‘Amweende Mulusyomo, Ikutali Mukubona’

Kakuceede buyo aasyoonto kuti Jerusalemu asaalwe alimwi akunyonyoonwa, mwaapostolo Paulo wakalemba kuti Banakristo, mbobali basikalumamba ba Kristo, beelede kwaalangila mapenzi alimwi tabeelede kubikkila kapati maano kukulikkomanisya alimwi abuumi buli kabotu. (2Tim. 2:3, 4) Mbwaanga nyika eeyi mbyaabi ilaafwaafwi kunyonyoonwa, tweelede kuba alusyomo luyumu kutegwa tucikonzye kuzumanana kubikkila maano zintu zyakumuuya. (2Kor. 4:18; 5:7) Amweebelele vidiyo yakuti ‘Walk by Faith, Not by Sight.’ (Amuunke a jw.org, akulanga aalembedwe kuti PUBLICATIONS > VIDEOS.) Amubone kuyandisisya zintu zyakumubili mbokwakaba kakole kuli ba Nahamu a Abitali. Mwamana amubandike mibuzyo iitobela.

(1) Ino ‘cintu cisesemya cakaimvwi mubusena busalala’ mumwanda wamyaka wakusaanguna cakali cinzi, alimwi nintaamu nzi Banakristo ibakali kukkala mu Jerusalemu njobakeelede kubweza? (Mt. 24:15, 16) (2) Ino nkaambo nzi kutija kuzwa mumunzi ncokwakali kuyandika lusyomo? (3) Ino ncinzi cakajatikizyidwe mukutija? (4) Ino nkaambo nzi ba Nahamu a Abitali ncobakamuka kutija? (Mt. 24:17, 18) (5) Ino lusyomo lwa Lakele lwakasunkwa buti ciindi naakali kuzwa mu Jerusalemu? (Mt. 10:34-37; Mk. 10:29, 30) (6) Ino Etani wakapa buti cikozyanyo cibotu mulusyomo alimwi akusyoma muli Jehova? (7) Ino Banakristo bakajana buyumuyumu nzi ku Pela? (8) Mukuya kwaciindi, ino lusyomo lwa Nahamu alwa Abitali lwakaceya buti? (9) Ino Jehova wakabalanganya buti Banakristo ibakali kukkala ku Pela? (Mt. 6:33; 1Tim. 6:6-8) (10) Ino mbuti mbotukonzya kwiiya Abrahamu a Sara ciindi notuli kumamanino aabweende bwazintu oobu? (Heb. 11:8-10) (11) Ino nkuyeeya kuli buti kwakapa kuti Nahamu a Abitali bapiluke ku Jerusalem, alimwi nkaambo nzi kuyeeya kwabo ncokwatakali kabotu? (Lk. 21:21) (12) Ino zintu zyakali buti mu Jerusalem ciindi Nahamu a Abitali nobakapiluka? (13) Ino nkaambo nzi ncotweelede kuyumya lusyomo lwesu lino, mamanino aabweende bwazintu oobu kaatanasika?—Lk. 17:31, 32; 21:34-36.

Kweenda mulusyomo caamba (1) kusyoma busolozi bwa Jehova, (2) kumulekela kuti atusololele, alimwi (3) akutondezya kuti tulabikkila maano zintu zyakumuuya kutali zyakumubili. Aabe makanze eesu kweenda mulusyomo, katusyomede kuti “nyika ilamana antoomwe azisusi zyanjiyo, pele ooyo uucita kuyanda kwa Leza unooliko lyoonse mane kukabe kutamani.”—1Joh. 2:17.