Cibalo 71

Ikutasyoma Caali Kwaba Farisi

IBAZYALI bamuntu wakali mukumbizi moofu bayoowa nobaitwa kuba Farisi. Balizi kuti kwakaambwa kuti woonse oyo utondezya lusyomo muli Jesu uyootandwa mucikombelo. Ikulesyegwa kuswaangana abambi mubuleya kuli boobu kulakonzya kuleta buyumuyumu kapati, ikapati kumukwasyi mucete. Aboobo bazyali bacenjela kapati.

Iba Farisi babuzya kuti: “Sena oyu mwaneenu, ngomwaamba kuti wakazyalwa moofu? Ino kai wabona buti sunu?”

Ibazyali bazumina balaamba: “Tulizi kuti ngomwaneesu, akwalo kuti wakazyalwa moofu. Pele tatuzi mbwaabona eno, akuti nguni uwakajula meso aakwe.” Masimpe mwanaabo weelede kuti wabaambila makani oonse aacitika pele cabusongo bazyali balaamba: “Amumubuzye, wakomena kale, ulalyaambilila mwini.”

Aboobo ba Farisi bamwiita muntu oyu alimwi. Lino basoleka kumukonga kwiinda mukumwaambila kuti bajana bumboni bwakuti Jesu ulaamulandu. Balaamba: “Kolumba Leza, tulimuzi oyu muntu kuti mucitazibi.”

Oyu muntu wakali moofu taukaki mulandu ngobaamba pe, ulaamba: “Na mucitazibi nsizi.” Pele wayungizya ategwa: “Pele ncintu comwe ncenzi, kuti ndakali moofu, eno ndabona.”

Ikusoleka kumujanina mulandu mukulungulula kwakwe, ba Farisi bamubuzya alimwi ategwa: “Wakakucita buti? Wakajula buti meso aako?”

Oyu muntu watongooka ategwa: “Ndazwa akumwaambila eno, pele tamumvwide. Nkaambonzi ncomuyanda kumvwa alimwi?” Munzila yakubbookezya wabuzya ategwa: “Sena anywebo muyanda kuba basikwiiya bakwe?”

Oku kwiingula kwabakalazya kapati ba Farisi. Balaamba: “Nduwe sikwiiya wakwe, pele swebo tuli basikwiiya ba-Musa. Tulizi kuti Leza wakaamba kuli-Musa, pele oyu muntu, tatumuzi nkwazwa.”

Katondezya kugambwa kapati, oyu mukumbizi mubombe waingula ategwa: “Eno nceeci iciyoosya, mbomutezi nkwazwa, nokubaboobo wakandijula meso aangu.” Inga twaamba nzi kumakani aaya? Oyu mukumbizi waamba kaambo kazibidwe ategwa: “Tulizi kuti Leza tamvwi bacitazibi, pele muntu woonse uukomba Leza, akucita mbwayanda, ngonguwe ngwamvwa. Kuzwa kumatalikilo aanyika takunamvwidwe umwi wakajulide meso aamuntu uwakazyalwa moofu.” Aboobo kalalibonya kabotu-kabotu kuti kaambo keelede kukosolwa boobu: “Oyo muntu naatali kuzwa kuli-Leza, naatakonzya kucita cintu.”

Iba Farisi tabakwe cakwiingula kukaambo kaluzi alimwi kasalala boobu. Baalilwa kwiile kwaazumina makani aaya aamasimpe aboobo batalika kutukila muntu oyu ategwa: “Wakazyalwa muzibi yebo, sena nduwe ooti twiisye?” Bamane bamutanda, kulibonya kuti bamutanda amucikombelo.

Jesu naamvwa makani ngobacita, wamuyandaula muntu oyu akwaamba kuti: “Sena wamusyoma Mwana a-Leza?”

Mukwiingula oyu muntu wakali moofu ulaamba: “Ino nguni, Omwami, kuti musyome?”

Jesu ulaamba: “Ngonguwe ngoambaula awalo.”

Ndilyonya, muntu oyu wamufwugamina Jesu akwaamba kuti: “Omwami, ndasyoma.”

Mpoonya Jesu wapandulula ategwa: “Nkaambo kakubeteka ncendazida munyika eyi, kuti abo abataboni babone, akuti abo ababona babe boofu.”

Bamvwe boobo iba Farisi baswiilila babuzya ategwa: “Sena aswebo tuli boofu?” Ikuti nobazumina kuti mboofu mumizeezo ikukazya kwabo nkobakazya Jesu nokwalekelelwa. Mbubwenya Jesu mbwaabaambila: “Kuti nomwali boofu nomutajisi cibi.” Pele cankazi bazumanana kwaamba kuti tabali boofu alimwi tabayandiki kumunikilwa munzila yakumuuya. Aboobo Jesu ulaamba: “Pele eno mwaamba kuti, Tulabona. Cibi canu mpocicili.” Johane 9:19-41.

▪ Nkaambo nzi bazyali bamuntu wakali moofu mukumbizi ncobayoowa nobaitwa kuba Farisi, aboobo baingula buti cabucenjezu?

▪ Ino ba Farisi basoleka buti kukonga muntu oyu wakali moofu?

▪ Nkaambo kali buti kaluzi ikaamba muntu oyu ikanyemya ba Farisi?

▪ Nkaambo nzi ba Farisi ncobatakwe mbobalekelelwa kukazya nkobakazya Jesu.

