Cibalo 69

Imubuzyo Kujatikizya Mausyi

ICIINDI lyapobwe, makani ngabandika Jesu abasololi baci Juda ayabuyuma. Jesu wazuminizya kuti: “Ndilizi kuti muli bana ba-Abrahamu, nokuboobo muyanda kundijaya, nkaambo ijwi lyangu talijisi bukalilo mulindinywe. Ndaamba zintu nzendakabona antoomwe a-Taata. Anywebo mulacita nzomwakamvwa kumauso.”

Nokuba kuti taamwaamba usyi wabo, Jesu wacisalazya kuti usyi wabo uliindene awakwe. Kabatamuzyi ngwayeeya Jesu, basololi baci Juda baingula balaamba: “Taateesu ngu-Abrahamu.” Bayeeya kuti bajisi lusyomo lomwe a Abrahamu iwakali mulongwe wa Leza.

Pele Jesu wabagambya abwiinguzi bwakwe bwakuti: “Kuti nomwali bana ba-Abrahamu, nomwali kucita milimo njaakali kucita Abrahamu.” Masimpe mwana mwini-mwini ulamwiiya usyi. Jesu ulaamba: “Pele eno muyanda kundijaya, ndi muntu uumwaambila bwini, mbwendakamvwa kuli-Leza. Abrahamu takacitide bobuya pe.” Aboobo Jesu waamba alimwi kuti: “Nywebo mucita milimo yamauso.”

Pele tabana muziba aino Jesu ngwaamba. Balaamba mbana ba Abrahamu bamuŋanda kabaamba kuti: “Tatukazyalidwe mubwaamu.” Pele kabataminina kuba bakombi bakasimpe mbuli Abrahamu balaamba: “Tulijisi Taata omwe, ngo-Leza.”

Pele sena Leza ngo Wisi ncobeni? Jesu waingula kuti: “Kuti Leza naali uso, nomwali kundiyanda, nkaambo ndakazwa kuli-Leza. Nsikalizidide ndemwini, pele wakandituma. Ino ncinzi ncomutamvwi kwaamba kwangu?”

Jesu wasoleka kutondezya basololi bacikombelo aba cikonzya kucitika akaambo kakumukaka. Pele lino wagama buya ulaamba: “Nywebo muzwa kuli-uso Saatani, muyanda kucita iziyanda uso.” Ino Diabolosi nguusyi wamusyobo nzi? Jesu wakamwaamba kuti mujayi alimwi ulaamba: “Nguubeja, ngowisi wababeja.” Aboobo Jesu wamanizya ategwa: “Muntu woonse wa-Leza ulamvwa majwi aa-Leza. Ncomukakilwa kwaamvwa, nkaambo tamuli bana ba-Leza.”

Nobakalala akaambo kakusinganya kwa Jesu, ba Juda baingula ategwa: “Sena tatwaambide kabotu kuti uli mu-Samariya, uli adaimona?” Ibbala lyakuti “mu-Samariya” ndijwi libelesyegwa kutondezya kunyansya naa kusampaula, nkaambo bana Samariya mbantu basulidwe kuba Juda.

Katabikkili maanu kukusampaula kwabo kwakumwaamba kuti mmu Samariya, Jesu waingula ategwa: “Nsijisi daimona, pele ndilemya Taata, nywebo mulandyuubya.” Kacizumanana, Jesu wabamba cisyomezyo cigambya ategwa: “Kuti muntu anooyobola ijwi lyangu, takooyoobona lufu.” Aino awa Jesu taambi kuti boonse abo bamutobela tabakafwi ncobeni. Pele waamba kuti tabakanyonyoonwi naa kufwa “lufu lwabili” lwalo lutakwe bulangizi bwabubuke.

Nokuba boobo iba Juda baamvwa mbwaamba majwi akwe Jesu. Mpoonya balaamba: “Eno twaziba kuti uli adaimona. Abrahamu wakafwa, abasinsimi, eno koamba kuti, Muntu anoobamba majwi aangu, takooyoofwa. Sena uli mupati kwiinda mufu taata Abrahamu, abafu basinsimi? Ino ulicitani yebo?”

Mumubandi oyu oonse, cilalibonya buya kuti Jesu waambila baalumi aba kuti ngo Mesiya wakasyomezyedwe. Pele muciindi cakwiingula cakugaminina kumubuzyo wabo wakuti nguni, Jesu ulaamba: “Kuti ndanoolidumaizya ndemwini, bulemu bwangu mbwabuyo, ngu-Taata uundilemya, ngomuamba kuti, Ngo-Leza wesu. Tamunamuziba, pele mebo ndilimuzi; na ndaamba kuti, Nsimuzi, ndilabeja anga ndinywe.”

Kacizumanana, Jesu waamba Abrahamu musyomesi alimwi kati: “Uso Abrahamu wakabotelwa kubona buzuba bwangu, wakabubona, wakakondwa.” Inzya, ameso aalusyomo, Abrahamu wakali kulangila kusika kwa Mesiya uusyomezyedwe. Icakutasyoma, iba Juda baingula ategwa: “Ootanaba amyaaka iili makumi osanwe, sena wakamubona Abrahamu?”

Jesu waingula ategwa: “Ncobeni ndamwaambila kasimpe, Abrahamu katanazyalwa mebo mpendi.” Aino awa Jesu waamba ciindi naatakainaba muntunsi kali muntu wamuuya singuzu kujulu.

