Kunamatila Kwaluubilili Lwamuŋanda

SILUUBILILI wamuŋanda umwi waku America ulapanga luubilili lulaanguzu kapati lukonzya kunamatila kubwaanda pele lutakonzyi kunamatila ansi, eeci cipa kuti ciindi cacilimo tuuka tweendeenda ansi katujatwa. Ino mbuti siluubilili ooyu mbwakonzya kupanga luubilili lujisi nguzu zyakunamatila kubwaanda, pele lutakonzyi kunamatila ansi?

Amubone kaambo aaka: Ooyu siluubilili ulanamatika luubilili lwakwe kubwaanda, kuciluli, amumasena aamwi, ulacita oobo kwiinda mukusuma luubilili lulaanguzu kapati lwiitwa kuti scaffolding disc, lwalo lukonzya kujata tuuka tuuluka. Kulubazu lumwi, basikuvwuntauzya baku University of Akron, mu Ohio, ku U.S.A., bakajana kuti tubeela twaluubilili lunamatila ansi ilwiitwa kuti gumfoot disc, tupangidwe bumbi naa kuti tuliindene kapati. Akaambo kakuceya kwatubeela tunamatila kwiinda musyobo wa scaffolding disc, musyobo wa gumfoot disc ulakonzya kulekezya alimwi cakufwambaana ulajata tuuka tukonzya kulyata aluubilili oolu.

Kweelana amakani ngobakaamba baku University of Akron, basikuvwuntauzya ibakayubununa makani aaya bakaamba kuti “bakatalika kale kujana nzila zyakubelesya mukupanga zyintu zinamatila zikonzya kubelesyegwa munzila zisiyene-siyene zizwa kuluubilili oolu lwamuŋanda.” Basayaansi balombozya kupanga zyintu zinamatila zikonzya kubelesyegwa mumabbandeji alimwi amukusilika mafwuwa aatyokede.

Ino muyeeya buti? Sena nguzu zyasiluubilili wamuŋanda zyakupanga luubilili lunamatila akulekezya zyakaboola akaambo kakusanduka kwazyintu naa zyakalengwa buya?