NYIKA ALIMWI ABANTU
Kuswaya ku El Salvador
MYAKA iitandila ku 500 yainda, ciindi bana Spain nibakasika mucisi lino ciitwa kuti El Salvador, musyobo uuzyibidwe kapati wakubusena oobu, wakaita busena oobu kuti Cuscatlán, izina ilyaamba kuti “Nyika Mbotu.” Mazuba aano, bantu banji mu El Salvador bazwa kumisyobo iizyibidwe kapati yamucisi cabo alimwi bamwi bazwa ku Europe.
Bana El Salvador bazyibidwe kuti mbantu bankutwe alimwi ibaseka-seka. Alimwi mbantu bajisi bulemu. Kabatanatalika mibandi yabo basaanguna kujuzyanya cabulemu kwiinda mukwaamba kuti: “Buenos días” (mwabuka buti?) naa kuti “Buenas tardes” (mwalibizya buti?). Mubwini, bana El Salvador ibakkala muminzi, bacibona kuti nkubula bulemu kwiindilila muntu kakunyina kumujuzya.
Kulima kkofi kwapa kuti cisi ca El Salvador cibe ampuwo kapati
Cakulya ncobakkomanina kapati bana El Salvador ciitwa kuti pupusa, cinkwa cipangwa abusu bwamapopwe naa mupunga civwelene a cheese abunyangu, nyama yangulube alimwi azimwi buyo. Cakulya ca pupusa kanji-kanji ciligwa aamusinza wamadeede alimwi a curtido, cilyo cisanganyizigwa akkabicci, hanyisi, makkaloti, alimwi amasipaisi. Nokuba kuti bamwi nobalya babelesya cipeni alimwi amfwoloko, pele kanji-kanji cakulya eeci ciligwa amaanza.
Pupusa ncimwi cazilyo ziligwa kapati mu El Salvador
Mavwuumina aa Los Tercios, Suchitoto
SENA MULIZYI? Cisi ca El Salvador ncisi camalundu aazwa mulilo. Mucisi eeci, kuli malundu aazwa mulilo aainda ku 20, akati kayaaya amwi acizwa mulilo nokuba mazuba aano. Mavwuumina aaitwa kuti Los Tercios ainda mumabwe aakapangwa amulundu aakazwide mulilo cimwi ciindi.
Mucisi oomu muli Bakamboni ba Jehova bainda ku 38,000 mumbungano zibalilwa ku 700. Bakamboni aaba balayiisya Bbaibbele kubantu bali 43,000 mumwaambo waci Spanish, Cingisi, alimwi amumwaambo wakutambaika waku El Salvador.