Meso Mapati Kabili Kaniini!

BANJI balakonzya kukaamba kuti nkabotu, pele bamwi balakonzya kukaamba kuti kalayoosya. Kajisi maulu malamfwu aaboneka kubula nguzu, boya buteteete, ameso mapati aamweka. Mubili wankako ulampa masentimita aabalilwa ku 12.5, alimwi kalema magilamu aabalilwa ku 114. Ino nkanyama nzi? Nkanyama kali mbuli caanga kaitwa kuti tarsier!

Atulange-lange musyobo umwi watunyama ootu, musyobo uutegwa tarsier waku Philippine. Meso, matwi, maanza, maulu, alimwi amucila wankako zyoonse ziboneka kukomena kapati kwiinda mubili wankako. Pele kubona mbokapangidwe kanyama aaka munzila iigambya kutondezya kuti kakapangwa cabusongo.

KUMVWA: Matwi aakanyama aaka aali mbuli pepa alakonzya kulivwunga, kulivwungulula, alimwi akumvwa majwi aansaansi kapati. Kufwambaana kumvwa kulakagwasya kutija banyama bakonzya kukaluma mbuli bakkiti bamusyokwe alimwi kulakagwasya kujana banyama bakulya. Kwasiya, matwi aakanyama aakaalamvwa kulila kwanyenze, lumoma, basyaankumbula, tuyuni, alimwi abacula. Mpoonya mutwe wankako ulatobelezya, kumwi meso mapati kaalanga kucintu ncokayanda kujata kuti kalye.

KUJATA: Maanza aakanyama aaka apangidwe munzila iikapa kucikonzya kujata tutabi tusyoonto-syoonto. Kumpela aatunwe kajisi magunyugunyu aapa kuti kakatatezemuki. Nociba ciindi nokoona, kanyama aaka keelede kuti kakajatilide kututabi. Magunyugunyu aali ansi aamucila wankako mulamfwu alakagwasya kukakatila kukatabi kusikila kasinsimuka.

KUBONA: Kunyina munyama uumbi uujisi meso mapati boobu kweelana ansaizi yamubili wanguwo. Alimwi buya, liso limwi alimwi lyaka tarsier ndipati kwiinda bongo bwankako! Meso aakanyama aaka taakonzyi kuzinguluka mumpako zyangawo; alangide buyo kumbele lyoonse. Sena eeci caamba kuti takabambidwe kabotu? Peepe. Kanyama aaka kalijisi bubotu bwankako, nkaambo nsingo yankako ipa kuti mutwe wankako kaucikonzya kunyona kusikila kumakosi.

KUSOTOKA: Kulampa kwamaulu aakanyama aaka kukapa kuti kakacikonzya kusotoka mamita aali 6 nkokuti, ziindi ziinda ku 40 zyabulamfwu bwamubili wankako! Nokavwima masiku, kanyama aaka inga kalavwungulula tunwe kutegwa kajate kanyama nkokayanda kakunyina kwiimpya.

Kanyama aaka takavwuli kupona kuti naa kavwubwa akaambo kakuyandisya kulya tuuka tuzumi alimwi akutayanda kujatwa. Nokuba boobo, kanyama aaka ikalibedelede kalabakkomanisya bantu baku Philippine. Kuboneka kuti cibeela cili coonse cakanyama aaka kapati meso ikakkala musyokwe cilagambya.