Cibalo 57

Kubafwida Luzyalo Bapengede

NAAMANA kubapa mulandu ba Farisi akaambo katunsiyansiya twabo itugwasya buyo mbabo, Jesu abasikwiiya bakwe bazwa. Mulayeeya kuti munsi omu naasolekede kuti balyookezye aasyoonto banyonganizigwa ciindi makamu aabantu naabajana. Lino antoomwe abasikwiiya bakwe baunka kuzisi zyaku Turo a Sidoni ikulampa makkilomita manji kuya kunyika. Olu lulibonya kuti ndolweendo lulikke Jesu ndwaabamba abasikwiiya bakwe lwakuzwa mu Israyeli.

Nobajana ŋanda yakukkala, Jesu wacisalazya kuti tayandi kuti muntu naba omwe azibe kuti nkobali. Pele nomuba moomu mucisi citali caba Israyeli waalilwa kulisisa. Imukaintu mu Giliki wakazyalilwa mumwena omu mu Suro-Fonika wamujana elyo watalika kulomba ategwa: “Ndifwida luzyalo, Mwami, Mwana a-Davida, mwana wangu musimbi ulijisi loko daimona.” Pele Jesu taamuvwuwa noliba jwi lyomwe.

Mpoonya basikwiya bamwaambila Jesu ategwa: “Mutande, nkaambo uza buongolola musule lyesu.” Kupandulula ncaatamubikkilila maanu, Jesu ulaamba: “Ndakatumwa buyo kumbelele zisweekede zyamusyobo wa Isilayeli.” (BT)

Pele mukaintu oyu tatyompwi pe. Waswena kuli Jesu akumufwugamina. Wakombelezya ategwa: “Mwami, ndigwasya.”

Ma! Uleelede weetezyegwa Jesu akukombelezya kwamukaintu oyu! Pele alimwi waamba mulimo wakwe wakusaanguna wakubelekela bantu ba Leza baku Israyeli. Aciindi mpoonya, ambweni kusunka lusyomo lwamukaintu oyu, waamba makani aakusalana kwaba Juda kajatikizya bamasi aambi kaamba kuti: “Tacili cibotu kubweza insima yabana akwiisowela tubwa.”

Kwiinda mujwi lyakwe lyaluzyalo alimwi abusyu bwakwe, Jesu watondezya luzyalo lwakwe lwini-lwini kubantu batali bama Juda. Wakuubya-ubya akukozyanisya kwakwe kwabamasi ababwa kwiinda mukubaamba kuti “[n]tubwa.” Muciindi cakuti mukaintu oyu anyeme, wabweza kaambo Jesu nkaamba kakusalana kwaba Juda akwaamba cakulibombya ategwa: “Mbukubede, Mwami! nkaambo tubwa tulalya tufwefwelenga tuwa kuzwa kumatafule aabasimalelo bato.”

Jesu waingula ategwa: “Webo mwanakazi, lusyomo lwako ndupati! Akucitwe kulinduwe mbuli mboyanda.” Elyo cacitika! Naapilukila kumunzi wajana mwanaakwe musimbi abulo kaponede.

Kuzwa kuminyinza yacisi ca Sidoni, Jesu abasikwiiya bakwe baanduluka minzi kugama ku Mulonga wa Jordano. Ambweni mulonga wa Jordano bawiinda nkuuli kumbali aaku Lwizi lwa Galilaya akunjila cisi caku Dekapole kujwe alwizi. Oku batanta mulundu pele makamu aabantu babajana elyo Jesu bamuletela zilema, bapuutide, boofu alimwi abasyaatambi abamwi-bamwi baciswa. Babatula kumaulu aa Jesu elyo wabaponya. Ibantu bagambwa nobabona basyaataambi baamba, azilema zyapona, boofu babona; elyo balumbaizya Leza wa Israyeli.

Jesu wabikkila kapati maanu kumuntu umwi musinkematwi alimwi sikamaama. Kanjikanji, basinkematwi balafwa nsoni kapati munkamu yabantu. Jesu ulakonzya ulikubwene kulibilika kwamuntu oyu. Aboobo Jesu caluzyalo wamugwisya munkamu wamutola kumbali. Nobaba balikke, Jesu waamba ncatimucitile. Wanjizya minwe yakwe mumatwi aamuntu oyu, alimwi waswida mate akumulamba ngawo amulaka wakwe. Mpoonya kalangide kujulu Jesu walisinsimukila akwaamba kuti: “Sinkuka.” Mpoonya matwi aamuntu oyu asinkuka alimwi wakonzya kwaambaula kabotu.

Jesu naaponya bantu aba banji, makamu aabantu balumba kapati. Balaamba: “Wabosya kucita zyoonse. Basinkematwi ulabasinkula, abalo basyataambi ulabaambya.” Matayo 15:21-31; Marko 7:24-37.

▪ Nkaambo nzi Jesu ncaatamuponya mwana aamukaintu mu Giliki mpoonya-mpoonya?

▪ Naamana boobo nkuli nkwaatola basikwiiya bakwe Jesu?

▪ Ino Jesu wamulanganya buti caluzyalo muntu musinkematwi alimwi sikamaama?

