Kuzyalwa Alimwi—Sena Ncecikonzya Kumupa Kufwutuka?

INO inga mwawiingula buti mubuzyo wakuti “Sena mwakazyalwa alimwi”? Bantu banji nyika yoonse mboizulwa balakonzya kwiingula kuti “Inzya!” Basyoma kuti kuzyalwa alimwi ncecitondezyo cakuti Mbanakristo beni-beni alimwi nenzila yalikke ikonzya kubapa kufwutuka. Bayeeya mbuli mbobayeeya basololi bazikombelo mbuli ba Robert C. Sproul ibakaiya zyabukombi alimwi ibakalemba kuti: “Ikuti muntu katazyedwe alimwi, . . nkokuti tali Munakristo.”

Sena andinywe muli akati kabaabo ibasyoma kuti ikuzyalwa alimwi nkokukonzya kumupa kufwutuka? Ikuti naa mboobo, tacidoonekwi kuti muyanda kugwasya bamukwasyi abeenzyinyoko kuti abalo batalike kweenda munzila eeyi. Pele, ikutegwa bacite oobo, beelede kuzyiba kwiindana kuliko akati kamuntu wakazyalwa alimwi ayooyo uutanazyalwa alimwi. Ino inga mwabapanduluda buti ncocaamba ikuzyalwa alimwi?

Ibanji basyoma kuti ‘kuzyalwa alimwi’ caamba muntu ulyaaba kuli Leza a Kristo akutalika kumvwana a Leza. Ikujatikizya kaambo aaka, ibbuku limwi lipandulula mabala lyaamba kuti muntu wakazyalwa alimwi “Munakristo wakasanduka naa uutondezya kuti uuli alusyomo kwiinda mukulilemeka munzila imwi napaila.”—Merriam-Webster’s Collegiate Dictionary—Eleventh Edition.

Sena inga mwagambwa kumvwa kuti bupanduluzi oobu tabweendelani ancolyaamba Bbaibbele? Sena mulayanda kuzyiba cini Ijwi lya Leza ncoliyiisya kujatikizya kuzyalwa alimwi? Masimpe, ikulanga-langa kaambo aaka cakusitikila kulakonzya kumugwasya kapati. Nkaambo nzi? Nkaambo kakuti ikuzyiba cini cijatikizyidwe mukuzyalwa alimwi kulakonzya kumugwasya lino akumupa bulangizi bwini-bwini.

Ino Ncinzi Bbaibbele Ncoliyiisya?

Mu Bbaibbele, imajwi aakuti ‘kuzyalwa alimwi’ ajanika buyo kulugwalo lwa Johane 3:1-12, ikuli mubandi uukomanisya ngwaakajisi Jesu amusololi wacikombelo waku Jerusalemu. Cibalo eeci camu Bbaibbele mulakonzya kucijana mukabbokesi kabikkilizyidwe. Tumukulwaizya kuti mucibale cibalo eeci.

Mucibalo eeci, Jesu wakaamba twaambo tuli mbotubede tujatikizyidwe “mukuzyalwa alimwi.” Masimpe ngakuti, mubandi wa Jesu ulatugwasya kwiingula mibuzyo eeyi yosanwe iiyandika yakuti:

◼ Ino kuzyalwa alimwi kuyandika buti?

◼ Sena inga twalisalila kuzyalwa alimwi?

◼ Ino kugwasya buti?

◼ Ino mbuti muntu mbwakonzya kuzyalwa alimwi?

◼ Ino nkucinca kuli buti kucitika akaambo kakuzyalwa alimwi?

Atwiilange- lange mibuzyo eeyi.

Kuzyalwa Alimwi—Ino Kuyandika Buti?

JESU naakali kubandika a Nikodemo, wakaamba kuti kuzyalwa alimwi kulayandika kapati. Ino wakakapandulula buti kaambo aaka?

