TOONSE, tulajatikizyigwa mumakwebo aatamani. Ino basimakwebo bajisi makanze nzi? Bayanda kuti bantu kababona kuti zyintu zyoonse nzyobaula zilayandika. Basimakwebo balizyi kuti basikuula balakwelelezyegwa kapati azyintu nzyobabona. Aboobo mbobaambilizya makwebo alimwi ambobasambala zyintu balacita munzila iipa kuti basikuula kabazikkomanina kapati nzyobabona.

Bbuku lyakuti Why People Buy Things They Don’t Need lyaamba kuti: “Ciindi bantu nobayanda kuula cintu cimwi, baleezyeezya kuti bacijana kale cintu eeco, bacuula, mpoonya caba cabo.” Basyaazibwene bamwi bayeeyela kuti basikuula balakonzya kukkomana kapati ciindi nobaula zyintu. Syaazibwene mumakani aamakwebo, Jim Pooler upandulula kuti: “Ikuti sikusambala wazyiba kuti sikuula wacikkomanina kapati cintu ncasambala, ulakonzya kubelesya lukkomano ndweena oolu kutegwa amoongelezye kucuula cintu eeco.”

Ino mbuti mbomukonzya kulikwabilila kulibasimakwebo bali boobu? Tamweelede kuciindizya kukkomana, alimwi amubone kuti naa zyintu basimakwebo nzyobaamba nzyamasimpe.

CISYOMEZYO: “Mulakonzya Kusumpula Buumi Bwanu”

Muntu uuli woonse ulayanda kupona buumi buli kabotu. Basimakwebo balatoongelezya kuti zyintu zyoonse nzyotuyanda, mbuli kupona buumi buli kabotu, lukwabililo, kutalibilika, alimwi akuba abalongwe, zilakonzya kujanwa kwiinda mukuula zyintu zimwi ziyandika.

CINI CICITIKA:

Ciindi zyintu nzyotujisi noziyaabuvwula, akwalo kupona buumi buli kabotu kulayaansi. Inga kwayandika kuyungizya ciindi alimwi amali kutegwa mulanganye zyintu zinji eezyo nzyomujisi. Kulibilika kulaindila akaambo kakuvwula kwazikwelete, acalo ciindi cakuba amukwasyi alimwi abalongwe cilaceya.

Njiisyo: “Nokuba kuti muntu kajisi zyintu zinji buti, ibuumi bwakwe tabuzwi kuzyintu eezyo nzyajisi.”—Luka 12:15.

CISYOMEZYO: “Mulakonzya Kuba Ampuwo”

Bantu basyoonto buyo mbabakonzya kuzumina kuti balaula zyintu akaambo kamambonwa. Nokuba boobo, ba Jim Pooler bakaamba kuti: “Ciindi bantu nobaula zyintu, muuya ngobajisi ngwakuyanda buyo kulitondezya kubeenzinyina, basimukobonyina, babelesinyina alimwi abasazinyina.” Akaambo kaceeci, basikwaambilizya makwebo balatondezya zyintu nzyobaamba kuti zibelesyegwa abantu balaampuwo. Mulumbe ngobaamba basimakwebo kubantu ngwakuti: “Andinywe mulakonzya kuba mbuli bantu aaba!”

CINI CICITIKA:

Kuyandisya kuba mbuli bantu balaampuwo kupa kutakkutila lyoonse. Ciindi nimwajana cintu cimwi ncimwali kuyanda, mulatalika kulombozya cintu cimbi.

Njiisyo: “Muntu uuyandisya mali takonzyi kukuta mali.”—Mukambausi 5:10.

CISYOMEZYO: “Zyintu Eezyi Zilamweelela”

Bbuku lyakuti Shiny Objects lyaamba kuti: “Nzila iizyibidwe kapati bantu mbobatuzyiba (naa mbotuyanda kuti batuzyibe) nkwiinda muzyintu nzyotujisi.” Basimakwebo balikazyi kaambo aaka, aboobo babelesya bantu balaampuwo kwaambilizya makwebo aabo.

Ino mulibona buti, alimwi mbuti mbomuyanda kuti bantu bamwi kabamubona? Muntu uuyandisya zyintu zipya? Muntu uuyandisya zisobano? Makanze aabasimakwebo ngakuti, ikuti mwaula cintu cimwi, mulakonzya kuba mbomuyanda kuti mube.

