Cibalo 55

Basikwiiya Banji Baleka Kumutobela Jesu

JESU ulayiisya mucikombelo mu Kapernauma kujatikizya mulimo wakwe wakuba cinkwa cini-cini cizwa kujulu. Makani aakwe aya aboneka kuti azumanana buyo kuzwa kumubandi watalikila kubantu ciindi nobamujana nobali kupiluka kuzwa kujwe a Lwizi lwa Galilaya kwalo nkobakalya zinkwa answi zyakapegwa kwiinda mumaleele.

Jesu wazumanana majwi aakwe ategwa: “Cinkwa eeco nceyoopa mmubili wangu kutegwa bantu munyika mboizulwa babe aabuumi.” Myaka yobile buyo yainda, mucilimo camu 30 C.E., Jesu wakaambila Nikodemo kuti Leza wakiiyandisya nyika cakuti wakatuma Mwanaakwe kuti abe Mufwutuli. Aboobo, Jesu lino utondezya kuti kufwumbwa muntunsi uulya mubili wakwe munzila yacikozyanyo kwiinda mukusyoma cipaizyo ncayoocita lino-lino, uyootambula buumi butamani.

Pele bantu abacima majwi aa Jesu. Babuzya ategwa: “Ino muntu oyu inga watupa buti mubili wakwe kuti tuulye?” Jesu uyanda kuti baswiilizi bakwe bateelele kuti ikulya mubili wakwe kuyoocitwa munzila yacikozyanyo. Aboobo kukankaizya makani aya waamba cimbi ciinda awaawo kucima kuti catabonwa kuti ncikozyanyo buyo.

Jesu ulaamba: “Kuti mwatalya mubili wa Mwanaa Muntu akunywa bulowa bwakwe, tamujisi buumi muli ndinywe pe. Muntu woonse uulya mubili wangu akunywa bulowa bwangu ulaabuumi butamani, alimwi ndiyoomubusya mubuzuba bwamamanino. Nkaambo mubili wangu nkokulya kwini-kwini abwalo bulowa bwangu nkokunywa kwini-kwini. Ooyo uulya mubili wangu akunywa bulowa bwangu nguukkalilide muli ndime, ambebo ndikkede muli nguwe.”

Masimpe, ikuyiisya kwa Jesu inga kwabija kapati kuti naa ukulwaizya kuti bantu kabalya bantunyina. Pele Jesu awa taambi kulya mubili buya kwini naa kunywa bulowa. Ncakankaizya buyo awa ncakuti boonse batambula buumi butamani beelede kusyoma cipaizyo ncayoocita ciindi aakutuula mubili wakwe uulondokede wabuntunsi akutila bulowa bwakwe. Pele nobaba basikwiiya bakwe, bunji bwabo kunyina anobasola kuteelela kuyiisya kwakwe aboobo bakazya ategwa: “Makani aaya mmapati. Nguni uukonzya kwaamvwa?”

Kazi kuti bunji bwabasikwiiya bakwe balatongooka, Jesu ulaamba: “Sena makani aaya amutyompya? Ino inga kwaba buti kuti mwabona Mwanaa Muntu katanta kubweeda ooko nkwaakabede kusaanguna? . . . Majwi aaya ngemwaambila ngaaleta Muuya wa Leza uupa buumi. Pele mpobali bamwi bantu batasyomi.”

Jesu wazumanana ategwa: “Aaka nkakaambo ncindamwaambila kuti taakwe uukonzya kuboola kulindime ccita kuti wapegwa nguzu a Taata zyakuza kulindime.” Nobamvwa boobo, basikwiiya banji bazwa akuleka kumutobela. Elyo Jesu walanga kubaapostolo bakwe bali 12 wababuzya ategwa: “Sena anywebo muyanda kundisiya?”

Petro waingula ategwa: “O Mwami, ino inga swebo twaya kulini? Yebo nduwe oojisi majwi aabuumi butamani. Swebo tulasyoma, akuziba kuti nduwe Uusalala uuzwa kuli Leza.” Oku nkutondezya lusyomo kapati, nokuba kuti Petro abamwi baapostolo teebakaziteelelesya nzyaakayiisya Jesu kumakani aaya!

Nokuba kuti wakukkomanina kwiingula kwa Petro, Jesu ulaamba: “Tee ndime ndakamusala nomuli kkumi ababili, pesi umwi wanu mmubi.” Waamba Judase Iskariote. Kulalangilwa kuti aciindi awa Jesu wabona “matalikilo” muli Judase anzila iilubide.

Jesu wazwaa kubatyompya bantu kwiinda mukukaka kuti bamubikke abe mwami alimwi balakonzya kabayeeya kuti ‘Ino oyu inga kali buti Mesiya kuti naa tayandi kuti abe acuuno cakwe cimweelede cabu Mesiya?’ Akalo aka kalaba kaambo katalubwi mumizeezo yabantu. Johane 6:51-71, The Bible in Tonga, 1996; 3:16.

▪ Mbaani Jesu mbapa mubili wakwe, alimwi ‘baulya buti mubili’?

▪ Majwi nzi aambi Jesu ngaamba aatyompya bantu, pele ukankaizya nzi?

▪ Iciindi banji nobaleka kumutobela Jesu, Petro waingula buti?

Cibalo 56

Ncinzi Cisofwaazya Muntu?

IKUKAZIGWA kwa Jesu kwavwula. Takuli buyo kuleka kumutobela kwabunji bwabasikwiiya bakwe pele bama Juda mu Judaya bayanda kumujaya mbubwena mbubakacitide ciindi naakali mu Jerusalemu ciindi capobwe lya Kwiindilila lyamu 31 C.E.

