Malifalensi Aamu Kabbuku Kamuswaangano Wabuumi Amulimo Wesu
SEPTEMBER 2-8
MBONO IZILI MU JWI LYA LEZA | BAHEBRAYO 7-8
“Mupaizi Lyoonse Mane Kukabe Kutamani Mbubonya Mbuli Melekizedeki”
it-2 366
Melekizedeki
Ooyu wakali Mwami waku Salemu yansiku alimwi wakali “mupaizi wa Leza Mupatikampatila,” Jehova. (Matl. 14:18, 22) Ngomupaizi wakusaanguna iwaambidwe mu Magwalo; wakaba mupaizi kautanasika mwaka wa 1933 B.C.E. Mbwaanga wakali mwami waku Salemu, ibbala lyaamba “luumuno,” mwaapostolo Paulo wakaamba Melekizedeki kuti “Mwami wa Luumuno” alimwi akaambo kazina lyakwe wakaambwa kuti “Mwami wa Bululami.” (Heb. 7:1, 2) Munzi wa Salemu uzyibidwe kuti ngomunzi iwakazyi kwiitwa kuti Jerusalemu, alimwi izina lyamunzi ooyu lyakaliswaangene a Jerusalemu, nkakaambo kaako zimwi ziindi Jerusalemu wiitwa kuti “Salemu.”—Int. 76:2.
Ciindi Abramu (Abrahamu) naakamana kuzunda Kedorelaomere antoomwe abami ibakamusangene, sikale ooyu wakaunka ku Kkuti lya Save naa “Kkuti lya Mwami.” Aboobo ookuya Melekizedeki “wakaleta cinkwa awaini” mpoonya wakamulongezya Abrahamu kwiinda mukwaamba kuti: “Aalongezyegwe Abramu kuli Leza Mupatikampatila, Mulengi wajulu anyika; alimwi aatembaulwe Leza Mupatikampatila, iwaaba basikukupenzya mujanza lyako!” Mpoonya Abrahamu wakapa mwami-mupaizi “cipaanzi cakkumi cazintu zyoonse” nkokuti ‘zintu zibotu nzyaakasaala’ ciindi naakazunda bamami ibakakamantene mukumulwana.—Matl. 14:17-20; Heb. 7:4.
(Bahebrayo 7:3) Mbwaanga tajisi bausyi abanyina, tajisi mulongo wazyalani nkwazulilwa, alimwi tajisi matalikilo aamazuba aakwe naaba mamanino aabuumi bwakwe, pele wakacitwa kuba mbuli Mwana wa Leza, ulazumanana kali mupaizi lyoonse.
it-2 367 ¶4
Melekizedeki
Muunzila nzi mwaakali aamasimpe makani aakuti Melekizedeki ‘tanaakajisi matalikilo aamazuba naaba mamanino aabuumi bwakwe’?
Paulo wakaamba kaambo kamasimpe ikalibedelede kujatikizya Melekizedeki, ciindi naakati: “Mbwaanga tajisi bausyi abanyina, tajisi mulongo wazyalani nkwazulilwa, alimwi tajisi matalikilo aamazuba aakwe naaba mamanino aabuumi bwakwe, pele wakacitwa kuba mbuli Mwana wa Leza, ulazumanana kali mupaizi lyoonse.” (Heb. 7:3) Mbubwenya mbuli bantu boonse, Melekizedeki wakazyalwa alimwi akufwa. Nokuba boobo, izina lyabausyi alimwi alyabanyina talizyibidwe pe, mulongo wazyalani nkwazulilwa tauzyibidwe, alimwi kunyina makani aali woonse mu Magwalo aatondezya matalikilo aamazuba aakwe naaba mamanino aabuumi bwakwe. Aboobo, Melekizedeki cakweelela wakali kwiiminina Jesu Kristo, walo uujisi mulimo wabupaizi ibutamani. Mbubwenya Melekizedeki mbwaatakajisi mupaizi ngwaakalida zina lyabupaizi naa iwakamulida zina lyabupaizi, awalo Kristo kunyina ngwaakalida zina lyabupaizi uukozyenye anguwe, alimwi Bbaibbele litondezya kuti kunyina naba omwe uuyakumulida zina lyakwe lyabupaizi. Kuyungizya waawo, nokuba kuti Jesu wakazyalilwa muzyalani lyamusyobo wa Juda alimwi amumulongo wazyalani lyabwami lya Davida, izyalani lyakwe lyakumubili kunyina mboliswaangene abupaizi bwakwe, alimwi cuuno cakwe cakuba mupaizi alimwi amwami aciindi comwe tiizyakaba akaambo kazyalani lyakwe lyakumubili. Zyuuno eezyi zyakapegwa kulinguwe akaambo kacikonke Jehova ncaakakonka kulinguwe.
(Bahebrayo 7:17) Nkaambo kujatikizya nguwe bumboni bumwi bwaamba kuti: “Yebo uli mupaizi lyoonse mane kukabe kutamani mbubonya mbuli Melekizedeki.”
it-2 366
Melekizedeki
Bupaizi bwa Kristo Bwasinizyigwa. Mubusinsimi bumwi buyandika kapati kujatikizya Mesiya, cikonke ca Jehova ku “Mwami” wa Davida ncakuti: “Yebo uli mupaizi lyoonse mane kukabe kutamani mbubonya mbuli Melekizedeki!” (Int. 110:1, 4) Intembauzyo eeyi iyakasololelwa amuuya yakapa bana Hebrayo kaambo kakubona Mesiya iwakasyomezyegwa kuti ngonguwe iwakali kuyoopegwa cuuno cakuba mupaizi alimwi amwami aciindi comwe. Lugwalo mwaapostolo Paulo ndwaakalembela bana Hebrayo, lwakabagwasya kutadooneka kujatikizya mbobakeelede kumuzyiba ooyo iwakasinsimwa, nkokuti “Jesu, ooyo waba mupaizi mupati mane kukabe kutamani mbubonya mbuli Melekizedeki.”—Heb. 6:20; 5:10.
it-1 1113 ¶4-5
Mupaizi Mupati
Kusumpuka kwa Bupaizi bwa Jesu Kristo. Bbuku lyamu Bbaibbele lya Bahebrayo litondezya kuti, kuzwa ciindi Jesu Kristo naakabusyigwa akuya kujulu, “mupaizi lyoonse mane kukabe kutamani mbubonya mbuli Melekizedeki.” (Heb. 6:20; 7:17, 21) Kapandulula bupati bwabupaizi bwa Kristo alimwi ambobusumpukide kwiinda bupaizi bwa Aroni, mulembi wabbuku lya Bahebrayo utondezya kuti Melekizedeki wakali mwami alimwi amupaizi iwakasalwa a Leza Mupatikampatila, ikutali kwiinda mukubukona buya. Mbwaanga Kristo Jesu, tanaakali wamusyobo wa Levi, pele wakali wamusyobo wa Juda alimwi wakali kuzwa muzyalani lya Davida, tanaakakona bupaizi kwiinda muzyalani lya Aroni, pele wakasalwa buya cacigaminina a Leza mbubwenya mbuli Melekizedeki. (Heb. 5:10) Kuyungizya acisyomezyo cilembedwe ku Intembauzyo 110:4: “Jehova wakonka cikonke (alimwi takacinci maano pe): ‘Yebo uli mupaizi lyoonse mane kukabe kutamani mbubonya mbuli Melekizedeki!’” kusalwa ooku kumupa kuti abe Mwami-Mupaizi wakujulu, alimwi Kristo ulijisi nguzu zyabweendelezi mu Bwami akaambo kakuti uzwa muzyalani lya Davida. Akaambo kaceeci, wakaba sikukona wabwami bwakasyomezyedwe mucizuminano ca Davida. (2Sam. 7:11-16) Aboobo ujisi zyuuno zyobilo nkokuti cuuno cabwami alimwi acabupaizi, mbubonya mbuli Melekizedeki.
