Malifalensi Aamu Kabbuku Kamuswaangano Wabuumi Amulimo Wesu
MARCH 1-7
MBONO IZILI MU JWI LYA LEZA | MYEELWE 7-8
“Nzyotwiiya Kunkambi Yabana Israyeli”
it-1 497 ¶3
Mbungano
Mu Israyeli, kwakali kubikkwa baiminizi kutegwa kabaiminina bantu boonse. (Ezr. 10:14) Aboobo, ‘basilutwe bamisyobo’ mbabakaleta zipego kumbele lyatente lyakukombela nolyakamana kwiimikwa. (My. 7:1-11) Kunze lyaboobo, bapaizi, ba Levi, ‘abasilutwe babantu,’ mbabakasinizya “cizuminano cisyomeka” mumazuba aa Nehemiya kwiinda mukubikka ciganto. (Neh. 9:38–10:27) Bana Israyeli nobakali munkanda, ‘basilutwe bambungano, baalumi basalidwe, alimwi abasimpuwo’ ibali 250 bakasangana Kora, Datani, Abiramu, a Oni mukubukila Musa a Aroni. (My. 16:1-3) Musa wakatobela busolozi bwa Leza kwiinda mukusala baalumi bali 70 akati kabaalu bamu Israyeli ibakali basilutwe, kutegwa bamugwasye “kunyamuna mukuli wabantu” ngwaakaalilwa kunyamuna alikke. (My. 11:16, 17, 24, 25) Lugwalo lwa Levitiko 4:15 lwaamba kujatikizya “baalu bambungano,” alimwi kulibonya kuti ibakali kwiiminina bantu bakali baalu babana Israyeli, basololi babo, babetesi babo alimwi abasilutwe babo.—My. 1:4, 16; Jos. 23:2; 24:1.
it-2 796 ¶1
Rubeni
Munkambi yabana Israyeli, bana Rubeni bakakkede akati kabana Simeoni abana Gadi, tente lyakukombela nkolili kumusanza. Nobakali kweenda, nkamu yamisyobo yotatwe eeyi iyakali kweendelezyegwa a Rubeni, yakali kutobela nkamu yamisyobo yotatwe ya Juda, Isakara, a Zebuloni. (My. 2:10-16; 10:14-20) Alimwi oobu mbobubambe bwakatobelwa ciindi misyobo noyakali kuleta zipaizyo nolyakaabwa tente lyakukombela.—My. 7:1, 2, 10-47.
Twaambo Tupati-Pati Kuzwa Mubbuku lya Myeelwe
8:25, 26. Ikutegwa baalumi beelela ncobeni babikkwe amulimo uucitwa aba Levi, alimwi kwiinda mukubikkila maanu kuciimo cabo, ibakacembeede bakalaililwa kuti kabacileka kubeleka mulimo uuminya bakomena. Nokuba boobo, bakali kukonzya kulisungula kugwasya ba Levi bambi. Nokuba kuti kunyina kucileka mulimo wakuba sikwaambilizya wa Bwami sunu, injiisyo yamulawo ooyu iyiisya ciiyo ciyandika kapati. Ikuti akaambo kakucembaala Munakristo umwi tacicikonzyi kubeleka milimo imwi, ulakonzya kujatikizyigwa mumilimo imwi njakonzya kubeleka.
Mbono Zyakumuuya
it-1 835
Mwana Mutaanzi
Mbwaanga bana basankwa bataanzi bana Israyeli mbabakeelede kuba basilutwe bamikwasyi iindene-indene, mbabakali kwiiminina cisi coonse. Mane buya, Jehova, wakaamba cisi coonse kuti “mwanaangu, imutaanzi kuzyalwa,” akaambo kakuti ncecisi cakwe cakusaanguna kweelana acizuminano ca Abrahamu. (Kul. 4:22) Mbwaanga Jehova wakafwutula buumi bwabo, wakabalailila kuti bamusalazizye “mwana musankwa mutaanzi kuzyalwa, wamuntu awamunyama.” (Kul. 13:2) Aboobo, bana basankwa bataanzi bakaabidwe kuli Leza.
MARCH 8-14
MBONO IZILI MU JWI LYA LEZA | MYEELWE 9-10
“Jehova Mbwasololela Bantu Bakwe”
it-1 398 ¶3
Nkambi
Mboyakali kweenda nkambi eeyi mpati (ku Myeelwe 33, Musa wakaamba masena aabalilwa ku 40) kuzwa abusena bumwi kuunka abusena bumbi cakatondezya kuti bakali kutobela bubambe bwakabikkidwe. Ikuti kkumbi kalivwumbide atala lyatente lyakukombela, bana Israyeli tiibakali kweenda. Pele kuti kkumbi lyanyamuka, bakali kweenda. “Jehova abalailila bana Israyeli kuti banyamuke, bakali kunyamuka akweenda, eelyo Jehova abalailila kuti bayake zilawo, bakali kuyaka.” (My. 9:15-23) Myeembo yansiliva yobilo iifwulidwe ansando njiyakali kuzyibya bantu boonse Jehova nzyaakalailila. (My. 10:2, 5, 6) Kulila kwamweembo munzila iicinca-cinca kwakali kubazyibya kuti banyamuke. Ciindi cakusaanguna nocakacitika eeci, mwakali “mubuzuba bwa 20 bwamwezi wabili mumwaka wabili [1512 B.C.E].” Bbokesi lyacizuminano kalili kumbele, nkamu yamisyobo yotatwe yakanyamuka, kumbele kwakali nkamu yakali kusololelwa a Juda, mpoonya ya Isakara, kumane ya Zebuloni. Kuzwa waawo, kwakali kuboola bana Gerisoni abana Merari kabanyamwide zibeela zyatente lyakukombela. Mpoonya kwakali kutobela nkamu yamisyobo yotatwe iyakali kusololelwa a Rubeni, mpoonya ya Simeoni kumane ya Gadi. Kuyungizya waawo, kwakali kutobela bana Kohati kabanyamwide tente lyakukombela, mpoonya kwakali kutobela nkamu yamisyobo yotatwe iyakali kusololelwa a Efraimu, mpoonya ya Manase kumane ya Benjamini. Kuzwa waawo, kumamanino, kwakali nkamu yakali kusololelwa amusyobo wa Dani, mpoonya wa Aseri, kumane wa Nafutali. Aboobo imisyobo mwakali bantu banji alimwi iyakajisi nguzu kapati yakali kweendela kumbele amusyule.—My. 10:11-28.
Sena Mulabona Kuti Mweendelezyegwa a Leza?
