Mwaka amwaka, bakubusi banji ibali mumikwasyi ya Bakamboni ba Jehova balabbapatizyigwa. Sena muyanda kubweza ntaamu eeyi? Ikuti naa mboobo, mweelede kusaanguna kuzyiba ncocaamba kulyaaba alimwi akubbapatizyigwa.

• Ino lubbapatizyo ninzi?

• Ino kulyaaba ninzi?

• Nkaambo nzi kubbapatizyigwa ncokuyandika?

• Nzyobaamba beenzinyoko

• Makani aakubeja alimwi aamasimpe

Ino lubbapatizyo ninzi?

Lubbapatizyo ilwaambidwe mu Bbaibbele nkubbizyigwa mumeenda cakumaninina, kutali buyo kusansailwa meenda, alimwi kwiiminina cintu cimwi ciyandika kapati.

• Kubbila mumeenda aciindi cakubbapatizyigwa citondezya buleya kuti tamuciliponeni nobeni.

• Kuzwa mumeenda citondezya kuti mwatalika kupona buumi bupya bwakucita zintu zimukkomanisya Leza.

Kwiinda mukubbapatizyigwa, mwaambilizya kubuleya kuti Jehova ngonguwe iweelede kubikka zyeelelo zyaciluzi acitaluzi, alimwi muzyibya buleya cikonke canu cakulisungula ikunoocita ncayanda Leza.

Ncomweelede kuyeeya: Nkaambo nzi ncomunga mwayanda kutondezya kubuleya kuti munoopona buumi bwakumvwida Jehova? Amubone 1 Johane 4:19 alimwi a Ciyubunuzyo 4:11.

Ino kulyaaba ninzi?

Kamutanabbapatizyigwa, mweelede kulyaaba kamuli nyolikke kuli Jehova. Mubuti?

Kwiinda mumupailo, mwaambila Jehova kuti mwasyomezya kumubelekela kukabe kutamani alimwi akuti munoocita ncayanda tacikwe makani acikonzya kucitika, naa ncobakonzya kusala bamwi.

Kubbapatizyigwa kutondezya buleya kulyaaba nkomwakacita nomwakali nyolikke. Kunze lyaboobo, kwaambila bamwi kuti tamuciliponeni pele lino muzulilwa kuli Jehova.—Matayo 16:24.

Ncomweelede kuyeeya: Nkaambo nzi buumi ncobubota ciindi nomwalyaaba kuli Jehova? Amubone Isaya 48:17, 18 alimwi a Bahebrayo 11:6.

Nkaambo nzi kubbapatizyigwa ncokuyandika?

Jesu wakaamba kuti basikwiiya bakwe beelede kubbapatizyigwa. (Matayo 28:19, 20) Aboobo, lubbapatizyo luciyandika ku Banakristo mazuba aano. Alimwi buya, Bbaibbele lyaamba kuti lusololela kulufwutuko.—1 Petro 3:21.

Nokuba boobo, mweelede kubbapatizyigwa akaambo kuti mulamuyanda Jehova akuti mulacibikkila maano cilongwe ncomujisi anguwe. Mweelede kuba amuuya ngwaakajisi sintembauzyo iwakalemba kuti: “Ino inga ndamupilusyila nzi Jehova kububotu boonse mbwaandicitila? . . . Ndilaita zina lya Jehova. Ndilazuzikizya zikonke zyangu kuli Jehova.”—Intembauzyo 116:12-14.

Ncomweelede kuyeeya: Ino nzintu nzi zibotu nzyaakamucitila Jehova, alimwi inga mwamupilusyila buti nzinzyo? Amubone Deuteronomo 10:12, 13 alimwi a Baroma 12:1.

Ikuti kamupona kweelana azyeelelo zyamu Bbaibbele alimwi mujisi cilongwe a Leza, cileelela kuti kamuyeeya kujatikizya kubbapatizyigwa. Ino inga mwazyiba buti kuti mwalibambila kubweza ntaamu eeyi?a

Mucibalo eeci, tulalanga-langa makani aatobela:

• Ino ndeelede kuzyiba zinji buti?

• Ino ncinzi ncondeelede kunoocita?

• Nzyobaamba beenzinyoko

Ino ndeelede kuzyiba zinji buti?