Amubone Jesu mbwaakaamba mbokuyandika kuzyalwa alimwi naakali kubandika a Nikodemo. Wakaamba kuti: “Kuti muntu tazyalululwi, takonzyi kunjila mubwami bwa Leza pe.” (Joni 3:3, BT) Mabala aakuti “kuti” alimwi a “takonzyi” atondezya mbokuyandika kuzyalwa alimwi. Mucikozyanyo: Kuti muntu waamba kuti, “Kuti zuba lyatapola, takukonzyi kuba mumuni,” nkokuti waamba kuti zuba lilayandika. Mbubwenya buyo, Jesu wakaamba kuti kuzyalwa alimwi kulayandika kapati kutegwa tukanjile mu “Bwami bwa Leza.”

Amane ikutegwa abagwasye bantu kutadooneka kujatikizya kaambo aaka, Jesu wakaamba kuti: ‘Mweelede kuzyalwa alimwi.’ (Johane 3:7) Aboobo, kweelana ancaakaamba Jesu, kuzyalwa alimwi kulayandika kapati kutegwa muntu akonzye ‘kunjila mu Bwami bwa Leza.’—Johane 3:5.

Mbokunga Jesu kaambo kakuzyalwa alimwi wakali kukabona kuti kalayandika kapati, Ibanakristo beelede kukamvwisya kaambo aaka. Mucikozyanyo, sena muyeeya kuti Munakristo inga wasala kuzyalwa alimwi?

Majwi aakwelelezya sikubala aali apeeji 5]

“Kuti zuba lyatapola takukonzyi kuba mumuni”

Kuzyalwa Alimwi—Sena Inga Twalisalila?

INO nguni uupa kuti muntu azyalwe alimwi? Nobakulwaizya baswiilizi kuti beelede kuzyalwa alimwi kutegwa babe Banakristo, bakambausi bamwi baamba majwi ngaakaamba Jesu aakuti: ‘Uleelede kuzyalwa alimwi.’ (Johane 3:7) Aaba bantu balaabelesya majwi aaya mbuli kuti mulawo buya. Munzila imwi baambila bantu boonse kuti, ‘Amuzyalwe alimwi.’ Aboobo, bayiisya kuti aumwi uusyoma ulakonzya kumumvwida Jesu akubweza ntaamu kutegwa azyalwe alimwi. Akaambo kakuyeeya boobu, baamba kuti bantu balakonzya kulisalila kuzyalwa alimwi. Pele, sena kuyeeya kuli boobo, kuleendelana ancaakaamba Jesu kuli Nikodemo?

Ikuti naa twaabala cakusitikila majwi ngaakaamba Jesu, tulakonzya kubona kuti tanaakali kuyiisya kuti muntu ulakonzya kulisalila kuzyalwa alimwi naa pe. Ino ncinzi ncotwaambila boobu? Majwi aa Chigiliki aakuti ‘kuzyalwa alimwi’ alakonzya kusandululwa kuti ‘uleelede kuzyalwa kuzwa kujulu.’ Kweelana abupanduluzi oobu, ikuzyalwa alimwi “kuzwa kujulu.” (Johane 19:11; Jakobo 1:17) Ee, uupa kuti muntu azyalwe alimwi ngu Leza.—1 Johane 3:9.

Ikuti katuyeeya majwi aakuti “kuzyalwa akuzyalwa ukuzwa kujulu” tacikonzyi kutukatazya kumvwisya muntu ncatakonzyi kulizyala. Amuyeeye buyo ikuzyalwa kwini. Sena mwakalisalila buya kuti muzyalwe? Peepe! Mbubwenya buyo, usyoma aumwi talisalili buya kuti azyalwe alimwi. Tulakonzya kuzyalwa alimwi ikuti naa Leza, Taateesu wakujulu wazumizya. (Johane 1:13) Aboobo, mwaapostolo Petro wakaliluzi naakaamba kuti: “Alumbwe Leza, Wisi wa-Mwana wesu Jesu Kristo! Nguwe wakatuzyalulula calweetelelo lwakwe lunji.”—1 Petro 1:3

Sena Mulawo Buya?

