse nkobaunka.

Aciindi awa Johane Mubbapatizi ucili muntolongo. Wakkala omu kwamyaka iitandila kwiibili lino. Mulayeeya kuti Johane wakaamba caantangalala kuti teecakaluzi pe kuti Heroda Antipa akwate Herodiya mukamunyina uutegwa Filipo. Mbwaanga Heroda Antipa wakali kutaminina kutobela Mulawo wa Musa, Johane wakacibikka aatuba ciimo cakwe cabumambe. Aboobo Heroda wakabikka Johane muntolongo ambweni kwiinda mukusinikizigwa a Herodiya.

Heroda Antipa ulizi kuti Johane mmuntu uululeme alimwi ulamuswiilila cakukkomana. Aboobo tazyi cakumucita. Kulubazu lumwi Herodiya ulimusulide Johane alimwi uluujisi kuyandaula nzila yakuti ajaigwe. Limwi ciindi ncaali kulangila calibonya.

Kakuceede mazuba masyoonto kuti busike buzuba bwapobwe lya Kwiindilila lyamu 32 C.E., Heroda wabamba pobwe lipati lyakusekelela buzuba bwakwe bwakuzyalwa. Ibaliko kupobwe eli kuli babelesi boonse balupati-pati ba Heroda alimwi abasilumamba antoomwe ankumekume zyamu Galilaya. Kumangolezya, Salome imwana musimbi wa Herodiya ngwaakazyala kuli Filipo wakali mulumaakwe, waambilwa kuti azyanine beenzu. Aba baalumi bakankamana kapati anzyanino yakwe.

Heroda wamukkomanina kapati Salome. Ulaamba: “Ndikumbila coonse ncoyanda, ndakupa.” Mane wakonka akukonka ategwa: “Coonse ncoti ndikumbile ndakupa ncico, niciba cibeela cabwami bwangu.”

Katanaingula, Salome wazwa kuyoobuzya banyina. Wabuzya ategwa: “Ino nkakumbilenzi?”

Nceeci coolwe limwi! Herodiya waingula kakunyina akusowa ciindi ategwa: “Mutwe wa Johane Mubapatizi.”

Ndilyonya Salome wapiluka kuli Heroda akwaamba kuti: “Ndayanda kuti undipe ndilyonya lino mutwe wa-Johane Mubapatizi mumutiba.”

Heroda wausa kapati. Pele akaambo kakuti beenzu bakumvwa kukonka kwakwe, wabaansoni kuti akake kucita obo nokuba kuti eci caamba kujaya muntu uunyina mulandu. Ndilyonya sikumujaya watumwa kuntolongo amalailile aayoosya ngaapegwa. Kaindi kaniini wajoka amutwe wa Johane mumutiba mpoonya wamupa Salome. Mpoonya walo watola kuli banyina. Bazikumvwe cacitika basikwiiya ba Johane, baboola kuzyoobweza mutumba akuyoouzikka mpoonya baatola makani kuli Jesu.

Ucimvwa Heroda kuti Jesu uponya bantu akutanda badaimona, wayoowa kapati kayeeya kuti Jesu ngu Johane wabuka kuzwa kubafwu. Aboobo ulayandisya kubona Jesu, ikutali kuti akamvwe mbwakambauka pele nkuyoobona naa ncayoowa ncencico cicitika naa pe. Matayo 10:1-5; 11:1; 14:1-12; Marko 6:14-29; Luka 9:7-9.

▪ Nkaambo nzi Johane ncali muntolongo, alimwi ncinzi ncatayandili kumujaya Heroda?

▪ Wacijana buti coolwe limwi Herodiya cakuti Johane ajayigwe?

▪ Nolwainda lufwu lwa Johane nkaambo nzi Heroda nkayandila kubona Jesu?

