17. Ino ncoolwe nzi cili aafwaafwi kumana, alimwi ino mmajwi nzi ngotuyooyeeya ino-ino?

¹⁷ Masimpe, tulizyi kuti basikukazya bayoozumanana kutupenzya. Alimwi tulazumanana kukambauka makani mabotu—nokuba kuli baabo batukazya. (Mt. 24:14, 21) Nokuba boobo, coolwe ncobapedwe basikukazya aaba icakweempwa akujana lufwutuko ciyoomana ino-ino. Kusalazyigwa kwazyina lya Jehova nkokuyandika kapati kwiinda lufwutuko lwabantunsi. (Amubale Ezekiele 38:23.) Ciindi masi naayooswaangana mbuli mbokwakasinsimwa kutegwa basoleke kunyonyoona bantu ba Leza, tuyooyeeya majwi aaya aasintembauzyo aakuti: “Bausigwe insoni akuzingwa lyoonse, bausigwe bweeme akunyonyooka.”—Int. 83:17.

18, 19. (a) Ino ncinzi ciyoocitikila basikukazya bulelo bwa Jehova? (b) Ino kusalazyigwa kwabweendelezi bwa Jehova ikuli afwaafwi kucitika kumujatikizya buti?

¹⁸ Mamanino ayoobasikila basikukazya bweendelezi bwa Jehova. Ijwi lya Leza lyaamba kuti bantu ibayoonyonyoonwa lya Armagedoni akaambo ‘kakutaswiilila makani mabotu,’ “bayoobetekelwa lunyonyooko lutamani.” (2 Tes. 1:7-9) Ilunyonyooko lwabo alimwi alufwutuko lwabaabo bakomba Jehova ziyooba zitondezyo zyakuti Jehova ngo Leza mwini-mwini alikke. Munyika mpya, iluzundo lupati oolu talukalubwi pe. Aabo bayoobuka “[mu]kubuka kwabafu, akwabaluleme akwabataluleme” bayooyiya milimo mipati ya Jehova. (Inc. 24:15) Munyika mpya, bayoobona citondezyo cabusongo bwakupona mubweendelezi bwa Jehova. Babombe myoyo abalo akati kabo bayoofwambaana kusyoma kuti Jehova ngo Leza mwini-mwini alikke.

“Ncobeni Eeli Ndezyina lya Leza Lisalalisya Alimwi Lipati”

Nicholas uukkala ku Cusa nguwakaamba majwi aaya mumulumbe wakwe mumwaka wa 1430.a Wakali mulombwana wakali kubikkila maanu mutwaambo tunji, alimwi wakaiya Chigiliki, Chihebrayo, twaambo twabusyaabusongo bwamunyika, twaambo twabukombi, namba, alimwi alwiiyo lwanyenyeezi azimwi zyakujulu. Naakajisi myaka yakuzyalwa iili 22, wakaba mupati wabasololi bamulawo mucikombelo ca Katolika. Mu 1448 wakaba musololi wacikombelo uutobela paapa.

Kutandila kumyaka iili 550 yainda, Nicholas waku Cusa wakayaka ŋanda yakulanganya bantu bacembeede bali mudolopo lya Kues, lyalo lino liitwa kuti Bernkastel-Kues, busena bulampa makkilomita aatandila ku 130 kumusanza kwadolopo lya Bonn mucisi ca Germany. Muŋanda momunya oomu, lino momujanika laibbulali yakwe iijisi mapepa aamabbuku aakalembwa amaanza aayinda ku 310. Limwi lyayaaya ndibbuku litegwa Codex Cusanus 220 mwalo mukonzya kujanwa mulumbe wakwe wamu 1430. Mumulumbe ooyu uutegwa: In principio erat verbum (Kumatalikilo Ijwi Wakaliko), Nicholas waku Cusa wakabelesya bbala lya Chilatini lyakuti Iehoua kwaamba Jehova.b Peeji 56 ijisi kaambo aaka katobela kajatikizya zyina lya Leza kakuti: “Ndezyina ndyaakalipa Leza mwini. Mabala one aa Chihebrayo, nkokuti, izyina eeli lyakajisi buyo misemu yamabala yone. . . . Ncobeni eeli ndezyina lya Leza lisalalisya alimwi lipati.” Kaambo nkaakaamba Nicholas waku Cusa kaleendelana akasimpe kakuti zyina lya Leza lilajanika mu Magwalo aa Chihebrayo aakusaanguna.—Kul. 6:3.

Kuzwa kumatalikilo aamwaanda wamyaka wa 15, ibbuku eeli litegwa codex ndebbuku lyakaindi liliko mwalo misemu yamabala aa Chihebrayo yone moilembedwe kuti “Iehoua.” Twaambo twakalembwa ootu mbumboni abumbi butondezya kuti nzila izyina lya Leza mbolyaambwa izikozyenye akuti “Jehova” zyali kubelesyegwa kapati mukulemba zyina lya Leza kwamyaanda yamyaka iili mbwiibede.