Bamwi balakonzya kulibuzya kuti, “Kuti naa muntu takonzyi kulisalila kuzyalwa alimwi, nkaambo nzi Jesu ncaakaambila kuti: ‘mweelede kuzyalwa alimwi’?” Ooyu mubuzyo mubotu nkaambo ikuti naa ncaakaamba Jesu citondezya kuti wakali mulawo buya, nkokuti wakali kutwaambila kucita cintu ncotutakonzyi kucita. Eeci tacisyi ncaakali kwaamba. Aboobo, ino majwi aakuti mweelede ‘kuzyalwa alimwi’ aamba nzi?

Ikuti twaalangisya majwi aaya mumwaambo wakusaanguna, atondezya kuti tauli mulawo buya. Pele atondezya kuti Jesu wakali kwaamba cakeelede kucitika. Wakati: ‘Uleelede kuzyalwa kuzwa kujulu.’—Johane 3:7.

Kutegwa tukamvwisye kaambo aaka atubone cikozyanyo. Amweezeezye kuti mukkala mudolopo iijisi zikolo zinji. Cikolo cimwi bacibikka kuti cibe cabana bakazyalilwa mudolopo eeli, pesi bazwa kulamfwu. Bumwi buzuba, musankwa umwi uukkala kulamfwu acikolo eeci alimwi watakazyalilwa mudolopo eeli waambila bapati bacikolo kuti, “Ndiyanda kutalika kwiiya ookuno.” Bapati bacikolo bamwaambila kuti, “Kutegwa utalike kwiiya kokuno weelede kuti koli umwi wabaabo bakazyalilwa mudolopo lino.” Aaya majwi ngibaamba bapati bacikolo taali mulawo buya. Tabamusinikizyi buya musankwa ooyu kuti abe muzyalwe. Muciindi caboobo, bamwaambila ciyandika kucitika—nkokuti ciyandika kumuntu uyanda kutalika kwiiya acikolo eeco. Mbubwenya buyo, Jesu naakaamba kuti ‘Mweelede kuzyalwa alimwi,’ wakali kwaamba cakeelede kucitika, nkokuti ciyandika kutegwa muntu ‘anjile mubwami bwa Leza.’

Kaambo kamamanino kakuti Bwami bwa Leza—kaliswaangene a makani aamwi aajatikizya kuzyalwa alimwi. Kaambo aaka kajatikizya mubuzyo wakuti, Ino kuzyalwa alimwi kugwasya buti? Ikuzyiba bwiinguzi bwamubuzyo ooyu kulakonzya kutugwasya kuzyiba ncocaamba kuzyalwa alimwi.

[Cifwanikiso icili apeeji 6]

Ino kuzyalwa alimwi akuzyalwa kwini kukozyenyi buti?

Kuzyalwa Alimwi—Ino Kugwasya Buti?

BANTU banji basyoma kuti muntu weelede kuzyalwa alimwi kutegwa akafwutuke. Amubone Jesu ncaakaamba kujatikizya kuzyalwa alimwi. Wakaamba kuti: “Kuti muntu tazyalululwi, takonzyi kunjila mubwami bwa Leza pe.” (Joni 3:3, BT) Aboobo, muntu weelede kuzyalwa alimwi kutegwa anjile mu Bwami bwa Leza kutali kuti afwutuke. Bamwi inga babuzya kuti sena ‘Ikunjila mu Bwami bwa Leza akufwutuka caamba cintu comwe?’ Peepe. Kutegwa tubone kwiindana kuliko, cakusaanguna atubone ncaamba majwi aakuti “bwami bwa Leza.”

