Bakali Kusama Yunifoomu Iijisi Bbaaji Iitegwa Purple Triangle
Ba Maud bakkala ku France alimwi babeleka acikolo ikulanganya bana balema. Caino-ino basicikolo mukkilasi imwi bakali kwiiya zyankondo yacijaye-jaye alimwi azilabba zyakupenzyezya zyaba Nazi. Baange bakali kusama mayunifoomu aakajisi bbaaji. Mubala wabbaaji amboyakapangidwe zyakali kutondezya kaambo muntu ncaakaangilwa.
Mwiiyi wabo naakali kwaamba kaambo baange bamwi ncobakali kusamina bbaaji ya purple triangle wakaamba kuti: “Ndiyeeya kuti yakali yabantu ibakali koonana abasankwanyina naa bamakaintunyina.” Nobakazwa mukkilasi, ba Maud bakaambaula amwiiyi ooyo akumupandulwida kuti bbaaji ya purple triangle yakali kuzyibya Bakamboni ba Jehova.a Bakamwaambila kuti bayoomuletela mabbuku aamba zyamakani aayo. Mwiiyi ooyu wakazumina akulomba ba Maud kuti bakaambile abasicikolo makani aaya.
Ciindi cimwi basicikolo bambi nobakali kwiiya makani ngoonya aaya, mwiiyi uumbi wakabelesya ccaati kutondezya mabbaaji aindene-indene aakali kusamwa abaange. Ccaati eeyi yakasinizya kuti Bakamboni ba Jehova mbabakali kusama bbaaji ya purple triangle. Nobakazwa mukkilasi, ba Maud bakapa mwiiyi ooyu mabbuku aamba zyamakani aayo. Mwiiyi ooyu wakazumina akubikka bubambe bwakuti ba Maud bakaambile basicikolo makani aaya.
Ba Maud bajisi mabbuku ngobakabelesya
Ba Maud bakalibambila mubandi wamaminiti aali 15, pele ciindi nocakasika, bakaambilwa kuti: “Mulaangulukide kubandika kwawoola lyomwe.” Bakatalika kwiinda mukutondezya vidiyo iitondezya bulelo bwa Nazi mbobwakabapenzya Bakamboni ba Jehova. Vidiyo noyakatondezya kuti ba Nazi bakabweza bana ba Bakamboni bali 800 kuzwa kubazyali babo, ba Maud bakayiimika vidiyo akubala zyakuluula zyabana botatwe akati kabaabo. Noyakamana vidiyo, ba Maud bakabala lugwalo lwakulaya ndwaakalemba Kamboni waku Austria, iwakajisi myaka iili 19 wazina lya Gerhard Steinacher mu 1940 kubazyali bakwe kakusyeede buyo mawoola masyoonto kuti ajaigwe aba Nazi.b
Mbuli mbobakacita kubasicikolo bakusaanguna, ba Maud bakacita mbubwenya akubasicikolo babili. Tulabalumba ba Maud akaambo kabusicamba bwabo. Bamayi boonse bobilo lino balabaamba Bakamboni ba Jehova ciindi nobayiisya kujatikizya baabo ibakapenzyegwa muzilabba zyakupenzyezya zyaba Nazi.
a Ciindi ca Nkondo Yanyika Yoonse Yabili, Bakamboni ba Jehova mu Germany, alimwi ibakali kwiitwa kuti Basikwiiya Bbaibbele, bakaangwa akaambo kakukaka kuba kulubazu lwaba Nazi.
b Gerhard Steinacher wakajaigwa akaambo kakukaka kunjila mpi yabasikalumamba yaku German. Mulugwalo lwakwe wakalemba kuti: “Ndicili mwana. Ncondilomba buyo ncakuti Mwami andipe nguzu zyakuliyumya.” Buzuba bwakatobela mafwumofwumo Gerhard wakajaigwa. Cikwankwani icili acuumbwe cakwe cilembedwe kuti: “Wakajaigwa akaambo kakulemeka Leza.”