LUGWASYO KUMUKWASYI | KUKOMEZYA BANA
Kubala Ncokuyandika Kapati Kubana—Cibeela 1: Kubala naa Kweebelela Mavidiyo?
Aciindi nobalyookezya bana banu, ncinzi ncobakonzya kusala kucita: kweebelela mavidiyo naa kubala? Ino muyeeya kuti ncinzi ncobakonzya kusala: fooni naa bbuku?
Kuzwa kaindi, bantu nobabala balanyonganizyigwa a TV alimwi azintu nzyobeebelela akucita aintaneti. Mubbuku lyabo lyamu 1990 lyakuti Endangered Minds, ba Jane Healy bakalemba kuti: “Mukuya kwaciindi, ambweni bantu bayoocilekela limwi kubala.”
Nobakali kulemba majwi aaya, cakali kulibonya mbuli kuti tacikonzyeki kucitika. Nokuba boobo, nokwakainda myaka iili 30, bamayi bamuzisi tekkinoloji moisumpukide bakabona kuti bakubusi banji tabajisi cilengwa cakubala mbuli mbobakali kucita bantu musyule.
Mucibalo eeci tulalanga-langa makani aatobela
Nkaambo nzi kubala ncokuyandika kapati kubana?
Kubala kukulwaizya kweezyeezya. Mucikozyanyo, ciindi nomubala caano cimwi, ino majwi aabantu baambidwe mumo amvwika buti? Ino balibonya buti? Ino busena mpobabede bulibonya buti? Mulembi inga ulapandulula zintu zimwi, pele izyasyaala mubali weelede kweezyeezya.
Muzyali wazina lya Laura wakaamba kuti: “Ciindi notweebelela mafilimu naa mavidiyo inga tweebelela cintu citondezya mizeezo yamuntu umbi. Nokuba kuti kucita boobo cilakonzya kukondelezya, pele kuli cintu ciinda kubota kujatikizya kubala. Kupa kuti nywebo kumugama mweezyeezye majwi aakalembwa amuntu uumbi.”
Kubala kugwasya bana kuba abube bubotu. Ciindi bana nobabala, balakonzya kwiiya kuzyiba mapenzi alimwi buya ambobakonzya kwaamana. Kuyungizya waawo, bana bayandika kubikkila maano kutegwa bacikonzye kubala. Kwiinda mukucita boobo, balaiya kuba abube mbuli kukkazika moyo, kulilesya alimwi alweetelelo.
Lweetelelo? Inzya! Basikuvwuntauzya bamwi basyoma kuti ciindi bana nobabala caano cimwi cakubikkila maano, cilabagwasya kuyeeya kujatikizya mbobalimvwa bantu aabo baambidwe mucaano ncobabala. Eeci cilakonzya kubagwasya kutondezya lweetelelo kubantu mbobazyi.
Kubala kupa kuyeeyesya kapati. Babali ibabikkila maano balabala kabotu-kabotu kutali cakubinda. Mane buya balainduluka mumwi ikuti naa kwayandika kucita oobo, kutegwa bamvwisye ncaamba mulembi. Nobacita oobo, cilabaubila kuyeeya zintu nzyobabala alimwi akugwasyigwa anzizyo.—1 Timoteyo 4:15.
Muzyali wazina lya Joseph wakaamba kuti: “Ciindi nobala, ncuuba-uba kuyeeya ncokaamba kaambo kamwi, kukeezyanisya ancozyi kale, akubona ziiyo nzyokonzya kwiiya. Pele caboola kumavidiyo amafilimu, talili lyoonse naakulwaizya kuyeeyesya kapati kujatikizya zintu.”
Masimpe ngakuti: Nokuba kuti mavidiyo azintu zimbi zyakweebelela zilayandika, bana banu baindwa cintu ciyandika kapati ikuti kabatajani ciindi cakubala.
Mbomukonzya kubakulwaizya kunoobala
Amufwambaane kutalika. Muzyali wabana basankwa bobilo wazina lya Chloe, wakaamba kuti: “Twakali kubabalila bana besu kuzwa ciindi nobakacili mwida, alimwi twakazumanana nobakazyalwa. Tulikkomene akaambo kakuti tiitwakaleka. Mukuya kwaciindi, kubala kwakaba cibeela cabuumi bwabo.”
Njiisyo yamu Bbaibbele: “Kuzwa kubuvwanda ulaazyi malembe aasalala.”—2 Timoteyo 3:15.
Amubikke zintu zikulwaizya kubala muŋanda yanu. Amucite nzyomukonzya kutegwa kacibaubila bana banu kubala kwiinda mukubabikkila mabbuku. Muzyali wabana bone wazina lya Tamara, wakapa muzeezo wakuti: “Amuyandaule mabbuku ngakonzya kukkomanina kubala mwanaanu akwaabikka munsi-munsi abulo bwakwe.”
Njiisyo yamu Bbaibbele: “Koyiisya mwana inzila njayelede kweendela; noliba leelyo aakukomena takazwi mulinjiyo pe.”—Tusimpi 22:6.
Amubabikkile ciindi cakubelesya intaneti. Muzyali wazina lya Daniel wakapa muzeezo wakuti buzuba bumwi kumangolezya, banamukwasyi boonse tabeelede kubelesya mafooni naa kweebelela TV. Wakaamba kuti: “Nobuba busiku bomwe buyo mumvwiki, tulakonzya kukkala buyo mangolezya aayo kakunyina kweebelela TV. Kumane tulakonzya kubelesya ciindi eeco kubala antoomwe naa umwi aumwi kulibalila.”
Njiisyo yamu Bbaibbele: ‘Amusinizye zintu ziyandika kapati.’—Bafilipi 1:10.
Amube cikozyanyo cibotu. Muzyali wabana basimbi bobilo wazina lya Karina, wakapa muzeezo wakuti: “Amupe bana banu kuyeeya kuti zintu nzyomubabalila zili mukucitika ncobeni kwiinda munzila mbomubala, alimwi alukkomano ndomujisi ciindi nomucita oobo. Ikuti naa mulakukkomanina kubala, abalo bana banu balakonzya kwiiya cikozyanyo canu.”
Njiisyo yamu Bbaibbele: “Kozumanana kulitakata kubala kubuleya.”—1 Timoteyo 4:13.
Tabali bana boonse ibayookukkomanina kubala. Nokuba boobo, kukulwaizya kwanu kulakonzya kupa kuti batalike kukukkomanina kubala. Muzyali wabana basimbi bobilo wazina lya David, wakabakulwaizya bana bakwe, pele tanaakagolela waawo pe. Wakaamba kuti: “Ndakali kubala mabbuku ngobakali kubala bana bangu, calo icakandigwasya kuzyiba zintu nzyobakkomanina alimwi atwaambo ntotwakali kukonzya kubandika. Twakali kujana ciindi cakubala antoomwe mbuli mukwasyi. Eelo kaka cakali kukkomanisya!”