1. Nkaambo nzi cikwati camumulawo ncociyandika kutegwa kube lukkomano mumukwasyi?

Makani mabotu azwa kuli Jehova, Leza uukkomene walo uuyanda kuti kakuli lukkomano mumikwasyi. (1 Timoteyo 1:11) Ngowakatalisya cikwati. Kutegwa kube lukkomano mumukwasyi, cikwati camumulawo cilayandika nkaambo cipa kuti bana bakomezyegwe kabotu. Banakristo beelede kulemeka milawo yamucisi mobakkala iijatikizya kulembya cikwati.​—Amubale Luka 2:1, 4, 5.

Ino Leza ucibona buti cikwati? Uyanda kuti mwaalumi amukaintu kabakwetene lyoonse. Jehova uyanda kuti mulumi amukaintu kabasyomeka kumweenzinyina. (Bahebrayo 13:4) Kulekana ulakusulaika. (Malaki 2:16) Pele ulabazumizya Banakristo kulekana akukwatwa naa kukwata uumbi ikuti ngobakwetene limwi wacita bumambe.​—Amubale Matayo 19:3-6, 9.

2. Ino mwaalumi amukaintu beelede kweendelezyanya buti?

Jehova wakalenga baalumi abamakaintu kutegwa kabagwasyanya milimo mucikwati. (Matalikilo 2:18) Mbwali mutwe wamukwasyi, mulumi weelede kubajanina nzyobayandika bamukwasyi wakwe kumubili alimwi akubayiisya kujatikizya Leza. Weelede kumuyanda mukaintu wakwe amoyo woonse. Mulumi amukaintu beelede kuyandana akulemekana. Mbwaanga mulumi amukaintu boonse tabalondokede, kwiiya kulekelela kulayandika kapati kutegwa kube lukkomano mucikwati.​—Amubale Baefeso 4:31, 32; 5:22-25, 33; 1 Petro 3:7.

3. Sena mweelede kumusiya ngomukwetene limwi kuti kakunyina lukkomano mucikwati?

Kuti kamujisi mapenzi mucikwati canu, nyoonse nyobilo mweelede kusolekesya kuyandana. (1 Bakorinto 13:4, 5) Ijwi lya Leza talikulwaizyi kwaandaana kuti ibe nenzila yakumana mapenzi aatayi koomoonga mucikwati.​—Amubale 1 Bakorinto 7:10-13.

4. Nobana, ino Leza uyanda kuti kamupona buumi buli buti?

Jehova uyanda kuti kamukkomene. Ulamupa lulayo lugwasya kapati kujatikizya mbomukonzya kukkomana mubukubusi bwanu. Uyanda kuti mugwasyigwe kubusongo aluzyibo lwabazyali banu. (Bakolose 3:20) Jehova alimwi uyanda kuti mujane lukkomano iluboola kwiinda mukubelekela Mulengi wanu alimwi a Mwanaakwe.​—Amubale Mukambausi 11:9–12:1; Matayo 19:13-15; 21:15, 16.

5. Nobazyali, mbuti mbobakonzya kujana lukkomano bana banu?

Mweelede kubeleka canguzu kutegwa mujanine bana banu cakulya, kwakukkala alimwi azyakusama. (1 Timoteyo 5:8) Pele alimwi kutegwa bana banu bakkomane, mweelede kubayiisya kuyanda Leza akwiiya kulinguwe. (Baefeso 6:4) Cikozyanyo canu mukutondezya luyando kuli Leza cilakonzya kubagwasya kapati bana banu. Kuti lulayo lwanu kaluzwa mu Jwi lya Leza, lulakonzya kubagwasya bana banu kuzilanga kabotu zintu.​—Amubale Deuteronomo 6:4-7; Tusimpi 22:6.

Bana balagwasyigwa ciindi nomubakulwaizya akubalumbaizya. Alimwi bayandika kululamikwa akulaigwa. Kucita boobo kulabakwabilila kubukkale bukonzya kubapa kutakkomana. (Tusimpi 22:15) Pele lulayo talweelede kupegwa calunya naa cabukali pe.​—Amubale Bakolose 3:21.

Bakamboni ba Jehova balamwaya mabbuku aindene-indene aakalembelwa kugwasya ikapati bazyali alimwi abana. Mabbuku aaya ayeeme aa Bbaibbele.​—Amubale Intembauzyo 19:7, 11.