Bwami nimfwulumende. Aboobo, “bwami bwa Leza” ‘nemfwulumende ya Leza.’ Bbaibbele liyiisya kuti Jesu Kristo, “mwana amuntu” ngo Mwami wa Bwami bwa Leza alimwi ulijisi mbalela limwi. (Daniele 7:1, 13, 14; Matayo 26:63, 64) Kunze lyaboobo, cilengaano ncaakabona mwaapostolo Johane citondezya kuti mbalela limwi Kristo mbantu bazwa ‘kumisyobo yoonse amilaka yoonse amikowa yoonse, azisi zyoonse’ alimwi ‘baya kulela ansi aano.’ (Ciyubunuzyo 5:9, 10; 20:6) Alimwi Ijwi lya Leza lilatwaambila kuti aabo baya kulela mba “katanga kaniini” kabantu bali 144,000 “ibakanununwa kuzwa ansi.”—Luka 12:32; Ciyubunuzyo 14:1, 3, BT.

Ino Bwami bwa Leza buli kuli? “Ibwami bwa Leza” alimwi ibwaambwa kuti “bwami bwa kujulu” butondezya kuti Jesu ambalela limwi bali kujulu. (Luka 810; Matayo 13:11) Aboobo, Bwami bwa Leza nimfwulumende yakujulu yeendelezyegwa a Jesu Kristo ambalela limwi ibakasalwa aano anyika.

Aboobo, ino ncinzi Jesu ncaakali kwaamba naakaamba kuti muntu weelede kuzyalwa alimwi kutegwa ‘anjile mubwami bwa Leza’? Wakali kwaamba kuti muntu weelede kuzyalwa alimwi kutegwa akalele a Kristo kujulu. Munzila imwi inga twaamba kuti, ikuzyalwa alimwi kugwasya kakamu kabantu bamwi ibaya kulela kujulu.

Kunze lyaboobo, twabona kuti ikuzyalwa alimwi kulayandika kapati akuti Leza nguupa kuti muntu azyalwe alimwi, alimwi kugwasya kakamu kabantu kuti bakalele kujulu. Ino kuzyalwa alimwi kucitika buti?

Majwi aakwelelezya sikubala aali apeeji 7]

Kuzyalwa alimwi kugwasya kakamu kabantu kuti bakalele kujulu

[Cifwanikiso icili apeeji 7]

Bwami bwa Leza buleendelezyegwa a Jesu Kristo ambalela limwi ibakasalwa aano anyika

Kuzyalwa Alimwi—Ino Kucitika Buti?

JESU tanaakaamba buyo ncokwakali kuyandika kuzyalwa alimwi naa uupa kuti muntu azyalwe ambokugwasya naakali kubandika a Nikodemo, pele wakaamba ambokucitika. Jesu wakaamba kuti: “Muntu atazyalwa amaanzi a-Muuya, takonzya kunjila mu-Bwami bwa-Leza.” (Johane 3:5) Aboobo, muntu ulazyalwa alimwi kwiinda mumaanzi amumuuya. Ino majwi aakuti “maanzi a-Muuya” aamba nzi?

Ino “Maanzi a-Muuya” Ninzi?

Mbwaanga Nikodemo wakali sikwiiya wabukombi bwaba Juda, wakalaazyi kabotu Magwalo aa Chihebrayo aamba ‘muuya wa Leza’—nguzu nzyabelesya Leza zikonzya kupa kuti bantu bacite mulimo umwi. (Matalikilo 41:38; Kulonga 31:3; 1 Samuele 10:6) Aboobo, Jesu naakabelesya bbala lyakuti “muuya,” Nikodemo wakazyiba kuti wakali kwaamba muuya uusalala, nguzu nzyabelesya Leza.

