LAIBBULALI YAA INTANETI ya Watchower
Watchtower
LAIBBULALI YAA INTANETI
Chitonga
  • BBAIBBELE
  • ZYAKAMWAIGWA
  • MISWAANGANO
  • Cisyomezyo ca Jefita
    Ziiyo Nzyomukonzya Kwiiya Kuzwa mu Bbaibbele
    • Jefita wazapula zisani zyakwe ciindi mwanaakwe naazuza kumucinga

      CIIYO 36

      Cisyomezyo ca Jefita

      Bana Israyeli bakamuzangila alimwi Jehova akutalika kukomba baleza bakubeja. Ciindi bana Amoni nobakabalwana bana Israyeli, baleza babo aabo kunyina nobakabagwasya pe. Bana Israyeli bakapenga kwamyaka minji. Mpoonya bakaambila Jehova kuti: ‘Twabisya. Twakomba kaka kotuvwuna kuli basinkondoma.’ Bana Israyeli bakabanyonyoona baleza babo bakubeja akutalika kukomba Jehova alimwi. Jehova tanaakali kuyanda kuti bazumanane kupenga.

      Sikalumamba wazina lya Jefita wakasalwa kuti asololele bana Israyeli kunkondo njobakali kulwana abana Amoni. Wakaambila Jehova kuti: ‘Kuti utugwasye kuzunda nkondo eeyi, ndisyomezya kuti ndaakupiluka kuŋanda, muntu uuyoosaanguna kuzwa muŋanda yangu kuzoondicinga, ndiyoomupa kulinduwe.’ Jehova wakauswiilila mupailo wa Jefita alimwi wakamugwasya kuzunda nkondo eeyo.

      Ciindi Jefita naakapiluka kuŋanda, mwanaakwe musimbi ngowakasaanguna kuzwa muŋanda kuzoomucinga, ooyo ngomwana alikke ngwaakajisi. Wakali kuzyana akulizya nsakalala. Ino Jefita ulacita buti? Wakayeeya cisyomezyo cakwe mpoonya wakaamba kuti: ‘Maawe, mwanaangu! Wandipenzya mumoyo. Ndakamusyomezya Jehova, aboobo kutegwa ndizuzikizye ncondakasyomezya, ndeelede kukutola kuti ukabeleke kutempele ku Silo.’ Pele mwanaakwe wakamwaambila kuti: ‘Bataata, ikuti mwakamusyomezya kale Jehova, mweelede kucizuzikizya ncomwakasyomezya. Ncondilomba buyo ncakuti mundipe myezi yobilo kutegwa nduunke kumalundu abeenzuma basimbi. Mpoonya ndiyakuunka.’ Mwana wa Jefita wakabeleka cakusyomeka kutempele buumi bwakwe boonse. Mwaka amwaka, beenzinyina bakali kuunka ku Silo kuyoomuswaya.

      Beenzinyina ba mwana wa Jefita baboola kuzoomuswaya kutempele

      “Kufwumbwa muntu uuyandisya mwanaakwe musankwa naa musimbi kwiinda ndime teelede kuba wangu.”​—Matayo 10:37

      Mibuzyo: Ino Jefita wakasyomezya nzi? Ino mwana wa Jefita wakacita buti akaambo kacisyomezyo cabausyi?

      Babetesi 10:6–11:11; 11:29-40; 1 Samuele 12:10, 11

  • Jehova Waambaula a Samuele
    Ziiyo Nzyomukonzya Kwiiya Kuzwa mu Bbaibbele
    • Samuele ujalula milyango yatente

      CIIYO 37

      Jehova Waambaula a Samuele

      Mupaizi Mupati Eli wakajisi bana basankwa bobilo ibakali kubelekela kutente lyakukombela kabali bapaizi. Mazina aabo bakali ba Hofeni a Finehasi. Tiibakali kwiitobela milawo ya Jehova alimwi tiibakali kubeendelezya kabotu bantu. Ciindi bana Israyeli nobakali kuleta zipaizyo kuli Jehova, ba Hofeni a Finehasi bakali kubweza nyama mbotu kapati. Eli wakamvwa ncobakali kucita bana bakwe pele tanaakabweza ntaamu iiyandika. Sena Jehova wakacilekela eeci kuti cizumanane kucitika?

      Nokuba kuti Samuele wakali muniini kuli Hofeni a Finehasi, kunyina naakatobela nzyobakali kucita. Jehova wakamukkomanina Samuele. Busiku bumwi naakali koona, Samuele wakamvwa muntu uumwiita. Wakabuka akuunka kuli Eli akumwaambila kuti: ‘Ndime aano!’ Pele Eli wakati: ‘Tiindakwiita pe. Koya ukoone.’ Samuele wakapiluka kukoona. Eeci cakacitika alimwi. Samuele naakamvwa muntu uumwiita ciindi catatu, Eli wakazyiba kuti ngu Jehova iwakali kwiita Samuele. Wakaambila Samuele kuti, ikuti amvwe muntu uumwiita alimwi, weelede kwaamba kuti: ‘Kondaambila, Jehova. Ndemubelesi wako ndiliswiilide.’

      Samuele waambila Eli makani ngaamwaambila Jehova

      Samuele wakapiluka nkwaakali koona. Mpoonya wakamvwa kuti: ‘Samuele! Samuele!’ wakaingula kuti: ‘Kondaambila, ndemubelesi wako ndiliswiilide.’ Jehova wakamwaambila kuti: ‘Umwaambile Eli kuti ndilamusubula walo amukwasyi wakwe. Ulizyi kuti bana bakwe basankwa bacita zintu zibi mutente lyangu, pele tabwezi ntaamu iili yoonse.’ Mafwumofwumo buzuba bwakatobela, Samuele wakajalula milyango yatente mbubwenya mbwaakali kucita lyoonse. Pele wakayoowa kwaambila mupaizi mupati makani ngaakamwaambila Jehova. Nokuba boobo, Eli wakamwiita akumubuzya kuti: ‘Mwanaangu, ncinzi ncaakwaambila Jehova? Kondaambila zyoonse.’ Aboobo Samuele wakamwaambila Eli zyoonse.

      Samuele naakali kuyaabukomena, Jehova wakazumanana kuba anguwe. Cisi coonse mobakali kukkala bana Israyeli, bakazyiba kuti Jehova wakasala Samuele kuti abe musinsimi amubetesi.

      “Koyeeya Mulengi wako Mupati mumazuba aabukubusi bwako.”​—Mukambausi 12:1

      Mibuzyo: Ino Samuele wakaindene buti a Hofeni a Finehasi? Ino mulumbe nzi Jehova ngwaakaambila Samuele?

      1 Samuele 2:12-17, 22-26; 3:1-21; 7:6

Chitonga Publications (1991-2025)
Log Out
Log In
  • Chitonga
  • Amutumine Bamwi
  • Makani Ngomuyanda
  • Copyright © 2025 Watch Tower Bible and Tract Society of Pennsylvania
  • Nzyomweelede Kuzumina
  • Mulawo Uujatikizya Kubamba Maseseke
  • Privacy Settings
  • JW.ORG
  • Log In
Amutumine Bamwi