Mukuya kwaciindi, bana Israyeli bakamuzangila alimwi Jehova akutalika kukomba baleza bakubeja. Kwamyaka iili 7, bana Midiyani bakali kubba banyama babana Israyeli akunyonyoona zisyango zyabo. Kutegwa babatije bana Midiyani, bana Israyeli bakali kuyuba mumpangala amumalundu. Bakalomba Jehova kuti abafwutule. Aboobo Jehova wakatuma mungelo kumusankwa uucili mwana-mwana wazina lya Gideoni. Mungelo wakati: ‘Jehova wakusala kuti ube sikalumamba singuzu.’ Gideoni wakabuzya kuti: ‘Ino inga ndabafwutula buti bana Israyeli? Kayi mebo ndicili mwana.’

Ino Gideoni wakali kuyoozyiba buti kuti Jehova wasala nguwe? Wakabikka butonje ansi akwaambila Jehova kuti: ‘Mafwumofwumo ikuti butonje bukatete akaambo kamume pesi ansi kaali ayumu, ndiyoozyiba kuti uyanda kuti mebo ndibafwutule bana Israyeli.’ Buzuba bwakatobela, butonje bwakali butete pele ansi akali ayumu! Lino Gideoni wakalomba kuti buzuba butobela butonje bube buyumu pele ansi kaali atete. Nocakacitika eeci, Gideoni wakasyoma ncobeni kuti Jehova wakasalide nguwe. Wakabunganya basikalumamba bakwe kutegwa akalwane bana Midiyani.

Jehova wakaambila Gideoni kuti: ‘Ndiyoopa kuti bana israyeli bazunde. Pele akaambo kakuti ujisi basikalumamba banji, inga mwayeeya kuti mwazunda munguzu zyanu. Kufwumbwa uuyoowede komwaambila apiluke kuŋanda.’ Aboobo basikalumamba bali 22,000 bakapiluka kuŋanda, eelyo kwakasyaala bali 10,000. Mpoonya Jehova wakati: ‘Basikalumamba aaba bacili banji kapati. Kobatola kumulonga, ubaambile kuti banywe maanzi. Usiye buyo baabo babikkila maano kulanga sinkondo ciindi nobanywa maanzi.’ Baalumi ibali 300 balo mbobakapakamene ciindi nobakali kunywa maanzi. Jehova wakasyomezya kuti baalumi aaba basyoonto bakali kuyoozunda basikalumamba bana Midiyani ibali 135,000.

Busiku mbubonya oobo, Jehova wakaambila Gideoni kuti: ‘Lino casika ciindi cakulwana bana Midiyani!’ Gideoni wakapa baalumi bakwe myeembo azibikkilo mwalo imwakali zisisi ziyaka mulilo. Wakabaambila kuti: ‘Mweelede kundilangisya akucita mbubonya mbondicita.’ Gideoni wakalizya mweembo, wakapwaya cibikkilo cakwe, wakanyamuna cisisi mujulu, eelyo wakoongolola kuti: ‘Ipanga lya Jehova alya Gideoni!’ Baalumi boonse bali 300 bakacita mbubwenya oobo. Bana Midiyani bakayoowa kapati akumwaikizyanya citaambiki. Akaambo kakunyongana, bakatalika kuyasana mulicabo. Aawa alimwi, Jehova wakagwasya bana Israyeli kuzunda basinkondonyina.

Mwaalumi muna Israyeli wazina lya Elikana wakajisi bamakaintu bobilo, umwi wakali Hana mpoonya umwi wakali Penina, pele Hana wakali kuyandwa kapati. Penina wakali kumufwubaazya Hana lyoonse akaambo kakuti tanaakajisi bana, pele walo wakalijisi bana banji. Mwaka amwaka, Elikana wakali kuunka amukwasyi wakwe kuyookomba kutempele ku Silo. Ciindi cimwi kabali kutempele, wakabona kuti mukaintu ngwaakali kuyandisya Hana, wakaluuside kapati. Wakaamba kuti: ‘Koleka kulila Hana. Uli mukaintu wangu alimwi ndilakuyanda.’

Nokwakainda ciindi, Hana wakaunka alikke kuyoopaila. Wakali kwiile kulila ciindi naakali kupaila kuli Jehova kuti amugwasye. Wakapaila kuli Jehova akumusyomezya kuti: ‘Jehova, ikuti wandipa mwana musankwa, ndiyoomupa kulinduwe, alimwi uyookubelekela buumi bwakwe boonse.’

Mupaizi Mupati Eli wakamubona Hana kafwinkila, mpoonya wakayeeya kuti wakalikoledwe. Hana wakaingula kuti: ‘Peepe simalelaangu, nsikoledwe pe. Ndijisi penzi lipati, aboobo ndaambila Jehova penzi lyangu.’ Eli wakazyiba kuti wakalubizya mpoonya wakaambila Hana kuti: ‘Leza aakupe ncoyanda.’ Hana wakalimvwa kabotu eelyo wakaunka. Kautanamana mwaka, wakazyala mwana musankwa akumuulika zina lyakuti Samuele. Sena inga weezyeezya mbwaakakkomana Hana?

Hana tanaakaciluba cisyomezyo ncaakasyomezya kuli Jehova. Mbwaakamulesyela buyo kunyonka Samuele, wakamutola kutempele. Wakaambila Eli kuti: ‘Ooyu ngomwana ngondakali kulomba. Ndamupa kuli Jehova kuti amubelekele mubuumi bwakwe boonse.’ Elikana a Hana bakali kumuswaya Samuele mwaka amwaka alimwi bakali kumuletela ajansi linyowana. Jehova wakapa Hana bana bambi basankwa botatwe alimwi abasimbi bobilo.