Mwana mupati wa Mwami Saulo, Jonatani, wakali sikalumamba sicamba. Davida wakaamba kuti Jonatani wakali alubilo mbuli sikwaze alimwi wakali anguzu mbuli syuumbwa. Bumwi buzuba, Jonatani wakabona basikalumamba ba Filisiti bali 20 kabali aamulundu. Jonatani wakaambila sikumunyamwida zilwanyo kuti: ‘Tulabalwana lilikke buyo kuti Jehova watupa citondezyo. Ikuti ba Filisiti batwaambile kuti tuunke, nkokuti tulabalwana.’ Ba Filisiti bakoompolola kuti: ‘Amuboole mutulwane!’ Aboobo baalumi bobilo bakatanta amulundu akubazunda basikalumamba aaba.

Akaambo kakuti ngowakali mwana wa Saulo mupati, Jonatani ngowakeelede kuba mwami uutobela. Pele wakalizyi kuti Jehova wakasala Davida kuti abe mwami wa Israyeli; aboobo kunyina naakamufwida munyono. Jonatani a Davida bakatalika kumvwana kapati. Bakasyomezyanya kuti banoogwasyanya. Jonatani wakapa Davida jansi lyakwe, panga, buta alutambo lwamucibuno kutondezya mbobakali kumvwana.

Ciindi Davida naakali kutija Saulo, Jonatani wakaunka kulinguwe akumwaambila kuti: ‘Koyuma, akuba sicamba. Jehova wasala nduwe kuba mwami. Nobaba bataata balizyi oobo.’ Sena inga wayanda kuba amweenzinyoko uuli kabotu mbuli Jonatani?

Ziindi zili mbozibede, Jonatani wakabikka buumi bwakwe muntenda kutegwa agwasye mweenzinyina. Wakalizyi kuti Mwami Saulo wakali kuyanda kujaya Davida, aboobo wakaambila bausyi kuti: ‘Inga cabija kuti mwamujaya Davida; nkaambo kunyina cibi ncaakacita.’ Saulo wakamunyemena Jonatani. Nikwakainda myaka iili mbwiibede, Saulo alimwi a Jonatani bakafwa munkondo.

Naakafwa Jonatani, Davida wakayandaula mwana wa Jonatani, Mefiboseti. Naakamujana, Davida wakamwaambila kuti: ‘Akaambo kakuti bauso twakali kumvwana kapati, ndinookulanganya buumi bwako boonse. Unookkala muŋanda yangu yabwami alimwi akulida atebulu lyangu.’ Davida kunyina naakamuluba mweenzinyina Jonatani.

Naakafwa Saulo, Davida wakaba mwami. Wakali amyaka yakuzyalwa iili 30. Nokwakainda myaka iili mbwiibede kali mwami, bumwi buzuba masiku naakali atala aaciluli caŋanda yakwe yabwami, Davida wakabona mukaintu mubotu kapati. Naakabuzya zina lyamukaintu ooyu, wakajana kuti ngu Bati-seba walo iwakakwetwe kuli sikalumamba wazina lya Uriya. Davida wakatuma bantu kuti bamwiite Bati-seba kuŋanda yakwe yabwami. Mpoonya wakoonana anguwe, kumane wakamita. Davida wakasola kusisa ncaakacita. Wakaambila mupati wabasikalumamba bakwe kuti Uriya bamubikke kumbele ooko nkondo nkoyakali mpati kapati kutegwa batija, bamusiye. Naakajaigwa Uriya munkondo, Davida wakamukwata Bati-seba.

Pele Jehova wakazibona zintu zibi zyoonse izyakali kucitika. Ino wakacita buti? Jehova wakatuma musinsimi Natani kuli Davida. Natani wakaamba kuti: ‘Mwaalumi umwi muvwubi wakalijisi mbelele zinji, pele mwaalumi mucete wakajisi buyo kana kambelele komwe kalo nkaakali kuyanda kapati. Mwaalumi ooyo muvwubi wakabweza kana kambelele komwe buyo nkaakajisi mwaalumi mucete.’ Davida wakanyema kapati akwaamba kuti: ‘Mwaalumi ooyo muvwubi weelede kujaigwa!’ Mpoonya Natani wakaambila Davida kuti: ‘Yebo ndonduwe mwaalumi ooyo muvwubi!’ Davida wakausa kapati, kumane wakalilekelela kuli Natani akwaamba kuti: ‘Ndamubisizya Jehova.’ Cibi eeci cakamuletela mapenzi Davida alimwi amukwasyi wakwe. Jehova wakamusubula Davida, pele wakamuzumizya kuti azumanane kupona nkaambo wakali kusyomeka alimwi wakali kulicesya.

Davida wakali kuyanda kuti ayakile Jehova tempele, pele Jehova wakasala mwana wa Davida wazina lya Solomoni kuti ayake nguwe. Davida wakatalika kumubambila zintu Solomoni akwaamba kuti: ‘Tempele lya Jehova lyeelede kubota kapati. Solomoni ucili mwana, pele ndilamugwasya kujana zintu ziyandika.’ Davida wakasanga mali aakwe manji kumulimo wakuyaka. Wakajana bantu bajisi luzyibo lunji lwakuyaka. Wakabunganya ngolida ansiliva, alimwi wakaleta makkedari kuzwa ku Turo aku Sidoni. Kali afwaafwi kufwa, Davida wakapa Solomoni malailile aajatikizya mbolyakeelede kuyakwa tempele. Wakaamba kuti: ‘Jehova wakandaambila kuti ndikulembele malailile aaya. Jehova uyookugwasya. Utayoowi pe. Uyume akuubeleka mulimo.’