Nzila aimwi iitondezya mbobusumpukide bupaizi bwa Kristo ilalibonya mukuti Levi, sikutalisya bupaizi bwaba Juda wakapa zyakkumi kuli Melekizedeki, nkaambo Levi wakacili mucibuno ca Abrahamu ciindi sikale ooyu naakapa cakkumi kumwami-mupaizi waku Salemu. Kuyungizya waawo, akaambo kaceeci Levi awalo wakalongezyegwa a Melekizedeki, nkaambo mulawo wakali kwaamba kuti musyoonto ulelekwa amupati. (Heb. 7:4-10) Mwaapostolo awalo wakaamba Melekizedeki kuti “tajisi bausyi abanyina, tajisi mulongo wazyalani nkwazulilwa, alimwi tajisi matalikilo aamazuba aakwe naaba mamanino aabuumi bwakwe.” Aboobo wakali kwiiminina mupaizi walyoonse mane kukabe kutamani nkokuti Jesu Kristo, walo iwakabusyigwa ‘kubuumi butakonzyi kunyonyoonwa.’—Heb. 7:3, 15-17.
Kuyandaula Mbono Zyakumuuya
(Bahebrayo 8:3) Nkaambo mupaizi mupati uuli woonse ulasalwa kutegwa katuula zipego alimwi azipaizyo; aboobo cakali kuyandika akuli yooyu awalo kuti abe acintu cimwi cakutuula.
w00 8/15 14 ¶11
Izipaizyo Zyakamukkomanisya Jehova
“Imwaapostolo Paulo waamba kuti: “Bapaizi bapati boonse mbobasalwa kuti batuule budumbu azipaizyo.” (Ba-Hebrayo 8:3) Amubone kuti Paulo waandaanya zituuzyo zyakali kupegwaa mupaizi mupati wamu Israyeli yansiku muzibeela zyobile, nkokuti “budumbu” alimwi “azipaizyo,” naa “zipaizyo nkaambo kazibi.” (Ba-Hebrayo 5:1) Ibantu banji balapa zipego ikutegwa batondezye luyando, kulumba alimwi akutalisya cilongwe naa ikutegwa bayandwe naa kutambulwa. (Matalikilo 32:20; Tusimpi 18:16) Ncimwi buyo, ibunji bwazituuzyo zyakalaililwa mu Mulawo kuti kazipegwa zilakonzya kubonwa kuti zyakali “budumbu” kuli Leza kutegwa bantu bakkomaninwe akubaa cilongwe. Ikusotoka Mulawo kwakali kuyandika kululamika alimwi ikutegwa kubbadelelwe zyakasowegwa “zipaizyo nkaambo kazibi” zyakali kutuulwa. Imabbuku aakusaanguna osanwe, ikapati mumabbuku aa Kulonga, Levitiko alimwi a Myeelwe, kupedwe zintu zinji kapati ziindene-indene kujatikizya zipaizyo zyamisyobo-misyobo azituuzyo. Nokuba kuti inga catuyumina kwiiya akuyeeya bumpiyompiyo boonse, itwaambo tupati-pati tumwi kujatikizya zituuzyo ziindene-indene tweelede kutubikkila maanu.
(Bahebrayo 8:13) Eelyo mukwaamba kuti “cizuminano cipya,” wapa kuti eeco cakusaanguna cibule mulimo. Lino eeco icacitwa kuti cibule mulimo alimwi iciyaabucembaala cilaafwaafwi kuloba.
it-1 523 ¶5
Cizuminano
Ino cizuminano ca Mulawo ‘cakabula buti mulimo’?
Cizuminano ca Mulawo ‘cakabula mulimo’ ciindi Leza naakaambilizya kwiinda mumusinsimi Jeremiya kuti kwakali kuyooba cizuminano cipya. (Jer. 31:31-34; Heb. 8:13) Mu 33 C.E. cizuminano ca Mulawo cakaleka kubeleka ciindi naakafwa Kristo acisamu cakupenzezya (Kol. 2:14), mpoonya cizuminano cipya ncecakatalika kubeleka.—Heb. 7:12; 9:15; Mil. 2:1-4.
AMUSUNGWAALE MUMULIMO WAMUMUUNDA
Muyakuba “Cisi Cabapaizi”
Bulowa bwa Jesu ibwakatika mbobupa kuti cizuminano cipya cibeleke. Bulowa oobu alimwi mbobupa kuti zibi zilekelelwe. Jesu tajatikizyidwe mucizuminano cipya. Akaambo kakuti tajisi cibi, tayandiki kulekelelwa. Pele Leza wakali kukonzya kubelesya mpindu yabulowa bwa Jesu kubana ba Adamu. Alimwi wakali kukonzya kusala bantu balyaabide kuba “bana” bakwe kwiinda mukubananika amuuya uusalala. (Amubale Baloma 8:14-17.) Akaambo kakuba bantu batakwe cibi mumeso aa Leza, inga twaamba kuti bayakuba mbuli Jesu Mwana wa Leza uutakwe cibi. Bananike aaba bayakuba “basikukonanyina a Kilisito” alimwi bayakuba acoolwe cakuba “cisi cabapaizi.” Eeci ncecoolwe cisi cabana Israyeli ncicakajisi ansi aa Mulawo. Kujatikizya “basikukonanyina a Kilisito,” mwaapostolo Petro wakaamba kuti: “Nywebo muli ‘musyobo uusalidwe, ibapaizi bami, cisi cisalala, iciinga ca Leza cilibedelede, kutegwa mwaambilizye koonse-koonse ibube bubotu’ bwayooyo wakamwiita kuzwa mumudima akumunjizya mumumuni wakwe uutaliboteli.” (1Pet. 2:9) Eelo kaka cilayandika kapati cizuminano cipya! Cizuminano eeci cipa kuti basikwiiya ba Jesu babe cibeela cabili calunyungu lwa Abrahamu.
