Loti wakakkala a Abrahamu acisyanyina, mucisi ca Kanana. Mukuya kwaciindi, Abrahamu a Loti bakaba abanyama bavwubwa banji cakuti busena bwakweembelela bwakaceya. Abrahamu wakati kuli Loti: ‘Tatukonzyi kuzumanana kukkala abusena bomwe pe. Ndakulomba kuti usale kufwumbwa lubazu lwanyika eeyi nkoyanda kuunka, mpoonya mebo ndilaunka kulubazu lumbi.’ Abrahamu tanaakali kuliyanda pe, tee kayi!

Loti wakalanga akubona nyika mbotu afwaafwi amunzi wiitwa kuti Sodoma. Nyika eeyo yakali aamaanzi manji alimwi abwizu bubotu. Aboobo, wakasala busena oobo akulongela nkuko amukwasyi wakwe.

Bantu bamumunzi wa Sodoma alimwi abamumunzi wakali afwaafwi wa Gomora bakali babi. Bantu aaba bakali babi cakuti Jehova wakayeeya buyo kuti ainyonyoone minzi eeyi. Pele Leza wakali kuyanda kufwutula Loti amukwasyi wakwe, aboobo wakatuma bangelo bobilo kuyoobacenjezya kuti: ‘Kamufwambaana! Kamuzwa mumunzi ooyu! Jehova ulaunyonyoona.’

Loti tanaakazwa mpoonya-mpoonya. Wakali kwiile kuwayawaya. Aboobo, bangelo bakamujata kujanza Loti amukaintu wakwe alimwi abana bakwe basimbi bobilo akubatola anze aamunzi, mpoonya bakati: ‘Amuzuze kutegwa mufwutuke! Mutalangi musyule. Ikuti mucebe, mulafwa!’

Nobakasika kumunzi uutegwa Zoari, Jehova wakawisya mulilo asulufa mu Sodoma a Gomora. Minzi eeyi yobilo yakanyonyoonwa cakumaninina. Ciindi mukaintu wa Loti naatakamumvwida Jehova akuceba musyule, wakaba cuulu camunyo! Pele Loti abana bakwe basimbi bobilo bakafwutuka nkaambo bakamumvwida Jehova. Kweelede kuti bakausa kapati kuti mukaintu wa Loti tanaakamvwida. Pele balo bakakkomana akaambo kakuti bakaatobela malailile aa Jehova.

Abrahamu wakayiisya mwanaakwe Izaka kuyanda Jehova alimwi akusyoma zisyomezyo zya Jehova zyoonse. Pele Izaka naakajisi myaka iili 25, Jehova wakaambila Abrahamu kucita cintu cimwi icakali kukatazya kapati. Ino cakali cintu nzi eeco?

Leza wakaambila Abrahamu kuti: ‘Kobweza mwanaako musankwa uuli alikke ukamutuule kali cituuzyo acilundu kunyika ya Moriya.’ Abrahamu tanaakazyi kaambo Jehova ncaakamwaambila kucita boobu. Nokuba boobo, wakamumvwida Jehova.

Buzuba bwakatobela mafwumofwumo, Abrahamu wakabweza Izaka ababelesi bakwe bobilo akuunka ku Moriya. Nokwakainda mazuba otatwe, bakatalika kwaabona malundu alaale. Abrahamu wakaambila babelesi bakwe kuti bacaale abusena amwi ciindi walo a Izaka nobakali kuunka kuyootuula cituuzyo. Abrahamu wakapa Izaka nkuni kuti anyamune, mpoonya walo wakabweza cipeni. Izaka wakabuzya bausyi kuti: ‘Ino munyama ngotuyanda kutuula uli kuli?’ Abrahamu wakaingula kuti: ‘Mwanaangu, Jehova ulatupa.’

Ciindi nobakasika acilundu, bakayaka cipaililo. Kumane Abrahamu wakamwaanga kumaanza akumaulu Izaka akumubikka acipaililo.

Abrahamu wakabweza cipeni. Aciindi nciconya eeco, mungelo wa Jehova wakaita kuzwa kujulu kuti: ‘Abrahamu! Utamujayi mwanaako! Lino ndazyiba kuti ulamusyoma Leza nkaambo walilyaabide kumutuula mwanaako.’ Mpoonya Abrahamu wakabona mugutu uuli ameja aapatide mucoonde. Cakufwambaana wakamwaangulula Izaka akutuula mugutu muciindi canguwe.

Kuzwa buzuba oobo, Jehova wakaita Abrahamu kuti mulongwe wakwe. Sena ulikazyi kaambo ncaakamwiitila boobo? Abrahamu wakacita kufwumbwa Jehova ncaakali kuyanda kuti acite, nokuba kuti Abrahamu tanaakazyi kaambo Jehova ncaakali kuyanda kuti acitile boobo.

Jehova wakaciinduluka alimwi cisyomezyo cakwe kuli Abrahamu naakati: ‘Ndiyookulongezya, alimwi ndiyoovwuzya bana naa lunyungu lwako.’ Eeci cakali kupandulula kuti Jehova wakali kuyoobalongezya bantu boonse kwiinda mumukwasyi wa Abrahamu.