Ŋanda ya Bwami ya Bakamboni ba Jehova iili yoonse ililembedwe zina lya Leza lisalala. Aboobo, tulimvwa kuti ncoolwe alimwi ncibeela ciyandika cabukombi bwesu busalala kutola lubazu mumulimo wakusalazya ŋanda eeyi kutegwa kaisalala, alimwi kailibonya kabotu. Boonse balakonzya kutola lubazu.

Amulisungule kusalazya yamana miswaangano. Yamana miswaangano, bakwesu abacizyi calukkomano balasalazya ŋanda ya Bwami. Ciindi comwe ansondo balaisalazya cakulomya. Mwaalu naa mukutausi uleendelezya mulimo, kanji-kanji kwiinda mukutobela mulongo wazintu zyeelede kucitwa. Kweelana azintu zyeelede kucitwa, bakwesu abacizyi balalisungula kupyaanga, kukolopa, kukunkumuna kasuko, kwaanga zyuuno, kusalazya zimbuzi, kusalazya magilazi, kusowa dooti alimwi akusalazya lubuwa. Ciindi comwe amwaka buzuba bulabikkwa bwakusalazya cakulomya. Kwiinda mukubapa milimo imwi bana, tubayiisya kuti kababulemeka busena bwesu bwakukombela.—Mukambausi 5:1.

Amulisungule kugwasyilizya mumulimo wakubambulula uuli woonse uuyandika. Mwaka amwaka Ŋanda ya Bwami ilalingulwa mukati aanze. Kweelana azintu nzyobajana mukulingula ooku, mulimo wakubambulula ulacitwa kutegwa ŋanda kaiboneka kabotu alimwi kucita boobu lyoonse kulagwasya kutegwa kakutabelesyegwi mali manji. (2 Makani 24:13; 34:10) Ŋanda ya Bwami iisalala alimwi iibambwa kabotu mbobusena bweelede kukombela Leza wesu. Kwiinda mukutola lubazu mumulimo ooyu, tutondezya kuti tulamuyanda Jehova akuti tulaabikkila maano masena eesu aakukombela. (Intembauzyo 122:1) Alimwi eeci cilabakulwaizya kapati bantu bamucilawo.—2 Bakorinto 6:3.

• Nkaambo nzi ncotweelede kububikkila maano busena bwesu bwakukombela?

• Mbubambe nzi bubikkidwe kutegwa Ŋanda ya Bwami kaisalala?

Sena mulayanda kuvwuntauzya kutegwa muyungizye luzyibo lwanu lwamu Bbaibbele? Sena kuli lugwalo, muntu, busena, naa cintu cimwi caambidwe mu Bbaibbele ncomuyanda kuzyiba? Sena kuli nomwakalibuzya naa Jwi lya Leza lilakonzya kumugwasya kujatikizya nzyomulibilika? Amukabelesye laibbulali iili ku Ŋanda ya Bwami.

Ilijisi zibelesyo zigwasya kuvwuntauzya. Ambweni, kuli mabbuku aambi ngomutajisi aapandulula zyamu Bbaibbele a Bakamboni ba Jehova aamumwaambo wanu. Pele, laibbulali iili ku Ŋanda ya Bwami ilijisi bunji bwamabbuku aakamwaigwa ino-ino. Alimwi ilakonzya kuti kaijisi ma Bbaibbele aabusanduluzi bwiindene-indene, bbuku lipandulula mabala, amabbuku aambi aagwasya kuvwuntauzya. Mulaangulukide kubelesya laibbulali kaitanatalika miswaangano alimwi anoyamana. Ikuti kakuli kkompyuta, ilakonzya kuti kaijisi Watchtower Library. Eeyi nipulogilamu yaakkompyuta iijisi mabbuku eesu manji alimwi acibeela cigwasya kutegwa kacitakatazyi kuvwuntauzya mwalo momukonzya kulemba mutwe wamakani umwi, bbala, naa lugwalo kutegwa muvwuntauzye.