Nobanyemezyegwa akutaminina kwa Jesu kwakuti wakaliwo Abrahamu katana, iba Juda babwezelela mabwe kuti bamufwuse. Pele wayuba akuzwa mutempele katalicisi pe. Johane 8:37-59; Ciyubunuzyo 3:14; 21:8.

▪ Ino Jesu watondezya buti kuti walo abasinkondonyina bajisi bamausyi baandeene?

▪ Ino kwiita nkobamwiita Jesu bama Juda kuti mu Samariya kwaamba nzi?

▪ Muunzila nzi Jesu mwaamba kuti basikumutobela tabakaboni lufwu?

Cibalo 70

Ikuponya Muntu Wakazyalwa Moofu

ICIINDI bama Juda nobasoleka kumuwaala mabwe Jesu, tanaazwa mu Jerusalemu pe. Mpoonya mu Sabata, walo abasikwiiya kabeenda mumunzi, babona muntu moofu kuzwa naakazyalwa. Basikwiiya babuzya Jesu ategwa: “Rabi, ino nguni uwakacita cibi, sena nguwenya muntu oyu, na mbamuzyala, ncaakazyalwa aboofu?”

Ambweni basikwiiya basyoma mbuli bama rabi bamwi kuti muntu ulakonzya kubisya kali mwida lyabanyina. Pele Jesu waingula ategwa: “Tali oyu muntu uwakacita cibi nobaba abamuzyala, pele nkuti milimo ya-Leza iyubululwe mulinguwe.” Ikoofwaala kwamuntu oyu takuli akaambo kakulubizya kumwi naa cibi cakacitwa amuntu oyu naa bazyali bakwe. Icibi camuntu wakusaanguna Adamu cakapa kuti bantu boonse kabatalondokede aboobo akuba balema mbuli kuzyalwa boofu. Ibulema bwamuntu oyu lino bwapa Jesu coolwe cakuyubulula milimo ya Leza.

Jesu ukankaizya kubindaana ikwakucita zintu ezi. Ulaamba: “Tulyeelede kubeleka milimo yayooyo uwakandituma, nelicili isikati, masiku alasika, nokutakwe muntu uukonzya kubeleka. Nencili munyika ndi mumuni wanyika.” Lino-lino lufwu lwa Jesu luyoomubikka mumudima wacuumbwe kwalo nkwatakonzyi kucita cili coonse. Aciindi awa, walo mmumuni wanyika.

Naamana kwaamba zintu ezi, Jesu waswida mate ansi akukanda bulongo angawo. Wananika bulongo ameso aamoofu oyu akwaamba kuti: “Koya, ukasambe mukaziba ka-Siloamu.” Imuntu oyu wamumvwida. Elyo naacita obo, wakonzya kubona! Elo wakondwa kaka naajoka, wabona kwaciindi cakusaanguna mubuumi bwakwe!

Basimukobonyina abamwi-bamwi bamuzi bakankamana. Babuzya ategwa: “Sena engwe oyu uwali kukala akukumbila.” Bamwi baingula ategwa: “Ngonguwe.” Pele bamwi tabasyomi pe balaamba: “Umukozya buyo.” Pele muntu oyu ulaamba: “Ndime.”

“Ino meso aako akajuka buti?” bantu bayanda kuziba.

“Mwaalumi oyo uutegwa Jesu wakakanda bulongo, wakananika meso aangu, wakandyaambila kuti, Koya ku-Siloamu, ukasambe, nkabela ndakainka, ndaakusamba, ndakakonzya kubona.”

Babuzya balaamba: “Uli kuli?”

Oyu muntu waingula ategwa: “Cita.”

Lino bantu bamutola oyu muntu wakali moofu kubasololi bacikombelo, ba Farisi. Lino abalo batalika kumubuzya mbuli mbwaakatalika-talika kubona. Oyu muntu wapandulula ategwa: “Wakabika bulongo kumeso aangu, ndakasamba, eno ndabona.”

Masimpe, iba Farisi beelede kukkomana akaambo kakuponesyegwa kwasikukumbila! Pele muciindi caboobo, batalika kufwubaazya Jesu. Balaamba: “Muntu oyu tazwi kuli-Leza.” Nkaambo nzi ncobaambila boobu? “Nkaambo tabambi buzuba bwa-Sabata.” Pele ba Farisi bamwi bakankamana balaamba: “Ino inga muntu sizinyonyoono wakonzya buti kucita maleele aali boobu?” (BT) Elyo kwaba kwaandaana akati kabo.

Mpoonya babuzya muntu oyu kuti: “Ino yebo, umwaamba buti, mbwaakakujula meso aako?”

Waingula ategwa: “Musinsimi we.”

Iba Farisi teebaasyoma makani aya pe. Basyoma kuti kuli kuzuminana kumwi akati ka Jesu amuntu oyu kutegwa bacenge bantu. Aboobo kubamba kaambo aka, baita bazyali bamoofu kutegwa babuzigwe. Johane 8:59; 9:1-18.

▪ Nkaambo nzi kakapa kuti muntu oyu aofwaale, alimwi nkaambo nzi katali nkako?

▪ Ino masiku nokutakwe muntu uukonzya kubeleka caamba nzi?

▪ Naaponesyegwa muntu oyu balimvwa buti abo bamuzyi?

▪ Ino ba Farisi baandaana buti akaambo kakuponesyegwa kwamuntu oyu?