bakati: “Nciindi camvula. Tatukonzyi kwiima anze.” (Ezara 10:9, 13; Jeremiya 36:22) Aboobo tacigambyi pe kuti beembeli bakali kukkala mubusena ooko nkwaakazyalilwa Jesu bakabona kuti balo antoomwe amatanga aabo tiibakacili kucezezya anze imasiku mumwezi wa December!

Pele Bbaibbele lyaamba kuti beembeli bakali musyokwe kabeembela matanga aabo imasiku buzuba naakazyalwa Jesu. Mubwini, sikulemba Bbaibbele Luka utondezya kuti aciindi eeco, beembeli “bakali musokwe, beembela butanga bwabo masiku” munsi lya Betelehemu. (Luka 2:8-12) Amubone kuti beembeli mubwini bakali kukkala musyokwe kulutanga, tiibakali kweendeenda buyo anze masikati pe. Imatanga aabo akali musyokwe kulutanga imasiku. Sena bupanduluzi oobo bwakukkala anze buleendelana akutontola alimwi amvwula iiliko ku Betelehemu mu December? Takweendelani pe. Aboobo izyakacitika aciindi cakuzyalwa kwa Jesu zitondezya kuti tanaakazyalwa mu December pe.a

Ijwi lya Leza lilatwaambila buzuba bwini Jesu naakafwa, pele kunyina makani manji alimwi aagaminide ngolijisi kujatikizya buzuba mbwaakazyalwa. Eeci cituyeezya majwi aa Mwami Solomoni aakuti: “Izina ibotu ndibotu kwiinda muunde, abuzuba bwakufwa mbubotu kwiinda buzuba bwakuzyalwa.” (Mukambausi 7:1) Aboobo tacigambyi pe kuti Bbaibbele lipa makani manji aagaminide kujatikizya mulimo alufwu lwa Jesu, pele lipa buyo masyoonto kujatikizya buzuba mbwaakazyalwa.

TEENSYI Bbaibbele lipa makani aajatikizya mazuba aakulyookezya aadumide mubukombi naa mucisi aasekelelwa sunu muzyooko zinji zyamunyika. Aboobo ino kusekelela kucitwa kwakazwa kuli? Ikuti kakuli laibbulali nkomukkala, inga mwayandisya kubona ncaamba mabbuku aali mumo kujatikizya mazuba aakulyookezya aadumide mucisi momukkala. Amulange-lange zikozyanyo zisyoonto buyo.

Isita. Ibbuku litegwa The Encyclopædia Britannica lyaamba kuti: “Kunyina citondezya mu Cizuminano Cipya kuti ipobwe lya Isita lyakali kucitwa.” Ino buzuba bwa Isita bwakatalika buti? Buliswaangene abukombi bwabantu batamuzyi Leza. Nokuba kuti buzuba bwakulyookezya oobu bwaambwa kuti mbwakuyeeya kubuka kwa Jesu, izilengwa zicitwa aciindi ca Isita tazyili zya Bunakristo pe. Mucikozyanyo, ikujatikizya “sulwe waa Isita” uudumide, ibbuku litegwa The Catholic Encyclopedia lyaamba kuti: “Sulwe ncitondezyo cibelesyegwa abantu batamuzyi Leza alimwi lyoonse cali kubelesyegwa kwiiminina buzyazi.”

Kusekelela Mwaka Mupya. Ibuzuba alimwi azilengwa zicitwa lyakusekelela Mwaka Mupya ziliindene mucisi acimwi. Ikujatikizya matalikilo aakusekelela ooku, ibbuku litegwa The World Book Encyclopedia lyaamba kuti: “Imweendelezi muna Roma Julius Caesar wakatalisya buzuba bwamu January 1 kuba Buzuba bwa Mwaka Mupya mu 46 B.C. Bana Roma bakaaba buzuba oobu kuli Janus, leza wamilyango, zitendele alimwi amatalikilo. Imwezi wa January wakaulikwa boobo kuzwa kuzina lya Janus iwakajisi masyu obile—bumwi bwakali kulanga kumbele alimwi bumwi musyule.” Aboobo kusekelela kujatikizya Mwaka Mupya kuzwide kuzilengwa zyabantu batamuzyi Leza.

Halloween. Ikujatikizya buzuba oobu bukozyenye apobwe licitilwa bafwide mbuli mweesyo, ibbuku litegwa The Encyclopedia Americana lyaamba kuti: “Izibeela zyazilengwa ziswaangene apobwe lya Halloween ziliswaangene azilengwa zyapobwe lya Druid [bupaizi bwansiku bwabakuwa baku Britain, France alimwi a Ireland bategwa ba Celt] Bunakristo kabutanatalika. Iba Celt bakali kupobweda baleza basyomwa bobile—leza wazuba alimwi aleza wabafwide (uutegwa Samhain). Ipobwe licitilwa leza wabafwide lyakali kucitwa mu November 1, aakali matalikilo aa Mwaka Mupya waba Celt. Ipobwe licitilwa bafwide bucebuce lyakabikkilizyigwa muzilengwa zya Banakristo.”

Mazuba Aakulyookezya Aambi. Tacikonzyeki pe ikubandika mapobwe oonse aacitwa munyika yoonse. Nokuba boobo, imazuba aakulyookezya aasumpula bantunsi naa mbunga zyabantunsi taakkomanini pe Jehova. (Jeremiya 17:5-7; Incito 10:25, 26) Alimwi kamuyeeyede kuti imatalikilo aamapobwe aacitwa muzina lyabukombi ngaakonzya kutondezya naa alamukkomanisya Leza naa pe. (Isaya 52:11; Ciyubunuzyo 18:4) Injiisyo zyamu Bbaibbele izyaambwa mu Cibalo 16 cabbuku lino zilamugwasya kuzyiba mbwakubona Leza kutola lubazu mumapobwe aajatikizya mazuba aakulyookezya aacitwa munyika.