CIZUMINANO CIPYA CATALIKA KUBELEKA
Ino cizuminano cipya cakatalika lili kubeleka? Tiicakatalika kubeleka ciindi Jesu naakaamba kujatikizya ncico mubusiku bwakwe bwamamanino anyika. Kutegwa citalike kubeleka, kwakali kuyandika kutika bulowa bwa Jesu alimwi ampindu yabulowa yakali kuyandika kupegwa kuli Jehova kujulu. Kuyungizya waawo, kwakali kuyandika kutila muuya uusalala ali baabo ibakali kuyakuba “basikukonanyina a Kilisito.” Aboobo, cizuminano cipya cakatalika kubeleka lya Pentekoste mu 33 C.E. ciindi basikwiiya ba Jesu basyomeka nobakananikwa amuuya uusalala.
Nokuba kuti munzila imwi cizuminano ca Mulawo ‘cakabula mulimo’ ciindi Jehova naakasinsima kwiinda mumusinsimi Jeremiya kuti wakali kuyakupanga cizuminano cipya abana Israyeli, cakacili kubeleka kusikila ciindi cizuminano cipya nocakatalika kubeleka. (Heb. 8:13) Nocakatalika kubeleka cizuminano cipya, Leza wakabona kuti taakwe lwiindano luliko akati kaba Juda alimwi abantu ibatakapaludwe ibakali kusyomeka akaambo kakuti ‘kupalulwa kwabo kwakali kwamumoyo kwiinda mumuuya ikutali mumulawo.’ (Lom. 2:29) Kwiinda mukutangana cizuminano ambabo, Leza wakali kuyakubikka milawo yakwe ‘mumizeezo yabo alimwi akwiilemba mumyoyo yabo.’ (Heb. 8:10) Mweelwe wabaabo ibali mucizuminano cipya wakali kuyakuba 144,000, kupanga cisi cipya—ba Isilayeli ba Leza.—Gal. 6:16; Ciy. 14:1, 4.
Cizuminano cipya cijatikizya Bwami mwalo imuli cisi cisalala cijisi bantu bajisi coolwe cakuba bami abapaizi mu Bwami bwakujulu. Cisi eeci ncibeela cabili calunyungu lwa Abrahamu. (Gal. 3:29) Aboobo, cizuminano cipya ciyumya cizuminano ca Abrahamu.
Kuli cibeela comwe acimwi ca Bwami icizuzikizyigwa kwiinda mucizuminano cipya. Cizuminano cipya cizyala ba Israyeli bakumuuya alimwi akupa kuti ibali mucizuminano eeci babe “basikukonanyina a Kilisito.” Nokuba boobo, kuyandika bubambe bwamilawo njobeelede kutobela kutegwa beelele kusangana Jesu mukuba bami alimwi abapaizi mu Bwami bwakujulu.
SEPTEMBER 9-15
MBONO IZILI MU JWI LYA LEZA | BAHEBRAYO 9-10
“Ncimvwule Buyo Cazintu Zibotu Ziboola”
(Bahebrayo 9:12-14) Wakanjila mubusena busalala, ikutali abulowa bwampongo abwabapoho bacili bana, pele wakanjila abulowa bwakwe mwini iciindi comwe buyo akutujanina lufwutuko lutamani. 13 Nkaambo ikuti bulowa bwampongo abwabapoho alimwi amulota wamoombe mupwizi izisansailwa kuli baabo basofwaazyigwa kazisalazya muntu kusikila nkwasalala kumubili, 14 sena ibulowa bwa Kristo, ooyo wakalituula kanyina kampenda kuli Leza ikwiinda mumuuya uutamani, tabukonzyi kwiinda aawo ikusalazya manjezyeezya eesu kumilimo iifwide kutegwa tubelekele Leza uupona mulimo uusetekene?
it-1 862 ¶1
Kulekelelwa
Kweelana amulawo Leza ngwaakapede cisi cabana Israyeli, ikutegwa muntu alekelelwe zibi zyakwe iwabisizya Leza naa muntunyina, cakusaanguna muntu ooyo wakeelede kubambulula kulubizya kwakwe kweelana ambowakali kwaamba Mulawo, mpoonya zimwi ziindi wakeelede kutuula bulowa kuli Jehova. (Lev. 5:5–6:7) Nkakaambo kaako, Paulo wakaamba kuti: “Inzya, kweelana a Mulawo, ibunji bwazintu zilasalazyigwa abulowa, alimwi ccita kuti bulowa bwatilwa, kunyina pe uukonzya kulekelelwa zibi.” (Heb. 9:22) Nokuba boobo, zipaizyo zyabulowa bwabanyama tiizyakali kukonzya kugwisya zibi pe nokuba kupa muntu kuba amanjezyeezya aasalala cakumaninina. (Heb. 10:1-4; 9:9, 13, 14) Mukwiimpana, cizuminano cipya icakasinsimwa cakapa kuti cikonzyeke kulekelelwa ncobeni kwiinda mucipaizyo cacinunuzyo ca Kristo. (Jer. 31:33, 34; Mt. 26:28; 1Kor. 11:25; Ef. 1:7) Noliba leelyo naakali anyika, Jesu wakatondezya kuti ulijisi nguzu zyakulekelela zibi kwiinda mukuponya mwaalumi iwakalebukide mubili.—Mt. 9:2-7.
(Bahebrayo 9:24-26) Nkaambo Kristo tanaakanjila mubusena busalala bwakabambwa amaanza aabantu pe, ibuli ncikozyanyo buyo cazintu zini-zini, pele wakanjila kujulu kwini buya, kutegwa lino akalibonye kumbele lya Leza akaambo kandiswe. 25 Eeci tiicakacitwa ikutegwa kalituula lyoonse, mbuli leelyo mupaizi mupati nanjila mubusena busalala mwaka amwaka abulowa ibutali bwakwe. 26 Ikuti nocali boobo, nokwali kuyandika kuti kapenga lyoonse kuzwa kumatalikilo aanyika. Pele lino walibonya ciindi comwe buyo kumamanino aabweende bwazintu bwiindene-indene kuti amanizye cibi kwiinda mucipaizyo cakwe mwini.
cf 183 ¶4
“Amuzumanane Kunditobela”
Magwalo kunyina ncaamba kujatikizya Jesu mbwaakasika kujulu, mbwaakatambulwa alimwi ambobakakkomana Bausyi kuba antoomwe anguwe alimwi. Nokuba boobo, Bbaibbele lyakaambila limwi cakali kuyoocitika kujulu mbwaakali kuyoopilukila buyo Jesu. Kwamyaanda yamyaka iili 15, ba Juda lyoonse bakali kubona mbolyakali kucitwa pobwe lisalala. Buzuba bomwe mwaka amwaka, mupaizi mupati wakali kunjila mu Busena Busalalisya bwatempele kuti asansaile bulowa Mubuzuba Bwakumanya Milandu bwazintu zyakali kutuulwa kumbele lyabbokesi lyacizuminano. Mubuzuba oobo, mupaizi mupati wakali kwiiminina Mesiya. Jesu wakacizuzikizya icakali kwiimininwa apobwe eeli ciindi comwe eelyo naakapiluka kujulu. Jesu wakaunka kujulu kwini buya kuli Jehova, ibusena busalalisya kapati mububumbo boonse, mpoonya wakapa mpindu yacinunuzyo cakwe kuli Bausyi. (Bahebrayo 9:11, 12, 24) Sena Jehova wakacitambula?
