-
Tempele lya JehovaZiiyo Nzyomukonzya Kwiiya Kuzwa mu Bbaibbele
-
-
CIIYO 44
Tempele lya Jehova
Ciindi Solomoni naakaba mwami wa Israyeli, Jehova wakamubuzya kuti: ‘Ino uyanda kuti ndikupe nzi? Solomoni wakati: ‘Ndicili mwana, alimwi tandicizyi kabotu ncondeelede kucita. Ndalomba undipe busongo kutegwa kandibeendelezya kabotu bantu bako.’ Jehova wakati: ‘Akaambo kakuti walomba busongo, ndilapa kuti ube musongo kapati kwiinda bantu boonse ibakkala anyika. Alimwi ndilapa kuti uvwube kapati. Alimwi ikuti kondimvwida, uyoopona ciindi cilamfwu kapati.’
Solomoni wakatalika kuyaka tempele. Wakabelesya ngolida mbotu kapati, nsiliva, mapulanga, alimwi amabwe. Kwakali baalumi alimwi abamakaintu banji kapati ibakali kuunka kuyoobeleka kutempele. Nokwakainda myaka iili 7, cakasika ciindi cakuti tempele lyaabwe kuli Jehova. Tempele lyakalijisi cipaililo, alimwi kwakali zituuzyo alincico. Solomoni wakafwugama kumbele lyacipaililo akupaila kuti: ‘O Jehova, tokonzyi kukkwana mutempele eeli alimwi talili libotu cakwiindilila, pele twalomba kuti ubutambule bukombi bwesu akuswiilila mipailo yesu.’ Ino Jehova wakalimvwa buti kujatikizya tempele alimwi amupailo wa Solomoni? Mbwaakamanina buyo kupaila Solomoni, kwakaloka mulilo kuzwa kujulu iwakaumpa zituuzyo izyakali acipaililo. Jehova wakalikkomanina tempele. Bana Israyeli nobakabona boobu, bakakkomana kapati.
Akaambo kabusongo bwakwe, Mwami Solomoni wakalizyibidwe kapati mu Israyeli yoonse alimwi akumasena aakulamfwu kapati. Bantu bakali kuboola kuli Solomoni kutegwa abagwasye kumapenzi ngobakajisi. Naba mwami mukaintu waku Seba wakaboola kutegwa amusunke amibuzyo iikatazya kapati. Mwami mukaintu ooyu naakamvwa bwiinguzi bwa Solomoni, wakati: ‘Tiindakazisyoma nzyobakandaambila bantu kujatikizya nduwe, pele lino ndalibonena kuti uli musongo kwiinda alizeezyo nzyobakandaambila. Leza wako Jehova wakulongezya.’ Buumi bwakali bubotu mucisi ca Israyeli, alimwi bantu bakalikkomene kapati. Pele zintu zyakali afwaafwi kucinca.
“Amubone! Imupati kwiinda Solomoni mpali aano.”—Matayo 12:42
-
-
Bwami BwaandaanaZiiyo Nzyomukonzya Kwiiya Kuzwa mu Bbaibbele
-
-
CIIYO 45
Bwami Bwaandaana
Ciindi Solomoni naakali kukomba Jehova, kwakali luumuno mu Israyeli. Pele Solomoni wakakwata bamakaintu banji ibakali kuzwa kumasena aambi, alimwi bamakaintu aaba bakali kukomba ba leza bakubeja. Aboobo asyoonto-syoonto Solomoni wakacinca akutalika kukomba mituni. Jehova wakanyema. Wakaambila Solomoni kuti: ‘Israyeli uyakwaandanizyigwa muzibeela zyobilo. Cibeela cipati ciyoopegwa kumubelesi wako umwi, mpoonya mukwasyi wako uyoolela buyo kabeela kasyoonto.’
Ncaakaamba Jehova wakacisalazya munzila aimbi. Umwi wababelesi ba Solomoni, Jeroboamu, wakali kweenda munzila naakaswaanganya musinsimi Ahija. Ahija wakazapaula cisani cakwe mutubeela tuli 12 akwaambila Jeroboamu kuti: ‘Jehova uyoobubweza bwami bwa Israyeli kuzwa kumukwasyi wa Solomoni akubwaandaanya muzibeela zyobilo. Kobweza tubeela tuli 10 twacisani eeci nkaambo uyooba mwami wamisyobo iili 10.’ Mwami Solomoni wakaamvwa makani aaya alimwi wakali kuyanda kumujaya Jeroboamu! Aboobo Jeroboamu wakatijila ku Egepita. Mukuya kwaciindi, Solomoni wakafwa mpoonya mwanaakwe Rehoboamu wakaba mwami. Kumane Jeroboamu wakayeeya kuti apiluke ku Israyeli nkaambo ooyo ngwaakali kuyoowa wakafwa.
Baalu bamu Israyeli bakaambila Rehoboamu kuti: ‘Ikuti naa ubeendelezye kabotu bantu, banoosyomeka kulinduwe.’ Pele beenzinyina Rehoboamu bakamwaambila kuti: ‘Weelede kubeendelezya calunya bantu! Kobabelesya kapati!’ Rehoboamu wakaswiilila lulayo lwabeenzinyina. Wakaba silunya kubantu, aboobo bakazanga. Bakabikka Jeroboamu kuba mwami wamisyobo iili 10, yalo iyakazikwiitwa kuti bwami bwa Israyeli. Misyobo iimbi yobilo yakazikwiitwa kuti bwami bwa Juda, alimwi yakazumanana kusyomeka kuli Rehoboamu. Misyobo iili 12 ya Israyeli lino yakaandaana.
Jeroboamu tanaakali kuyanda kuti bantu bakwe kabaunka kuyookomba ku Jerusalemu, yalo iyakali mubwami bwa Rehoboamu. Sena ulikazyi kaambo? Jeroboamu wakali kuyoowa kuti balamucincila maano bantu akuba kulubazu lwa Rehoboamu. Aboobo wakapanga boombe bangolida bobilo akwaambila bantu kuti: ‘Ku Jerusalemu nkulamfwu kapati. Mulakonzya kukomba nkukonya okuno.’ Bantu bakatalika kukomba boombe bangolida, aboobo bakamuluba Jehova alimwi.
“Mutanjili mujoko lyomwe abantu batasyomi. Nkaambo ino bululami buswaangene buti abubi? . . . Naa, ino muntu uusyoma uswaangene buti amuntu uutasyomi?”—2 Bakorinto 6:14, 15
-