Ino mbuti kaambo nkaakaamba Jesu kujatikizya maanzi? Atulange-lange zyintu izyakali kucitika katanabandika a Nikodemo anaakamanizya. Zyintu eezyi zitondezya kuti Johane Mubbapatizi abasikwiiya ba Jesu bakali kubbapatizya bantu mumeenda. (Johane 1:19, 31; 3:22; 4:1-3) Bantu banji ibakali mu Jerusalemu bakalaazyi makani aaya. Aboobo, Jesu naakaamba maanzi, Nikodemo weelede kuti wakazyiba kuti Jesu wakali kwaamba maanzi abelesyegwa kubbapatizya bantu.a

Kubbapatizyigwa a “Muuya Uusalala”

Ikuti naa ‘kuzyalwa amaanzi’ caamba kubbapatizyigwa mumaanzi, ino ‘kuzyalwa amuuya’ caamba nzi? Jesu katanabandika a Nikodemo, Johane Mubbapatizi wakaamba kuti bantu baya kubbapatizyigwa amaanzi amuuya. Wakaamba kuti: “Mebo ndamubapatizya amaanzi, walo [Jesu] uzoomubapatizya a-Muuya Uusalala.” (Marko 1:7, 8) Marko iwakalemba Makani Mabotu upandulula ciindi cakusaanguna nolwakacitika lubbapatizyo luli boobu. Wakalemba kuti: “Lino kuciindi eco kwakasika Jesu kuzwa ku-Nazareta mucisi ca-Galilaya, akubapatizigwa kuli-Johane mu-Jordano. Ndilyonya naakazwa mumaanzi wakabona ijulu lyaba bukwazi, a-Muuya wamuselukila mbuli inziba.” (Marko 1:9, 10) Jesu naakabbizyigwa mu Jordano, wakabbapatizyigwa mumaanzi. Ciindi muuya niwakasika kuzwa kujulu, nceciindi naakabbapatizyigwa amuuya.

Nokwakainda myaaka yotatwe kuzwa ciindi naakabbapatizyigwa, Jesu wakabasyomezya basikwiiya bakwe kuti: “Muyoobapatizigwa a-Muuya Uusalala kaatanainda mazuba manjimanji.” (Incito 1:5) Ino eeci cakacitika lili?

Ibuzuba bwa Pentekoste mu mwaka wa 33 C.E., basikwiiya ba Jesu ibali 120, bakaswaangana muŋanda ku Jerusalemu. “Ndilyonya kwakazwa mujulu muzunzumina mbuli guwo ilyuungisya, wakazuzya ŋanda yoonse mobakakede. Kwakabasikila milaka; iili mbuli mulilo. . . . Boonse bakazyula Muuya Uusalala.” (Incito 2:1-4) Mbomunya buzuba oobu, bamwi mu Jerusalemu bakakulwaizyigwa kuti babbapatizyigwe mumaanzi. Imwaapostolo Petro wakabaambila kuti: “Amusanduke, mubapatizigwe umwi umwi muzina lya-Jesu Kristo, mujatilwe zibi zyanu, nomwati tambule cipego ca-Muuya Uusalala.” Ino bakacita buti? “Abo abakatambula makani aakwe bakabapatizigwa, mbubonya buzuba obo bakayungililwa bantu bati kabe myaanda iili makumi otatwe.”—Incito 2:38, 41.

Izyintu Zyobilo Zyeelede Kucitika

Ino nzila eezyi zyakubbapatizyigwa zitutondezya nzi kujatikizya kuzyalwa alimwi? Zitutondezya kuti kuyandika kucita zyintu zyobilo kutegwa muntu azyalwe alimwi. Kamuyeeya kuti Jesu wakasaanguna kubbapatizyigwa mumaanzi. Mpoonya wakapegwa muuya uusalala. Mbubwenya buyo, basikwiiya ba Jesu bakasaanguna kubbapatizyigwa mumaanzi (bamwi bakabbapatizyigwa a Johane Mubbapatizi), bamane bakapegwa muuya uusalala. (Johane 1:26-36) Abalo basikwiiya bapya ibali 3,000 bakasaanguna kubbapatizyigwa mumaanzi, bamane nkokupegwa muuya uusalala.