(Bahebrayo 10:1-4) Lino mbwaanga Mulawo ncimvwule buyo cazintu zibotu ziboola, pele ikutali zintu eezyo zini-zini, taukonzyi kubapa kulondoka aabo baboola kuli Leza kwiinda mukuzumanana kutuula zipaizyo nzimunya mwaka amwaka. 2 Ikuti nocali boobo, sena zipaizyo nozyatakaleka kutuulwa? Nkaambo aabo ibabeleka mulimo uusetekene nobakasalazyigwa ciindi comwe buyo, nobatali kuzumanana kupenga mumizeezo akaambo kazibi. 3 Muciindi caboobo, zipaizyo eezyi nciibalusyo cazibi mwaka amwaka, 4 nkaambo bulowa bwabapoho abwampongo tabukonzyi kugusya zibi pe.
it-2 602-603
Kulondoka
Kulondoka kwa Mulawo wa Musa. Mulawo iwakapegwa kubana Israyeli kwiinda muli Musa wakali kubikkilizya kutalisya mulimo wabupaizi alimwi akutuula zipaizyo zyabanyama baindene-indene. Nokuba kuti wakazwa kuli Leza, akuti wakalilondokede, Mulawo ooyu, mulimo wabupaizi naa zipaizyo kunyina nozyakabapa kulondoka aabo ibakali kuutobela Mulawo kweelana ambwaakaamba mwaapostolo iwakasololelwa amuuya. (Heb. 7:11, 19; 10:1) Muciindi cakwaangununa bantu kucibi alimwi alufwu, mulawo wakapa kuti cibi cilibonye antangalala. (Rom. 3:20; 7:7-13) Nokuba boobo, zintu zyoonse eezyi izyakazwa kuli Leza zyakajisi mulimo kweelana akuyanda kwa Leza; Mulawo wakali mbuli “musolozi” iwakali kusololela bantu kuli Kristo, eelyo wakaba ‘cimvwule cilondokede cazintu zibotu ziboola.’ (Gal. 3:19-25; Heb. 10:1) Aboobo, ciindi Paulo naamba “nciwakaalilwa kucita Mulawo akaambo kakuti wakanyina nguzu” (Rom. 8:3), kuboneka kuti waamba kwaalilwa kwamupaizi mupati waba Juda bakumubili (walo iwakali kusalwa kwiinda mu Mulawo kutegwa kalanganya bubambe bwazipaizyo alimwi ngowakali kunjila mu Busena Busalalisya mu Buzuba Bwakumanya Milandu kajisi bulowa bwazipaizyo) ‘kubafwutula cakumaninina’ aabo mbaakali kugwasya, kweelana ambolupandulula lugwalo lwa Bahebrayo 7:11, 18-28. Nokuba kuti kutuula zipaizyo kwiinda muciinga cabapaizi ca Aroni kwakali kubagwasya bantu kutambulika kuli Leza, pele eeci tiicakabapa kwaangununwa cakumaninina kucibi nkaambo bakacili basizibi. Mwaapostolo wakacaamba eeci ciindi naakali kwaamba kuti zipaizyo zyakumanya milandu tazikonzyi “kubapa kulondoka aabo baboola kuli Leza,” nkokuti, manjezyeezya aabo. (Heb. 10:1-4; amweezyanisye a Heb. 9:9.) Mupaizi mupati tanaakali kukonzya kupa cinunuzyo icakali kuyandika kutegwa muntu aangununwe cakumaninina kucibi. Mulimo wabupaizi butamani bwa Kristo ngowakali kukonzya kucizuzikizya eeci.—Heb. 9:14; 10:12-22.
Kuyandaula Mbono Zyakumuuya
(Bahebrayo 9:16, 17) Nkaambo nokuli cizuminano, imuntu ooyo sikubamba cizuminano weelede kufwa, 17 nkaambo cizuminano cili amulimo ikuti umwi wafwa, mbwaanga tacijisi nguzu aciindi cimbi eelyo muntu sikubamba cizuminano nacipona.
w92 3/1 31 ¶4-6
Mibuzyo Yabasikubala
Paulo wakaamba kuti lufwu lwakali kuyandika kutegwa cizuminano cisinizyigwe akati ka Leza alimwi abantu. Cizuminano ca Mulawo ncimwi cazikozyanyo. Musa ngowakali simwiimaakati wacizuminano eeco, kutegwa kube kuzuminana akati ka Leza alimwi abana Israyeli. Aboobo Musa wakabeleka mulimo uuyandika kapati alimwi ngomuntu iwakali kubeendelezya bana Israyeli ciindi nobakanjila mucizuminano eeci. Akaambo kaceeci, Musa wakali kubonwa kuti ngomuntunsi sikubamba cizuminano ca Mulawo calo icakatalisyigwa a Jehova. Pele sena Musa wakeelede kutila bulowa bwakwe kutegwa cizuminano ca Mulawo citalike kubeleka? Peepe. Muciindi caboobo, banyama mbobakali kutuulwa, alimwi bulowa bwabo bwakali kwiiminina bulowa bwa Musa.—Bahebrayo 9:18-22.
Ino mbuti kujatikizya cizuminano cipya icili akati ka Jehova alimwi abana Israyeli bakumuuya? Jesu Kristo wakalijisi coolwe cilibedelede cakuba Simwiimaakati, nkokuti akati ka Jehova alimwi abana Israyeli bakumuuya. Nokuba kuti Jehova ngowakacitalisya cizuminano eeci, mubwini cakayeeme ali Jesu Kristo. Kunze lyakuba Simwiimaakati mucizuminano eeci, Jesu wakayanzana cacigaminina abaabo ibakali kuyoosaanguna kunjila mucizuminano eeci. (Luka 22:20, 28, 29) Kuyungizya waawo, wakali kweelela kupa cipaizyo icakali kuyandika kutegwa cizuminano eeci cisinizyigwe. Cipaizyo eeci tiicakali cabanyama buyo, pele cakali cipaizyo cabuumi bwamuntu uulondokede. Aboobo Paulo wakaamba kuti muntu iwakali kuyooba sikubamba cizuminano cipya ngu Kristo. Kuzwa ciindi ‘Kristo naakanjila . . . kujulu kwini buya kutegwa akalibonye kumbele lya Leza akaambo kandiswe,’ cizuminano cipya cakasinizyigwa.—Bahebrayo 9:12-14, 24.
