Nobakazwa mumuunda wa Edeni, ba Adamu a Eva bakazyala bana banji. Mwanaabo wakusaanguna Kaini wakaba mulimi, mpoonya wabili Abelo wakaba mweembezi.

Buzuba bumwi Kaini a Abelo bakapa zituuzyo kuli Jehova. Sena ulicizyi cituuzyo? Ncipengo caalubazu. Jehova wakacikkomanina cituuzyo ca Abelo, pele tanaakakkomana acituuzyo ca Kaini. Eeco cakapa kuti Kaini anyeme kapati. Jehova wakamucenjezya Kaini kuti bukali bwakwe inga bwamupa kuti acite cibi. Pele Kaini tanaakaswiilila pe.

Muciindi caboobo, Kaini wakaambila Abelo kuti: “Atweende musyokwe.” Kabali musyokwe, Kaini wakamuuma mwanookwabo akumujaya. Ino Jehova wakacita buti kujatikizya makani aaya? Jehova wakamusubula Kaini akumutandila kule amukwasyi wakwe. Kaini tanaakazumizyidwe kujoka alimwi pe.

Sena kuli ciiyo ncotukonzya kwiiya? Inga twatalika kunyema ikuti zintu tiizyeenda mbotwali kuyanda. Ikuti twanyema​—naa kuti bamwi batucenjezya akaambo kakuti babona kuti tulinyemede—​tweelede kufwambaana kucinca mbotuyeeya, biyo-biyo inga twacita cintu cibi kapati.

Akaambo kakuti Abelo wakali kumuyanda kapati Jehova alimwi wakacita ziluleme, Jehova unoomuyeeya lyoonse. Leza uyoomubusya Abelo ciindi aakucinca nyika kuba paradaiso.

Mukuya kwaciindi, bantu bakavwula kapati munyika. Bunji bwabo bakali babi. Nobaba bangelo bamwi kujulu bakabija kapati. Bakasiya munzi wabo kujulu akuboola anyika. Sena ulizyi ncobakacitila boobo? Kutegwa basame mibili yabuntu akukwata bamakaintu.

Bangelo alimwi abamakaintu bakazyala bana. Bana aabo bakakomena kapati akuba basinguzu mpoonya bakaba basilunya. Bakali kuuma bantu. Jehova tanaakalekela kuti zintu eezyi zizumanane kucitika. Aboobo wakayeeya kuti abanyonyoone bantu babi aaba azambangulwe.

Pele kwakali muntu umwi iwakaindene abantu bamwi. Wakali kumuyanda Jehova. Izina lyakwe wakali Nowa. Wakalikwete alimwi wakalijisi abana botatwe, Semu, Hamu a Jafeti, boonse botatwe bakalikwete. Jehova wakaambila Nowa kuyaka bwato bupati, kutegwa walo amukwasyi wakwe bafwutuke ku Zambangulwe. Bwato oobo bwakali mbuli cibbokesi cipati icatakali kubbila mumaanzi. Alimwi Jehova wakaambila Nowa kuleta banyama banji akubanjizya mubwato kutegwa abalo bafwutuke.

Mpoonya-mpoonya Nowa wakatalika kuyaka bwato. Nowa amukwasyi wakwe bakatola myaka iili 50 kuyaka bwato. Bakayaka bwato mbubonya mbuli Jehova mbwaakabaambila. Aciindi eeco, Nowa wakacenjezya bantu kujatikizya Zambangulwe. Pele kunyina wakamuswiilila pe.

Mpoonya cakasika ciindi cakunjila mubwato. Atubone cakatobela.