Lino nciindi capobwe lya Kwiindilila lyamu 32 C.E. Ambweni kweelana aceelelo ca Leza cakuti ajanike, Jesu waunka kupobwe lya Kwiindilila ku Jerusalemu. Nokuba boobo wacita boobu kapakamene kapati nkaambo buumi bwakwe buli muntenda. Kumane wapilukila ku Galilaya.

Ambweni Jesu uli ku Kapernauma ciindi ba Farisi abalembi bazwa ku Jerusalemu nobaboola kulinguwe. Bayandaula nzila yakumutamikizya kaambo ikuti watyola mulawo wacikombelo. Babuzya ategwa: “Ino nkaambonzi basikwiiya bako balasotoka ziyanza zyabapati? Nkaambo tabasambi kumaanza aabo nibalya insima.” Eci tacili cintu ciyandika kuli Leza pele ba Farisi bacibona kuti nkulubizya kapati kuti watacicita eci ciyanza cabapati calo cibikkilizya kusamba kusika mutukokola.

Muciindi cakubaingula kutamikizya kwabo, Jesu waamba bubi bwabo alimwi akutyola Mulawo wa Leza caali. “Anywebo nkaambonzi mulasotoka Mulao wa-Leza nkaambo kaciyanza canu?” uyanda kuziba. “Nkaambo Leza wakalailila kuti, Lemeka uso abanyoko, alimwi, Umwi aumwi uutukila wisi na banyina afwe akufwa. Pele inywe mulaamba kuti, Umwi aumwi uuambila wisi na banyina kuti, Ncipo cakupa Leza eco ncimukonzya kugwasigwa kulindime, oyu teelede kulemeka wisi na banyina.”

Masimpe ba Farisi bayiisya kuti mali, lubono naa cili coonse caabwa kuti ncipo kuli Leza, ncatempele alimwi tacikonzyi kubelesyegwa mulimo umbi pe. Pele cipo caabwa ciyobolwa aamuntu oyo wacaaba. Munzila eyi, imwana aamba buyo kuti mali naa lubono ngu “korbani”—icipo caabwa kuli Leza naa kutempele—cimupa kuti atagwasyi bazyali bakwe bacembeede balo banga kabayandika kugwasyigwa kapati.

Kakalede kapati akaambo kakunyona Mulawo wa Leza nkobacita ba Farisi, Jesu ulaamba: “Mbomulobya Mulao wa-Leza kuciyanza canu. Nubasikuupaupa ameso, Isaya ncobeni wakasinsima mbumubede, wakati, Bantu aba balandilemya amilomo yabo, nekubaboobo myoyo yabo ili kule ambe. Kukomba kwabo nkwabuyo, nkaambo balafunda zifundo zyamilao yabantu.”

Ambweni makamu aabantu balizwide awa kutegwa babape ciindi ba Farisi kuti babuzye Jesu. Lino ba Farisi nobabula bwiinguzi kukusinsa kwa Jesu waita makamu kuti aboole afwaafwi. Ulaamba: “Amundiswiilile nyoonse, muvwisye. Taakwe cintu icizwa anze lyamuntu cinjila mukati cikonzya kumubisya pe, pele zintu zizwa mukati lyamuntu, ezyo nzezibisya muntu.”

Mpoonya nobanjila muŋanda basikwiiya bakwe babuzya ategwa: “Sa ulizi kuti ba-Farisi nibakamvwa inkani eyi bakabilila?”

Jesu waingula ategwa: “Zizikilwa zyoonse nzyaatakazikila Taata uuli kujulu zizoononkolwa. Amubaleke! mbeenzyi boofu. Kuti moofu uleenzya moofu, boonse bobile balawida mumulindi.”

Jesu waboneka kuti wagambwa ciindi Petro mukwiiminina basikwiiya naalomba kusalazyilwa kujatikizya icisoofwaazya muntu. Jesu waingula ategwa: “Sa anywebo ambuli sunu tamuna kumvwisya? Sa tamuna kuziba kuti kunjila, coonse cinjila mukanwa cilaya mwida, limwi cisowegwe kunze. Pele kuzwa eco cizwa mukanwa cilazwa mumoyo, nciconya ncicisofwaazya muntu. Nkaambo mumoyo wamuntu mulazwa miyeeyo mibi, bujayi, bumambi, bwaamu, kubba, bulengelezi, amatusi. Nzeezi zisofwaazya muntu. Pele kulya amaanza aatasambide takusofwaazyi muntu pe.”

Awa Jesu takulwaizyi kuba basimatombe. Taambi kuti muntu tayelede kusamba kumaanza katanatalika kubamba cakulya naa kulya cakulya. Pele Jesu usinganya busikuupaupa ameso bwabasololi bacikombelo ibasola kuzinguluka milawo ya Leza iiluleme kwiinda mukuzumanana tunsiyansiya tutali twamumagwalo. Inzya, mmicito mibi iisofwaazya muntu alimwi Jesu utondezya kuti ezi zitalikila mumoyo wamuntu. Johane 7:1; Deuteronomo 16:16; Matayo 15:1-20; Marko 7:1-23; Kulonga 20:12; 21:17; Isaya 29:13.

▪ Nkukazigwa nzi lino Jesu nkwaaba ankuko?

▪ Nkutamikizya nzi nkobacita ba Farisi, pele kweelana ambwaamba Jesu iba Farisi bautyola buti Mulawo wa Leza caali?

▪ Nzinzi Jesu nzyaamba izisofwaazya muntu?