1. Sena Leza ulaiswiilila mipailo yoonse?

Leza ulabatamba bantu bamisyobo yoonse kuti kababandika anguwe mumupailo. (Intembauzyo 65:2) Nokuba boobo, Leza taiswiilili naa kwiitambula mipailo yoonse. Mucikozyanyo, mipailo yamwaalumi uupenzya mukaintu wakwe taiswiilili pe. (1 Petro 3:7) Alimwi bana Israyeli nibakazumanana kucita zibi, Leza kunyina naakaiswiilila mipailo yabo. Nokuba boobo, Leza ulaiswiilila mipailo noiba yabantu bacita zibi zipati ikuti beempwa. Cakutadooneka, mupailo ncoolwe citaliboteli.​—Amubale Isaya 1:15; 55:7.

Amweebelele Kavidiyo Sena Leza Ulaiswiilila Mipailo Yoonse?

2. Mbuti mbotweelede kupaila?

Mupailo ncibeela cabukombi bwesu, aboobo tweelede kupaila buyo ku Mulengi wesu, Jehova. (Matayo 4:10; 6:9) Alimwi, mbwaanga tatulondokede, tweelede kupaila kwiinda muzina lya Jesu akaambo kakuti wakafwida zibi zyesu. (Johane 14:6) Jehova tayandi kuti katwiinduluka naa kubala buya mipailo. Uyanda kuti katupaila kuzwa ansi aamoyo.​—Amubale Matayo 6:7; Bafilipi 4:6, 7.

Mulengi wesu ulaswiilila noiba mipailo yakaumuumu. (1 Samuele 1:12, 13) Leza ulatutamba kuti katupaila kufwumbwa ciindi, mbuli ciindi cakoona, cakubuka, cakulya alimwi anotuli mumapenzi.​—Amubale Intembauzyo 55:22; Matayo 15:36.

3. Nkaambo nzi Banakristo ncobabungana antoomwe?

Kuba acilongwe a Leza tacili cuuba-uba akaambo kakuti tukkala akati kabantu batajisi lusyomo muli Leza alimwi ibasampaula cisyomezyo cakwe canyika yaluumuno. (2 Timoteyo 3:1, 4; 2 Petro 3:3, 13) Aboobo, tuyandika kukulwaizyigwa abakombima, alimwi abalo bayanda kuti katubakulwaizya.​—Amubale Bahebrayo 10:24, 25.

Kuyanzana abantu bamuyanda Leza kulatugwasya kuba acilongwe a Leza. Miswaangano ya Bakamboni ba Jehova itupa coolwe cibotu cakuyumizyigwa alusyomo lwabamwi.​—Amubale Baroma 1:11, 12.

4. Mbuti mbomukonzya kuba acilongwe a Leza?

Mulakonzya kuba acilongwe a Jehova kwiinda mukuzinzibala kuyeeya nzyomwaiya mu Jwi lyakwe. Amuyeeye nzyomukonzya kwiiya kumilimo yakwe, kululayo lwakwe alimwi akuzisyomezyo zyakwe. Kupaila akuzinzibala kuyeeya kuyootugwasya kumvwisya bubotu bwaluyando abusongo bwa Leza.​—Amubale Joshua 1:8; Intembauzyo 1:1-3.

Mulakonzya kuba mulongwe wa Leza lilikke kuti kamumusyoma. Pele lusyomo luli mbuli cintu cipona calo ciyandika kusanina. Mweelede kuzumanana kuyumya lusyomo lwanu kwiinda mukuzinzibala kuyeeya twaambo twakamupa kutalika kusyoma.​—Amubale Matayo 4:4; Bahebrayo 11:1, 6.

5. Ino kuba acilongwe a Leza kuyoomugwasya buti?

Jehova ulabalanganya aabo bamuyanda. Ulakonzya kubakwabilila kuzintu zyoonse zikonzya kupa kuti lusyomo lwabo abulangizi bwabo bwabuumi butamani bube muntenda. (Intembauzyo 91:1, 2, 7-10) Ulatucenjezya kujatikizya micito imwi iikonzya kubikka buumi bwesu alukkomano muntenda. Jehova ulatuyiisya nzila mbotu mbotweelede kupona.​—Amubale Intembauzyo 73:27, 28; Jakobo 4:4, 8.