1. Sena kuli buyo cikombelo comwe cakasimpe?

Jesu wakayiisya basikumutobela kujatikizya cikombelo comwe buyo, cikombelo cakasimpe. Cili mbuli nzila iisololela kubuumi butamani. Jesu wakaamba kuti: “Mbasyoonto baijana” nzila eeyo. (Matayo 7:14) Leza utambula buyo bukombi buyeeme aa Jwi lyakwe lyakasimpe. Bakombi boonse bakasimpe balikamantene mulusyomo lomwe.​—Amubale Johane 4:23, 24; 14:6; Baefeso 4:4, 5.

Amweebelele Kavidiyo Sena Leza Ulabukkomanina Bukombi Boonse?

2. Ino ncinzi ncaakaamba Jesu kujatikizya Banakristo bakubeja?

Jesu wakacenjezya kuti basinsimi bakubeja bayoonyonganya Bunakristo. Kunze, balibonya mbuli kuti mbakombi bakasimpe. Zikombelo zyabo zilitaminina kuba zya Bunakristo. Pele mulakonzya kubazyiba bwini mbobabede bantu bali boobu. Munzila nzi? Bukombi bwakasimpe bulikke mbobutondezya bube anzila zya Banakristo beni-beni.​—Amubale Matayo 7:13-23.

3. Ino bakombi bakasimpe inga mwabazyiba buti?

Atulange-lange zitondezyo zyosanwe eezyi:

• Bakombi bakasimpe balalilemeka Bbaibbele kuti ndi Jwi lya Leza. Balasolekesya kupona kweelana anjiisyo zili mumo. Aboobo, cikombelo cakasimpe ciliindene acikombelo ciyeeme aamizeezo yabantu. (Matayo 15:7-9) Bakombi bakasimpe tabayiisyi cintu cimwi akucita ciimpene ancobayiisya.​—Amubale Johane 17:17; 2 Timoteyo 3:16, 17.

• 

  Basikutobela Jesu bakasimpe balalilemeka zina lya Leza, Jehova. Jesu wakalilemeka zina lya Leza kwiinda mukulizyibya. Wakagwasya bantu kuzyiba Leza alimwi akubayiisya kupailila kuti lisalazyigwe zina lya Leza. (Matayo 6:9) Kubusena nkomukkala, ino ncikombelo nzi cizyibya zina lya Leza?​—Amubale Johane 17:26; Baroma 10:13, 14.

• Banakristo bakasimpe balakambauka kujatikizya Bwami bwa Leza. Leza wakatuma Jesu kuti akambauke makani mabotu aajatikizya Bwami. Bwami bwa Leza mbobulangizi bulikke mbobajisi bantu. Jesu wakazumanana kukambauka kujatikizya Bwami oobu kusikila buzuba mbwaakafwa. (Luka 4:43; 8:1; 23:42, 43) Wakaamba kuti basikumutobela bayookambauka kujatikizya Bwami oobu. Ikuti muntu umwi wamusikila kaambaula kujatikizya Bwami bwa Leza, ino inga mwayeeya kuti ngwakucikombelo nzi?​—Amubale Matayo 24:14.

• Basikutobela Jesu tabali banyika eeyi mbyaabi. Mulakonzya kubazyiba nkaambo tabatoli lubazu mumapolitikisi naa mumazwanga aabuleya. (Johane 17:16; 18:36) Alimwi tabatobeli micito naa nzila zibyaabi zili munyika.​—Amubale Jakobo 4:4.

• Banakristo bakasimpe balijisi luyando lulibedelede akati kabo. Ijwi lya Leza lilabagwasya kulemeka bantu bamisyobo yoonse. Nokuba kuti bukombi bwakubeja bwagwasyilizya munkondo zicitika munyika, bakombi bakasimpe balakaka kucita oobo. (Mika 4:1-3) Kuyungizya waawo, Banakristo bakasimpe balalisungula kubelesya ciindi azintu zyabo kugwasya alimwi akukulwaizya bamwi.​—Amubale Johane 13:34, 35; 1 Johane 4:20.

4. Sena inga mwacizyiba cikombelo cakasimpe?

Ncikombelo nzi ciyiisya njiisyo ziyeeme aa Jwi lya Leza, icilemeka zina lya Leza, alimwi akwaambilizya Bwami bwa Leza kuti mbobulangizi bulikke bwabantu? Ninkamu nzi iijisi luyando alimwi iitatoli lubazu munkondo? Ino muyeeya buti?​—Amubale 1 Johane 3:10-12.