Ikuti twayeeya kubbapatizyigwa kwakacitika mu Pentecoste 33 C.E., ino kuzyalwa alimwi kucitika buti mazuba aano? Kulacitika mbubwenya mbocakacitika kubaapostolo abasikwiiya ba Jesu. Kusaanguna, muntu uleempwa kuzibi zyakwe amane ulalyaaba kuli Jehova akutondezya kuti wakalyaaba kwiinda mukubbapatizyigwa mumaanzi. Mpoonya, ikuti naa Leza wamusala kuti akalele mu Bwami Bwakwe, ulananikwa amuuya uusalala. (Kubbapatizyigwa amaanzi) muntu ulalisalila; pele (kubbapatizyigwa a muuya) ngu Leza uusala. Ikuti naa zyintu eezyi zyobilo zyacitika kumuntu, nkokuti wazyalwa alimwi.

Pele, ino nkaambo nzi Jesu naakali kubandika a Nikodemo ncaakabelesya majwi aakuti ‘kuzyalwa amaanzi amuuya’? Wakali kukankaizya kaambo kakuti aabo babbapatizyigwa amaanzi amuuya baya kucinca cakumaniina. Cibalo citobela cilatutondezya kucinca kucitika muntu nazyalwa alimwi.

Bupanduluzi buyungizidwe

[Cifwanikiso icili apeeji 9]

Johane wakali kubabbapatizya amaanzi bana Israyeli ibakali kweempwa

Ino Nkucinca Kuli Buti Kucitika Akaambo Kakuzyalwa Alimwi?

INO nkaambo nzi Jesu ncaakabelesya majwi aakuti ‘kuzyalwa amuuya’ naakali kwaamba zyakubbapatizyigwa amuuya uusalala? (Johane 3:5) Ibbala lyakuti “kuzyalwa” ikuti naa lyabelesyegwa munzila yamaambilambali, lyaamba “kutalika.” Aboobo, majwi aakuti “kuzyalwa alimwi” aamba “kutalika.” Aboobo, maambilambali aakuti “kuzyalwa” “akuzyalwa alimwi” atondezya kuti aabo babbapatizyigwa amuuya uusalala balacinca bukkale bwabo, nkokuti mbwababona Leza. Ino kucinca ooku kucitika buti?

Naakali kupandulula Leza mbwabagwasya bantu kutegwa bakalele kujulu, mwaapostolo Paulo wakabelesya cikozyanyo camukwasyi. Wakalembela Banakristo bakali kupona ciindi eeco kuti ‘baya kuba bana’ alimwi akuti Leza una kubalanganya mbuli “bana bakwe.” (Ba-Galatiya 4:5; Ba-Hebrayo 12:7) Kutegwa mubone cikozyanyo camwana wakulela mbocitugwasya kuzyiba kucinca kucitika muntu nabbapatizyigwa amuuya uusalala, amucilange-lange alimwi cikozyanyo camusankwa uyanda kutalika kwiiya acikolo cabana bakazyalilwa mudolopo oomo.

Kucinca Kuba Kumwana Uulelwa

Mucikozyanyo eeci, imusankwa ooyu takonzyi kutalika kwiiya acikolo eeci akaambo kakuti tanaakazyalilwa mudolopo eeli. Pele, amweezyeezye kuti bumwi buzuba imwana musankwa zyintu zyamucincila. Muntu umwi uukkala kubusena ooko wamubweza kutegwa abe mwanaakwe kweelana amulawo wacisi. Ino ncinzi cikonzya kucitika? Akaambo kakuti lino ubonwa kuti mwana wayooyo uukkala mudolopo eelyo, ulakonzya kucita zyintu nzyibacita bana bamwi bakazyalilwa mudolopo eelyo akutalika kwiiya acikolo eeco. Kulelwa kwamupa kuti acince.

