Cibalo 65

Lweendo Lwakaziye Kuya ku Jerusalemu

MMUPEYO wamu 32 C.E., alimwi Pobwe lya Zilawo lilaafwaafwi. Jesu ucita mulimo wakwe kapati mu Galilaya kuzwa ciindi capobwe lya Kwiindilila lyamu 31 C.E., ciindi ba Juda nobaali kusola kumujaya. Kulibonya kuti kuzwa ciindi eco, Jesu walikuunkila buyo mapobwe otatwe aamwakaa mwaka aaba Juda ku Jerusalemu.

Banabokwabo Jesu lino bamukulwaizya kuti: “Zwa kuno, uye ku-Judaya.” Jerusalemu ngomunzi mupati wa Judaya alimwi nkokucitilwa bukombi cisi coonse. Banabokwabo bayeeya kuti: “Takukwe muntu uuduma uucita zintu mumbali.”

Nokuba kuti Jakobo, Simoni, Josefa alimwi a Judase tabasyomi kuti mupati wabo Jesu ngu Mesiya ncobeni, bayanda kuti atondezye nguzu zyakwe zyamaleele kuli boonse babungene kupobwe. Nokuba boobo Jesu uliibwene ntenda. Ulaamba: “Inyika tiikonzya kumusula, pele mebo ilindisulide, nkaambo ndiilungulula kuti milimo yayo mibi.” Aboobo Jesu waambila banabokwabo kuti: “Kamuya nywebo kupobwe, mebo nsikooinka eneeno kupobwe eli.”

Ipobwe lya Zilawo ndyamazuba aali ciloba. Mubuzuba bwalusele, lilamanisigwa amilimo yabukombi. Ipobwe eli ndelimanizya mwaka wabulimi aboobo nciindi cakukondwa kapati akulumba. Nokwainda mazuba manji kuzwa ciindi nobaaunka banabokwabo Jesu kuyakusangana abambi basilweendo, walo abasikwiiya bakwe baunka kakutakwe uuziba, kabatabonwi abantu pe. Batola nzila iinda mu Samariya kuleka nzila iibelesya bantu banji iinda munsi a Mulonga wa Jordano.

Mbwaanga Jesu ankamu yakwe balayandika aakoona mumunzi wa Samariya, watuma batumwa kumbele kuti bakalangaule masena. Nokuba boobo, bantu bakaka kumucitila cili coonse Jesu nobamvwa kuti uya ku Jerusalemu. Akaambo kakunyema, Jakobo a Johane babuzya kuti: “Omwami, sena uyanda kuti tulailile mulilo useluke kujulu ubatente?” Jesu wabakalalila akaambo kakuyeeya cintu cili boobu elyo baya kumunzi uumbi.

Mbobayabweenda munzila imulembi wati kuli Jesu: “Mufundisi, nzookutobela koonse nkoya.”

Jesu waingula ategwa: “Bamwaaba balijisi milyango, abalo bayuni bamujulu balijisi ziteente, pele Mwana a-Muntu taakwe nkooneka mutwe wakwe.” Jesu upandulula kuti imulembi uyoojana buyumuyumu kuti waba sikumutobela. Alimwi kulibonya kuti imulembi ulalisumpula kapati cakuti takonzyi kuyanda buumi bwamusyobo oyu.

Kumuntu umwi Jesu ulaamba: “Ndicilila.”

Oyu muntu ulaamba: “Ndileka sansi nkazike taata.”

Jesu waingula ategwa: “Leka bafu bazike bafu babo beni, koya yebo ukambauke Bwami bwa-Leza.” Kulibonya kuti bausyi muntu oyu teebakainafwa pe, nkaambo kuti nobakalifwide takulangilwi kuti mwaanaabo naakaliko awa kuswiilila Jesu. Kuboneka kuti mwana ulomba ciindi cakuti akalindile lufwu lwabausyi. Talibambilide pe kubikka Bwami bwa Leza ambele mubuumi bwakwe.

Mbobayaabuya munzila kugama ku Jerusalemu, aumbi mwaalumi waambila Jesu ategwa: “Omwami, ndizookucilila, kwalo sansi undileke nkabalaye abali kumunzi.”

Mukwiingula Jesu ulaamba: “Taakwe muntu uwakajata jamba ejanza lyakwe akucebukila munsi, uuelede Bwami bwa-Leza.” Abo bayooba basikwiiya ba Jesu beelede kugamika meso aabo kumulimo wa Bwami. Mbubwena mufwolo mbounga wanyongana kuti naa uujisi jamba katagamikide kulanga kumbele, umwi-umwi uucebukila munsi kubweende bwazintu bwakale ulakonzya kulebezyegwa kuzwa munzila iitola kubuumi butamani. Johane 7:2-10; Luka 9:51-62; Matayo 8:19-22.

▪ Mbaani ibanyinaa Jesu, alimwi balimvwa buti kujatikizya nguwe?

▪ Nkaambo nzi bana Samariya ncobali babi myoyo boobu, elyo ncinzi ncobayanda kucita ba Jakobo a Johane?

▪ Mibandi nzi yotatwe Jesu njaalaa njiyo munzila, alimwi mbuti mbwakankaizya mbokuyandika kulyaaba mumulimo?