Ino inga twatondezya buti kuti tulabukkomanina bweendelezi bwa Leza? Mwaapostolo Paulo wakaamba kuti: “Kamubamvwida aabo basololela akati kanu alimwi kamulibombya.” (Heb. 13:17) Pele kucita boobo tacili cuuba-uba lyoonse pe. Mucikozyanyo: Amweezyezye kuti muli bana Israyeli mumazuba a Musa. Amuyeeye kuti mwali kweenda kwaciindi cilimbocibede, kumane ikkumbi lyaima. Ino lilaima kwaciindi cilamfwu buti? Sena mbuzuba bomwe? Ninsondo? Naa myezi buya? Mpoonya mulakonzya kulibuzya kuti, ‘Sena ndilongolole zyintu zyoonse nzyondijisi?’ Kusaanguna ndiza inga mwalongolola buyo zyintu ziyandika kapati. Mukuya kwamazuba mulakonzya kuzilongolola zyoonse. Mpoonya kamuyanda kumanizya kulongolola, mwabona ikkumbi lyanyamuka caamba kuti mweelede kutalika alimwi kulongela. Kucita boobo tacili cuuba-uba. Mbubwenya buyo bana Israyeli bakeelede ‘kulonga.’—My. 9:17-22.
Ino tucita buti notweendelezyegwa a Leza? Sena tulabutobela bweendelezi oobo? Naa tulazumanana kucita zyintu kweelana ambotwakazyibila kucita? Sena tulaatobela malailile ngotwakapegwa ino-ino mbuli kusololela ziiyo zya Bbaibbele, kukambaukila bantu bazwa kuzisi zimbi, kujanika lyoonse kukomba mumukwasyi, kubelekela aantoomwe aba Kkomiti ya Hospital Liaison alimwi akulilemeka kabotu kumiswaangano yacooko? Alimwi tulatondezya kuti tulabulemeka bweendelezi bwa Leza kwiinda mukutobela lulayo. Notusala ziyandika kapati tatweelede kulisyoma pe, pele tweelede kulanga kuli Jehova ambunga yakwe kuti itusololele. Mbubwenya mbuli mwana mbwayanda kukwabililwa abazyali bakwe nokuli mvwula mpati, andiswe tulakwabililwa ambunga ya Jehova ciindi mapenzi aali mbuli mvwula mpati naatusikila.
Mbono Zyakumuuya
it-1 199 ¶3
Kuswaangana
Ncokuyandika Kuswaangana. Pobwe Lyakwiindilila ilyakali kucitwa mwaka amwaka litondezya kaambo ncotweelede kubona miswaangano Jehova njatubambila kuti itugwasye kumuuya kuba cintu ciyandika kapati. Mwaalumi uuli oonse iwakali kusalala alimwi watakali mulweendo, pele watakali kulibambila Pobwe Lyakwiindilila wakeelede kujaigwa. (My. 9:9-14) Ciindi Mwami Hezekiya naakaita aabo bakali kukkala mu Juda alimwi amu Israyeli ku Jerusalemu kuti basekelele Pobwe Lyakwiindilila, mulumbe wakwe, wakali wakuti: “Nobana Israyeli, amupiluke kuli Jehova . . . mutayumyi myoyo yanu mbuli mbobakacita bamauso. Amulibombye kuli Jehova akuboola kutempele lyakwe ndyaasalazya kukabe kutamani, mubelekele Jehova Leza wanu kutegwa bukali bwakwe buyaka mbuli mulilo bumuleke. . . . Jehova Leza wanu ngusiluse alimwi ngusilweetelelo, alimwi takamufwutatili ikuti naa mwapiluka kulinguwe.” (2Mak. 30:6-9) Kwaalilwa kujanika acaali cakali kutondezya kutamubikkila maano Leza. Alimwi nokuba kuti mapobwe mbuli Pobwe Lyakwiindilila taacitwi a Banakristo, Paulo wakabakulwaizya kutaleka kuswaangana antoomwe naakati: “Katubikkilana maano ikutegwa tukulwaizyanye kutondezya luyando akucita milimo mibotu, tutanooleki kuswaangana antoomwe, mbuli bamwi ibajisi ciyanza eeci, pele katukulwaizyanya umwi amweenzinyina, alimwi atuzumanane kucita boobo ikapati mbomubwene kuti buzuba bwaswena afwaafwi.”—Heb. 10:24, 25.
MARCH 15-21
MBONO IZILI MU JWI LYA LEZA | MYEELWE 11-12
“Nkaambo Nzi Ncotweelede Kweeleba Muuya Wakutongooka?”
Mutabi Basikuswiilila Buyo Ibaluba
Ibunji bwa Banakristo tabalinjizyi mukutalilemeka kwakoonana. Pele tweelede kucenjela akubona kuti tatutaliki kutongooka kwalo kukonzya kupa kuti tukakwe a Leza. Paulo utulaya kuti: “Tutasunki Jehova mbubakamusunka bamwi babaabo, elyo bakalumwa kubazoka. Alimwi mutatongauki mbuli mbubakatongauka bamwi babaabo, bakanyonyoonwa kuli-Sikunyonyoona.” (1 Ba-Korinto 10:9, 10) Bana Israyeli bakabatongooka ba Musa a Aroni—ee, kubikkilizyaa Leza buya kumugama—bakaatongooka mana ngobakali kupegwa munzila yamaleele. (Myeelwe 16:41; 21:5) Sena Jehova tanaakanyema kapati akaambo kakutongooka kwiinda mbwakanyema akaambo kabwaamu bwabo? Ibbaibbele lyaamba kuti basikutongooka banji bakafwa kwiinda mukulumwaa nzoka. (Myeelwe 21:6) Muciindi camusyule, bantu ibali 14,700 basikutongooka bazangi bakanyonyoonwa. (Myeelwe 16:49) Aboobo, tatweelede kusunka kukkazika moyo kwa Jehova kwiinda mukutalemeka zintu Jehova nzyatupa.