Ciindi Paulo naakali kwaamba Musa alimwi a Jesu kuti mbaasikubamba cizuminano bantunsi, tanaakali kupandulula kuti umwi akati kabo ngowakatalisya zizuminano eezyo, mbwaanga sikuzitalisya mwini-mwini ngu Leza. Muciindi caboobo, bantu aaba bobilo bakalijatikizyidwe kapati kabali basimwiimaakati mukupa kuti zizuminano eezyi zikonzyeke. Mucizuminano cimwi acimwi, lufwu lwakali kuyandika, aboobo banyama bakali kwiiminina Musa, mpoonya Jesu wakatuula bulowa bwakwe kujatikizya baabo ibali mucizuminano cipya.
(Bahebrayo 10:5-7) Aboobo naakaboola munyika wakaambila Leza kuti: “‘Zipaizyo alimwi azituuzyo tiiwakaziyanda pe, pele wakandibambila mubili. 6 Tiiwakazikkomanina pe zituuzyo zyuumpwa buumbulu azituuzyo zyacibi.’ 7 Mpoonya ndakati: ‘Bona! Ndaboola, (mubbuku lyakuvwunga kulilembedwe kujatikizya ndime) kuti ndicite kuyanda kwako, O Leza.’”
it-1 249-250
Kubbapatizyigwa
Luka wakalemba kuti Jesu wakali kupaila ciindi naakali kubbapatizyigwa. (Lk. 3:21) Kuyungizya waawo, mulembi walugwalo lwa Bahebrayo wakaamba kuti ciindi Jesu Kristo “naakaboola munyika” (nkokuti, ikutali ciindi naakazyalwa alimwi katanacizyiba kubala akwaamba majwi aaya, pele ciindi naakalisungula kubbapatizyigwa mpoonya akutalika mulimo wakwe) wakali kwaamba kweelana alugwalo lwa Intembauzyo 40:6-8 kuti: “Zipaizyo alimwi azituuzyo tiiwakaziyanda pe, pele wakandibambila mubili. . . . Bona! Ndaboola, (mubbuku lyakuvwunga kulilembedwe kujatikizya ndime) kuti ndicite kuyanda kwako, O Leza.” (Heb. 10:5-9) Jesu mbwaakazyalilwa buyo wakali kuzulilwa mucisi caba Juda, cisi eeco cakali mucizuminano a Leza, nkokuti cizuminano ca Mulawo. (Kul. 19:5-8; Gal. 4:4) Akaambo kaceeci, Jesu wakali kale mucizuminano a Jehova Leza ciindi naakalitola kuli Johane kutegwa abbapatizyigwe. Aboobo Jesu wakacita cintu cimwi icakali kuyandika kapati kwiinda ceeco ncaakeelede kucita kweelana a Mulawo. Wakalipa kuli Bausyi, nkokuti kuli Jehova kutegwa acite “kuyanda” kwa Bausyi kwiinda mukwaaba mubili wakwe walo ‘wakabambidwe’ kutegwa kulesyegwe kupaizya banyama ibakali kutuulwa kweelana a Mulawo. Mwaapostolo Paulo wakaamba kuti: “Kwiinda mu ‘kuyanda’ ooko, twakasalazyigwa kwiinda mucituuzyo camubili wa Jesu Kristo ciindi comwe buyo kukabe kutamani.” (Heb. 10:10) Cintu acimwi Bausyi Jesu ncobakali kuyanda kuti acite cakaliswaangene amulimo wa Bwami alimwi Jesu wakalilisungwide kuucita mulimo ooyu. (Lk. 4:43; 17:20, 21) Jehova wakakutambula kulyaaba kwa Mwanaakwe, kwiinda mukumunanika amuuya uusalala akwaamba kuti: “Yebo uli Mwanaangu ngweyandisya, ngwekkomanina.”—Mk. 1:9-11; Lk. 3:21-23; Mt. 3:13-17.
SEPTEMBER 16-22
MBONO IZILI MU JWI LYA LEZA | BAHEBRAYO 11
“Mboluyandika Kapati Lusyomo”
(Bahebrayo 11:1) Lusyomo mbulangizi businizyidwe bwaceeco cilangilwa, mbumboni busalede bwazintu zini-zini zitanabonwa.
Amutondezye Lusyomo Muzisyomezyo zya Jehova
Bupanduluzi bwalusyomo kweelana a Bbaibbele mbolyaamba, bulajanika kulugwalo lwa Bahebrayo 11:1. (Amubale.) Lusyomo luyeeme kapati azintu zyobilo nzyotutakonzyi kubona ameso eesu: (1) Zintu ‘eezyo zilangilwa’—eezyi zibikkilizya zintu iziyoocitika kumbele izyakasyomezyegwa kuti ziyoocitika pele izitanacitika, mbuli kumana kwabubi boonse alimwi akuboola kwanyika mpya. (2) “Zintu zini-zini zitanabonwa.” Mucibalo eeci, bbala lya Chigiriki lisanduludwe kuti “bumboni busalede” caamba bumboni butadoonekwi bwacintu cimwi iciliko pele citalibonyi, mbuli kubako kwa Jehova Leza, Jesu Kristo, bangelo, alimwi amilimo iibelekwa a Bwami bwakujulu. (Heb. 11:3) Ino mbuti mbotukonzya kutondezya kuti bulangizi bwesu nkobuli ncobeni alimwi akuti tusyoma muzintu zitalibonyi izyaambwa mu Jwi lya Leza? Tulakonzya kucita oobo kwiinda mumajwi eesu alimwi amilimo yesu. Ikuti zintu eezyi kazitako, lusyomo lwesu talukonzyi kuzulila pe.
(Bahebrayo 11:6) Kunze lyaboobo, ikuti kakunyina lusyomo tacikonzyeki pe kumukkomanisya Leza, nkaambo kufwumbwa ooyo uuswena afwaafwi kulinguwe weelede kusyoma kuti nkwali ncobeni akuti uba sikupa bulumbu kuli baabo bamuyandaula cabusungu.
“Sikupa Bulumbu Kuli Baabo Bamuyandaula Cabusungu”
Ino Jehova inga twamukkomanisya buti? Paulo wakalemba kuti: “Ikuti kakunyina lusyomo tacikonzyeki pe kumukkomanisya Leza.” Amubone kuti mwaapostolo Paulo taambi kuti nciyumu kukkomanisya Leza kuti kakunyina lusyomo. Pele waamba kuti tacikonzyeki kucita oobo. Munzila imwi, wakali kwaamba kuti lusyomo lulayandika kapati kutegwa muntu amukkomanisye Leza.
Ino Leza ukkomanina lusyomo luli buti? Kuli zyintu zyobilo zijatikizyidwe mukuba alusyomo muli Leza. Cakusaanguna, tweelede “kusyoma kuti nkwali ncobeni.” Nkaambo kuti katutasyomi kuti Leza nkwali ncobeni, tatukonzyi kumukkomanisya. Nokuba boobo, lusyomo lwini-lwini lubikkilizya zyintu zinji, nkaambo naaba madaimona alasyoma kuti Jehova nkwali ncobeni. (Jakobo 2:19) Kusyoma kuti Leza nkwali ncobeni kweelede kutupa kubweza ntaamu yakutondezya lusyomo lwesu kwiinda mukupona munzila iimukkomanisya.—Jakobo 2:20, 26.
