Cibalo 91

Naabusigwa Lazaro

JESU antoomwe abaabo bamusindikila lino basika kucuumbwe ca Lazaro. Mane nimpangala iisinkidwe bbwe amulyango. Jesu ulaamba: “Amugwisye bbwe.”

Marta wakazya nkaambo tanamvwisya Jesu ncakanza kucita. Ulaamba: “Omwami, kuciindi cino ulanunka, nkaambo ulifwide mazuba one.”

Pele Jesu wabuzya ategwa: “Sena nsikwe nendakwaambila kuti, Na wasyoma ulabona bulemu bwa-Leza?”

Nkabela ibbwe lyagwisigwa. Mpoonya Jesu walungumana kujulu wapaila ategwa: “Taata, ndakulumba nkaambo kakuti wandimvwa. Kwalo ndali kuzi kuti ulandimvwa lyoonse, pele ndaamba obo nkaambo kamakamu aandizingulukide, kuti bazumine kuti nduwe owakandituma.” Jesu wapaila caantangalala kutegwa bantu bazibe kuti ncayanda kucita, cilacitwa kwiinda munguzu nzyatambula kuzwa kuli Leza. Mpoonya waompolola ajwi pati ulaamba: “Lazaro, kozwa omo.”

Eelyo Lazaro wazwa. Maboko aakwe amaulu acizambaidwe muzisani zyakuzikwa azyalo akwalo kumeso kuzambaidwe cisani. Jesu ulaamba: “Amumwaangunune, mumuleke aende.”

Nobabona maleele aya, bama Juda banji baboolede kuzyooumbulizya Mariya a Marta bamusyoma Jesu. Pele bamwi baunka kuyooambila ba Farisi zyacitika. Ndilyonya, balo abapaizi basilutwe babamba muswaangano Wankuta Mpati yaba Juda.

Inkuta Mpati ibikkilizya Kayafa mupaizi mupati uuliko lino antoomwe aba Farisi aba Saduki, bapaizi basilutwe alimwi abakali bapaizi bapati musyule. Aba balilizya-lizya ategwa: “Tucite buyani? Nkaambo muntu oyu ulacita malele manji. Kuti twamuleka buyo, boonse balasyoma nguwe, abalo ba-Roma balasika bazootunyanga busena bwesu amusyobo wesu.”

Nokuba kuti basololi bacikombelo balazumina kuti Jesu “ulacita malele manji,” ncobabikkilide kapati maanu zyuuno zyabo alimwi abweendelezi. Ikubusigwa kwa Lazaro, kwabagambya kapati ba Saduki nkaambo tabasyomi kuti kuli kubusigwa.

Kayafa, walo ulangilwa kuti mu Saduki lino waambaula ategwa: “Tamukwe ncomuzi, nokuba kweezeezya kuti ncibotu kulindinywe kuti muntu omwe afwide bantu, kuti musyobo woonse utafwidilili.”

Leza nguwapa kuti Kayafa aambe boobu nkaambo kumbele mwaapostolo Johane wakazyoolemba kuti: “Eno eci ncaakaamba [Kayafa], takalyaambilide lwakwe mwini.” Ncaakali kwaamba awa Kayafa ncakuti Jesu weelede kujaigwa ikukwabilila kuti atayaambele kunyonyoona zyuuno zyabo zyabweendelezi. Pele kweelana a Johane, ‘Kayafa wakasinsima kuti Jesu wakeelede kufwa kutali kufwida musyobo oyo walo, pele kuti akabunganye antoomwe bana ba-Leza.’ Alimwi mmasimpe mmakanze aa Leza kuti Mwanaakwe afwe abe cinunuzyo caboonse.

Kayafa lino wazwidilila kuyunga Basinkuta Mpati kuti bakanze kujaya Jesu. Pele Jesu, ambweni naamvwa makanze aaya kuzwa kuli Nikodemo umwi wa Basinkuta Mpati wali mulongwe kulinguwe, wakuzwa kubusena obu. Johane 11:38-54.

▪ Nkaambo nzi Jesu ncaapaila cantangalala katana mubusya Lazaro?

▪ Ino abo bakabona kubusigwa oku bakalimvwa buti?

▪ Ncinzi ciyubulula bubi bwa Basinkuta Mpati?

▪ Ino Kayafa wakajisi makanze nzi, pele Leza wakamubelesya kuti asinsime nzi?