1. Sena zikombelo zyoonse nzibotu?

Kuli bantu babombe myoyo muzikombelo zyoonse. Ikuzyiba kuti Leza ulababona bantu aabo alimwi ulabalanganya, makani mabotu. Pele cuusisya ncakuti, micito mibi yacitwa muzina lyabukombi. (2 Bakorinto 4:3, 4; 11:13-15) Kweelana amalipooti amwi, zikombelo zimwi zilajatikizyigwa nomuba mumicito yabugwebenga, kujaya musyobo wabantu bamwi, nkondo alimwi akutundulula bana. Eelo kaka eeci cilabausisya bantu bamusyoma ncobeni Leza!​—Amubale Matayo 24:3-5, 11, 12.

Nokuba kuti bukombi bwakasimpe bulamulemeka Leza, bukombi bwakubeja tabumukkomanisyi pe. Buyiisya makani aatajaniki mu Bbaibbele, kubikkilizya anjiisyo zyakubeja kujatikizya Leza alimwi abafwide. Pele Jehova uyanda kuti bantu bazyibe kasimpe kujatikizya nguwe.​—Amubale Ezekieli 18:4; 1 Timoteyo 2:3-5.

2. Ino kuli makani nzi mabotu aajatikizya bukombi?

Cikkomanisya ncakuti, Leza teenwi azikombelo izilitaminina kuti zilamuyanda pele mubwini ziyanda nyika ya Saatani. (Jakobo 4:4) Ijwi lya Leza lyaamba zikombelo zyoonse zyakubeja kuti ngu “Babuloni Mupati.” Babuloni wakali munzi wansiku nkobwakatalikila bukombi bwakubeja nilyakainda Zambangulwe lyamuciindi ca Nowa. Lino-lino, Leza uyoobunyonyoona bukombi ibweena alimwi akudyaaminina bantu.​—Amubale Ciyubunuzyo 17:1, 2, 5, 16, 17; 18:8.

Kucili makani mabotu aambi. Jehova tabalubide bantu babombe myoyo ibamwaikide muzikombelo zyakubeja munyika yoonse. Ulabakamantanya bantu bali boobo kwiinda mukubayiisya kasimpe.​—Amubale Mika 4:2, 5.

3. Ncinzi ncobeelede kucita babombe myoyo?

Jehova ulabayanda bantu ibayanda kasimpe abubotu. Ubakulwaizya kuti bazwe mubukombi bwakubeja. Bantu bamuyanda Leza balilyaabide kucinca kutegwa bamukkomanisye.​—Amubale Ciyubunuzyo 18:4.

Mumwaanda wamyaka wakusaanguna, ciindi bantu babombe myoyo nobakamvwa makani mabotu kubaapostolo, bakaatambula calukkomano. Bakaiya nzila mpya yabuumi kuzwa kuli Jehova, nzila mpya yabuumi bukkomanisya ibujisi makanze abulangizi. Bapa cikozyanyo cibotu kulindiswe mazuba aano nkaambo bakaatambula makani mabotu kwiinda mukubikka Jehova kumbele mubuumi bwabo.​—Amubale 1 Batesalonika 1:8, 9; 2:13.

Jehova ulabatambula mumukwasyi wakwe wabakombi aabo ibazwa mubukombi bwakubeja. Kuti mwakuzumina kutamba kwa Jehova, muyooba balongwe bakwe, muyooba mumukwasyi mupya waluyando wabakombi ba Jehova akutambula buumi butamani.​—Amubale Marko 10:29, 30; 2 Bakorinto 6:17, 18.

4. Ino Leza uyooleta buti lukkomano munyika yoonse?

Lubeta luboola kubukombi bwakubeja makani mabotu. Luyookatalusya bantu munyika yoonse kukudyaamininwa. Bukombi bwakubeja tabukeeni limbi bantu akubaandaanya. Boonse bantu ibanoopona bayookamantana mukukomba Leza wakasimpe alikke.​—Amubale Ciyubunuzyo 18:20, 21; 21:3, 4.