Afwaafwi a Babelo, kwakali munzi uutegwa Uri, ooko bantu nkobakali kukomba baleza banji ikutali Jehova. Pele kwakali mwaalumi mumunzi wa Uri iwakali kukomba buyo Jehova alikke. Izina lyakwe wakali Abrahamu.

Jehova wakati kuli Abrahamu: ‘Kozwa mumunzi wako, usiye babbululu bako, uunke kucisi nconditiikutondezye.’ Mpoonya Leza wakamusyomezya kuti: ‘Ndiyoopa kuti ube cisi cipati alimwi ndiyoobacitila zintu zibotu bantu munyika yoonse akaambo kanduwe.’

Abrahamu tanaakazyi nkwaakali kuyanda kumutuma Jehova, pele wakasyoma Jehova. Aboobo Abrahamu, mukaintu wakwe Sara, bausyi Abrahamu ba Tera alimwi amujwa wakwe Loti bakabunganya zintu zyabo akutalika lweendo lwabo lulamfwu.

Abrahamu wakajisi myaka yakuzyalwa iili 75 ciindi walo amukwasyi wakwe nobakasika kucisi eeco Jehova ncaakali kuyanda kubatondezya. Cakali kwiitwa kuti cisi ca Kanana. Kali kokuya, Leza wakabandika a Abrahamu akumusyomezya kuti: ‘Nyika yoonse eeyi njobwene, ndiyakwiipa bana bako.’ Pele Abrahamu alimwi a Sara bakalicembeede alimwi tiibakajisi bana pe. Aboobo ino Jehova wakali kuyoocizuzikizya buti cisyomezyo cakwe?

Ba Abrahamu a Sara bakalikwetene kwamyaka minji. Bakasiya munzi wabo mubotu ku Uri akutalika kukkala mumatente. Pele Sara tanaakatongooka pe, nkaambo wakali kumusyoma Jehova.

Sara wakali kuyandisisya kuba amwana cakuti wakaambila Abrahamu kuti: ‘Ikuti mubelesi wangu Hagare wazyala mwana, mwana ooyo inga waba buyo mbuli mwanaangu.’ Mukuya kwaciindi, Hagare wakazyala mwana. Zina lyakwe wakali Isimayeli.

Nokwakainda myaka minji, ciindi Abrahamu naakajisi myaka iili 99 alimwi Sara kali aamyaka iili 89, bakaswaigwa beenzu botatwe. Abrahamu wakabatambula kuti balyookezye munsi aacisamu alimwi akulya ambabo. Sena ulizyi kuti beenzu aaba bakali bani? Bakali bangelo! Bakaambila Abrahamu kuti: ‘Mwaka uuboola aciindi nciconya eeci, yebo amukaintu wako munoojisi mwana.’ Sara wakali kuswiilila kali mutente. Sara wakatalika kulisekela akwaamba kuti: ‘Sena inga ndazyala mwana mubucembele bwangu?’

Mwaka wakatobela, Sara wakazyala mwana musankwa, mbubonya mbuli mungelo wa Jehova mbwaakasyomezya. Abrahamu wakamuulika zina lyakuti Izaka, caamba kuti “Kuseka.”

Izaka naakali amyaka iili 5, Sara wakabona Isimayeli kafwubaazya Izaka. Sara wakayanda kukwabilila mwanaakwe, aboobo, wakaunka kuli Abrahamu akumulomba kuti amutande Hagare a Isimayeli. Naakasaanguna kwaamvwa makani aayo, Abrahamu tanaakakkomana pe. Pele Jehova wakati kuli Abrahamu: ‘Komuswiilila Sara. Ndiyoomulanganya Isimayeli. Pele cisyomezyo cangu ciyoozuzikizigwa kwiinda muli Izaka.’