Kulibambila kuyoobbapatizyigwa tacaambi kwiile kuswata twaambo, mbuli mbwacita muntu uunka kulemba musunko kucikolo. Pele, muyandika kubelesya “maano” kutegwa muyumye lusyomo lwanu lwakuti ncoliyiisya Bbaibbele ncamasimpe. (Baroma 12:1) Mucikozyanyo:

• Sena mulisinizyide kuti Leza nkwali akuti mweelede kumukomba?

  Bbaibbele lyaamba kuti: “Kufwumbwa ooyo uuswena afwaafwi kulinguwe weelede kusyoma kuti nkwali ncobeni akuti uba sikupa bulumbu kuli baabo bamuyandaula cabusungu.”—Bahebrayo 11:6.

  Amulibuzye kuti: ‘Nkaambo nzi ncondisyoma muli Leza?’ (Bahebrayo 3:4) ‘Nkaambo nzi ncondeelede kumukomba?’—Ciyubunuzyo 4:11.

  Sena muyandika lugwasyo? Amubone cibalo cakuti “Kulenga naa Kusanduka?—Cibeela 1: Nkaambo Nzi Ncondisyoma Muli Leza?”

• Sena mulasyoma kuti mulumbe uuli mu Bbaibbele uzwa kuli Leza?

  Bbaibbele lyaamba kuti: “Magwalo oonse akasololelwa a Leza alimwi alagwasya mukuyiisya, mukusinsa, mukululamika zintu, mukulaya cabululami.”—2 Timoteyo 3:16.

  Amulibuzye kuti: ‘Nkaambo nzi ncondisyoma kuti Bbaibbele ndibbuku liinda amizeezo yabantu?’—Isaya 46:10; 1 Batesalonika 2:13.

  Sena muyandika lugwasyo? Amubone cibalo cakuti “Ino Bbaibbele Inga Lyandigwasya Buti?—Cibeela 1: Kulimvwisya Kabotu Bbaibbele.”

• Sena mulisinizyide kuti Jehova ubelesya mbungano ya Bunakristo kuzuzikizya makanze aakwe?

  Bbaibbele lyaamba kuti: “Kuli [Leza] akube bulemu kwiinda mumbungano alimwi akwiinda muli Kristo Jesu kumazyalani oonse mane kukabe kutamani.”—Baefeso 3:21.

  Amulibuzye kuti: ‘Sena nzyondiiya kumiswaangano ya Bunakristo ndizibona kuti zizwa kubantu naa kuli Jehova?’ (Matayo 24:45) ‘Sena ndilajanika kumiswaangano noliba leelyo bazyali bangu nobataunki (ikuti kabamuzumizya kucita oobo)?’—Bahebrayo 10:24, 25.

  Sena muyandika lugwasyo? Amubone cibalo cakuti “Nkaambo Nzi Ncomweelede Kujanika Kumiswaangano ku Ŋanda ya Bwami?”

Ino ncinzi ncondeelede kunoocita?

Tamuyandiki kulondoka buya kutegwa mubbapatizyigwe. Nokuba boobo, mweelede kutondezya kuti muliyandide ‘kufwutatila zintu zibi akucita zibotu.’ (Intembauzyo 34:14) Mucikozyanyo:

• Sena mupona kweelana azyeelelo zya Jehova?

  Bbaibbele lyaamba kuti: “Amuzumanane kuba amanjezyeezya mabotu.”—1 Petro 3:16.

  Amulibuzye kuti: ‘Ino ndatondezya buti kuti ndijisi ‘maano aayiisyidwe kwaandaanya ciluzi acitaluzi’?’ (Bahebrayo 5:14) ‘Sena kuli bukkale bugaminide mbondiyeeya mondakazunda kuyungwa abeenzuma? Sena balongwe bangu balandikulwaizya kucita ziluzi?’—Tusimpi 13:20.

  Sena muyandika lugwasyo? Amubone cibalo cakuti “Ino Inga Ndaayiisya Buti Manjezyeezya Aangu?”

• Sena mulazumina kuti mwalubizya?

  Bbaibbele lyaamba kuti: “Umwi aumwi wesu uyoolyaambilila mwini kuli Leza.”—Baroma 14:12.

  Amulibuzye kuti: ‘Sena ndilasyomeka mumoyo alimwi akuli bamwi?’ (Bahebrayo 13:18) ‘Sena ndilalyaambilila kulubizya kwangu, ndilasisa naa kupa bamwi mulandu?’—Tusimpi 28:13.

