Ikumvwisya Kugambya Kwacuuka Citegwa Greater Wax Moth

ICUUKA citegwa greater wax moth cilakonzya kumvwa majwi aatala kwiinda munyama uuli woonse munyika. Nokuba boobo, matwi aancico apangidwe munzila iitakatazyi, maniini mbuli kumpela kwanyeleti.

Mucikozyanyo: Kwamyaka minji, bantu bali kwiiya kujatikizya mbocimvwa zintu icuuka eeci. Caino-ino, basayaansi ku University of Strathclyde, ku Scotland, bakasola kubona mbocimvwisya cuuka eeci kubelesya majwi aaindene-indene. Bakapima mbwaakali kunyanyaala ma membranes alimwi akulekkooda mbwaakali kubeleka maseelo aatambula majwi. “Zibeela zyamukati” zyamatwi zyakali kucikonzya kumvwa noziba zintu zyakajisi majwi aatala aasika ku 300 kilohertz. Nobakeezyanisya, bakajana kuti basikampaafwa balamvwa majwi aasika ku 212 kilohertz, inswi zitegwa dolphins zyalo zigolela a 160 kilohertz, mpoonya bantu tabakonzyi kwaamvwa majwi aainda a 20 kilohertz.

Basikuvwuntauzya bayanda kubelesya kumvwisya kusumpukide kwacuuka eeci kutegwa bapange zintu zipya zisumpukide. Munzila nzi? Syaazibwene James Windmill waku University of Strathclyde waamba kuti: “Bayanda kucita oobo kutegwa bapange zyaambawido zitali zipati alimwi zibeleka kabotu. Eezyi zilakonzya kubikkwa muzintu ziindene-indene mbuli mumafooni alimwi azintu zigwasya kumvwa majwi.”

Ino muyeeya buti? Sena ikumvwisya kugambya kwacuuka citegwa greater wax moth kwakabako akaambo kakusanduka naa kwakalengwa buya?