CINI CICITIKA:

Kunyina cintu cikonzya kucinca bwini mbotubede naa kupa kuti tube aabube bulombozyeka, mbuli kusyomeka.

Njiisyo: “Kulisakatizya kwanu kutabi buyo . . . [kwa]kusama zyintu zyangolida naa zisani zidula kapati—pele akube kulisakatizya kwamuntu wamukati kamoyo.”—1 Petulo 3:3, 4.

Kuyungizya akusungilizyigwa abasimakwebo, andiswe tobeni tulakonzya kuba amuuya wakuciindizya kuula zyintu. Nzyeezi nzila zili cisambomwe zikonzya kumugwasya kutegwa kamutaciindizyi kuula zyintu.

1. Mutanoouli zyintu nzyomwatalibambilide kuula. Sena cilamukkomanisya kuula zyintu zinji akaambo buyo kakuti muulo ulajolwa ansi? Ikuti naa kacili boobo, eeci inga camupa kuba amuuya wakuula zyintu nzyomwatalibambilide. Kutegwa muutantamuke muuya ooyu, mweelede kukkazika moyo akuzinzibala kuyeeya buyumuyumu bukonzya kuboola akaambo kakulanganya zyintu eezyo nzyomwaula. Amuyeeye zyintu nzyomwakaula cakutalibambila zyalo nzyomwakaliyeeya kuti tiimwakeelede kuzyuula. Amusaangune kuyeeya kamutanasala cakucita.

2. Tamweelede kuula zyintu kutegwa mulikkomanisye ciindi nomutyompedwe. Kuula zyintu kulakonzya kumukkomanisya kwaciindi buyo cisyoonto. Pele ciindi mwatalika kulimvwa bubi alimwi, cilakonzya kupa kuti muunke kuyakuula zyintu zimbi alimwi kutegwa mulimvwe kabotu. Muciindi cakumana penzi eeli kwiinda mukuula zyintu, mweelede kujana balongwe bakonzya kumugwasya, naa kucita cintu cimwi cimukkomanisya mbuli kuyaabweendeenda.

3. Tamweelede kuula zyintu akaambo kakuyanda buyo kulikondelezya. Muzintoolo zipati-pati kuula zyintu cili mbuli cisobano buya. Nokuba kuti inga mwaunka muzintoolo naa kulanga aa Intaneti akaambo kakuyanda buyo kulikkomanisya, zyintu zinji nzyomubona zyakabambilwa kumukulwaizya kuti muule. Aboobo, mweelede buyo kuula cintu ncimwaunkila kuyakuula.

4. Amusale balongwe cabusongo. Bukkale alimwi azyintu nzyobaamba balongwe banu zilazijatikizya kapati zyintu nzyomuyanda. Ikuti kamuula zyintu akaambo kakuti muyanda kuba mbuli beenzinyoko, mweelede kusala balongwe bataayandisyi kapati mali.

5. Kamutubelesya kabotu tukkaadi twakubbanki tumuzumizya kukweleta zyintu. Ncuuba-uba kukweleta zyintu kwiinda mukubelesya tukkaadi twakubbanki. Mweelede kusola kubbadela zikwelete zyoonse zyamumwezi ooyo kubelesya tukkaadi twanu twakubbanki. Amubelesye tukkaadi tutaduli. Amutucenjelele tukkaadi tumuzumizya kukweleta zyintu zinji. Muciindi cakukweleta zyintu kwiinda mukubelesya tukkaadi, amwaayobole mali kutegwa mukaule zyintu zinji kubelesya mali buya.

6. Amuzyibe mweelwe wamali ngomujisi. Ncuuba-uba kwiile kuula zyintu kuti kamutaazyi kabotu mali ngomujisi. Lyoonse mweelede kulanga-langa akuzyiba mweelwe wamali ngomujisi. Amuzyibe mali ngomweelede kunoobelesya mwezi amwezi kweelana amali ngomuvwola. Amwaazyibe mali ngomubelesya, mpoonya amubone naa aleendelana amweelwe wamali ngomwakabikka. Amubuzye mulongwe ngomusyoma kutegwa amupandulwide kujatikizya makani aamba zyamali ngomutazyi kabotu.