‘Mutanootongooki’
Elo muuya wa Israyeli wakacinca kaka! Kumatalikilo, ikulumba kwabo akaambokakunununwa kuzwa ku Egepita alimwi akuvwunwa kwiinda mu Lwizi Lusalala kwakabakulwaizya kwiimba ntembauzyo kuli Jehova. (Kulonga 15:1-21) Pele kabalangila makatazyo aamunkanda alimwi akuyoowa bana Kanana, ikulumba kwabantu ba Leza kwakanjililwa busena amuuya wakutongooka. Muciindi cakulumba Leza akaambo kalwaanguluko ndobakajisi, bakamutongooka akaambo kakuyeeya kulubide nkobakajisi kwakuti wakali kubaimya nzyobakali kuyanda. Aboobo kutongooka kwakali kutondezya kuti bakali bantu batalumbi kuli Jehova kuzintu nzyaakali kubapa. Nkakaambo kaako ncaakati: “Ino inkamu eyi imbi ilaleka lili kunditongaukila?”—Myeelwe 14:27; 21:5.
it-2 719 ¶4
Kuzwangana
Kutongooka. Kutongooka kulatyompya alimwi kulacisa. Kalitanalampa kuzwa ciindi nobakazwa mu Egepita, bana Israyeli bakatalika kumutongooka Jehova, akaambo kababelesi bakwe Musa alimwi a Aroni mbaakabikkide kubasololela. (Kul. 16:2, 7) Kumbele matongoosi aabo akamutyompya kapati Musa cakuti wakalomba kuti afwe. (My. 11:13-15) Kutongooka kulakonzya kumubikka muntenda mpati sikutongooka. Zintu zyoonse nzyobakali kutongookela Musa Jehova wakazibona kuti bakali kutongooka bweendelezi bwakwe. (My. 14:26-30) Aboobo, ibanji bakajaigwa akaambo kakutongooka.
Mbono Zyakumuuya
it-2 309
Mana
Mbwaakali Kulibonya. Mana akali kulibonya mbuli “tunseke tuniini-niini tutuba” alimwi “akali kuboneka” mbuli bulimbo. Akali kulweela “mbuli tunkwa tuvwelene abuci” naa “mbuli tunkwa tuvwelene amafwuta.” Bamana kwaaziya naa kwaatwa, bakali kwaajika naa kwaapanga zinkwa zibunge.—Kul. 16:23, 31; My. 11:7, 8.
MARCH 22-28
MBONO IZILI MU JWI LYA LEZA | MYEELWE 13-14
“Lusyomo Mbolutupa Kuba Basicamba”
Kuba Sicamba Kwiinda Mukusyoma Akuyoowa Leza
Pele basikutwela bobilo, Joshua a Kalebe bakaliyandide kapati kunjila mu Nyika Yakasyomezyegwa. Bakati, bana Kanana “nzilyo zyesu. Citabilizyo cabo cazwa; Jehova uli aswebo; mutabayoowi.” (Myeelwe 14:9) Sena Joshua a Kalebe bakali kwiile kusyoma ncobatakazyi? Peepe! Antoomwe acisi coonse bakalibwene Jehova nkwaakanyansya Egepita singuzu abaleza bakwe kwiinda mu Zipenzyo Zili Kkumi. Mpoonya bakabona Jehova nkwaakanyikizya Farao ampi yakwe mu Lwizi Lusalala. (Intembauzyo 136:15) Cakutadooneka, basikutwela bali kkumi abaabo bakasungilizyigwa ambabo bakanyina kaambo kakubeda abukandu. Katondezya kucisa moyo Jehova wakati, “Balaleka lili kukaka kundisyoma, nekuba kuti zitondezyo nzinji nzindakacita akati kabo?”—Myeelwe 14:11.
Jehova wakaligama buya penzi—ibukandu mbobakajisi bantu bwakatondezya kubula lusyomo kwabo. Inzya, lusyomo abusicamba zileendelana kapati, cakuti imwaapostolo Johane wakalemba kujatikizya mbungano ya Bunakristo alumamba lwakumuuya ndoyakajisi kuti: “Luzundo luzunda nyika ndoolu, ndusyomo lwesu.” (1 Johane 5:4) Sunu, lusyomo mbuli loolo lwa Joshua a Kalebe lwapa kuti kukambaukwe makani mabotu aa Bwami nyika yoonse a Bakamboni ba Jehova bainda kutuulunzuma tuli cisambomwe, bana abapati, basinguzu abakompeme. Kunyina sinkondo wacikonzya kukazya impi eeyi yabasinguzu basicamba.—Ba-Roma 8:31.
Mbono Zyakumuuya
it-1 740
Nyika Leza Njaakapa Bana Israyeli
NYIKA Leza njaakapa bana Israyeli yakali nyika mbotu ncobeni. Musa naakatuma basikutwela kuti bakailange-lange Nyika Yakasyomezyedwe akubweza micelo imwi yanjiyo, bakaleta nkuyu, mapomegranite, acikama camisaansa cipati cakuti cakatembwa abamaalumi bobilo acisamu! Nokuba kuti bakayoowa akaambo kakubula lusyomo, bakaluula kuti: Nyika eeyi “ninyika iikunka buci amukupa.”—My. 13:23, 27.
AMUSUNGWAALE MUMULIMO WAMUMUUNDA
Sena zisyomezyo zya Leza tucizibona kuba nzyancobeni? Mucikozyanyo, Leza wasyomezya kunyonyoona nyika ya Saatani. Nokuba boobo, sena tulanyonganizyigwa azintu zyakulikondelezya ziindene-indene iziliko munyika eeyi? Ikuti naa mbombubo oobo, tulakonzya kutalika kudooneka kuti mamanino ali afwaafwi. (Hab. 2:3) Amubone acikozyanyo cimbi. Jehova wakapa cinunuzyo, alimwi akusyomezya kuti ulatulekelela zibi zyesu. Pele ikuti twazumanana kubikkila maano kuzibi nzyotwakacita musyule, tulakonzya kutalika kudooneka kuti Jehova wakatulekelela ncobeni. (Mil. 3:19) Eeci cilakonzya kupa kuti lukkomano lwesu ndotujisi mukubelekela Leza lumane alimwi akucileka kukambaukila bamwi.
Sena Jehova ndicimubelekela kusikila mpondigolela? Kubelekela Jehova canguzu kulatugwasya kubikkila maano kapati kubulangizi bwesu bwakumbele. Nokuba boobo, ino mbuti kuti twatalika kubikkila maano kapati kuzintu nzyotuyanda lwesu tobeni? Mucikozyanyo, tulakonzya kuzumina kulembwa mulimo uuvwolwa mali mabotu-botu pele uutatupi ciindi cakubelekela Jehova. Eeci cilakonzya kupa kuti lusyomo lwesu luceye, alimwi tulakonzya kuba “batolo,” kubelekela Jehova asyoonto kwiinda mbotukonzya kumubelekela.—Heb. 6:10-12.
