Kuswaya ku Indonesia

CISI ca Indonesia cijisi nsumbu zisika ku 17,000. Bantu bamucisi eeci balizyibidwe kuti balaaluyando, balakkazyika moyo, balaabulemu alimwi balasamausya kapati.

Zyakulya zyaku Indonesia zibikkilizya mupunga, micelo alimwi azyakulya zimwi zibikkidwe masipaisi. Mumikwasyi imwi ciindi nobalya balakkala amuseme, akubelesya maanza kusunsa zyakulya zimbi mumupunga. Bantu banji bamucisi eeci baamba kuti kulya munzila iili boobu kupa kuti cakulya kacinona.

Bana Indonesia balayandisya kuzekaula, kwiimba alimwi akuzyana. Cibelesyo cakwiimbya citegwa angklong, ncibelesyo cabana Indonesia cipangidwe amatete aangidwe antoomwe. Matete aaya akapangwa kuti kaalila munzila iilibedelede. Kutegwa bacikonzye kwiimba lwiimbo, baimbi beelede kulizyila antoomwe kwiinda mukusuka cibelesyo eeci aciindi ceelede.

Kusikila mumwaanda wamyaka wa 15 C.E., zikombelo zyaba Hindu alimwi aba Buddha zyakalidumide kapati mu Indonesia. Mumwaanda wamyaka wa 16, ci Islam cakaduma muzilengwa zyamu Indonesia. Bantu bazwa ku Europe bakasika mumwaanda wamyaka wa 16 mucisi eeci kuyanda masipaisi, alimwi mbebakatalisya zikombelo zya Bunakristo Bwanyika.

Bakamboni ba Jehova, ibazyibidwe kapati munyika yoonse akaambo kamulimo wabo wakuyiisya Bbaibbele, balabeleka cabusungu mucisi eeci kuzwa mu 1931. Mazuba aano, kuli Bakamboni bainda ku 22,000 mu Indonesia. Balabeleka kapati kutegwa bakambaukile basyataambi bali mucisi eeci. Mu 2010 bantu bainda ku 500 bakajanika kumuswaangano waalubazu wamumwaambo wakutambaika wakacitwa a Bakamboni ba Jehova kutegwa baibaluke lufwu lwa Jesu Kristo.