Mumwaanda wamyaka wakusaanguna, kabunga kasyoonto ‘kabatumwa abaalu ku Jerusalemu’ kakabeleka kakali kabunga keendelezya alimwi kakali kusala zyakucita ziyandika kapati zijatikizya mbungano yoonse ya Banakristo bananike. (Milimo 15:2) Akaambo kakubandika ncaamba Magwalo alimwi akutobela busolozi bwamuuya wa Leza, bakali kuzuminana muzintu nzyobakali kusala kucita. (Milimo 15:25) Nzila eeyi njiibelesyegwa amazuba aano.

Kalabelesyegwa a Leza kucita kuyanda kwakwe. Bakwesu bananike ibali mu Kabunga Keendelezya balaliyanda kapati Jwi lya Leza alimwi balaaluzyibo lunji mukulanganya makani aajatikizya mulimo mboweelede kucitwa alimwi azintu zimbi zyakumuuya. Balaswaangana nsondo ansondo kulanganya ziyandika zyabunyina bwanyika yoonse. Mbubwenya mbuli mumwaanda wamyaka wakusaanguna, malailile aazwa mu Bbaibbele alapegwa kwiinda mumagwalo naa mubalangizi beendeenda alimwi anzila zimbi. Eeci cilabagwasya bantu ba Leza kuti kabayeeya alimwi akucita zintu calukamantano. (Milimo 16:4, 5) Kabunga Keendelezya kalalanganya mulimo wakubamba cakulya cakumuuya, kalabakulwaizya boonse kuti kababikka mulimo wakukambauka mubusena bwakusaanguna, alimwi kaleendelezya mulimo wakusala bakwesu beelela kupegwa mikuli.

Kalabutobela busolozi bwamuuya wa Leza. Kabunga Keendelezya kalangila ku Mwami Wakujulu Aansi, Jehova, alimwi aku Mutwe wambungano, Jesu, kuti babasololele. (1 Bakorinto 11:3; Baefeso 5:23) Bakwesu bamu Kabunga Keendelezya tabaliboni kuti mbebasololi babantu ba Leza. Balo antoomwe a Banakristo bananike boonse, “bazumanana kutobela Mwanaambelele [Jesu] kufwumbwa ooko nkwaya.” (Ciyubunuzyo 14:4) Kabunga Keendelezya kalakkomana kapati ciindi notukapailila alimwi anotupailila mulimo ngokacita.

• Mbaani bakali mukabunga keendelezya mumwaanda wamyaka wakusaanguna?

• Mbuti Kabunga Keendelezya mbokayandaula busolozi bwa Leza mazuba aano?

Zina lya Chihebrayo lyakuti Beteli, lyaamba “Ŋanda ya Leza.” (Matalikilo 28:17, 19, bupanduluzi buyungizyidwe) Ndizina lyeelela lyaamba maanda ngobabelesya Bakamboni ba Jehova mumasena aasiyene-siyene nyika yoonse mboizulwa kwalo mulimo wakukambauka nkoulanganizyigwa. Kabunga Keendelezya kabelekela kumaofesi mapati mu New York State, ku U.S.A., alimwi kalalanganya mulimo uucitwa mumaofesi aamitabi muzisi zinji. Mbuli nkamu, aabo babelekela mumasena aaya baitwa kuti mukwasyi wa Beteli. Mbubwenya mbuli mukwasyi, balakkala, balabeleka, balalya, alimwi akwiiya Bbaibbele antoomwe mulukamantano.—Intembauzyo 133:1.

Mbusena bulibedelede kwalo bamukwasyi wa Beteli nkobabeleka cakulyaaba. Mumaanda aa Beteli oonse, kuli Banakristo bamaalumi alimwi abamakaintu ibalyaabide kucita kuyanda kwa Leza alimwi amulimo wa Bwami kwaciindi coonse. (Matayo 6:33) Kunyina uuvwola, nokuba boobo boonse balapegwa masena aakoona, cakulya alimwi amali masyoonto aakuligwasyilizya. Boonse a Beteli balijisi mulimo wakucita, bamwi babelekela mumaofesi, muncikini naa muŋanda yakulida. Bamwi babelekela muŋanda yakusimbila mabbuku, kusalazya mumaanda, kuwasya zisani, kusalazya busena, naa kucita milimo imbi buyo.

