LUGWASYO KUMUKWASYI | LUKWATANO
Kutulanga Munzila Iili Kabotu Tumpenda Twajisi Ngomukwetene Limwi
Mulakkomana kucita zintu aciindi cili coonse; pele walo ngomukwetene limwi uyanda kusaanguna kulibambila kabotu zyoonse.
Muli baumuzi alimwi mulaansoni; pele walo ngomukwetene limwi ulakukkomanina kuyanzana abantu.
Sena kuli kampenda kamwi nkajisi ngomukwetene limwi kalo kamupa kunyema? Ikuti naa mwakabikkila maano, cikwati canu cilakonzya kunyongana. Nkakaambo kaako Bbaibbele ncolyaambila kuti “ooyo uuzumanana kwaamba kaambo nkeena waandaanya balongwe beni-beni.”—Tusimpi 17:9.
Muciindi cakulekela kampenda aako kumupa kunyema akuzwangana angomukwetene limwi, ambweni mulakonzya kwiiya kukalanga munzila iili kabotu.
Mucibalo eeci tulalanga-langa makani aatobela
Kutulanga munzila iili kabotu tumpenda tumupa kunyema
Cintu cimupa kunyema ncacita ngomukwetene limwi ambweni cileendelana abube bumwi mbomukkomanina kujatikizya nguwe. Amulange-lange zikozyanyo eezyi zyotatwe:
“Kanji-kanji balumi bangu inga bacita zintu asyoonto-syoonto noliba leelyo notulibambila kuunka kubusena bumwi. Pele kulubazu lumwi eeci ncecipa kuti kabandikkazikila moyo. Zimwi ziindi kuwaya-waya kwabo kulandinyemya, nokuba boobo kuli akati kazintu nzyondiyanda kapati kujatikizya mbabo.”—Ba Chelsea.
“Bakaintu bangu inga tabayandi kwiimpya nokaba kantu komwe nobalimbila; tabaiyandi mizeezo yabamwi, calo cindipa kunyema zimwi ziindi. Pele kulubazu lumwi, kubikkila maano kwabo nobacita zintu kubapa kuti lyoonse kabalibambilide.”—Ba Christopher.
“Balumi bangu zimwi ziindi balibonya kutabikkila maano, calo cindipa kunyema. Pele aciindi nciconya, kukkalikana kwabo nobacita zintu kuli akati kazintu izyakapa kuti ndibayande kapati. Aboobo, ndilabayanda kapati akaambo kabube bwabo bwakubatama lyoonse nomuba mubukkale bupa kukopana mumizeezo.”—Ba Danielle.
Mbubwenya mbuli mbobakaiya ba Chelsea, ba Christopher, alimwi aba Danielle, zintu nzyacita kabotu alimwi anzyataciti kabotu ngomukwetene limwi zitondezya buyo zibeela ziindene-indene zyabube bomwe. Aboobo, ikuti naa mwaile kunyema tamukonzyi kububona bube bubotu mbwajisi ngomukwetene limwi.
Nokuba boobo, zimwi ziindi taakwe bumbi mbomukonzya kutubona tumpenda tumupa kunyema. Mucikozyanyo, Bbaibbele lilaamba kuti bantu bamwi ‘mbakali.’ (Tusimpi 29:22) Mubukkale buli boobu, muntu weelede kusolekesya kapati kuleka “kulutila, bukali, kunyema, kubwenta alimwi amajwi aakusampaula.”a—Baefeso 4:31.
Pele kuti kampenda aako kakamupa kunyema, amutobele lulayo lwamu Bbaibbele lwakuti: “Amuzumanane kweengelelana . . . nokuba kuti umwi kajisi kaambo kakutongooka.”—Bakolose 3:13.
Kuyungizya waawo, amusole kubona kampenda aako kamupa kunyema munzila iili kabotu—ambweni inga kabuli bube ibwakapa kuti mumuyande kapati muntu ngomukwetene limwi. Mulumi wazina lya Joseph wakaamba kuti, “Kubikkila buyo maano kucintu cipa kunyema cili mbuli muntu uulanga buyo daimondi mboibosya mumabali kwiinda ikukkomanina bweebesi bwanjiyo.”
Nzyomukonzya kubandika
Kusaanguna, umwi aumwi ulakonzya kwiingula mibuzyo eeyi alikke. Mpoonya akubandika bwiinguzi aumwi mbwaajana.
Sena mubona kuti kuli kampenda kamwi nkajisi ngomukwetene limwi kalo kamupa kuzwangana? Ikuti naa mboobo, ino nkampenda nzi?
Sena kampenda aako ndipenzi lipati naa pe?
Sena kuli bubotu buliko mukampenda aako? Ikuti naa mboobo, ino mbubotu nzi, alimwi nkaambo nzi ncomubuyanda kapati bube oobo mbwajisi ngomukwetene limwi?
a Amubone zibalo zyakuti “Mbomukonzya Kukweendelezya Kunyema Kwanu,” “Mbomukonzya Kuleka Kwaamba Majwi Aanyemya,” alimwi acakuti “Mbomukonzya Kuleka Kukazyanya.”