ZICITIKA MUNYIKA
United States
Mubuvwuntauzi bumwi ibwakacitwa kubantu babelesya migwagwa mumadolopo, kwakajanwa kuti muntu omwe akati kabantu botatwe ulanyonganizyigwa ciindi nasotoka mugwagwa akaambo kakuswiilila nyimbo, kwaambaula afooni alimwi azyintu zimwi buyo. Pele kwakajanwa kuti icakali kubanyonganya kapati nkulemba tugwalo afooni. Aabo ibakali kutuma tugwalo afooni bakali kutola ciindi cilamfwu kusotoka mugwagwa kwiinda bamwi, alimwi bakali kulangilwa kutaatobela malobboti, kusotoka mugwagwa abusena buteelede alimwi akusotoka mugwagwa kakunyina kulanga kulumwensyi akululyo.
Nigeria
Bamakaintu batolwa ku Europe kuzwa ku Nigeria abantu basambala bantunyina balasinikizyigwa kukonka cakusisikizya kumalende aajuju. Kutegwa babeendelezye alimwi akuba masimpe kuti bamakaintu aaba tabakaki caboola kumakani aakoonana, bantu aaba bapa bamakaintu aaba kuti kabayoowa kupenzyegwa amyuuya mibi.
Spain
Akati ka 5 a 10 pesenti yabantu batabeleki, nobalemba magwalo aakulomba kunjila mulimo tabalembi kuti balijisi madigili aakuyunivesiti alimwi akuti bakali kubeleka kaindi, nkaambo ikuti naa batubikkilizya twaambo ootu inga balibonya kuti baliyiide kapati cakuti tabeeleli kulembwa mulimo.
Munyika
Mumasi aatavwubide, busi ibuzwa kuzitofwu zibelesya nkuni mbobujaya bantu banji. Bantu basika ku 4 miliyoni balafwa amwaka akaambo kamalwazi aaboola akaambo kakuyoya muya uujisi busi. Basikuvwuntauzya baamba kuti busi buzwa kuzitofwu zibelesya nkuni naa malasya bulajaya mbubwenya mbuli busi bwatombwe.