Cibalo 53

Imuleli Uyandika Wiinda Bantunsi

ICIINDI Jesu naasanina zyuulu zyabantu camaleele, boonse bagambwa. Balaamba: “Ncobeni oyu ngomusinsimi uuelede kusika ansi.” Tabaambi buyo kuti Jesu weelede kuti kali musinsimi oyu mupati kwiinda Musa pele akuti ulakonzya kuba muleli uuyandika kapati. Aboobo bakanza kumujata kuti bamubikke abe mwami.

Nokuba boobo Jesu wacizyiba ncobakanza bantu. Elyo wazwa cakufwambaana kutegwa batamujati cakumusungilizya. Wamwaisya makamu aabantu akwaambila basikwiiya kuti banjile mubwato akupilukila kugama ku Kapernauma. Mpoonya waunka kucilundu kuyookomba. Jesu uli alikke busiku boonse obo.

Kubucedo, Jesu walanga kuzwa abusena obo bwaatala elyo wabona mayuwe nkwaayuuntana alwizi akaambo kaguwo libbubbula. Kakutuba kapati akaambo kamwezi, mbwaanga mmuunsi-munsi abuzuba bwapobwe lya Kwiindilila, Jesu wabona bwato bujisi basikwiiya bakwe kabuyuuntana kweenda mumayuwe. Ibaalumi bakwasula anguzu zyabo zyoonse.

Naabona boobu Jesu, waselemuka kuzwa amulundu akutalika kweenda kugama kubwato atalaa mayuwe. Ibwato bweendede kale makkilomita aatandila kumusanu ciindi Jesu naasika kulimbubo. Nokuba boobo wazumanana mbuli kuti uyanda kwiindilila. Nobamubona basikwiiya bakwe bakankamana bati: “Musangu!”

Jesu waingula cakuumbulizya ategwa: “Ndime. Mutayoowi.”

Pele Petro ulaamba: “Mwami, kuti nduwe, ndilailila kuti mboole kulinduwe atala amaanzi.”

Jesu waingula ategwa: “Boola.”

Nkabela, Petro wasotoka kuzwa mubwato weenda atala amaanzi kuya kuli Jesu. Pele naabona mayuwe, Petro wayoowa akutalika kubbila, woongolola wati: “Mwami, ndivuna.”

Mpoonya-mpoonya, Jesu watambika janza lyakwe, wamujata, wamwaambila kuti: “Webo nusilusyomoluniini, ino nkaambonzi wadoneeka?”

Petro a Jesu nobanjila mubwato luwo lwaleka, elyo basikwiiya bagambwa. Pele sena baleelede kugambwa? Ikuti nobamvwisisya “makani aamikamu” kwiinda mukulumba maleele mapati Jesu ngaacita mawoola masyoonto ainda ciindi naasanina zyuulu zyabantu amikamu yosanwe alimwi atuswi tobile buyo, nocatabagambya boobu pe kuti wakonzya kweenda atala aamaanzi akulesya luwo. Nokuba boobo, lino basikwiiya bavwundama kuli Jesu balaamba: “Ncobeni nduwe Mwana a-Leza.”

Muciindi buyo cisyoonto basika ku Genesarete, icibanda cibotu cili munsi-munsi aaku Kapernauma. Awa babwaangilila bwato. Pele nobaunka kunkomwe, bantu bamuziba Jesu elyo baunka muminzi yeengelede kuyabubweza balwazi. Nobabaleta aba amalo abo akuguma buyo moombe wacisani ca Jesu, baponesyegwa.

Aciindi awa makamu aabantu aabona kusaninwa kwazyuulu camaleele aziba kuti Jesu waunka. Aboobo mato masyoonto-syoonto aazwa ku Tiberiya naasika, banjila akuunka ku Kapernauma kuyakuyandaula Jesu. Nobamujana bamubuzya ategwa: “Rabi, wakeza lili kuno?” Jesu wabasinsa mbuli mbotutibone lino-lino. Johane 6:14-25; Matayo 14:22-36; Marko 6:45-56.

▪ Jesu naamana kusanina zyuulu zyabantu camaleele, ncinzi ncobayanda kumucita bantu?

▪ Ncinzi ncaabona Jesu kuzwa kumulundu oko nkwaaunkide alikke, elyo wacita nzi amane?

▪ Nkaambo nzi basikwiiya ncobateelede kugambwa boobu azintu ezi?

▪ Ncinzi cacitika nobasika kunkomwe?

Cibalo 54

“Cilyo Cini-Cini Cizwa Kujulu”

IBUZUBA bwainda kwakacitika zintu zinji. Jesu wakasanina zyuulu zyabantu camaleele amane wakaloboka kusoleka kwabantu kuti bamubikke kuti abe mwami. Imasiku ayo ngaonya wakeenda atalaa Lwizi lwa Galilaya lwakalaa mayuwe; wakavwuna Petro wakatalikide kubbila ciindi naakeenda atalaa maanzi aakali kuyuuntana amayuwe; alimwi wakalesya mayuwe ikufwutula basikwiiya bakwe kuti bwato bwabo butabbili.