Mbusena bucitilwa milimo iigwasyilizya mulimo wakukambauka Bwami. Mulimo mupati uucitwa mumaanda aa Beteli nkugwasya kuti kasimpe kamu Bbaibbele kasike kubantu banji. Broshuwa eeyi ncimwi cacikozyanyo camilimo eeyo. Yakalembwa kwiinda mubusolozi bwa Kabunga Keendelezya. Yakatumwa mumasena aindene-indene kwiinda mukubelesya nzila yakutambikizyanya makani akkompyuta kutubunga twabasanduluzi nyika yoonse mboizulwa. Yakasimbwa kwiinda mukubelesya mincini iisimba mabbuku manji mukaindi kasyoonto buyo iili mumaanda aa Beteli, alimwi yakatumwa kumbungano ziinda ku 110,000 nyika yoonse mboizulwa. Ciindi mulimo uuli boobu nuucitwa, bamukwasyi wa Beteli balagwasyilizya mumulimo uuyandika kapati weelede kucitwa cakufwambaana—kukambauka makani mabotu.—Marko 13:10.

• Mbaani babelekela a Beteli, alimwi nzintu nzi nzyobapegwa?

• Mulimo nzi uuyandika kapati uugwasyilizyigwa amilimo iicitwa mumaanda aa Beteli?

Bamukwasyi wa Beteli balabeleka mumadipatimenti aaindene-indene, kulanganya mulimo wakukambauka mucisi comwe naa kwiinda waawo. Balakonzya kubeleka mutubunga twabasanduluzi, kusimba mamagazini amabbuku, kuyobola mabbuku, kulekkooda zyakuswiilila naa mavidiyo naa kulanganya makani aambi aacilawo.

Kkomiti Yamutabi njiyeendelezya mulimo. Kabunga Keendelezya kalapa mukuli wakweendelezya ofesi yamutabi ku Kkomiti Yamutabi iibambwa abaalu beelela botatwe naa kwiinda waawo. Kkomiti izyibya Kabunga Keendelezya kujatikizya kuyaambele kwamulimo mucisi cimwi acimwi ceendelezyegwa akkomiti alimwi amapenzi aali woonse aakonzya kuboola. Malipooti aali boobo agwasya Kabunga Keendelezya kusala makani aayelede kubikkilwa maano mumabbuku aayoolembwa kumbele, mumiswaangano yambungano alimwi amiswaangano mipati. Baiminizi ba Kabunga Keendelezya balatumwa ciindi aciindi kuswaya mitabi akupa busolozi kuli baabo bali muma Kkomiti aa Mitabi mbobakonzya kulanganya mikuli yabo. (Tusimpi 11:14) Pulogilamu yaalubazu iibikkilizya amakani aapegwa amwiiminizi waku maofesi mapati ilabambwa kutegwa bantu bakkala mucilawo cilanganizyigwa amutabi bakulwaizyigwe.

Mbungano zyamucilawo zilagwasyilizyigwa. Kuofesi yamutabi kuli bakwesu bajisi mikuli yakuzumizya kubambwa kwambungano zipya. Bakwesu alimwi balasololela mulimo wabapainiya, bamisyinali alimwi abalangizi bamabazu ibabelekela mucilawo cilanganizyigwa amutabi. Balabikka bubambe bwamiswaangano yabbazu ayacooko, balalanganya kuyakwa kwa Maanda aa Bwami mapya, alimwi akubona kuti mabbuku atumwa kumbungano kubapa nzyobayandika. Mulimo woonse uucitwa kumutabi ugwasyilizya mulimo wakukambauka kuti ucitwe kabotu-kabotu kweelana abubambe.—1 Bakorinto 14:33, 40.

• Ino Makkomiti aa Mitabi akagwasya buti Kabunga Keendelezya?

• Mikuli nzi iilanganizyigwa aofesi yamutabi?