Mulimo Uukatalusya

¹ Imulumbe wamu Bbaibbele ulabakatalusya boonse aabo bautambula alimwi akuutobela mubukkale bwabo. (Int. 19:7, 8) Ulabagwasya kuzitantamuka njiisyo zyakubeja, zilengwa zibyaabi alimwi ulapa bulangizi busyomeka bwakumbele. Pele, tabali buyo baabo balikke ibatambula makani mabotu ibagwasyigwa pe. Abalo baambila bamwi kasimpe kamu Bbaibbele kakatalusya balakatalusyigwa.—Tus. 11:25.

² Ikukatalusyigwa Amulimo: Jesu wakaamba kuti, aabo ibalibambide kubweza jokwe lyacikozyanyo lyakuba sikwiiya wa Kristo, calo cibikkilizya mulimo wakukambauka akugwasya bantu kuba basikwiiya, bakali kuyoojana ‘kukatalukwa mumyoyo yabo.’ (Mt. 11:29) Awalo Jesu wakakatalusyigwa naakali kukambaukila bamwi. Cakali mbuli cakulya kulinguwe. (Joh. 4:34) Naakatuma basikwiiya bakwe ibali 70 kuyookambauka, bakakondwa nobakabona Jehova mbwaakali kubagwasyilizya.—Lk. 10:17.

³ Ibanakristo banji sunu abalo balakatalusyigwa kwiinda mukutola lubazu mumulimo wakukambauka. Mucizyi umwi wakaamba kuti: “Imulimo ulakatalusya nkaambo ulandipa bulangizi amakanze mubuumi bwangu. Mapenzi ngondijisi alimwi akulibilika abuzuba kulaceya nonditola lubazu mumulimo.” Aumbi mucizyi sikumwaya musungu mboobu mbwaamba: “Imulimo . . . upa kuti Jehova abe mwini-mwini kulindime abuzuba, undipa luumuno alimwi akuliiba mumoyo ikutakonzyi kujanwa munzila imbi pe.” Elo kaka ncoolwe ikuba “basimilimonyina [a] Leza”!—1 Kor. 3:9.

⁴ Jokwe lya Kristo Ndyuuba: Nokuba kuti Banakristo bakulwaizyigwa ‘kusolekesya,’ Jesu tatulailili kupa zintu zinji kwiinda nzyotukonzya. (Lk. 13:24) Masimpe, caluyando ulatutamba ‘kuba mujokwe lyakwe.’ (Mt. 11:29) Aabo ibaliyumya mubukkale buyumu, beelede kusyoma kuti mulimo ngobabeleka camoyo woonse, nokuba buyo kwaciindi cisyoonto, ulamukkomanisya Leza.—Mk. 14:6-8; Kol. 3:23.

⁵ Elo kaka cilakatalusya ikubelekela Leza uubikkila maano kuzintu zyoonse nzyotumucitila akaambo kazina lyakwe! (Heb. 6:10) Aboobo atusolekesye kumubelekela kusikila aagolela nguzu zyesu.

Amwiiye Ibubotu bwa Jehova

¹ Notwamana kulanga kubbila kwazuba ikubotu naa notwamana kulya cakulya cabudodoodo, sena tatukulwaizyigwi ikulumba Jehova Intalisyo yabubotu boonse? Ibubotu bwa Jehova butukulwaizya kuti tumwiiye. (Int. 119:66, 68; Ef. 5:1) Ino mbuti mbotukonzya kutondezya bube bwabubotu?

² Amutondezye Bubotu Kuli Baabo Batasyomi: Inzila iimwi motunga twaiya bubotu bwa Jehova, nkwiinda mukubabikkila maano aabo mbotutaswaangene limwi kulusyomo. (Gal. 6:10) Ikutondezya bubotu munzila iigwasya kulakonzya kubagwasya bantu kubalanga kabotu Bakamboni ba Jehova amulumbe ngobakambauka.

³ Mucikozyanyo, imukubusi mukwesu umwi mupainiya wakali kulindila kuti babonane adokotela kucibbadela. Wakakkede munsi aabacembele bakali kulibonya kuciswa kapati akati kabantu bakaliko. Ciindi cakwe nocakasika mupainiya ooyu kuti abonane adokotela, wakalekela bacembele aaba kuti babonane adokotela. Kumbele bakaswaangana alimwi, ooku kwakali kumusika. Ibacembele aaba bakakkomana kubonana amukubusi ooyu. Nokuba kuti musyule bacembele aaba bakali kukaka makani mabotu, pele lino bakabazyiba camasimpe kuti Bakamboni ba Jehova balabayanda basimukobonyina kapati. Ciiyo ca Bbaibbele calyoonse cakatalisyigwa kulimbabo.

⁴ Amutondezye Bubotu Buli Boobo Kubakwesu Abacizyi: Alimwi tulabwiiya bubotu bwa Jehova notugwasya basyomima. Nokuli ntenda, tuli akati kabaabo bafwambaana kugwasya bakwesu. Tulautondezya imuuya ooyu ngoonya notugwasya baabo batajisi zyakweendela kumiswaangano, notuswaya bakompeme alimwi akubasangalizya kabotu aabo mbotutazyi kabotu mumbungano.—2 Kor. 6:11-13; Heb. 13:16.

⁵ Inzila aimbi Jehova mwatondezya bubotu bwakwe, ‘njakufwambaana kujatila.’ (Int. 86:5) Ikwiiya nguwe kuyootugwasya kutondezya luyando lwabubotu kwiinda mukubajatila bantu. (Ef. 4:32) Eeci cilagwasya kutegwa kuyanzana kwesu abasyomima ‘kakuli kubotu kapati.’—Int. 133:1-3.

⁶ Ibubotu bwa Jehova butalivwulili abutugwasye akutupa kuti tumutembaule kapati akutukkomanisya. Alimwi ibubotu bwakwe abutukulwaizye kuzumanana ikwiiya bubotu bwakwe muli zyoonse zyotucita.—Int. 145:7; Jer. 31:12.