Cibalo 58

Mikamu a Bumena

MAKAMU-makamu aabantu bayoboloka kuya kuli Jesu mu Dekapole. Ibanji bazwa kulamfwu kuboola kubusena obu kuvwulide Bamasi kuti bazikumuswiilile akuponesyegwa kumalwazi aabo. Balijisi azinzuma zipati zyalo nzyobabelesya kunyamuda zintu mbuli cilengwa ciindi nobeenda kwiinda mumasena aa Bamasi.

Muciindi Jesu waita basikwiiya bakwe akwaamba kuti: “Ndafwida luzyalo aba bantu banji, nkaambo balikede kulindime mazuba otatwe, akulya pe. Kuti ndabamwaisya mwabo mwabo kabacifwide inzala, banooya bulengauka munzila, alimwi bamwi bazwa kule.”

Basikwiiya bakwe babuzya ategwa: “Ino kai muno musokwe zizwe kuli zilyo zyakukusya bantu boonse aba?”

Jesu wabuzya ategwa: “Ino mujisi mikamu yongae?”

Baingula ategwa: “Tulijisi mikamu iili musanu aibili atuswi tuce.”

Kalailila bantu kuti bakkale ansi, Jesu wabweza mikamu atuswi, wakomba kuli Leza, wakomauna akwaabila basikwiiya bakwe. Mpoonya balo baabila bantu boonse balya cakukkuta. Nokwamana boobo, bufwefwelenga bwabwezelelwa elyo kwazula nsuwo zili musanu azibili nokuba kuti kwali baalumi batandila ku 4,000 kubikkilizya abanakazi abana ibalya!

Jesu waamwaisya makamu, wanjila mubwato abasikwiiya bakwe, balandukila kunkomwe yakumbo ya Lwizi lwa Galilaya. Awa ba Farisi cino ciindi kabasindikidwe abasimbunga yacikombelo yaba Saduki basola kumusunka Jesu kwiinda mukumwaambila kuti abatondezye citondezyo cizwa kujulu.

Kazi makanze aabo aakumusunka, Jesu waingula kuti: “Nikwakaba kumazuba mulaamba kuti, Bulaca kabotu, nkaambo kujulu kulasalala. Alimwi cifumofumo mulaamba kuti, Sunu bwaca bubi, nkaambo kujulu kulasalala cakusia. Mulizi kupandulula busyu bwakujulu, pele tamukonzyi kupandulula zitondezyo zyaziindi.”

Aambe boobo, Jesu wabaita kuti mbaasizibi abasibwaamu alimwi wabacenjezya mbubwena mbwaakaambide ba Farisi munsi kuti kunyina citondezyo citipegwe calikke citondezyo ca Jona. Nobazwa awa abasikwiiya bakwe banjila mubwato akugama ku Betsaida kunyikaa Lwizi lwa Galilaya. Kabaciya, basikwiiya bayeeya kuti baluba kubweza mikamu pele buyo omwe ngubabwezelezya.

Kayeeyede makani ngaali kwaambaula aba Farisi aba Saduki basikutobela Heroda, Jesu walailila ategwa: “Amucenjele kubumena bwaba-Farisi akubumena bwa-Heroda.” Kulibonya kuti basikwiiya bayeeya kuti Jesu waamba kuluba nkubaluba kubwezelezya mikamu ciindi naamba bumena aboobo batalika koombolozyanya. Naabona kuti teebamvwisya, Jesu ulaamba: “Nkaambonzi muloombolozyanya kuti mwabula mikamu.”

Lino-lino Jesu wakapa mikamu camaleele kuzyuulu zyabantu, maleele aamamanino wakaacita ambweni buzuba bomwe naa obile aainda. Beelede kuziba kuti tabikkilide maanu kukubula mikamu iini. Wabayeezya kuti: “Sa tamwiibaluki? Nindakakomauna mikamu yosanwe akusanina bantu bali zyuulu zyosanwe, kazili zyongae zisuwo zizwide bufwefwelenga nzimwakayola?”

Baingula ategwa: “zyakali ikumi azibili.”

“Alimwi eyo mikamu yosanwe aibili njibakaabilwa bantu bali zyuulu zyone, ino kazili zyongae zisuwo zizwide bufwefwelenga nzimwakayola?”

Baingula ategwa: “Zyakali musanu azibili.”

“Sa tamuna kumvwisya?” Jesu wababuzya. “Ino nkaambonzi tamuna kuziba kuti teensi mikamu njendaamba. Amucenjele bumena bwaba-Farisi aba-Saduki.”

Limwi bakamvwa kaambo basikwiiya. Bumena ibupa kuti cintu cimwi cisase alimwi bupa kuti cinkwa cifwutumuke, ndebbala lyakali kubelesyegwa kwaamba busofwaazi. Aboobo lino basikwiiya baziba kuti Jesu ubelesya cikozyanyo ikubacenjezya kuti bacenjele “kukwiisya kwaba-Farisi aba-Saduki,” ikuyiisya kwalo kusofwaazya. Marko 8:1-21; Matayo 15:32–16:12.

▪ Nkaambo nzi bantu ncobajisi zinzuma zipati zyakuyumwida?

▪ Naazwa mu Dekapole, ninyendo nzi zyabwato Jesu nzyaayenda?

▪ Ncinzi ncobatamvwisisya basikwiiya kujatikizya kaambo nkaamba Jesu kabumena?

▪ Ino Jesu waamba nzi mukaambo kakuti “bumena bwaba-Farisi aba-Saduki?”