Bwami bwa Israyeli bwamisyobo iili 10 bwakajisi bami babyaabi banji kapati, pele Ahabu ngowakali mubi kwiinda boonse. Wakakwete mukaintu mubi kapati iwakali kukomba Baala. Izina lyakwe wakali Jezebeli. Ahabu alimwi a Jezebeli bakazuzya cisi coonse abukombi bwa Baala alimwi bakajaya basinsimi ba Jehova. Ino Jehova wakacita buti? Wakatuma musinsimi Elija kuti aambile Ahabu mulumbe umwi.

Elija wakaambila Mwami Ahabu kuti akaambo kazintu zibi nzyaakali kucita, imvwula iyooleka kuwa mu Israyeli. Kwamyaka yotatwe, bantu tiibakali kulima alimwi kwakali nzala. Mukuya kwaciindi, Jehova wakatuma Elija kuti aunke alimwi kuli Ahabu. Mpoonya Mwami Ahabu wakaambila Elija kuti: ‘Yebo ndonduwe uuleta mapenzi! Nduwe uupa kuti zyoonse eezyi kazicitika.’ Pele Elija wakaingula kuti: ‘Tandili ndime ndapa kuti imvwula ileke kuwa. Nduwe uupa kuti kaitawi, nkaambo ukomba Baala. Tulacita musunko. Kobunganya bantu bamucisi boonse alimwi abasinsimi ba Baala a Cilundu ca Karimeli.’

Bantu bakabungana acilundu. Elija wakaamba kuti: ‘Amulisalile. Ikuti Jehova ngo Leza mwini-mwini, amumutobele. Ikuti naa ngu Baala, nkokuti amutobele nguwe. Mboobu mbomweelede kucita. Basinsimi ba Baala ibali 450 beelede kubamba cituuzyo akwiita leza wabo, mpoonya andime ndilabamba cituuzyo akwiita kuli Jehova. Ooyo uutiivwiile kwiinda mukutuma mulilo, ngo Leza mwini-mwini.’ Bantu bakazumina.

Basinsimi ba Baala bakabamba cituuzyo. Buzuba boonse bakaita kuli leza wabo kuti: ‘O Baala, Kotuvwiila!’ Naakabona kuti Baala tavwiili, Elija wakatalika kumufwubaazya. Wakati: ‘Kamoongolola kusika mpomugolela. Andiza woona alimwi kuyandika kuti umwi amubusye.’ Nokwakaba kumazuba, basinsimi ba Baala bakazumanana kwiita. Pele mbubwenya buyo, kunyina wakavwiila pe.

Elija wakabikka cituuzyo cakwe acipaililo akutila maanzi alincico. Mpoonya wakapaila kuti: ‘O Jehova, bantu abazyibe kuti yebo ndonduwe Leza wakasimpe.’ Mpoonya-mpoonya, Jehova wakatuma mulilo kuzwa kujulu eelyo wakacuumpa cituuzyo. Bantu bakoompolola kuti: ‘Jehova ngo Leza wakasimpe!’ Elija wakati: ‘Mutabalekeli kuti batije basinsimi ba Baala!’ Buzuba oobo, basinsimi ba Baala ibali 450 bakajaigwa.

Ciindi kakumbi kaniini nokakalibonya kulwizi, Elija wakaambila Ahabu kuti: ‘Mvwula mpati ilaboola. Kobamba nkalaki yako, uunke kuŋanda.’ Julu lyakasiya mbi akaambo kamakumbi, muwo wakaunga, mpoonya mvwula mpati yakatalika kuwa. Mpoonya ciyumayuma cakamana. Ahabu wakaizuzisya kapati nkalaki yakwe kusikila mpagolela. Kwiinda mukugwasyigwa a Jehova, Elija wakabalika kapati kwiinda nkalaki! Pele sena mapenzi aa Elija oonse akamana? Atubone.

Jezebeli wakamvwa cakacitika kubasinsimi ba Baala, aboobo wakanyema kapati. Wakatuma mulumbe kuli Elija wakuti: ‘Juunza ayebo ulafwa mbubwenya mbuli basinsimi ba Baala.’ Elija wakayoowa kapati akutijila munkanda. Wakapaila kuti: ‘Jehova, mbubo lino cabonwa. Andifwe buyo.’ Akaambo kakukatala, Elija wakoona munsi aacisamu.

Mungelo wakamubusya akumwaambila kuti: ‘Buka ulye.’ Elija wakabona cinkwa cibulungene icakali aamabwe aapya alimwi acinkuli camaanzi. Wakalya akunywa, mpoonya wakoona alimwi. Mungelo wakamubusya alimwi akumwaambila kuti: ‘Kolya. Uyandika nguzu mulweendo lwako.’ Aboobo Elija wakalya alimwi. Kumane wakeenda kwamazuba aali 40 masiku asyikati, mane wasika ku Cilundu ca Horebu. Naakasika ooko, wakanjila mumpako yabbwe kutegwa aone. Pele Jehova wakaambaula anguwe. Wakati: ‘Elija, ino utyani kuno?’ Elija wakaingula kuti: ‘Bana Israyeli tiibabamba cizuminano cabo anduwe. Banyonyoona zipaililo zyako akujaya basinsimi bako. Lino bayanda kundijaya andime.’

Jehova wakamwaambila kuti: ‘Koya ukaime acilundu.’ Cakusaanguna, muwo mupati wakabbubbula kumbele lyampako yabbwe. Cakatobela, kwakaba muzuzumo wanyika kumane kwakaboola mulilo. Kumamanino, Elija wakamvwa jwi libombe lyaansaansi. Wakalivwumba kumeso acisani cakwe akwiima amulyango wampako yabbwe. Mpoonya Jehova wakamubuzya kaambo ncaakatijila. Elija wakati: ‘Ndacaala endike.’ Pele Jehova wakamwaambila kuti: ‘Toli olikke pe. Mu Israyeli kucili bantu bali 7,000 bandikomba. Koya ukasale Elisha kuti abe musinsimi mubusena bwako.’ Mpoonya-mpoonya, Elija wakaunka kuyoocita ceeco Jehova ncaakamwaambila. Sena uyeeya kuti Jehova ulakonzya kukugwasya ayebo ikuti wacita ceeco ncayanda kuti ucite? Inzya, inga wacita oobo. Atubone cintu cimwi cakacitika ciindi nokwakali ciyumayuma.