Sena Bakamboni ba Jehova Balijisi Basololi Bavwola?

Mbwaanga batobela cikozyanyo ca Bunakristo bwamumwaanda wamyaka wakusaanguna, Bakamboni ba Jehova tabaindanyi akati kabasololi abantu buyo mucikombelo. Boonse babbapatizyidwe mbabelesi babikkidwe alimwi balatola lubazu mumulimo wakukambauka akuyiisya. Mumbungano yomwe kulaba Bakamboni babalilwa ku 100. Baalumi basimide kumuuya mumbungano imwi aimwi balabeleka kabali “baalu.” (Tito 1:5) Balacita oobo kakunyina kubbadelwa kumulimo ngobabeleka.