Cibalo 72

Jesu Watuma Ibali 70

MUUMWAKA wa 32 C.E., imyaka yotatwe iizwide kuzwa ciindi calubbapatizyo lwa Jesu. Walo abasikwiiya bakwe bakali ku Pobwe lya Zilawo ku Jerusalemu alimwi kuboneka kuti bacili munsi-munsi. Mane, eyi myezi iili cisambomwi yacaala yamulimo wakwe Jesu waimanina mu Judaya naa mutalaa Mulonga wa Jordano mucooko ca Pereya. Obu busena buyandika kubelekwa.

Masimpe, nolyakamana pobwe lya Kwiindilila lyamu 30 C.E., Jesu wakatola myezi iili lusele kakambauka mu Judaya. Pele kuzwa ciindi bama Juda nobakasola kumujaya kupobwe lya Kwiindilila lyamu 31 C.E., imwaka omwe acisela wakatobela wakaumanina ku Galilaya kakambauka cakufwundumana. Muciindi eco, wakabaambunga mpati iiyiisidwe kabotu yabakambausi, njaatakajisi musyule omu. Aboobo lino watalisya mulimo wakukambauka wamamanino mu Judaya.

Jesu watalisya mulimo oyu kwiinda mukusala basikwiiya bali 70 akubatuma bobile-bobile. Aboobo kuli tubunga tuli 35 antoomwe twabakambausi ba Bwami beelede kubeleka busena obu. Aaba bamusolwedela muminzi amumasena oonse Jesu mwalibambilide kuyoosika ambweni kasindikilidwe abaapostolo bakwe.

Muciindi cakwaambila bali 70 kuti baye muzikombelo, Jesu wabaambila kuti banjile mumaanda aabantu kapandulula kuti: “Kufumbwa ŋanda njomuti kanjile, musaangune kuti, Luumuno alube kuŋanda ino. Kuti mwali omo siluumuno, luumuno lwanu lunookede kulinguwe.” Ino mulumbe wabo ngwamusyobo nzi? Jesu ulaamba: “Mukabaambawide kuti, Bwami bwa-Leza buli afwaafwi kulindinywe.” Kujatikizya milimo yabaaba bali 70, Matthew Henry’s Commentary yaamba kuti: “Mbubwena mbuli Mwami wabo, kufwumbwa nkubakali kuswaya, bakali kukambauka ŋanda aŋanda.”

Imalailile aa Jesu kuli baaba bali 70 alikonzyenye ayaalya ngaakapede bali 12 ciindi naakabatumide kuyakukambauka mu Galilaya ciindi citandila kumwaka musyule. Aba bali 70 tanaabacenjezya buyo kujatikizya kukazigwa nkobayooswaanganaa nkuko, ikubagwasya kulibambila kutola mulumbe kuli basiŋanda, pele wabapa anguzu zyakuponya baciswa. Aboobo aakusika Jesu kwaakwiinda ciindi cisyoonto, ibanji banooyandide kumubona Mwami ulaa basikwiiya bakonzya kucita zintu zibotu boobu.

Ikukambauka kwabaaba bali 70 akutobela kwa Jesu kwatola buyo ciindi cisyoonto. Ndilyona itubunga tuli 35 twabakambausi ba Bwami twatalika kupiluka kuli Jesu. Baamba cakukkomana ategwa: “Omwami, abalo badaimona batumvwa nkaambo kezina lyako.” Makani aali boobu aamulimo mubotu masimpe amukonda Jesu nkaambo ulaamba: “Ndakamubona Saatani ulaloka kujulu mbuli lulabo. Amubone, ndamupa bwami bwakulyata nzoka atubanze.”

Jesu ulizi kuti bwaakumana kuzyalwa Bwami bwa Leza kumamanino aaciindi, Saatani abadaimona bakwe bayootandwa kuzwa kujulu. Pele lino ooku kutandwa kwabadaimona batalibonyi kwiinda mubantu buyo ncisyomezyo ciyungizidwe cazintu ziyoocitika. Aboobo Jesu waamba kuwa kwa Saatani kuzwa kujulu kwakumbele kuti ncintu ciyoocitika ncobeni. Nkokuti muunzila yacikozyanyo kuti ibali 70 bapegwa bwami bwakulyata nzoka atubanze. Pele Jesu ulaamba: “Mutabotelwi kuti badaimona bamumvwa, pele amubotelwe kuti mazina aanu alilembedwe kujulu.”

Jesu wasekelela kapati elyo walumba Usyi caantangalala akaambo kakubelesya babelesi bakwe aba babombede munzila yanguzu boobu. Kaambila basikwiiya bakwe wati: “Ali acoolwe meso aabona zintu nzomubona nywebo. Nkaambo ndamwaambila kuti, basinsimi banjibanji abami bakali kuyanda kubona zintu nzomubona, pele tabakazibwene, akumvwa nzomumvwa, pele tabakazimvwide.” Luka 10:1-24; Matayo 10:1-42; Ciyubunuzyo 12:7-12.

▪ Nkuli nkwaakakambaukila Jesu mumyaka yotatwe yakusaanguna mumulimo wakwe, alimwi mbusena nzi mbwaabeleka mumyezi iili cisambomwi yamamanino?

▪ Nkuli nkwaabatuma Jesu ibali 70 kuti bakajane bantu?

▪ Nkaambo nzi Jesu ncaambila kuti wakamubona Saatani ulaloka kuzwa kujulu?

▪ Muunzila nzi ibali 70 mubakonzya kulyata nzoka atubanze?