Lino bantu mbaakasanina camaleele Jesu kunyikaa Lwizi lwa Galilaya bamujana afwaafwi aku Kapernauma akumubuzya ategwa: “Wakeza lili kuno?” Kabasinsa, Jesu ulaamba baboola kumuyandaula nkaambo balangila kutambula buyo acimbi cakulya. Wabakulwaizya kuti batabelekeli cakulya cibola pele cakulya cikkalilila mane kubuumi butamani. Aboobo bantu babuzya kuti: “Tucite buti kuti tubeleke milimo ya-Leza?”

Jesu waamba mulimo omwe uuyandika kapati. Wapandulula ategwa: “Ngooyu mulimo wa-Leza, kuti mumusyome oyo ngwaakatuma.”

Pele bantu tabamusyomi Jesu nokuba kuti wacita maleele manji. Cilagambya kuti, nokuba kuti wacita zintu zyoonse ezi zibotu, bamubuzya balaamba: “Ino ncitondezyonzi ncocita kuti tucibone, tukusyome? Mulimonzi ngocita? Bamataata bakalya Mana munkanda, mbuli mbokulembedwe. Wakabapa kulya ukuzwa kujulu kuti balye.”

Mukwiingula kulomba citondezyo kwabo, Jesu waisalazya Ntalisyo yazipo ezi zyamaleele kaamba kuti: ‘Tali Musa uwakamupa cilyo cizwa kujulu, pele Taata nguumupa cilyo cini-cini cizwa kujulu. Nkaambo cilyo ca Leza ngooyo uuzwa kujulu, uupa nyika buumi.’

Bantu balaamba: “O Mwami, kotupa cilyo eeco lyoonse.” (BT)

Jesu wapandulula ategwa: “Ndime cinkwa cipa buumi. Kufumbwa muntu uuza kulindime takooyoofwa limbi nzala, ayooyo uusyoma mulindime takooyoofwa limbi nyota pe. Pele mbuli mbondamwaambila kale kuti, nikuba kuti mulindibwene, tamundisyomi pe. Pele boonse aabo mbandipa taata balaza kulindime, nkabela kufumbwa uuza kulindime nsikoomutanda pe. Nkaambo mebo nsiindakaboola ano ansi kuzwa kujulu kuti nzoocite luyando lwangu ndemwini pe. Ndakaboolela kucita ziyanda yooyo wakandituma. Lino nzyayanda ooyo wakandituma nzyakuti nditasweekelwi naba omwe wa baabo mbaandipa, pele kuti ndikababusye mubuzuba bwamamanino. Nkaambo ziyanda Taata nzyakuti kufumbwa uubona mwana akumusyoma abe abuumi butamani.” (BT)

Nobamvwa boobu bama Juda batalika kutongooka Jesu nkaambo waamba kuti “Ndime cinkwa cakazwa kujulu.” Kunyina kwiindana nkobabwene kulinguwe amuntu uuzyalwa kubazyali bantunsi aboobo mbubwena bwakacita bantu baku Nazareta batalika kukazya ategwa: “Sena engwe Jesu, mwana a-Josefa ngotuzi wisi abanyina? Ino uamba buti eno kuti, Ndakazwa kujulu?”

Jesu waingula ategwa: “Mutatongauki akati kanu. Takukwe muntu uukonzya kuza kulindime Taata uwakandituma atamukwela, amebo ndiyoomubusya kubuzuba bwakumamanino. Kulilembedwe mubasinsimi kuti, Boonse bayooiisigwa Leza. Umwi umwi uwakamvwa kuli-Taata, akwiiya kulinguwe, uleza kulindime. Takuli kuti kuli muntu uwakabona Taata, pele oyo uuzwida kuli-Leza, ngonguwe uwakabona Taata. Ncobeni ndamwaambila kasimpe, Oyo uusyoma uli abuumi ubutamani.”

Kacizumanana, Jesu waindulula ategwa: “Ndime cinkwa cipa buumi. Bamauso bakalya mana munkanda, pele bakafwa. Ono nceeci cinkwa cakazwa kujulu cakuti muntu wacilya atakafwidilili. Ndime cinkwa cipa buumi cakazwa kujulu. Inga muntu naa wacilya ulapona kukabe kutamani.” (BT) Inzya kwiinda mukusyoma Jesu iwakatumwa a Leza, ibantu balakonzya kubaa buumi butamani. Kunyina mana naa cinkwa cimbi cikonzya kutupa ceeco!

Kulibonya kuti mubandi uujatikizya cinkwa cizwa kujulu watalika ndilyona bantu nobamujana Jesu munsi aaku Kapernauma. Pele wazumanana akuzyoosika kumamanino ciindi Jesu naalikuyiisya mucikombelo mu Kapernauma. Johane 6:25-51, 59; Intembauzyo 78:24; Isaya 54:13; Matayo 13:55-57.

▪ Nzintu nzi zyacitika kautana mubandi wa Jesu uujatikizya cinkwa cizwa kujulu?

▪ Ikulanga zintu Jesu nzyaazwaa kucita, nkaambo nzi kulomba citondezyo ncokuteelede?

▪ Nkaambo nzi bama Juda ncobatongaukila Jesu naamba kuti walo ncinkwa cini-cini cizwa kujulu?

▪ Nkuli nkuwacitikila mubandi uujatikizya cinkwa cizwa kujulu?