Cibalo Cibalo 52

Jesu Wasanina Zyuulu Zyabantu Camaleele

IBAAPOSTOLO bali 12 balukkomanina lweendo lwakukambauka mu Galilaya moonse. Lino ciindi buyo cisyoonto kuzwa ciindi naajaigwa Johane, bapilukila kuli Jesu akwaamba zintu zibotu nzyobacita. Naabona kuti balikatede alimwi kuli bantu banji baboola akwiinka cakuti tabajisi aciindi cakulya, Jesu ulaamba: ‘Atweende kubusena nkotuyooba tolikke tukalyookezye asyoonto.’

Nobanjila mubwato, ambweni munsi-munsi aaku Kapernauma bagama kubusena butantamukide kujwe aa Jordano kwiindilila ku Betsaida. Nokuba boobo bantu banji bababona nobanyamuka alimwi bambi baamvwa makani. Boonse aba bazuza kumbele kuccilizya nkomwe elyo bwato nobwasika nkujana bantu babacinga.

Naazwa mubwato Jesu wabona makamu-makamu aaya aabantu elyo wabafwida luzyalo nkaambo bali mbuli mbelele zitakwe mweembezi. Aboobo wabaponya balwazi babo akutalika kubayiisya zintu zinji.

Iciindi ceenda kufwambaana elyo basikwiiya ba Jesu baboola kulinguwe akwaamba kuti: “Okuno nkusokwe buyo, alimwi izuba lyaya ambo. Bamwaisye kuti banjile mumyuunda amuminzi iiengelede, bakalyuulile zyakulya.”

Nokuba boobo mukwiingula Jesu ulaamba: “Amubape zyakulya nywebo.” Mpoonya, akaambo kakuti Jesu ulizi kale ncaticite, wasunka Filipo kwiinda mukumubuzya kuti: “Nkukuli nkotuti kaule mikamu kuti balye aba?”

Kweelana ambwazilanga Filipo zintu, zilikatazide. Kuli baalumi batandila ku 5,000, alimwi ambweni bantu balakonzya kwiinda ku 10,000 kubikkilizya banakazi abana! Filipo waingula ategwa “mikamu niiulwa mpondo [mpondo akali mali aakali kubelekelwa abuzuba] zili musanu muzibili tiikoobazyulizya, kuti, umwi umwi atole kaniini buyo.”

Ambweni kutondezya mbocitakonzyeki kusanina bantu banji boobu, Andreya walisungula ulaamba: “Mpokali kalombe akajisi mikamu yosanwe yabbaale answi zyobile, ino alyalo mpaanzi kubantu banjibanji bali bobuya?”

Mbwaanga ncilimo ciindi cisyoonto cisyeede kalitana pobwe lya Kwiindilila lyamu 32 C.E., kuli mweemvwe munji kapati. Aboobo Jesu waambila basikwiiya bakwe kuti baambile bantu kuti bakkale mubwizu mutubunga twabantu bali 50 atwabantu bali 100. Wabweza mikamu yosanwe atuswi tobile, walanga kujulu akulumba. Mpoonya watalika kukomoona mikamu answi. Wapa basikwiiya bakwe mpoonya balo baabanya bantu. Cikankamanisya ncakuti, ibantu boonse balya mane balilekela buya!

Mpoonya Jesu waambila basikwiiya bakwe kuti: “Amubweze bufwefwelenga ubwasyaala, kuti kutasweeki cintu.” Nobacita obo, bazuzya zisuwo zili kkumi azibili zyabufwefwelenga bwasyaala bwazinkwa answi! Matayo 14:13-21; Marko 6:30-44; Luka 9:10-17; Johane 6:1-13.

▪ Nkaambo nzi Jesu ncayandauda busena bwakuti babe balikke baapostolo bakwe?

▪ Nkuli nkwaabatola basikwiiya bakwe Jesu, alimwi nkaambo nzi kulyookezya kwabo ncokwatakonzyeka?

▪ Nokwaba kumazuba ncinzi ncobaamba basikwiiya, pele Jesu wabalanganya buti bantu?