Sena Nyika Ilakonzya Kukamantana?

SENA nyika yesu iya kukunyonyooka naa kuluumuno? Kuboneka kuti cili coonse inga cacitika.

Kulubazu lumwi, ibaleli bamwi baamba kuti luumuno lulakonzyeka munyika yoonse—nkaambo bayeeya kuti, ikuti luumuno kalutako munyika kunakuli mapenzi manji. Kunze lyaboobo, banji balayoowa nobayeeya mibuzyo mbuli yakuti: Ino ncisi nzi cijisi zilwanyo zikonzya kunyonyoona kapati munyika? Sena inga bazibelesya? Ino ncinzi cikonzya kucitika ikuti naa bazibelesya?

Kuzwa kaindi, kuzundana akusalaulana ntotwaambo twali kupa kuti kutabi kukamantana alimwi cikombelo capa kuti zintu kaziya bwiindila kubija muciindi cakuti kaziya bubota buya. “Kufumbwa cintu caandaanya bantu cilakonzya kubapa kutamvwana alimwi cikombelo ncecili kumpela kwaandanya bantu,” mbwaakalemba simubweza twaambo James A. Haught. “Nokuba kuti bantu banji basyoma kuti cikombelo cipa kuti bantu kabacita zintu zibotu, cabonwa kuti cipa kuti bantu bamwi kabacita zintu zibi kapati.” Mulembi Steven Weinberg awalo wakajisi muzeezo ngumunya ooyu. Wakalemba kuti: “Ikwaandaana kuboola akaambo kacikombelo kulakonzya kupa kuti bantu babotu kabacita zintu zibi.”

Sena mulasyoma kuti kuyakuba lukamantano bumwi buzuba munyika yesu? Inzya! Pele kukamantana kwanyika takukabooli akaambo kamuntu naa zikombelo zibambwa abantu, mbubonya mbotutiibone.

1. Nkaambo nzi Jehova nceelela kuba Muleli wabubumbo boonse?

“JEHOVA ulikazikide cuuno cakwe cabwami mujulu, nkabela bwami bwakwe buleendelezya kuliboonse.” (Intembauzyo 103:19) Kwiinda mumajwi aayo, sintembauzyo wakaamba kaambo kayandika kapati kujatikizya bweendelezi. Mbwali Mulengi, Jehova Leza uleelela kuba Muleli wabubumbo boonse.