Izaka wakajisi myaka iili 40 naakakwata Rebeka. Wakali kumuyanda kapati. Mukuya kwaciindi, bakazyala bana basankwa bamaanga.

Musankwa mupati wakali Esau, mpoonya muniini wakali Jakobo. Esau wakali kuyandisya kapati kuunka musyokwe alimwi wakalicibwene kuvwima banyama. Pele Jakobo wakali kuyandisya kukkala aŋanda.

Mumazuba aayo, mwana musankwa mutaanzi kuzyalwa wakali kupegwa nyika mpati alimwi amali ikuti bausyi bafwa. Eeci cakali kwiitwa kuti cikono. Mumukwasyi wa Izaka, cikono cakali kubikkilizya akuba alubazu muzisyomezyo Jehova nzyaakasyomezya Abrahamu. Esau tanaakali kuzibikkila maano kapati zisyomezyo eezyo, pele Jakobo wakalizyi kuti zilayandika kapati.

Bumwi buzuba, Esau wakasika kuzwa kukuvwima kakatede kapati. Wakamvwa cakulya cinunkilila ncaakali kujika Jakobo, mpoonya wakati: ‘Ndafwa nzala! Kondipa musinza!’ Jakobo wakati: ‘Ndilakupa, pele kosaanguna kundisyomezya kuti ulandipa cikono cako.’ Esau wakati: ‘Ino cikono cilaampindu nzi! Inga wacibweza. Mebo ncondiyanda buyo, nkulya.’ Sena uyeeya kuti ncaakacita Esau cakali camaano? Peepe. Esau wakakaka cintu ciyandika kapati akaambo buyo kamusinza.

Ciindi Izaka naakacembaala, cakasika ciindi cakuti ape cikono kumwanaakwe musankwa mutaanzi kuzyalwa. Pele Rebeka wakagwasya Jakobo, mwanaabo musankwa muniini kutegwa acibweze cikono. Naakaazyiba makani aayo Esau, wakanyema kapati alimwi wakali kuyanda kumujaya mwanookwabo. Izaka a Rebeka bakali kuyanda kumukwabilila Jakobo, aboobo bakamwaambila kuti: ‘Koya ukakkale kuli baacisyanyoko ba Labani kusikila Esau akaleke kunyema.’ Jakobo wakabamvwida bazyali bakwe, aboobo wakatija.

Jehova wakasyomezya Jakobo kuti wakali kuyoomukwabilila mbubwenya mbwaakakwabilila ba Abrahamu a Sara. Jakobo wakakkala kubusena butegwa Harani, wakakwata akuba amukwasyi mupati, alimwi wakavwuba kapati.

Mukuya kwaciindi, Jehova wakaambila Jakobo kuti: ‘Kopiluka kunyika yabamauso.’ Aboobo Jakobo amukwasyi wakwe bakeenda musinzo mulamfwu kupiluka kwabo. Kacili munzila Jakobo, bantu bamwi bakaboola akumwaambila kuti: ‘Mwanookwanu Esau ulaboola alimwi ulijisi abaalumi bali 400!’ Jakobo wakayoowa kayeeya kuti Esau uyanda kumulwana amukwasyi wakwe. Wakapaila kuli Jehova kuti: ‘Ndakomba, kondivwuna kuli Esau.’ Buzuba bwakatobela, Jakobo wakatumina Esau mbelele, mpongo, ŋombe alimwi amadonki manji.

Masiku ngaonya aayo Jakobo kali alikke, wakabona mungelo. Mungelo ooyo wakatalika kutingana anguwe. Bakazumanana kutingana mane kubucedo. Nokuba kuti Jakobo wakalicisa, tanaakaleka pe. Mungelo wakaamba kuti: ‘Kondileka nduunke.’ Pele Jakobo wakati: ‘Tandikookuleka pe mane undileleke.’

Kumamanino mungelo wakamuleleka Jakobo. Lino Jakobo wakalizyi kuti Jehova takonzyi kulekela Esau kuti amulwane.

Mafwumofwumo ngaonya aayo, Jakobo naakalanga kulaale wakamubona Esau abaalumi bali 400. Jakobo wakainda kumbele lyamukwasyi wakwe akuvwuntama ansi kumbele lyamwanookwabo ziindi zili 7. Esau wakazuza kuyoomucinga Jakobo akumukumbata. Banabokwabo aaba bakatalika kulila alimwi bakabamba luumuno. Ino uyeeya kuti Jehova wakalimvwa buti kujatikizya mbwaakaayendelezya makani aaya Jakobo?

Kumane Esau wakapiluka kuŋanda yakwe, awalo Jakobo wakaunka kuŋanda yakwe. Jakobo wakajisi bana basankwa bali 12. Mazina aabo ngaaya: Rubeni, Simeoni, Levi, Juda, Dani, Nafutali, Gadi, Aseri, Isakara, Zebuloni, Josefa a Benjamini. Umwi wabana aabo wakali Josefa, walo Jehova ngwaakabelesya kufwutula bantu bakwe. Sena ulizyi mbwaakamubelesya? Atubone.