Kuswaya ku Kyrgyzstan

KYRGYZSTAN ncisi cizungulukidwe amalundu malamfwu aajisi caanda, cisi eeci cili mu Central Asia alimwi caabana minyinza acisi ca Kazakhstan, Uzbekistan, Tajikistan, alimwi aca China. Cibeela cacisi eeci icitandila ku 90 pesenti, cijisi malundu. Cisi ca Kyrgyzstan cilalidunda akaambo kamulundu uutegwa Tian Shan Mountain, walo uulampa mamita aasika ku 7,439. Cibeela cacisi cibalilwa ku 4 pesenti cijisi zisaka. Aboobo cilakkomanisya kubona kuti cisaka cimwi akati kazisaka iziinda kukomena munyika icijisi ma walnut cijanika mucisi ca Kyrgyzstan.

Kusamausya beenzu abulemu zili akati kazilengwa zidumide kapati akati kabantu baku Kyrgyzstan. Mucisi ca Kyrgyzstan cilikabotu kubelesya bbala lyabulemu lyakuti “ba” ciindi noita muntu mupati alimwi akumupa cuuno ciindi nomuli mu bbaasi, alimwi acuuno cilemekwa atebulu nomuyanda kulya.

Kanji-kanji mumikwasyi inga kuli bana botatwe naa bainda waawo. Bunji bwaziindi mwana musankwa muniini ali boonse nguukkala abazyali noliba leelyo naakwata, kutegwa kalanganya bazyali mubucembele bwabo.

Kuzwa kubwana, basimbi balayiisyigwa milimo iiyandika kutegwa bakabe bamakaintu balanganya kabotu mikwasyi yabo. Ciindi nobakkwanya myaka yakuma 16 inga baleelela kulanganya mukwasyi. Kanji-kanji banamusimbi balalibambila zintu nzyeelede kutola musimbi kumusankwa. Zintu eezyi zilakonzya kubikkilizya zyakulivwumba ziindene-indene, zyakusama zisiyene-siyene, alimwi akkapeti yakusuma amaanza. Mpoonya musankwa ulabbadela mali aacikwati alimwi azivwubwa.

Ciindi camapobwe alimwi amadilwe, kulajaigwa mbelele naa bbiza. Ilaabanizyigwa muzibeela-beela, alimwi cibeela cimwi acimwi inga cibambilidwe muntu uugaminide. Kweelana amyaka alimwi abulemu mbwapegwa mweenzu, umwi aumwi ulapegwa cibeela cakwe; alimwi bulemu mbobuyandika kapati mukutobela cilengwa eeci. Mpoonya cakulya ncobayandisya kapati basicisi iciitwa kuti beshbarmak cilapegwa kubantu. Cilyo eeci cilisyigwa amaanza.