Cibalo 66

Ku Pobwe lya Zilawo

JESU waduma kapati mumyaka iitandila kwiitatu kuzwa ciindi calubbapatizyo lwakwe. Izyuulu zinjaanji zyaabona maleele akwe alimwi mpuwo yamilimo yakwe yamvwigwa cisi coonse. Lino bantu mbobabungana ku Pobwe lya Zilawo mu Jerusalemu batalika kumuyandaula. Bayanda kuziba balaamba: “Uli kuli?”

Jesu waba ngonguwe ngobakazyanya bantu. Bamwi balaamba: “Muntu mubotu oyu.” Bamwi ategwa: “Pe, tali boobo, pele ueneena buyo bantu.” Kuli kwaambaula kunji kwamusyobo ooyu mazuba aakusaanguna aapobwe. Pele kunyina uuliyumya-yumya kuti aambe zya Jesu caantangalala. Eci cili boobu akaambo kakuti bantu bayoowa kuguntaikwa abasololi baba Juda.

Ipobwe nolyasika akati, Jesu wapompa. Waunka kutempele kwalo bantu nkobagambwa akaambo kakuyiisya kwakwe kubotu. Mbwaanga kunyina naakaunka kucikolo cabu rabi Jesu, iba Juda bakankamana ategwa: “Ino muntu oyu ulizi buti kubala uwatakaiya?”

Jesu wapandulula ategwa: “Kwiisya kwangu takuli kwangu ndemwini, nkukwakwe uwakandituma. Kwanooli muntu uuyanda kucita luyando lwakwe, ulaziba kwiisya kuti na kuzwa kuli-Leza na ndilalyaambila buyo ndemwini.” Ikuyiisya kwa Jesu kuleendeleni kapati amulawo wa Leza. Aboobo cilizibidwe kuti uyandaula bulemu bwa Leza kutali bwakwe mwini. Jesu wabuzya ategwa: “Sena Musa takamupede mulao?” Munzila yakubasinsa ulaamba: “Takukwe omwe wanu uucita mulao.”

Mpoonya Jesu wabuzya ategwa: “Nkaambonzi ncomuyanda kundijaya?”

Ibantu bali munkamu, ambweni ibeenzu kupobwe tabazi kuti kuli makani aali boobu. Bacibona kuti ncintu cikankamanisya kuti muntu umwi ulakonzya kuyanda kujaya mwiiyi mubotu boobu. Aboobo bayeeya kuti kuli cilubide kuli Jesu camupa kuti ayeeye boobu. Balaamba: “Uli adaimona, nguni uuyanda kukujaya?”

Ibasololi baci Juda bayanda kuti Jesu ajaiyigwe nokuba kuti makamu taazi. Ciindi Jesu naakaponya muntu umwi mu Sabata mwaka acisela wainda, ibasololi bakasola kumujaya. Aboobo Jesu lino watondezya kubula maanu kwabo kwiinda mukubabuzya kuti: “Na muntu wapalulwa abuzuba bwa-Sabata kuti mulao wa-Musa utasotokwa, sena mwandikalalila nkaambo ndakaponya muntu abuzuba bwa-Sabata? Mutabeteki aciimo, pele amubeteke cakululama.”

Ibakkala mu Jerusalemu ibabuzyi bukkale obu lino balaamba: “Sena engwe oyu ngobayanda kujaya? Ede ngooyu uambila antangalala, eno takucikwe ncobaamba kulinguwe. Sena bapati balizi ncobeni kuti ngonguwe Kristo?” Ibanyenzi bana Jerusalemu bapandulula ncobatasyomeni kuti Jesu ngo Kristo, balaamba: “Swebo tulimuzi oyu muntu nkwazwa, pele Kristo walo asika, takukwe uumuzi nkwazwa.”

Jesu waingula ategwa: “Mulindizi ankwenzwa mulikuzi, alimwi nsikalizidide lwangu ndemwini, pele oyo uwakandituma nguusinizizye, ngomutezi. Ndilimuzi mebo, nkaambo ndazwa kulinguwe, walo ngowakandituma.” Bamvwe boobu basoleka kumujata ambweni kutegwa bamubikke muntolongo naa kumujaya. Pele teebakonzya pe nkaambo ciindi cakuti Jesu ajaigwe tacinasika.

Nokuba boobo, ibanji bamusyoma Jesu mbubwena mbuli mbobeelede. Wakeenda atalaa maanzi, wakalesya luwo, wakaumuzya guwo kulwizi, wakasanina zyuulu camaleele azinkwa zisyoonto atuswi, wakaponya balwazi, balema bakeenda, wakajalula meso aaboofu, wakaponya basicinsenda alimwi wakabusya bafwide. Aboobo babuzya ategwa: “Kristo asika, sena uzoocita malele manji aainda aya ngacita oyu muntu?”

Iba Farisi nobamvwa bankamu kabaambaula makani aya, balo abapaizi bapati batuma bamapulisa kuti bakamujate. Johane 7:11-32.

▪ Wasika lili Jesu kupobwe, alimwi bantu baamba nzi kujatikizya nguwe?

▪ Nkaambo nzi bamwi ncobaambila kuti Jesu ulaa daimona?

▪ Bamulanga buti Jesu bantu bakkala ku Jerusalemu?

▪ Nkaambo nzi banji ncobamusyomena Jesu?