  Sena muyandika lugwasyo? Amubone cibalo cakuti “Ino Ncinzi Ncondikonzya Kucita Ikuti Ndalubizya?”

• Sena mulimukubelekela acilongwe canu a Jehova?

  Bbaibbele lyaamba kuti: “Amuswene kuli Leza, eelyo awalo ulaswena kulindinywe.”—Jakobo 4:8.

  Amulibuzye kuti: ‘Ino munzila nzi mondili mukuswena kuli Jehova?’ Mucikozyanyo, ‘Ino Bbaibbele ndilibala ziindi zinji buti?’ (Intembauzyo 1:1, 2) ‘Sena ndilapaila lyoonse?’ (1 Batesalonika 5:17) ‘Sena mipailo yangu inga iligaminide? Sena balongwe bangu mbalongwe ba Jehova?’—Intembauzyo 15:1, 4.

  Sena muyandika lugwasyo? Amubone cibalo cakuti “Ino Bbaibbele Inga Lyandigwasya Buti?—Cibeela 2: Mbondikonzya Kukukkomanina Kubala Bbaibbele” alimwi acakuti “Nkaambo Nzi Ncondeelede Kupaila?”

MUZEEZO: Kutegwa mulibambile kubbapatizyigwa, amubale cibalo 37 mubbuku lyamu cikuwa lyakuti Questions Young People Ask—Answers That Work, Volume 2. Amubikkile maano kapati kumapepa aakulembela aali apeeji 308 a 309.

Sena muzeezo wakulyaaba kuli Jehova alimwi akubbapatizyigwa umupa kulibilika? Ikuti naa mboobo, cibalo eeci cilamugwasya kuleka kuyoowa.

Mucibalo eeci tulalanga-langa makani aatobela

• Ino mbuti kuti ndikacite cibi cipati ndaakumana kubbapatizyigwa?

• Ino mbuti kuti kandiyoowa mikuli iyooboola ndaakumana kubbapatizyigwa?

• Ino mbuti kuti kandilimvwa kuti tandeeleli kubelekela Jehova?

• Nzyobaamba beenzinyoko

Ino mbuti kuti ndikacite cibi cipati ndaakumana kubbapatizyigwa?

Kaambo ncomulibilika: Ambweni kuli ngomuzyi wakacita cibi cipati mpoonya wakagwisyigwa mumbungano. (1 Bakorinto 5:11-13) Mulakonzya kulibilika kuti ambweni eeci cilakonzya kumucitikila.

“Ciindi nondakaba amuzeezo wakubbapatizyigwa kusaanguna, ndakayoowa akuyeeya kuti ndaakumana buyo kubbapatizyigwa inga ndaakucita cibi cipati. Ndakeezyeezya mbocakali kukonzya kupa bazyali bangu kuusa.”—Rebekah.

Lugwalo luyandika: “Simucita zibi aileke nzila yakwe . . . Aapiluke kuli Jehova, walo uutiimufwide luse, aapiluke kuli Leza wesu, nkaambo uyoomulekelela cakumaninina.”—Isaya 55:7.

Amuyeeye kaambo aaka: Nokuba kuti basimucita zibi ibateempwi balagwisyigwa mumbungano, Jehova ulabafwida luse aabo ibeempwa alimwi akutambula lulayo.—Intembauzyo 103:13, 14; 2 Bakorinto 7:11.

Alimwi buya, kaambo nkaaka: Nokuba kuti tamulondokede, mulakonzya kweeleba masunko kwiinda mukugwasyigwa a Leza. (1 Bakorinto 10:13) Kayi, tee ndinywe mulisalila cakucita.

“Ndakali kuyoowa kuti inga ndaakucita cibi cipati ndaakumana kubbapatizyigwa, pesi ndakabona kuti inga kwaba kulubizya ikuti tiindabbapatizyigwa. Aboobo ndakayeeya kuti tiindakeelede kulekela kuyoowa zintu zikonzya kucitika kumbele kundilesya kubbapatizyigwa.”—Karen.

Masimpe ngakuti: Ikuti mwayanda, mulakonzya kweeleba kucita cibi cipati, mbuli mbobacita babelesi ba Jehova banji.—Bafilipi 2:12.

Sena mulayanda lugwasyo alumbi? Amubone cibalo cakuti “Ino Inga Ndalizunda Buti Sunko?”

Ino mbuti kuti kandiyoowa mikuli iyooboola ndaakumana kubbapatizyigwa?