Cabili, tweelede “kusyoma kuti” Leza ngu “sikupa bulumbu.” Muntu uujisi lusyomo lwini-lwini ulizyi kuti kusolekesya kwakwe kupona munzila iimukkomanisya Leza takuli kwabuyo pe. (1 Bakolinto 15:58) Ino inga twamukkomanisya buti Jehova ikuti katutasyomi kuti ulakonzya alimwi uliyandide kutupa bulumbu? (Jakobo 1:17; 1 Petulo 5:7) Muntu uuyeeya kuti Leza tabikkili maano, talumbi, alimwi akuti tali mwaabi, nkokuti tamuzyi Leza waambwa mu Bbaibbele.
Ino mbaani Leza mbapa bulumbu? Paulo waamba kuti upa “baabo bamuyandaula cabusungu.” Bbuku limwi lyabasanduluzi ba Bbaibbele lyaamba kuti ibbala lyamu Chigiliki lyakasandululwa kuti “bamuyandaula cabusungu” talipandululi “kuunka buya kuyooyandaula” pele lyaamba “kukomba Leza.” Ibbuku limbi lipandulula kuti, ibbala lyamu Chigiliki lyakasandululwa kuti “bamuyandaula cabusungu” lipa muzeezo wakubeleka canguzu alimwi akubikkila maano. Masimpe ngakuti, Jehova ulabapa bulumbu aabo ibajisi lusyomo lubapa kumukomba caluyando luzwa ansi aamoyo alimwi acabusungu.—Matayo 22:37.
Amuyumye Lusyomo Lwanu Muzintu Nzyomulangila
Kulugwalo lwa Bahebrayo caandaano 11, mwaapostolo Paulo waamba mapenzi ngobakaliyumya babelesi ba Leza banji ibataambidwe mazina. Mucikozyanyo, mwaapostolo waamba kujatikizya bamakaintu bakajisi lusyomo ibakasweekelwa bana babo basankwa mulufwu pele ibakazoobusyigwa. Mpoonya alimwi ulaamba kujatikizya bamwi ‘batakazumina kunununwa acinunuzyo cimwi, ikutegwa bakajane bubuke bwiinda kubota.’ (Heb. 11:35) Nokuba kuti tatukonzyi kubazyiba aabo Paulo mbaakajisi mumizeezo, bamwi, mbuli Naboti alimwi a Zekariya, bakapwaigwa mabwe mane lufwu akaambo kakumvwida Leza alimwi akucita kuyanda kwakwe. (1Bam. 21:3, 15; 2Mak. 24:20, 21) Daniele alimwi abeenzinyina bakajisi coolwe ‘cakuzumina kunununwa acinunuzyo cimwi’ kwiinda mukutakakatila kulusyomo lwabo. Muciindi caboobo, lusyomo lwabo munguzu zya Leza lwakabapa ‘kujala milomo yabasyuumbwa’ alimwi ‘akuzunda nguzu zyamulilo.’—Heb. 11:33, 34; Dan. 3:16-18, 20, 28; 6:13, 16, 21-23.
Akaambo kalusyomo lwabo, basinsimi mbuli Mikaya a Jeremiya “bakasukusyigwa kwiinda mukusampaulwa . . . akubikkwa muntolongo.” Ibambi mbuli Elija, “bakali kuyaabutuntulika muzimpayuma amumalundu amumampangala alimwi amumalindi aanyika eeyi.” Boonse bakaliyumya akaambo kakuti bakajisi ‘bulangizi businizyidwe bwaceeco cilangilwa.”—Heb. 11:1, 36-38; 1Bam. 18:13; 22:24-27; Jer. 20:1, 2; 28:10, 11; 32:2.
Kuyandaula Mbono Zyakumuuya
(Bahebrayo 11:4) Akaambo kalusyomo Abelo wakatuulila Leza cipaizyo cilaampindu kapati kwiinda ca Kaini, alimwi kwiinda mulusyomo oolo wakacitilwa bumboni bwakuti wakali mululami, nkaambo Leza wakazizumina zipego zyakwe, alimwi nokuba kuti wakafwa, ucaambaula kwiinda mulusyomo lwakwe.
it-1 804 ¶5
Lusyomo
Zikozyanyo Zyakaindi Zyalusyomo. Umwi aumwi ‘wankamu mpati yabakamboni’ njaakaamba Paulo (Heb. 12:1) wakalijisi lusyomo luyumu. Mucikozyanyo, Abelo wakalizyi kujatikizya cisyomezyo ca Leza cijatikizya “lunyungu” ilwakali kuyoopwayaula “nzoka” kumutwe. Alimwi wakalibonena kuzuzikizyigwa kwakusinganya Jehova nkwaakaamba kujatikizya bazyali bakwe mu Edeni. Kabali kunze amuunda wa Edeni, Adamu amukwasyi wakwe bakali kujana cakulya kwiinda mukuzwa nkasaalo nkaambo kakuti nyika yakalisinganizyidwe, aboobo yakamenede mamvwa azincenya. Kulalangilwa kuti Abelo wakali kumubona Eva kuti wakali kumuyandisisya mulumaakwe mpoonya awalo Adamu wakali kumweendelezya mukaintu wakwe. Tacidoonekwi kuti banyina bakali kwaamba kujatikizya macise aaboola akaambo kakutumbuka. Alimwi, kumanjililo aamuunda wa Edeni kwakabikkidwe bakerubi alimwi apanga livwilima mulilo. (Matl. 3:14-19, 24) Zyoonse eezyi bwakali ‘bumboni busalede,’ bwalo ibwakapa kuti Abelo abe alusyomo lwakuti lufwutuko lwakali kuyooboola kwiinda ‘mulunyungu lwakasyomezyegwa.’ Aboobo, kwiinda mukukulwaizyigwa alusyomo “wakatuulila Leza cipaizyo,” calo icakalaampindu kapati kwiinda ca Kaini.—Heb. 11:1, 4.
(Bahebrayo 11:5) Akaambo kalusyomo Enoki wakalonzyegwa ikutegwa ataluboni lufwu, alimwi tanaakajanwa kuli koonse pe akaambo kakuti Leza wakalimulonzyede; nkaambo katanalonzyegwa wakacitilwa bumboni bwakuti wakakkomanisya Leza.