Ilagwasya kubana bacikolo mu Muswaangano wa Buumi Amulimo. Mulakonzya kwiibelesya laibbulali iili ku Ŋanda ya Bwami ciindi nomulibambila makani aanu. Mulangizi wa Muswaangano wa Buumi Amulimo nguulanganya laibbulali. Nguujisi mulimo wakubona kuti mabbuku mapya abikkwa alimwi akuti abikkwa munzila iili kabotu. Walo naa bayi banu ba Bbaibbele balakonzya kumutondezya mbomukonzya kwaajana makani ngomuyanda. Nokuba boobo, kunyina mabbuku aamulaibbulali ayelede kugusyigwa mu Ŋanda ya Bwami. Alimwi buya, tatweelede kuba bayamba akulemba-lemba mumabbuku aaya. Caantangalala Bbaibbele lilaamba kuti kutegwa ‘tujane luzyibo lwa Leza,’ tweelede kuba aluyandisisyo lwakuluyandaula “mbuli mbono zisisidwe.” (Tusimpi 2:1-5) Laibbulali iili ku Ŋanda ya Bwami ilakonzya kumugwasya kutegwa mutalike kuluyandaula.

• Nzibelesyo zili buti zyakuvwuntauzyizya zijanika mulaibbulali iili ku Ŋanda ya Bwami?

• Nguni uukonzya kumugwasya kutegwa mucikonzye kwiibelesya kabotu laibbulali?

Jesu Kristo wakaambila basikumutobela kuti: “Aumunike mumuni wanu kubantu kutegwa babone milimo yanu mibotu akupa bulemu kuli Uso uuli kujulu.” (Matayo 5:16) Akaambo kaceeci, tulazibelesya kabotu nzila zyasayaansi zyamazuba aano kubikkilizya a Intaneti. Webbusati yesu ya jw.org, njenzila iizumizyidwe kujana makani kujatikizya milimo anzyobasyoma Bakamboni ba Jehova. Ncinzi cijanika awebbusaiti eeyi?

Bwiinguzi bwamu Bbaibbele kumibuzyo iibuzyigwa-buzyigwa. Mulakonzya kujana bwiinguzi kumibuzyo iimwi iiyandika kapati bantu njibabuzya. Mucikozyanyo, tulakiti yakuti Sena Kupenga Kuli Nokuyoomana? ayakuti Sena Ncobeni Bafwide Balakonzya Kupona Alimwi? alajanika a Intaneti mumyaambo iinda ku 600. Alimwi mulakonzya kujana Bbaibbele lya Busanduluzi Bwanyika Mpya mumyaambo iinda ku 130, alimwi amabbuku aapandulula Bbaibbele, kubikkilizya abbuku lyakuti Ino Ncinzi Cini Bbaibbele Ncoliyiisya? alimwi amamagazini mapya aa Ngazi Yamulindizi a Sinsimuka! Bunji bwamabbuku aaya alakonzya kubalwa naa kuswiililwa a Intaneti naa kwaakkopa kaali ma MP3, PDF naa EPUB. Mane buya mulakonzya kupulinta mapepa aali mbwaabede akupa muntu uutondezya luyandisisyo mumwaambo wakwe. Mavidiyo aajisi mabbuku aamumyaambo minji yakutambaika nkwaali. Mulakonzya kukkopa zisobano zyakuswiilila buyo, zisobano zyamu Bbaibbele, alimwi anyimbo zinonezya kuswiilila ciindi nomulyookezya.

Makani aamasimpe aajatikizya Bakamboni ba Jehova. Acimbi cijanwa, makani mapya alimwi azibeela zyamavidiyo zijatikizya mulimo wesu wanyika yoonse, zintu zicitika kujatikizya Bakamboni ba Jehova alimwi amakani aamba zyalugwasyo lwesu nokucitika ntenda. Mulakonzya kujana makani aamba zyamiswaangano yacooko iilangilwa alimwi amakkeyala aamaofesi eesu aamitabi.

Kwiinda mukubelesya nzila eezyi, tumunika mumuni wakasimpe kumasena woonse aamunyika. Bantu ibazwa muzyooko zyoonse zyanyika kubikkilizya aku Antarctica, balagwasyigwa. Tupailila kuti “ijwi lya Jehova lizumanane kumwaigwa cakufwambaana” munyika yoonse kutegwa Leza alemekwe.—2 Batesalonika 3:1.

• Ino webbusaiti ya jw.org ibagwasya buti bantu banji kwiiya kasimpe kamu Bbaibbele?

• Ncinzi ncomunga mwayanda kulangaula awebbusaiti yesu?