Eeci citondezya cicitika kuli baabo bazyalwa alimwi. Amulange-lange kukozyanya kuliko. Mucikozyanyo eeci, imusakwa ooyo ulakonzya kwiiya ikuti wacita ziyandika—kutalika kukkala kubusena ooko. Pele, musankwa ooyu takonzyi kukkala kubusena oobu ccita kuti muntu umwi wamubweza kuti abe mwanaakwe. Mbubwenya buyo, bantu bamwi baya kulela mumfwulumende ya Leza yakujulu, ikuti naa ‘bazyalwa alimwi.’ Pele tabakonzyi kulisalila akaambo kakuti Leza nguupa kuti bazyalwe alimwi.

Ino ncinzi cakapa kuti bukkale bwamusankwa ooyu bucince? Icakapa boobo ncakuti muntu umwi wakamubweza kuti abe mbuli mwana wakulizyalila kweelana amulawo wacisi. Nokuba boobo, eeci tiicakapa kuti musankwa ooyu acince mbwaakali kulimvwa naa kuyeeya. Pele, naakatalika kukukkala mudolopo eelyo kweelana amulawo wacisi wakacinca bukkale bwakwe. Wakaba mbuli mwana wakulizyalila. Aboobo, wakali kukonzya kutalika kwiiya acikolo cabantu bakazyalilwa mudolopo eelyo balikke.

Mbubwenya buyo, Jehova wakacinca bukkale bwakabunga kabantu batalondokede akupa kuti babe bana bakwe. Imwaapostolo Paulo, iwakali mukabunga aako, wakalembela basyominyina kuti: “Mwatambula muuya wabwana, mulinguwo mutuompolola kuti, Abba, Ta. Muuya mwini ulazuminana amyuuya yesu tubeni kuti tuli bana ba-Leza.” (Ba-Roma 8:15, 16) Ncobeni, kwiinda mukuulwa, Banakristo aabo bakaba mumukwasyi wa Leza, naa “bana ba-Leza.”—1 Johane 3:1; 2 Ba-Korinto 6:18.

Pele, nokuba kuti Leza wakapa kuti Banakristo aaba babe bana bakwe, tiibakalondoka pe. (1 Johane 1:8) Nokuba boobo, kweelana ambwaakapandulula Paulo, nobakaba bana ba Leza, bukkale bwakacinca. Alimwi muuya wa Leza wakapa kuti kabasyoma kuti baya kukkala a Kristo kujulu. (1 Johane 3:2) Ilusyomo oolu ndobakaba andulo akaambo ka muuya uusalala lwakapa kuti babe abulangizi bupya. (2 Ba-Korinto 1:21, 22) Ee, bakaba abuumi bupya—bakazyalwa alimwi.

Kujatikizya bana ba Leza, Ibbaibbele lyaamba kuti: “Bayooba bapaizi ba-Leza aba-Kristo, bayooendelezya awe myaaka iili cuulu.” (Ciyubunuzyo 20:6) Bana ba Leza baya kulela antoomwe a Kristo mu Bwami bwa Leza naa mumfwulumende yakujulu. Mwaapostolo Petro wakaambila basyominyina kuti baya kupegwa “lukono lutafwiki, lutakwe kampenda, lutapusami. Ndulo lukono ndumuyobwedwa kujulu.” (1 Petro 1:3, 4) Elo kaka lukono oolu ndubotu!

Nokuba boobo, kaambo aaka kakulela kapa kuti kube mubuzyo wakuti: Ikuti naa aabo bazyalwa alimwi baya kulela kujulu, ino baya kulela bani? Mubuzyo ooyu uya kulangwa-langwa mucibalo citobela.

[Cifwanikiso icili apeeji 10]

Ino ncinzi ncakaamba Paulo kujatikizya kulelwa?