Sena cilandiyumina kulekelela bamwi? Ciindi bamwi nobatulubizyila naa kutucisizya moyo, sena tulakalala naa kucileka kubaambauzya? Ikuti naa mbombubo oobo, inga kakuli tubikkila maano kapati mbotulimvwa. Tutondezya kuti tulamusyoma Jehova ciindi notulekelela bamwi. Munzila nzi? Ikuti umwi watulubizyila, cili mbuli kuti ujisi cikwelete kulindiswe. Ciindi notwamulubizyila Jehova, tulaba acikwelete kulinguwe. (Lk. 11:4) Aboobo, ciindi notulekelela bamwi, tusyoma Jehova. Tusyoma nguwe kuti atulongezye akaambo kabube bwesu, alimwi zilongezyo zyakwe nzibotu kapati kwiinda cintu ncakonzya kutucitila muntu iwatulubizyila. Basikwiiya ba Jesu abalo bakazyiba kuti lusyomo lulayandika kutegwa tulekelele bamwi. Ciindi Jesu naakabaambila kulekelela bantu ibakabalubizyila ziindi zinji, basikwiiya bakwe bakamulomba kuti: “Kotuyungizyila lusyomo.”—Lk. 17:1-5.
Sena ndilanyema kuti ndapegwa lulayo? Amuyandaule twaambo tugwasya mululayo ndomwapegwa muciindi cakuyandaula zintu zilubide mululayo naa muciindi cakuyandaula kulubizya kwasikupa lulayo. (Tus. 19:20) Mutaindwi coolwe cakwiiya kuyeeya mbuli mbwayeeya Jehova!
Sena ndilatongooka kujatikizya baabo basololela mumbungano? Ciindi bana Israyeli nobakabikkila maano kumulumbe mubyaabi ngobakaamba basikutwela nyika ibali kkumi, bakatalika kutongooka Musa alimwi a Aroni. Mpoonya Jehova wakabuzya Musa kuti: “Ino bayooleka lili kutandisyoma?” (My. 14:2-4, 11) Masimpe, Jehova wakalizyi kuti bana Israyeli tiibakali kumusyoma nkaambo bakatongooka Musa alimwi a Aroni, baalumi mbaakasalide. Mbubwenya buyo, ikuti lyoonse katutongooka baabo Jehova mbabelesya kusololela bantu bakwe mazuba aano, inga catondezya kuti lusyomo lwesu muli Leza lwaceya.
MARCH 29–APRIL 4
MBONO IZILI MU JWI LYA LEZA | MYEELWE 15-16
“Amukucenjelele Kulisumpula Alimwi Akuciindizya Kulisyoma”
Sena Jehova Ulimuzyi?
Nokuba boobo, ciindi bana Israyeli nibakali mulweendo kuya ku Nyika Yakasyomezyegwa, Kora wakabona mbuli kuti kuli cakalubide mububambe bwa Leza. Mpoonya baalumi bamwi bakali kusololela ibakali 250 bakaba kulubazu lwa Kora kusoleka kuti bacince zyintu. Kulangilwa kuti Kora abamwi bakali kulimvwa kuti bakalikwabilidwe akaambo kacilongwe cabo a Jehova. Bakaambila Musa kuti: “Mwalisumpula, nkaambo bantu boonse buyo balasalala, alimwi Jehova mpali akati kabo.” (My. 16:1-3) Eelo kaka wakatondezya muuya wakulisumpula akulisyoma! Musa wakabaambila kuti: “Jehova ulamutondezya na ngwasalide nguni.” (Amubale Myeelwe 16:5.) Kumamanino aabuzuba bwakatobela, Kora alimwi abaabo bakazanga anguwe bakafwa.—My. 16:31-35.
Sena Jehova Ulimuzyi?
Musa a Kora baliindene kapati caboola kukutondezya bulemu kububambe bwa Jehova alimwi akuyanda kwakwe. Mbobakali kucita zyintu kujatikizya bubambe bwa Jehova alimwi akuyanda kwakwe kuli mbokwakaswaangene ambwaakali kubabona. Kora wakali mu Levi muna Kohati alimwi wakalijisi mikuli minji, yalo yakali kubikkilizya acoolwe cakubona lufwutuko lwabana Israyeli nibakazabuka Lwizi Lusalala, wakaba kulubazu lwa Jehova ciindi Jehova naakali kubeteka bana Israyeli a Cilundu ca Sinai ibatakali kutobela milawo alimwi wakatola lubazu mukubweza bbokesi lya cizuminano. (Kul. 32:26-29; My. 3:30, 31) Cilalibonya kuti wakali kusyomeka kuli Jehova kwamyaka minji alimwi bana Israyeli banji bakali kulanga kulinguwe.
Mbono Zyakumuuya
w98 9/1 20 ¶1-2
Amuzibikke Kumbele Izintu Ziyandika Kucitwa Kusaanguna!
Eci Jehova wakacibona kuti mulandu mupati. Ibbaibbele lyaamba kuti, “mpoonya awo Jehova wakaambila Musa kuti, Oyo muntu ncobeni uleelede kujayigwa.” (Myeelwe 15:35) Nkaambo nzi ncaakacibona munzila eyi Jehova ncaakacita muntu oyo?
Ibantu bakalijisi mazuba aali cisambomwi aakutebba nkuni alimwi akubeleka milimo imwi kujatikizya cakulya, zyakusama alimwi amaanda. Ibuzuba bwaciloba bwakeelede kwaabwa kukucita milimo yakumuuya. Nokuba kuti teecakalubide kutebba nkuni, tiicakaluzi pe ikubelesya ciindi eco ikucita boobo calo cakeelede kubelesyegwa kukomba Jehova. Nokuba kuti Banakristo tabeendelezyegwi a Mulawo wa Musa, sena eci cakacitika tacituyiisyi ciiyo sunu cakuzibikka kumbele izintu ziyandika kusaanguna?—Ba-Filipi 1:10.
AMUSUNGWAALE MUMULIMO WAMUMUUNDA
Kulimvwa kabotu akaambo kazintu nzyotucita kabotu, akaambo kamuntu umwi naa cintu cimwi kupa kuti tulimvwe kuba abulemu. Alimwi kutupa kukkutila akaambo kakuti swebo lwesu naa bantu mbotuyandisya bacita cintu cimwi cibotu naa akaambo kakuti bajisi cintu cimwi cibotu.” Tacili cibi kulimvwa boobu pe. Mwaapostolo Paulo wakaambila bana Tesalonika kuti: “Tulamulumbaizya kumbungano zya Leza akaambo kakuliyumya kwanu, alimwi alusyomo lwanu mukupenzyegwa kwanu koonse kubikkilizya amapenzi aamujisi.” (2Tes. 1:4) Aboobo, kulimvwa kabotu akaambo kamilimo yabamwi alimwi akukkomana akaambo kamilimo yesu kuli buyo kabotu. Tatweelede kufwa nsoni akaambo kamukwasyi wesu, zilengwa zyesu, naa busena nkotwakakomenena.—Mil. 21:39.
