BAKUBUSI BALABUZYA
Ino Kuba Abalongwe Banji a Social Media Kuyandika Kapati Buti?
Mukubusi wazina lya Elaine wakaamba kuti: “Ciindi nondakabona kuti basicikoloma bajisi balongwe banji a social media, ndakati, ‘Ha—balizyibidwe kapati!’ Kwaamba masimpe, ndakaba amunyono.”
Sena kuli nomwakalimvwide boobo? Ikuti naa mboobo, cibalo eeci cilamugwasya kutatyompwa ikuti kamutajisi balongwe banji a social media.
Ino kuba abalongwe banji a social media kuyandika kapati buti?
“Amukucenjelele kwaamba zintu zilibonya mbuli kuti mulalicesya kakuli mubwini mulalisumpula”
Ino nintenda nzi iziliko?
Kulugwalo lwa Tusimpi 22:1, Bbaibbele lyaamba kuti “izina libotu lyeelede kusalwa kwiinda lubono lunji.” Aboobo cili buyo kabotu kuyanda kuba ampuwo mbotu, naa kuyanda kuti bantu bamwi bamuyande.
Pele zimwi ziindi kulombozya kukkomaninwa inga nkupati kapati cakuti tamukonzyi kukkomana ccita kuti bantu banji kabamukkomanina. Sena kuli ntenda iikonzya kubako? Onya, uujisi myaka 16, ulazumina kuti nkoili:
“Ndakabona bantu kabacita zintu zyabufwubafwuba kucikolo, mbuli kusotoka awindo lilamfwu, kutegwa balipangile mpuwo.”
Kutegwa kababikkilwa maano abeenzinyina, bamwi mane buya balalikkopa nobacita zintu zyabufwubafwuba akuzituma a social media. Mucikozyanyo, bakubusi bamwi bakalikkopa kabalya saafwu cintu citeelede kuligwa nkaambo cilajaya!
Bbaibbele lyaamba kuti: “Mutaciti cintu cili coonse . . . cakulisumpula.”—Bafilipi 2:3.
Ncomweelede kuyeeya:
Ino kuba abalongwe banji a social media kuyandika kapati buti kulindinywe?
Sena muyoobikka buumi bwanu muntenda kutegwa muzyibwe akukkomaninwa abeenzinyoko?
“Kulicenga kuti mulizyibidwe kapati”
Talili lyoonse bantu nobacita zintu zibikka buumi muntenda kutegwa bazyibwe. Erica uujisi myaka 22, wakaamba nzila aimbi njobabelesya bantu bamwi kutegwa babe aampuwo:
“Bantu balaposita mafwoto manji aatondezya zicitika mubuumi bwabo kutegwa balibonye mbuli kuti bajisi balongwe banji mbobayanzana limwi lyoonse. Eeci cipa bantu kuyeeya kuti balizyibidwe kapati.”
Cara, uujisi myaka 15 wakaamba kuti, bantu bamwi balabeja kutegwa balipangile mpuwo:
“Ndakabona mafwoto ngobakaposita bamwi aalibonya mbuli kuti bakali kupobwe kakuli mubwini bakali aŋanda.”
Matthew, uujisi myaka 22, ulazumina kuti wakacita cikozyenye aceeci:
“Ndakaposita fwoto iitondezya kuti ndakakkopelwa ku Mount Everest, nokuba kuti tandinaunkide ku Asia!”
Bbaibbele lyaamba kuti: “Tuyanda kuti katusyomeka muzintu zyoonse.”—Bahebrayo 13:18.
Ncomweelede kuyeeya:
Ikuti naa mubelesya social media, sena kuli nomwakapositide cintu cimwi citali camasimpe kutegwa mube aampuwo?
Sena mafwoto alimwi amajwi ngomutuma atondezya bwini mbomubede alimwi azintu nzyomusyoma?
Ino kuba abalongwe banji a social media kuyandika kapati buti?
Bantu banji basyoma kuti kutegwa uzyibwe kapati a social media weelede kuba abantu bakukkomanina banji. Matthew, iwaambwa kale musyule ulazumina kuti mbwaakali kulimvwa oobo:
“Ndakali kubabuzya bantu kuti, ‘Ino bali bongaye bamukkomanina?’ naa kuti ‘Mweelwe nzi mupati wabantu bakamukkomaninide kale?’ Kutegwa bavwule kapati, ndakali kukkomanina bantu mbonditazyi kutegwa abalo bandikkomanine. Ndakatalika kulimvwa kuti ndeelede kuba aampuwo alimwi social media yakapa kuti ndiindile buya kulimvwa boobo.”
Kuba ampuwo a social media cili mbuli cakulya cinyina busani—cilakkomanisya kwaciindi cisyoonto pele tacimupi kukkuta
Maria uujisi myaka 25, wakaamba kuti bantu balalipima mbobabede kwiinda mukubona mweelwe wabantu babakkomanina:
“Ikuti musimbi waposita fwoto yakwe mpoonya banji tiibamukkomanina, ulimvwa kuti tali mubotu. Kuyeeya kuli boobu takuluzi pe, pele masimpe ngakuti ikuti koli mubukkale buli boobu ayebo inga wazuminizya. Mubwini, balalipenzya balikke.”
Bbaibbele lyaamba kuti: “Tutalisumpuli pe, tutabusyi mizundano akati kesu, alimwi tutafwidilani munyono.”—Bagalatiya 5:26.
Ncomweelede kuyeeya:
Ikuti naa mubelesya social media, sena mujana kuti imupa kulyeezyanya abamwi?
Sena mubikkila kapati maano kuba abantu bamukkomanina banji kwiinda kuba abalongwe beni-beni?