Cibalo 92

Basicinsenda Bali Kkumi Baponesyegwaa Jesu Kaya ku Jerusalemu Lwamamanino

JESU watyompya makanze Aankuta Mpati aakumujaya kwiinda mukuzwa mu Jerusalemu akuunka kumunzi uutegwa Efraimu ambweni ulaa musinzo ulaa makkilomita aali 24 naa aainda awa kugama kunyikaa ku Jerusalemu. Oko wakkala abasikwiiya bakwe ikulamfwu abasinkondonyina.

Nokuba boobo ipobwe lya Kwiindilila lyamu 33 C.E. lilafwaafwi aboobo Jesu uli mulweendo alimwi. Wainda mu Samariya akuyakunjila mu Galilaya. Olu ndweendo lwakwe lwamamanino kalutana buyo lufwu lwakwe. Kabacili mu Galilaya, walo abasikwiiya bakwe ambweni basangana bamwi bali mulweendo kuya ku Jerusalemu kupobwe lya Kwiindilila. Batola nzila iinda mucooko ca Pereya, kujwe aa Mulonga wa Jordano.

Mbwaatalikila buyo lweendo olu, ciindi Jesu naanjila mumunzi wa Samariya naa Galilaya, waswaanganizigwa baalumi bali kkumi balaa cinsenda. Eci cilwazi cibyaabi cilalya zizyo zyamubili wamuntu asyoonto-syoonto—minwe yakumaanza, yakumaulu, matwi, mpemo alimwi amilomo. Ikukwabilila bamwi kuti batatambukilwi, Mulawo wa Leza kujatikizya sicinsenda waamba kuti: “Alivumbe kumulomo kati, ‘Nsisalali, nsisalali.’ Unookkede lyoonse mbubonya oobo kwaciindi najisi bulwazi oobo, . . . uleelede kukkala alikke.” (BT)

Basicinsenda bali kkumi balautobela Mulawo kujatikizya basicinsenda aboobo baima kulaale a Jesu. Pele baongolola amajwi mapati ategwa: “Omwami Jesu, tufwide luzyalo.”

Naababona aalamfwu Jesu ulaamba: “Kamuya mukalitondezye kubapaizi.” Jesu waamba boobu nkaambo Mulawo wa Leza ulabazumizya bapaizi kwaamba kuti basicinsenda basalala bapona kuzwa kucilwazi cabo. Munzila eyi bali boobu balazumizigwa kukkala antoomwe abantu bapona kabotu alimwi.

Aba bali kkumi balaa lusyomo munguzu zya Jesu zyamaleele. Aboobo bafwambaana kuunka kuyoobona bapaizi nokuba kuti tabana ponesyegwa. Kabacili munzila, lusyomo lwabo muli Jesu lwalumbulwa. Batalika kubona akulimvwa kuti bapona!

Ibali fwuka akati kabaaba basicinsenda basalazigwa bazumanana mulweendo lwabo, pele umwi sicinsenda mu Samariya wapiluka kuyooyandaula Jesu. Nkaambo nzi? Nkaambo walumba kapati kucintu camucitikila. Walumbaizya Leza ajwi pati elyo naamujana Jesu, wavwundama kumatende aakwe, wamulumba.

Mukwiingula Jesu ulaamba: “Sena tabasalede abali kumi? Ino bali kuli abali musanu mubane? Sena taakwe uwaboola kulumbaizya Leza, pele oyu uwamasi?”

Mpoonya waambila oyu mwaalumi mu Samariya ategwa: “Buka uende, lusyomo lwako lwakufutula.”

Ciindi notubala makani aa Jesu aakuponya basicinsenda bali kkumi, tweelede kuyeeyesya ciiyo icili mumubuzyo wakwe wakuti: “Ino bali kuli abali musanu mubane?” Ikutalumba kwakatondezyegwa abaaba bali fwuka nkukompama kupati kapati. Sena tuyooba mbuli mu Samariya, ikutondezya kuti tulalumba kuzintu nzyotutambula kuzwa kuli Leza kubikkilizya acisyomezyo cabuumi butamani munyika mpya ya Leza yabululami? Johane 11:54, 55; Luka 17:11-19; Levitiko 13:16, 17, 45, 46; Ciyubunuzyo 21:3, 4.

▪ Ino Jesu waatyompya buti makanze aakumujaya?

▪ Nkuli Jesu nkwaya lino, alimwi nkuli kwini nkwagama?

▪ Nkaambo nzi basicinsenda ncobaimina kulaale, alimwi nkaambo nzi Jesu ncaabaambila kuti baye kubapaizi?

▪ Nciiyo nzi ncotukonzya kwiiya kuzwa kuliceeci cakacitika?