“Wakakkomanisya Leza”
Aboobo, ino muunzila nzi Enoki ‘mwaakalonzyegwa’ kutegwa “ataluboni lufwu”? Kulangilwa kuti Jehova wakamulonzya Enoki kabotu-kabotu kuzwa kubuumi akuya kulufwu, kutegwa amukwabilile kumacise aalufwu. Pele cakusaanguna, Enoki wakacitilwa “bumboni bwakuti wakakkomanisya Leza.” Muunzila nzi? Kakusyeede buyo ciindi cisyoonto kuti afwe, kulangilwa kuti Enoki wakabona cilengaano kuzwa kuli Leza, ambweni icakali kumutondezya nyika kaili paradaiso. Akaambo kacitondezyo eeci cisalede cakuti wakali kukkomaninwa a Jehova, Enoki wakoona mulufwu. Kalemba kujatikizya Enoki alimwi abamaalumi abamakaintu bamwi basyomeka, mwaapostolo Paulo wakati: “Boonse aaba bakafwa kabajisi lusyomo.” (Bahebrayo 11:13) Kumane, ambweni basinkondonyina bakauyandaula mubili wakwe pele “tanaakajanwa kuli koonse pe,” ambweni akaambo kakuti Jehova wakausisa kutegwa bantu bataunyonyooni naa kuubelesya kusumpula bukombi bwakubeja.
SEPTEMBER 23-29
MBONO IZILI MU JWI LYA LEZA | BAHEBRAYO 12-13
“Lulayo Ncitondezyo Caluyando lwa Jehova”
(Bahebrayo 12:5) Alimwi mwakulubila limwi kukombelezya ikumwaamba kuti muli bana, kwakuti: “Mwanaangu, utalunyansyi pe lulayo luzwa kuli Jehova, nokuba kutakata nolulamikwa anguwe;
Mutalangi “Zyintu Zili Musyule”
Lulayo lucisa. Mbuti kuti katuyanda kulanga musyule cabukali kululayo lumwi ndotwakapegwa aciindi cimwi? Eeci tacikonzyi buyo kutucisa pele alimwi cilakonzya kututyompya—kupa kuti ‘tulende moyo.’ (Heb. 12:5) Kufwumbwa naa ‘twalunyasya’ lulayo kwiinda mukulukaka naa ‘twalenda moyo’ akaambo kakuti twaluzumina kumane twalukaka, izicitika zilakozyanya—tatuzumizyi lulayo kuti lutugwasye naa tubambululwe. Eelo kaka cilainda kugwasya kuti twatobela majwi aa Solomoni aakuti: “Jatisya lulayo, utaluleki; kakatila kulindulo, nkaambo mbobuumi bwako.” (Tus. 4:13) Mbubwenya mbuli namutekenya uutobela zikwankwani izili mumugwagwa, atulutambule lulayo, akulubelesya alimwi akuyaambele.—Tus. 4:26, 27; amubale Bahebulayo 12:12, 13.
(Bahebrayo 12:6, 7) nkaambo aabo mbayanda Jehova ulabalaya, mane buya, ulamukwibbaula muntu uuli woonse ngwatambula kuba mwanaakwe.” 7 Mweelede kuliyumya nkaambo eeyo ninzila imwi yakulaigwa kwanu. Leza umucitila mbuli bana bakwe. Nkaambo ino mwana uuli buti uutalaigwi abausyi?
“Nomupaila, Amwaambe Kuti, ‘Taata”
Usyi bana siluyando ulabalaya bana bakwe nkaambo inga uyanda kuti bakabe bantu bali kabotu baakukomena. (Baefeso 6:4) Usyi ooyu inga kasinizizye, pele kunyina nalaya bana bakwe calunya. Mbubwenya buyo, Taateesu wakujulu zimwi ziindi ulakonzya kutulaya. Pele lulayo lwa Leza lyoonse ulalupa caluyando ikutali cabukali. Mbubwenya mbuli Bausyi, Jesu tanaakali silunya, noliba leelyo basikwiiya bakwe nobakamuka kulutobela lulayo.—Matayo 20:20-28; Luka 22:24-30.
(Bahebrayo 12:11) Masimpe, kunyina lulayo lukkomanisya ciindi nolupegwa, pele lulacisa; nokuba boobo kuzwa waawo luzyala mucelo waluumuno abululami kuli baabo ibakayiisyigwa andulo.
“Kamumvwa Kulaigwa Kutegwa Mube Basongo”
Nokuba kuti lulayo lulakonzya kucisa kapati, kuli cintu cimwi ciinda kucisa—mapenzi aaboola akaambo kakukaka lulayo. (Heb. 12:11) Amulange-lange zikozyanyo zyobilo—Kaini a Mwami Zedekiya. Ciindi Kaini naakamusula Abelo akuba amakanze aakumujaya, Leza wakamucenjezya kuti: “Ino nkaambo nzi ncoonyemena boobu akutyompwa? Ikuti naa wacinca akutalika kucita kabotu, sena tokakkomaninwi? Pele kuti utacinci akucita kabotu, kozyiba kuti cibi cilikukkalilide amulyango, alimwi ciyanda kukweendelezya; pele sena uyoocizunda?” (Matl. 4:6, 7) Kaini tanaakaswiilila pe. Cibi cakamuzunda. Eelo kaka Kaini wakaliletela mapenzi ngaakali kukonzya kweeleba! (Matl. 4:11, 12) Lulayo lwa Jehova nolwatakacisa mbuli mapenzi ngaakajana.
Kuyandaula Mbono Zyakumuuya
(Bahebrayo 12:1) Aboobo lino, akaambo kakuti tuzingulukidwe ankamu mpati boobu yabakamboni, aswebo atuzisowe zyoonse zitulemena alimwi acibi eeco cifwambaana kutuzambaila, alimwi atubalike cakuliyumya mukusiyana nkotubikkilidwe kumbele,
w11 9/15 17-18 ¶11
Amubalike Cakuliyumya
‘Nkamu mpati yabakamboni’ tiiyakali buyo nkamu yabantu beebelela muntu naa nkamu njobayanda kuti izunde. Muciindi caboobo, bakali kutola lubazu mumuzundano uuli mbuli wakubalika. Alimwi bakazwidilila mumuzundano ooyu kusika kumamanino. Nokuba kuti lino balifwide, balakonzya kwaambwa kuti bakali basikubalika bacibwene ibakali kukonzya kukulwaizya baabo ibatalika ino-ino kubalika mumuzundano. Kamuyeeya buyo mbobakali kukonzya kumvwa kuti aakati kabaabo beebelela kwakali basikubalika bacibwene. Eeci cilakonzya kupa kuti babalike kapati kusika kumamanino. Bakamboni aaba bakaindi bakatondezya kuti muzundano ooyu wamaambilambali nokuba kuti ulakatazya, bakali kukonzya kuzwidilila. Aboobo, akaambo kakuziyeeya zyintu nzyobakali kucita ‘bankamu yabakamboni,’ Banakristo ba Hebrayo bamumwaanda wamyaka wakusaanguna bakaliyumya alimwi ‘bakabalika cakuliyumya mukusiyana’ alimwi andiswe tulakonzya kucita mbubwenya oobo mazuba aano.