Nkabunga Buyo Kasyoonto Kaya Kulela, Pesi Mbanji Baya Kugwasyigwa

KUZWA ciindi nibakali kupona baapostolo, Leza wali kusala kabunga ka Banakristo basyomeka, akupa kuti babe bana bakwe. Aaba bana ba Leza balacinca kapati cakuti Ijwi lya Leza libaamba kuti balazyalwa alimwi. Ikuzyalwa alimwi kugwasya babelesi ba Leza kutegwa bakalele kujulu. (2 Timoteo 2:12) Kutegwa bakabe baleli kujulu, baya kubusyigwa. (Ba-Roma 6:3-5) Kujulu, “bayoolela ansi” antoomwe a Kristo.—Ciyubunuzyo 5:10; 11:15, BT.

Nokuba boobo, Ijwi lya Leza litwaambila kuti kuli abamwi ibaya kufwutuka kukabe kutamani. Ibbaibbele (mu Magwalo aa Chihebrayo aa Chigiliki) litwaambila kuti Leza uya kufwutula nkamu zyobilo—inkamu nsyoonto njabaabo baya kulela kujulu mpoonya nkamu mpati njabaabo baya kulelwa ano ansi. Mucikozyanyo, amubone mwaapostolo Johane ncaakabalembela basyominyina ibakazyalwa alimwi. Naakali kwaamba Jesu, wakati: “Ngomulungo wazibi zyesu [kakamu kasyoonto], alimwi teensi kulindiswe akulike, pele kuzibi zyanyika yoonse [nkamu mpati].”—1 Johane 2:2.

Mbubwenya buyo, mwaapostolo Paulo wakalemba kuti: “Zilenge zyoonse [nkamu mpati] zilisukeme kulindila kuyubununwa kwabana ba Leza [kakamu kasyoonto].” (Baloma 8:19-21, BT) Ino mbuti mbotweelede kwaabona makani aakalemba Johane a Paulo? Tweelede kuzyiba kuti: Aabo bazyalwa alimwi baya kulela kujulu. Ino mulimo nzi ngobaya kucita? Ikutegwa bakagwasye bantu banji ibanakulelwa abwami bwa Leza, ibana kuli anyika. Aboobo, Jesu wakayiisya basikwiiya bakwe kupaila kuti: “Abuze Bwami bwako, alucitwe luyando lwako, ansi ano mbubonya mbuli kujulu.”—Matayo 6:10.

Magwalo aa Chihebrayo aalo alaamba kuti kuya kufwutuka nkamu zyobilo. Mucikozyanyo, amubone Jehova ncaakaambila Abrahamu kaapanyina wa Jesu: “Mulunyungu lwako [kakamu kasyoonto] zisi zyoonse zyaansi [nkamu mpati] moziyoojana coolwe.” (Matalikilo 22:18) Ncobeni, zisi zyoonse ziya kulongezyegwa kwiinda “mulunyungu” lwa Abrahamu.

Ino “lunyungu” nguni? Ngu Jesu Kristo antoomwe abaabo ibakazyalwa alimwi, bana ba Leza. Mwaapostolo Paulo wakaamba kuti: “Mbuli mbumuli bakwe Kristo, muli inyungu zya-Abrahamu.” (Ba-Galatiya 3:16, 29) Ino nzilongezyo nzi nzyobajana bantu boonse kwiinda “mulunyungu” oolu? Balaacoolwe cakumvwana a Leza alimwi baya kupona kukabe kutamani muparadaiso anyika. Sintembauzyo Davida wakasinsima kuti: “Balulami bayookona nyika, bayookala alinjiyo lyoonse.”—Intembauzyo 37:29; Isaya 45:18; Ciyubunuzyo 21:1-5.

Masimpe, bamwi bana kulela kujulu, pesi mbanji baya kugwasyigwa akuba abuumi butamani anyika. Eelo kaka ciya kubota ikuti naa nywebo amukwasyi wanu mukabe akati kabaabo baya kujana zilongezyo zitamani iziya kuletwa a Bwami bwa Leza!