Kulubazu lumwi, kulisumpula kulakonzya kunyonganya zilongwe kwaambisya cilongwe cesu a Jehova. Kulisumpula kulakonzya kupa kuti tunyansye naa kukaka lulayo muciindi cakulutambula cakulibombya. (Int. 141:5) Kulisumpula “nkulilanga munzila iiteelede” naa “bube mbobatondezya bantu ibayeeya kuti balabainda bamwi nokuba kuti kanji-kanji inga kakutakwe twaambo tulimvwisya tubapa kuyeeya boobo.” Jehova ulakusulaika kulisumpula. (Ezk. 33:28; Am. 6:8) Pele Saatani ulakkomana kubona bantu balidunda, nkaambo batondezya bube mbubwenya mbwajisi bwakulisumpula. Kweelede kuti Saatani wakakkomana akulidunda kwabantu bali mbuli Nimrodi, Farao, alimwi a Abisalomu. Bantu aaba boonse bakazundwa abube bwakulisumpula. (Matl. 10:8, 9; Kul. 5:1, 2; 2Sam. 15:4-6) Kulisumpula alimwi nkokwakapa kuti cilongwe ca Kaini a Leza cinyongane. Kaini wakapegwa lulayo a Leza lwakwe mwini, pele kulisumpula kwakwe kwakapa kuti atatambuli lulayo ndwaakapegwa. Cakulisumpula taakacibikkila maano ncaakakulwaizyigwa kucita a Jehova, eeci cakapa kuti alinjizye muntenda.—Matl. 4:6-8.
APRIL 5-11
MBONO IZILI MU JWI LYA LEZA | MYEELWE 17-19
“Mebo Ndendime . . . Lukono Lwako”
Sena Mulamuzumizya Jehova Kuti Abe Caabilo Canu?
Amuyeeye ba Levi ibatakapegwa lukono lwanyika. Mbokunga kukomba ncecintu ncobakali kuyandisya, bakali kusyoma Jehova kuti ulabapa zyakulya, nkaambo wakabaambide kuti: “Ndime caabilo cako.” (My. 18:20) Nokuba kuti tatubelekeli mutempele mbuli bapaizi aba Levi mbobakali kucita, tulakonzya kwiiya cikozyanyo cabo katujisi lusyomo lwakuti Jehova uyootupa nzyotuyandika. Lusyomo ndotujisi lwakuti Leza ulakonzya kutupa nzyotuyandika lulayuma kapati mbotuya kumamanino aamazuba.—Ciy. 13:17.
Jehova Ncaabilo Cangu
Ino kucita mulimo ooyu cakali kwaamba nzi kuba Levi? Jehova wakaamba kuti wakali kuyooba caabilo cabo mukuti bakapegwa coolwe cakucita mulimo uutajisi muulo muciindi cakutambula lukono lwanyika. Kuba ‘bapaizi ba Jehova’ ndolwakali lukono lwabo. (Jos. 18:7) Lugwalo lwa Myeelwe 18:20 lutondezya kuti eeci tiicakapa kuti babe bacete pe. (Amubale Myeelwe 18:19, 21, 24.) Ba Levi bakeelede kupegwa “zipanzi zyoonse zyakumi zyambono zyaba-Israyeli, bazikone, nkaambo kamilimo yabo.” Bakeelede kutambula cibeela ca 10 pesenti cazyintu nzyobakatebula bana Israyeli alimwi abanyama bavwubwa ibakayungizyigwa. Abalo ba Levi bakeelede kupa cibeela cakkumi cazyintu nzyobakatambula, “nkokuti zintu zinono zyamulinzizyo” kutegwa bagwasyilizye mulimo wabupaizi. (My. 18:25-29) Bapaizi alimwi bakali kupegwa “zipaizyo zyoonse zisalala,” bana Israyeli nzyobakali kuleta kuli Leza abusena bwakukombela. Aboobo, baciinga cabupaizi bakeelede kusyoma Jehova kuti uyoobapa nzyobayandika.
Mbono Zyakumuuya
g02 6/8 14 ¶2
Munyo, Ncintu Ciyandika Kapati
Kuyungizya waawo, munyo wakaba citondezyo cacintu cisitikide alimwi citamani. Aboobo kaindi, cizuminano citamani cakali kwiitwa kuti “cizuminano camunyo.” Kumane bantu bakajatikizyidwe mucizuminano eeci bakali kulya antoomwe, kakuli amunyo, kutondezya kuti banjila mucizuminano. (Myeelwe 18:19) Ansi aa Mulawo wa Musa, munyo wakali kubikkwa muzipaizyo zyakali kutuulwa acipaililo, kwiiminina kutasofwaala naa kutabola.
AMUSUNGWAALE MUMULIMO WAMUMUUNDA
Tulamupa Jehova akaambo kaluyando ndotujisi kulinguwe alimwi akumulumba. Ciindi notulanga-langa zintu zyoonse Jehova nzyatucitila, tulakulwaizyigwa kapati. Naakali kupandulula zintu izyakali kuyandika kumulimo wakuyaka tempele iwakali kulangilwa, Mwami Davida wakazumina kuti zintu zyoonse nzyotujisi zizwa kuli Jehova alimwi akuti kufwumbwa ncotumupa Jehova cizwa akati kazintu nzyaakatupa kale.—Amubale 1 Makani 29:11-14.
Kupa alimwi ncitondezyo cabukombi bwesu kuli Jehova. Mucilengaano, mwaapostolo Johane wakamvwa babelesi ba Jehova kujulu kabaamba kuti: “Uleelela, Jehova, O Leza wesu, ikutambula bulemu alulemeko alimwi anguzu, nkaambo nduwe wakalenga zintu zyoonse, alimwi akaambo kakuyanda kwako zyakabako alimwi zyakalengwa.” (Ciy. 4:11) Sena tamukonzyi kuzumina kuti Jehova uleelela kutambula bulemu boonse alulemeko nzyotukonzya kumupa kwiinda mukumupa zintu ziinda kubota nzyotujisi? Kwiinda muli Musa, Jehova wakalailila bana Israyeli kuti kabalibonya kubusyu bwa Jehova ziindi zyotatwe mumapobwe akali kucitwa mwaka amwaka. Kacili cibeela cabukombi bwabo kumapobwe aayo, bana Israyeli tiibakeelede “kuboola kubusyu bwa Jehova cinkwamaanza.” (Dt. 16:16) Mbubwenya buyo amazuba aano, kupa kuzwa ansi amoyo kutegwa tutondezye kulumba alimwi akugwasyilizya mulimo wacibeela caanyika cambunga ya Jehova ncintu ciyandika kapati mubukombi.
