Jehova wakaambila Samuele kuti: ‘Koya kuŋanda ya Jese. Umwi akati kabana bakwe basankwa nguuyooba mwami wa Israyeli uutobela.’ Aboobo, Samuele wakaunka kuŋanda ya Jese. Naakabona mwana wa Jese mupati wakayeeya kuti: ‘Ooyu musankwa kweelede kuti ngonguwe.’ Pele Jehova wakaambila Samuele kuti talinguwe. Jehova wakaamba kuti: ‘Ndibona zili mumoyo wamuntu, kutali mbwaboneka anze.’

Jese wakaleta abambi basankwa bali 6 kuli Samuele. Pele Samuele wakati: ‘Jehova kunyina ngwaasala akati kabo. Sena kuli bambi mbojisi?’ Jese wakati: ‘Kuli omwe wacaala, musyoonto aali boonse, Davida. Wayakukweembela mbelele.’ Ciindi Davida naakasika, Jehova wakaambila Samuele kuti: ‘Ooyu ngonguwe!’ Aboobo Samuele wakatila Davida mafwuta amutwe, kumunanika kuti akabe mwami wabana Israyeli kumbele.

Aciindi cimwi, bana Israyeli bakali kulwana aba Filisiti, balo ibakajisi sikalumamba iwakali aanguzu kapati wazina lyakuti Goliati. Buzuba abuzuba, Goliati wakali kubasampaula bana Israyeli. Wakoompolola kati: ‘Amutume mwaalumi kuti alwane andime. Ikuti andizunde, tulaba bazike banu. Pele kuti ndimuzunde, mulaba bazike besu.’

Davida wakaboola kunkambi yampi yabana Israyeli kuletela banabokwabo basikalumamba cakulya. Naakamvwa nzyaakali kwaamba Goliati wakati: ‘Mebo ndilamulwana!’ Mwami Saulo wakati: ‘Ucili mwana.’ Davida wakaingula kuti: ‘Jehova ulandigwasya.’

Saulo wakasola kuti asamike Davida zisani zyakwe zyankondo, pele Davida wakati: ‘Tandikonzyi kuunka azisani eezyi.’ Davida wakabweza nkwisyo akuunka kukalonga. Wakasala mabwe osanwe aabulungene akwaabikka mukabbeeke. Mpoonya Davida wakazuza kuunka kuli Goliati. Goliati wakoompolola kuti: ‘Koboola kuno kasankwa. Mutunta wako ndilaupa bayuni bauluka mujulu alimwi abanyama bamusyokwe.’ Davida tanaakayoowa pe. Wakamwiingula kuti: ‘Yebo waboola kulindime apanga asumo, pele mebo ndiboola kulinduwe muzina lya Jehova. Tolwani ndiswe pe; pele ulwana Leza. Bantu boonse aaba balazyiba sunu kuti Jehova ulaanguzu kwiinda panga naa sumo. Ulamwaaba nyoonse mumaanza eesu.’

Davida wakabikka bbwe munkwisyo yakwe akulifwusa canguzu. Kwiinda mulugwasyo lwa Jehova, ibbwe lyakauma akubbila munkumo ya Goliati. Goliati wakawa ansi akufwa. Kumane ba Filisiti bakatija. Sena ulamusyoma Jehova mbubwenya mbuli Davida?

Ciindi Davida naakajaya Goliati, Mwami Saulo wakamubikka kuba musololi wabasikalumamba bakwe. Davida wakazunda nkondo zinji, alimwi wakaba ampuwo. Kufwumbwa ciindi Davida naakali kupiluka kuzwa kunkondo, bamakaintu bakali kuboola kabazyana akwiimba kabati: ‘Saulo wajaya bantu banji, pele Davida wajaya bantu banji kapati!’ Saulo wakamufwida munyono Davida alimwi wakali kuyanda kumujaya.

Davida wakalicizyi kulizya kantimbwa. Bumwi buzuba naakali kulizyila Saulo kantimbwa, mwami wakamufwusa sumo. Davida wakaleya, mpoonya sumo lyakayasa kubwaanda. Kuzwa waawo, Saulo wakasola ziindi zinji kuti ajaye Davida. Mpoonya mukuya kwaciindi, Davida wakatija akuyooyuba munkanda.

Saulo wakabweza basikalumamba bali 3,000 akuunka kuyooyandaula Davida. Wakanjila mumpangala oomo Davida abeenzinyina mobakayubide. Beenzinyina Davida bakaamba caansaansi kuti: ‘Eeci ncecoolwe cako cakuti umujaye Saulo. Davida wakasobelela kuya kuli Saulo akutenda kabeela kajansi lyamwami. Saulo tanaakazyiba icakali kucitika. Kuzwa waawo, Davida wakalimvwa bubi akaambo kakutalemeka mwami Jehova ngwaakasala. Tanaakabazumizya beenzinyina kuti bamujaye Saulo. Mane buya wakoompolola kuli Saulo kuti, naakamujaya nkaambo wakalijisi coolwe cakucita boobo. Sena Saulo wakacinca mbwaakali kuyeeya kujatikizya Davida?

Peepe. Saulo wakazumanana kumuyandaula Davida. Busiku bumwi Davida amwana wamucizyi wakwe wazina lya Abisai bakaunka cakusobelela munkambi ya Saulo. Naba mulindizi wa Saulo wazina lya Abineri awalo wakali koona. Abisai wakati: ‘Eeci ncoolwe cesu! Amuleke ndimujaye mebo.’ Davida wakaingula kuti: ‘Peepe, Jehova ulazyiba ncaatiimucite Saulo. Atubweze buyo sumo lyakwe akankuli kakwe kamaanzi mpoonya tuunke.’

Davida wakatanta cilundu cimwi icakali afwaafwi ankambi ya Saulo. Mpoonya wakoongolola kuti: ‘Abineri, ino nkaambo nzi ncootamukwabilila mwami wako? Ino kankuli ka Saulo alimwi asumo lyakwe zili kuli?’ Saulo wakalizyiba jwi lya Davida kumane wakati: ‘Ikuti nooyanda noondijaya, pele tonoondijaya pe. Ndilizyi kuti uyooba mwami wabana Israyeli uutobela.’ Saulo wakapiluka kuŋanda yakwe yabwami. Pele tabali boonse bamumukwasyi wa Saulo ibakamuzondede Davida.