(Bahebrayo 13:9) Mutaleyi akaambo kanjiisyo ziindene-indene alimwi zyeenzu, nkaambo cilainda kubota kuti moyo ukkazikizyigwe aluzyalo lwa Leza ikutali azyakulya pe, eezyo zitabagwasyi pe aabo bajisi bubi anzizyo.
w89 12/15 22 ¶10
Amutuule Zipaizyo Nzyakkomanina Jehova
Bana Hebrayo bakeelede kucenjela “akaambo kanjiisyo ziindene-indene alimwi zyeenzu” zyaba Juda. (Bagalatiya 5:1-6) Kutali akaambo kanjiisyo eezyo pe, pele kwiinda ‘muluzyalo lwa Leza lupati lukonzya kupa kuti moyo ukkazikizyigwe’ kutegwa kube kutazungaana mukasimpe. Kuboneka kuti bamwi bakali kukazyanya kujatikizya zyakulya alimwi azipaizyo, nkakaambo kaako Paulo wakaamba kuti moyo tiiwakakkazikizyidwe ‘azyakulya eezyo izyatakali kubagwasya pe aabo bakajisi bubi anzizyo.’ Aboobo kugwasyigwa kumuuya kulaboola akaambo kakubikkila maano kukukomba Leza alimwi akutondezya kulumba kucinunuzyo, kutali akaambo kakuciindizya kubikkila maano kujatikizya zyakulya zimwi alimwi akulemeka mazuba amwi. (Baroma 14:5-9) Kuyungizya waawo, cinunuzyo ca Kristo cakapa kuti zituuzyo nzyobakali kutuula bana Levi zileke kubeleka.—Bahebrayo 9:9-14; 10:5-10.
SEPTEMBER 30–OCTOBER 6
MBONO IZILI MU JWI LYA LEZA | JAKOBO 1-2
“Cintu Icisololela Kukubisya Alimwi Alufwu”
(Jakobo 1:14) Pele umwi aumwi ulasunkwa kwiinda mukoongelezyegwa akucegwa azisusi zyakwe mwini.
Masunko
Sunko nkukwelelezyegwa kucita cintu cimwi—kwaambisya cintu cibyaabi. Mucikozyanyo, ciindi nomuli mucintoolo, mwabona cintu cimwi cimukkomanisya. Mumizeezo mwayeeya kuti mulakonzya kucibba kakunyina kujatwa. Pele manjezeezya aanu aamba kuti peepe! Aboobo mwaugusya muzeezo ooyo akuzumanana kweenda. Aciindi eeco sunko lyamana, mpoonya mwaba basikuzunda.
BBAIBBELE NCOLYAAMBA
Kusunkwa tacimupi kuba muntu mubi. Bbaibbele lilazuminizya kuti toonse tulasunkwa. (1 Bakorinto 10:13) Mbotucita ciindi notwasunkwa ncecintu ciyandika kapati. Bamwi balazumanana kuyeeya cintu citali kabotu mpoonya mukuya kwaciindi balazundwa acintu eeco. Bambi mpoonya-mpoonya balacigusya mumizeezo kuti ncibi.
“Umwi aumwi ulasunkwa kwiinda mukoongelezyegwa akucegwa azisusi zyakwe mwini.”—Jakobo 1:14.
(Jakobo 1:15) Lino zisusi eezyo zyamita, zizyala cibi; mpoonya cibi eeco cacitwa, cileta lufwu.
Masunko
Bbaibbele lilaamba zintu zisololela kukucita cibi. Lugwalo lwa Jakobo 1:15 lwaamba kuti: “Zisusi [zibi] zyamita, zizyala cibi.” Mubufwaafwi, ikuti twazumanana kuyeeya zintu zibi, inga catupa kusika antaamu yakwaalilwa kuzitantamuka kusikila mane twazicita buya mbubwenya mbuli mukaintu uumitide mbwatakonzyi kusumpya buzuba bwakutumbuka. Nokuba boobo, tulakonzya kutantamuka kuba bazike bazisusi zibi. Alimwi buya tulakonzya kuzizunda.
Kuyandaula Mbono Zyakumuuya
(Jakobo 1:17) Cipego cibotu cili coonse alimwi acipego cilondokede cili coonse zizwa kujulu, zilaseluka kuzwa kuli Taata wamimuni yakujulu ooyo uutasanduki naa kucinca mbuli zimvwule zicinca-cinca.
it-2 253-254
Mumuni
Jehova ngu “Taata wamimuni yakujulu.” (Jak. 1:17) Tali buyo ‘sikupa zuba kutegwa kube mumuni masyikati, uupa milawo yamwezi alimwi uupa nyenyeezi kuti kazimweka masiku’ (Jer. 31:35) pele alimwi ngo Kasensa kamumuni uuli woonse wakumuuya. (2Kor. 4:6) Mulawo wakwe, malailile alimwi ajwi lyakwe mumuni kuli baabo bazumina kweendelezyegwa anzizyo. (Int. 43:3; 119:105; Tus. 6:23; Is. 51:4) Sintembauzyo wakaamba kuti: “Kwiinda mumumuni wako tulakonzya kubona mumuni.” (Int. 36:9; amweezyanisye a Int. 27:1; 43:3.) Mbubwenya mbuli mumuni wazuba mbouzumanana kuyaabumwekesya kuzwa kubucedo “kusikila mane kwatuba buu,” ayalo nzila yabalulami, iimunikilwa abusongo bwa Leza, ilazumanana kumwekesya. (Tus. 4:18) Aboobo kutegwa tutobele malailile ngabikkide Jehova, tweelede kweenda mumumuni wakwe. (Is. 2:3-5) Kulubazu lumwi, ikuti muntu kalanga zintu munzila iitali kabotu naa kuba amakanze mabyaabi, nkokuti muntu ooyo uli mumudima wakumuuya uutaambiki. Eeci cileendelana ancaakaamba Jesu naakati: “Ikuti liso lyako kalilaamunyono, mubili wako woonse ulaba mumudima. Ikuti liso ilyeelede kuleta mumuni kumubili lyabija akutalika kuleta mudima, mubili woonse ulaba mumudima uusiya mbi!”—Mt. 6:23; amweezyanisye a Dt. 15:9; 28:54-57; Tus. 28:22; 2Pet. 2:14.
(Jakobo 2:8) Lino ikuti naa mulautobela mulawo wamwami kweelana alugwalo lwaamba kuti, “Weelede kuyanda simukobonyoko mbubonya mbuli mboliyanda omwini,” mucita kabotu kapati.
it-2 222 ¶4
Mulawo
“Mulawo Wamwami.” “Mulawo wamwami” ulisumpukide alimwi ulayandika kapati kwiinda milawo iimbi yeendelezya bukkale bwabantu njakonzya kubikka mwami. (Jak. 2:8) Cintu cipati icakali mucizuminano ca Mulawo nduyando; nkaambo wakali kwaamba kuti “weelede kuyanda simukobonyoko mbubonya mbuli mboliyanda omwini” mpoonya (mulawo wamwami) wakali mulawo wabili akati kamilawo aakayeeme Mulawo woonse a Basinsimi. (Mt. 22:37-40) Nokuba kuti tabeendelezyegwi acizuminano ca Mulawo, Banakristo baleelede kutobela mulawo wa Mwami Jehova alimwi a Mwanaakwe, Mwami Jesu Kristo kweelana acizuminano cipya.