Kupa, ncintu cili kabotu kulindiswe. Ncintu cigwasya kulindiswe kuti katupa cabwaabi kutali buyo kuba basikutambula. (Amubale Tusimpi 29:21.) Tulakonzya kuyeeya mwana uupa bazyali bakwe cipego kuzwa kumali masyoonto ngobamupa. Eelo kaka bazyali balalumba cipego eeco! Mwana uubeleka mulimo wabupainiya alimwi uukkala aŋanda ulakonzya kupa bazyali mali amwi kutegwa agwasyilizye kuula zintu ziyandika aŋanda. Nokuba kuti bazyali tabakonzyi kulangila cintu cili boobu kucitika, balakonzya kuzitambula zipego eezyi akaambo kakuti kumwana ninzila yakutondezya kulumba kuzintu zyoonse nzyobamucitila. Mbubwenya buyo, Jehova ulizyi kuti kupa zintu zyesu ncintu cili kabotu kulindiswe.
APRIL 12-18
MBONO IZILI MU JWI LYA LEZA | MYEELWE 20-21
“Amuzumanane Kubomba Moyo Ciindi Nomwafwaankanizyigwa”
Amuyandaule Kubomba Moyo Akukkomanisya Jehova
Tuyookweeleba kucita zintu iziyootuletela mapenzi. Amuyeeye alimwi kujatikizya Musa. Kwamyaka minji wakazumanana kali muntu mubombe moyo alimwi akukkomanisya Jehova. Mpoonya kumamanino kwalweendo ilukatazya munkanda ilwakatola myaka iili 40, Musa wakaalilwa kutondezya kubomba moyo. Mwanookwabo, ooyo uulangilwa kuti nguwakafwutula buumi bwakwe mu Egepita, wakazwa akufwa alimwi wakazikkwa ku Kadesi. Lino alimwi bana Israyeli bakali kutongooka kuti tiibakali kulanganizyigwa kabotu. Aciindi eeci bakali ‘kuzwangana a Musa’ kujatikizya kubula maanzi. Nokuba kuti Jehova wakabacitila maleele manji kwiinda muli Musa alimwi nokuba kuti Musa wakabasololela kabotu kwaciindi cilamfwu, bantu bakatongooka. Tiibakatongooka buyo kujatikizya kubula maanzi pele alimwi bakamutongooka Musa, mbuli kuti ngowakapa kuti bafwe nyota.—My. 20:1-5, 9-11.
Amuyandaule Kubomba Moyo Akukkomanisya Jehova
Akaambo kakukalala kapati, Musa wakaleka kubomba moyo. Muciindi cakwaambaula calusyomo kundomba, kweelana ambwaakamulailila Jehova, Musa wakaambaula cabukali kubantu akwaamba kuti walo ulacita maleele. Mpoonya, wakauma ndomba ziindi zyobilo kumane maanzi akatalika kupoomoka. Kulisumpula alimwi akunyema kwakapa kuti alubizye kapati. (Int. 106:32, 33) Akaambo kakwaalilwa kubomba moyo kwaciindi cisyoonto, Musa tanaakazumizyigwa kunjila Munyika Yakasyomezyedwe.—My. 20:12.
Kuzwa kucikozyanyo eeci, twiiya ziiyo ziyandika kapati. Cakusaanguna, tweelede kuzumanana kubambulula bube bwesu bwakubomba moyo. Ikuti naa twabulekelezya kwaciindi cisyoonto, kulisumpula kulakonzya kutalika akupa kuti tutalike kwaamba akucita zintu cabufwuba-fwuba. Cabili, kukopana mumizeezo kulakonzya kupa kuti cikatazye kubomba moyo, aboobo tweelede kusolekesya kubomba moyo noliba leelyo notuli mubukkale bukatazya kapati.
w09 9/1 19 ¶5
Mubetesi Wiiminina Ciluzi
Kusaanguna, Leza tanaakalailila Musa kwaambaula abantu, naa kubaamba kuti mbazangi. Cabili, Musa a Aroni bakaalilwa kumulemeka Leza. Wakabaambila kuti: ‘Tiimwandilemeka.’ (Kapango 12) Kwiinda mukwaamba kuti “tumugwisyizye maanzi,” Musa wakali kwaamba kuti walo a Aroni, ikutali Leza mbabakali kuyoobapa maanzi camaleele. Catatu, lubeta lwakali kweendelana alubeta lwakapedwe musyule. Leza tanaakazumizya kuti luzubo lwakaliko kumatalikilo lunjile munyika ya Kanana, aboobo awalo Musa a Aroni tiibakeelede kunjila munyika yakasyomezyedwe. (Myeelwe 14:22, 23) Cane, Musa a Aroni bakali basololi. Aabo ibajisi mikuli minji, Leza uyakuyanda zinji kulimbabo.—Luka 12:48.
Mbono Zyakumuuya
Sena Kulezya Kwabantu Mukubona Mbwakubona Jehova?
Mubukkale boonse oobu, Jehova naakasala kumusubula Aroni mpoonya-mpoonya. Pele wakabona kuti Aroni tali muntu mubi pe naa kuti ngonguwe wakalubizyide kapati. Kulibonya kuti Aroni wakalekela bukkale naa kuyunga kwabamwi kumupa kusiya nzila mbotu. Nokuba boobo, ciindi nakaambilwa kulubizya kwakwe, wakakuzumina cakufwambaana alimwi wakagwasyilizya lubeta lwa Jehova. (Kul. 32:26; My. 12:11; 20:23-27) Jehova wakasala kubikkila maano kulusyomo lwa Aroni akweempwa kwakwe. Nokwainda myaanda yamyaka, Aroni aluzubo lwakwe bakali kuyeeyegwa kuti mbantu bayoowa Jehova.—Int. 115:10-12; 135:19, 20.
AMUSUNGWAALE MUMULIMO WAMUMUUNDA
Kolibikkila mbaakani. Muciindi cakwaamba kuti, “Mbondibede oobu,” kosolekesya kucinca mbobede muciindi cigaminide, ambweni mumyezi iili cisambomwe. Muciindi eeci, kolemba kucinca nkoocita. Lyoonse wanyema, kolemba (1) cacitika, (2) mbowacita, alimwi (3) ambooyelede kucita kabotu zintu alimwi akaambo ncooyelede kucitila boobo. Mpoonya weelede kusola kuyoocita mbubwenya waakunyema alimwi. Muzeezo: Kozyiba kuzwidilila nkoocita! Kolemba bubotu mboojana akaambo kakulilesya.—Njiisyo yamu Bbaibbele: Bakolose 3:8.