Kaambo ncomulibilika: Mucikozyanyo, ambweni kuli bakubusi mbomuzyi ibakasiya banamukwasyi alimwi abalongwe kuti bakayungizye mulimo wabo kuli Jehova. Mulakonzya kulibilika akuyeeya kuti ambweni bantu bayoolangila kuti andinywe mukacite mbubonya.

“Munakristo uubbapatizyidwe uleelela kucita zintu zinji mumulimo wa Jehova, pele bantu bamwi tabalyaabi naa kuti bukkale bwabo tabubazumizyi pe.”—Marie.

Lugwalo luyandika: “Umwi aumwi alingule nzyacita lwakwe mwini, mpoonya ulajana kaambo kamupa kukondwa lwakwe mwini, ikutali akaambo kakulyeezyanya amuntu uumbi.”—Bagalatiya 6:4.

Amuyeeye kaambo aaka: Muciindi cakulyeezyanisya abamwi, amubikkile maano kumajwi aali kulugwalo lwa Marko 12:30: “Weelede kuyanda Jehova Leza wako amoyo wako woonse.”

Kamuyeeyede kuti mweelede kubelekela Jehova amoyo wanu woonse, kutali waumwi. Ikuti kamumuyanda ncobeni Jehova, muyoojana nzila yakumubelekela kusikila mpomugolela.

“Nokuba kuti kubbapatizyigwa nkusala kupati, tauli mukuli uuminya pe. Ikuti kamujanika abalongwe bali kabotu, balakonzya kumugwasya mwayandika lugwasyo. Mbomuyaabutambula mikuli asyoonto-syoonto alwalo lukkomano lwanu lunooyaabukomena. Aboobo ikuti kamweenkela kubbapatizyigwa, mulakonzya kuliletelela nobeni.”—Julia.

Masimpe ngakuti: Mweelede kutondezya kulumba kuluyando Jehova ndwaamutondezya. Kucita boobo kuyoomukulwaizya kumubelekela kusikila mpomugolela.—1 Johane 4:19.

Sena mulayanda lugwasyo alumbi? Amubone cibalo cakuti “Sena Ndili Muntu Uubikkila Maano Kuzintu?”

Ino mbuti kuti kandilimvwa kuti tandeeleli kubelekela Jehova?

Kaambo ncomulibilika: Jehova Mweendelezi wabubumbo boonse; aboobo bantu tabakonzyi kweelanisyigwa anguwe naaceya. Ambweni mulakonzya kulibuzya kuti, mwati Leza ulindizyi?

“Akaambo kuti bazyali bangu Mbaakamboni ba Jehova, ndakalilibilikide kuti ndakakona cilongwe cangu a Jehova kuzwa kulimbabo, akuti Jehova tanaakandikwela mebo lwangu kundigama.”—Natalie.

Lugwalo luyandika: “Kunyina muntu uukonzya kuboola kulindime ccita kuti wakwelwa a Taata wakandituma.”—Johane 6:44.

Amuyeeye kaambo aaka: Akaambo kuti muyeeya makani aakubbapatizyigwa cilakonzya kuba citondezyo cakuti Jehova uli mukumukwela kutegwa mube acilongwe anguwe. Sena mulakuzumina kutambwa ooku?

Amuyeeye alimwi kuti Jehova, kutali nywebo naa muntu umbi, nguubikka zyeelelo kuli baabo mbayanda kukwela. Alimwi Jwi lyakwe limusyomezya kuti, ikuti ‘mwaswena kuli Leza, awalo ulaswena kulindinywe.”—Jakobo 4:8.

“Akaambo kakuti mulimuzyi Jehova alimwi mwakakwelwa kulinguwe, ncitondezyo cakuti ulamuyanda. Aboobo ciindi nomulimvwa kuti tamweeleli kumubelekela, amuliyeezye kuti walo tabusyi mbwamubona oobo. Alimwi Jehova lyoonse uliluzi.”—Selina.

Masimpe ngakuti: Ikuti mwasika azyeelelo zyakubbapatizyigwa, nkokuti muleelela kuba mukombi wa Jehova. Alimwi kamuyeeyede kuti, ngonguwe weelela kukombwa alikke.—Ciyubunuzyo 4:11.

Sena mulayanda lugwasyo alumbi? Amubone cibalo cakuti “Nkaambo Nzi Ncondeelede Kupaila?”