Kojata moyo. Ikuti muntu wakunyemya, utaambi cintu casaanguna kuboola mumizeezo yako. Muciindi caboobo, kolijata. Kuti kacikonzyeka, koswa ciya. Erik uujisi myaka iili 15 wakaamba kuti: “Ciindi nondiswa ciya, cindipa ciindi cakuyeeya kanditanacita cintu naa kwaamba cintu cimwi cikonzya kundipa kuusa kumamanino.”—Njiisyo yamu Bbaibbele: Tusimpi 21:23.
Kolanga-langa mbazu zinji. Ziindi zimwi inga wanyema akaambo kakubona mbazu yomwe mukaambo—mbazu iijatikizya nduwe. Kosola kulanga-langa mbobakonzya kulimvwa bamwi. Jessica mukaintu mwana-mwana wakaamba kuti: “Noliba leelyo bantu nobali bakali, kanji-kanji inga kuli kaambo kakonzya kundigwasya kubamvwisya.”—Njiisyo yamu Bbaibbele: Tusimpi 19:11.
Ikuti kacikonzyeka, kozwa abusena aawo. Bbaibbele lyaamba kuti: “Kubwesyanya kakutanatalika, kozwa buyo aawo.” (Tusimpi 17:14) Mbubwenya mbolutondezya lugwalo oolu, zimwi ziindi cilayandika kuzwa abusena aawo. Mpoonya muciindi cakuzumanana kuyeeya cacitika akupa kuti kunyema kwiindile, kocita zintu zimwi. Danielle mukaintu mwana-mwana wakaamba kuti: “Ndajana kuti kunyanyaasya mubili kulandigwasya kukkazika moyo akulijata kuti nditanyemi.”
Koiya kutabikkilila. Bbaibbele lyaamba kuti: “Amukopane, pele mutabisyi pe. Amulyaambauzye mumyoyo yanu, . . . akuumuna.” (Intembauzyo 4:4) Amubone kuti kukopana takulubide pe. Mubuzyo ngwakuti, ino ncinzi citiitobele? Richard mwaalumi mwana-mwana wakaamba kuti: “Ikuti wazumizya bamwi kukunyemya, cipa kuti babe anguzu. Inga cainda kugwasya kutababikkilila.” Kuti wacita boobo, unooyendelezya bukali bwako kutali kulekela bukali kukweendelezya.
APRIL 19-25
MBONO IZILI MU JWI LYA LEZA | MYEELWE 22-24
“Jehova Wakapa Kuti Kusinganizyigwa Kube Cilongezyo”
bt 53 ¶5
Kukambauka “Makani Mabotu Aajatikizya Jesu”
Mazuba aano, mbubwenya mbocakabede mumwaanda wamyaka wakusaanguna, kupenzyegwa kwabantu ba Leza tiikwalesya mulimo wakukambauka. Muciindi caboobo, akaambo kakupa kuti Banakristo baunke kumasena aamwi, andiza kuntolongo naa kucisi cimwi, eeci capa kuti mulumbe wa Bwami ubasikile bantu ibali kumasena aayo. Mucikozyanyo, nokwakali Nkondo Yanyika Yoonse Yabili, Bakamboni ba Jehova bakapa bumboni muzilabba zyakupenzyezya zyaba Nazi. Mu Juda umwi iwakajana Bakamboni ooko wakaluula kuti: “Busicamba mbobakatondezya Bakamboni ba Jehova bwakapa kuti ndisinizye kuti lusyomo lwabo lwakayeeme a Magwalo, aboobo andime ndakaba Kamboni.”
it-2 291
Bufwubafwuba
Makanze Aabufwubafwuba Aakukazya Jehova. Musinsimi Balamu cabufwubafwuba wakali kuyanda kusinganya Israyeli kutegwa apegwe mali a Mwami Balaki wabana Moabu, pele Jehova wakaanjilila makani akulesya makanze aakwe. Kujatikizya Balamu, mwaapostolo Petro wakalemba kuti “munyama uutaambauli uunyamuna ntundu wakaambaula ajwi lyamuntu ikulesya makanze aabufwubafwuba aamusinsimi ooyu.” Ikwaamba bufwubafwuba bwa Balamu, Petro wakabelesya bbala lya Chigiriki lyakuti pa·ra·phro·niʹa, ilyaamba “kusondoka.”—2Pet. 2:15, 16; My. 22:26-31.
Mbono Zyakumuuya
Twaambo Tupati-Pati Kuzwa Mubbuku lya Myeelwe
22:20-22—Ino nkaambo nzi Jehova ncaakamunyemena Balamu? Jehova wakaambilide musinsimi Balamu kuti tanaakeelede kusinganya bana Israyeli. (Myeelwe 22:12) Pele musinsimi wakaunka abaalumi ba Balaki kajisi makanze aakusinganya bana Israyeli. Balamu wakali kuyanda kukkomanisya mwami wa Moabu akutambula bulumbu kulinguwe. (2 Petro 2:15, 16; Juda 11) Neliba leelyo Balamu naakasinikizyigwa kubalongezya muciindi cakubasinganya bana Israyeli, wakayanda kukkomaninwa amwami kwiinda mukupa muzeezo wakuti banakazi bakomba Baala babelesyegwe koongelezya baalumi bana Israyeli. (Myeelwe 31:15, 16) Aboobo, cakapa kuti Leza amukalalile Balamu nkaambo kabulyatu bwamusinsimi ooyu butaambiki.
APRIL 26–MAY 2
MBONO IZILI MU JWI LYA LEZA | MYEELWE 25-26
“Sena Mbwacita Zintu Muntu Omwe Kulakonzya Kugwasya Bantu Banji?”
“Amubutije Bwaamu!”
SIKUZUBA nswi waunka kubusena nkwakonzya kujana musyobo wanswi ngwayanda kuloba. Wasala cakulya ncozilya, mpoonya wawaala kalobyo mumaanzi. Walindila cakukkazyika moyo, kumane nswi noyalya cakulya, wakwisula kalobyo akwiijata nswi.
Mbubwenya buyo, bantu balakonzya kucegwa. Mucikozyanyo, bana Israyeli bakali afwaafwi kunjila Munyika Yakasyomezyedwe ciindi nobakakkala mu Zibanda zya Moabu. Mwami wabana Moabu wakasyomezya Balamu kuti ulamupa mali manji ikuti wasinganya bana Israyeli. Mukuya kwaciindi, Balamu wakajana nzila yakuti bana Israyeli balisinganye beni. Wakasala cintu icili mbuli cakulya ncozilya kapati nswi. Wakatuma bamakaintu bana Moabu ibakacili bana-bana kunkambi yabana Israyeli kutegwa bakoongelezye bamaalumi.—Myeelwe 22:1-7; 31:15, 16; Ciyubunuzyo 2:14.
“Amubutije Bwaamu!”
Nkaambo nzi bana Israyeli banji boobu ncobakoongelezyegwa a Balamu? Bakali kuyeeya buyo mbobakonzya kulikondelezya beni, alimwi bakaziluba zyoonse Jehova nzyaakabacitila. Bana Israyeli bakajisi twaambo tunji ncobakeelede kusyomeka kuli Leza. Wakabavwuna kuzwa mubuzike mu Egepita, wakabapa zyakulya munkanda alimwi wakabeenzya kabotu mane kumunyinza wa Nyika Yakasyomezyedwe. (Bahebrayo 3:12) Nokuba boobo, bakoongelezyegwa abwaamu. Mwaapostolo Paulo wakaamba kuti: ‘Tutaciti bwaamu, mbubonya bamwi babo mbobakacita bwaamu, cakuti bakafwa.’—1 Bakorinto 10:8.
Mbono Zyakumuuya
it-1 359 ¶1-2
Munyinza
Aboobo kulibonya kuti kwaabanizyigwa kwanyika akati kamisyobo kwakayeeme atwaambo tobilo: mpocakali kuyoowida cisolo, alimwi ambobakali banji mumusyobo ooyo. Ambweni cisolo cakali kugwasya kuzyiba lubazu lwanyika yakali kuyoopegwa kumusyobo aumwi, naa nkuunyika, kumusanza, kujwe naa kumbo, muzibanda zyakulwizi, naa mumalundu. Jehova nguwakali kukosola makani aajatikizya cisolo, aboobo kwakanyina kufwidilana munyono naa kutongooka akati kamisyobo. (Tus. 16:33) Kwiinda mukucita boobu, Leza wakali kukosola makani kutegwa musyobo umwi aumwi upegwe nyika kweelana abusinsimi mbwaakasinsima Jakobo katanafwa bulembedwe ku Matalikilo 49:1-33.
Bamana kuuma cisolo akujana lubazu lwanyika nkouyookkala musyobo ooyo, cakali kuyandika lino kuzyiba munyinza wacilawo kweelana akaambo kabili: mbobakali banji mumusyobo ooyo. “Mweelede kwaabana nyika mumikwasyi yanu kuti ibe lukono lwanu kwiinda mukuuma cisolo. Kunkamu iijisi bantu banji mweelede kuyungizya lukono, eelyo kunkamu iijisi bantu basyoonto mweelede kucesya lukono. Busena bwaumwi aumwi oobo ikwawida cisolo, buyooba lukono lwakwe.” (My. 33:54) Kufwumbwa nkocawida cisolo, olo ndolubazu aumwi musyobo ngowakali kupegwa, pele caboola kuminyinza, yakali kukonzya kucinca. Mbwaanga cilawo ca Juda cakali cipati kapati akaambo kakuti bakali basyoonto, cakacesyegwa akwaabila musyobo wa Simeoni.—Jos. 19:9.
AMUSUNGWAALE MUMULIMO WAMUMUUNDA
Kuli twaambo tunji tupa kuti myeelwe iili mumagwalo obilo aaya yiindane. Pele andiza kaambo kakonzya kufwambaana kumvwika nkakuti mweelwe wini uli akati ka 23,000 a 24,000.
Amubone kaambo akamwi. Mwaapostolo Paulo wakaamba ncobakacita bana Israyeli ku Sitimu kuti cakali cikozyanyo cicenjezya ku Banakristo bamumunzi wa Korinto, imunzi mwakazwide bwaamu. Wakalemba kuti: “Alimwi tutaciti bwaamu, mbubonya bamwi babo mbobakacita bwaamu, cakuti kwakafwa bantu bali 23,000 akati kabo mubuzuba bomwe.” Ikwaamba buyo baabo bakajaigwa a Jehova akaambo kabwaamu, Paulo wakaamba kuti bakali 23,000.—1 Bakorinto 10:8.
Pele lugwalo lwa Myeelwe caandaano 25, lutwaambila kuti “bana Israyeli bakatalika kukomba Baala waku Peori, mpoonya bukali bwa Jehova bwakababukila bana Israyeli.” Kumane Jehova wakalailila Musa kujaya “basololi boonse babantu.” Walo Musa wakaambila babetesi kucita mulimo ooyo. Aboobo, Pinehasi wakabweza ntaamu cakufwambaana yakujaya muna Israyeli iwakaleta mukaintu muna Moabu munkambi, mpoonya-mpoonya, “lunyonyooko lwakalesyegwa.” Kumane kumamanino cibalo caamba kuti: “Aabo bakafwa alunyonyooko oolo bakali 24,000.”—Myeelwe 25:1-9.
Mweelwe waambidwe mulugwalo lwa Myeelwe kuboneka kuti ubikkilizya “basololi boonse babantu” ibakajaigwa ababetesi alimwi ambaakajaya Jehova lwakwe. Andiza kwakali bali 1,000 ibakajaigwa ababetesi, calo cakapa kuti mweelwe usike ku 24,000. Tacikwe makani naa basololi aaba bakacita bwaamu, kutola lubazu mumapobwe, naa kubazumizya aabo ibakatola lubazu, abalo bakajisi mulandu ‘iwakusangana mukukomba Baala waku Peori.’
Kujatikizya bbala lyakuti “kusangana,” bbuku limwi lyaamba zyamu Bbaibbele lyakaamba kuti lilakonzya kwaamba “kulikumbatizya kumuntu umwi.” Bana Israyeli bakalilyaabide kuli Jehova, pele ciindi ‘nobakasangana mukukomba Baala waku Peori,’ bakacimana cilongwe cabo a Leza. Nokwakainda myaka iili 700, kwiinda mumusinsimi Hosea, Jehova wakaambila bana Israyeli kuti: “Balo bakaunka kuli Baala waku Peori; bakalyaaba kucintu cuusya nsoni, eelyo bakali kusesemya mbubonya mbuli cintu eeco ncobakali kuyandisya.” (Hosea 9:10) Boonse aabo bakacita boobo bakaleelede kusubulwa a Leza. Aboobo, Musa wakabayeezya bana Israyeli kuti: “Mwakalibonena ameso aanu Jehova ncaakacita kujatikizya Baala waku Peori; kufwumbwa muntu wakali kutobela Baala waku Peori Jehova Leza wanu wakamunyonyoona kuzwa akati kanu.”—Deuteronomo 4:3.